James 4:4 - Chishemanituu Utayimuwin: Kaa Uskaach Testament

⁴ Taapwe nitawiin kaa ihtiyekw. Namui aa chichischeyihtenaawaau awen e saachihtaat taan e itaatisiinaanuyich utah aschiihch uhkaateu Chishemanituu. An awen kaa saachihtaat taan e itaatisiinaanuyich utah aschiihch ihtuutaasuu chechii uhkaataat Chishemanituu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁴ ᑖᐺ ᓂᑕᐐᓐ ᑳ ᐃᐦᑎᔦᒄ᙮ ᓇᒧᐃ ᐋ ᒋᒋᔅᒉᔨᐦᑌᓈᐙᐤ ᐊᐌᓐ ᐁ ᓵᒋᐦᑖᑦ ᑖᓐ ᐁ ᐃᑖᑎᓰᓈᓄᔨᒡ ᐅᑕᐦ ᐊᔅᒌᐦᒡ ᐅᐦᑳᑌᐤ ᒋᔐᒪᓂᑑ᙮ ᐊᓐ ᐊᐌᓐ ᑳ ᓵᒋᐦᑖᑦ ᑖᓐ ᐁ ᐃᑖᑎᓰᓈᓄᔨᒡ ᐅᑕᐦ ᐊᔅᒌᐦᒡ ᐃᐦᑑᑖᓲ ᒉᒌ ᐅᐦᑳᑖᑦ ᒋᔐᒪᓂᑑ᙮

James 4:4 Iomraidhean Croise

Matthew 12:39

Ekw Jesus kaa itaat, “Anuhchiish awenichii kaa pimaatisiitwaau naashch taapwe machaatisiyuuch kaye pisikwaatisiyuuch. Kaa kakwechihchemuyekw chechii waapahtiikuyekw maamishkaach waapahtiiwewin, namui chika uhchi waapahtiikunaawaau. Mikw aniyuuh taan kaa ishi maamishkaach ispayit aniyaa uchischiwehiichesuu Jonah eukw mikw an che waapahtiikuyekw.

Matthew 16:4

Anuhchiish iinuuch naashch taapwe machaatisiyuuch kaye naashch pisikwaatisiyuuch. Mikw e wii waapahtahkwaau maamishkaach waapahtiiwewinh, namui maak chika chii waapahtiyaakanuuch. Mikw aniyuu maamishkaach chekwaayuu kaa ispayit Jonah eukw mikw aniyuu che waapahtiyaakanuutwaau.” Ekw Jesus kaa nakataat kaa ati chistuhtet.

Matthew 6:24

“Namui awen chika chii atushkuweu niishu uchimaau, wesh peyakw aniyuu chika uhkaateu, ekw aniyuu kutak che saachihaat. Aniyuu peyakw suuhk chika atushkuweu, ekw aniyuu kutak namui chika uhchi naheyimeu chechii atushkuwaat. Namui chika chii atushkuweu Chishemanituu eyuu maak suuhk e aapatisit e wii miisitisiit.”

Luke 19:27

Ekw maak peshuwaahkuch anichii kaa uhkaasitwaau anichii ekaa kaa nituweyimitwaau chechii chisheuchimaauch, chechii nipahaakanuutwaau utah e ihtaauch.’ ” Eukw uyuu chischinuhamaacheu tipaachimuwiniyuu Jesus kaa wiihtahk mekwaach e ati pimuhtetwaau Jerusalemihch ishi.

John 15:19

Iteyihtaakusiyekw maak taan e iteyihtaakusitwaau chipaa saachihiikuwaauch mwehch e ishi sasaachihiitutwaau wiyawaau. Mikw maak e chii wiyaapamitakuch eukw wehchi uhkaatitaakuch, wesh taapaa anite e ihtaatwaau chit ishi wiichihiiwenaawaau ekw.

John 17:14

Nichii wiihtamuwaauch taan kaa ishi miyin chechii wiihtamuukwaau. Chii uhkaatikuch maak aweyuu utah aschiihch kaa ihtaayich wesh taapaa utah aschiihch ishi tipeyihtaakusuuch mwehch niya e ishi ekaa tipeyihtaakusiyaan utah aschiihch.

John 7:7

Taapaa ihtakuniyuu chekwaayuu chechii uhchi uhkaatitaakuch awenich utah aschiihch kaa ihtaatwaau ekaa kaa taapweyimaatwaau Chishemanituu, mikw maak nuuhkaatikuch niya wesh niwiihten taan e ishpish machaatisiinaanuuhch.

Romans 5:10

Eshkw maak mekwaach ekaa mitun uhchi aapateyimahkw Chishemanituu yaapach chii uhtinam taanite chechii uhchi ishinaakuniyich chechii ati miyu wiicheuhkw. Kaa nipistamaakuuhkw Christ ekut kaa uhchi nihiipayihtaat uyuu chechii ishinaakuniyich. Ekw maak anuhchiish e miyuwicheuhkw Chishemanituu cheshtinaateyihtaakun che pimaachihiitahkw Jesus upimaatisiiwiniihch uhchi.

Romans 8:7

Wesh anichii nitamukw chechii ishi naniheyihtamihiisutwaau kaa ishi maamituneyihtahkwaau nishkuushtaweuch Chishemanituuh. Namui ihtuutamuweuch taan e itashuweyich. Namui mechim chii ihtuutamuweuch.

1 Corinthians 1:20

Taan maak an awen naashch kaa kachehtaaweyihtahk. Taan an awen naashch mistahii kaa chiskutamuwaakanuut. Kaye maak taan an awen naashch kaa kaschihuuhtaakusit e ayimit. Chii nuukuhtaau Chishemanituu ekaa mitun chechii iipwaahkaahtaakuniyich aniyuu aschiiyuu kachehtaaweyihtamuwiniyuu.

1 Corinthians 1:21

Ekw maak e ishpish kachehtaaweyihtahk Chishemanituu chii ihtuutam ekaa kachehtaaweyihtamuwinihch chechii uhchi chischeyimikut aweyuuh. Teyakuch chii naheyihtamihiikuu chechii pimaachihaat aniyuu aweyuuh kaa taapwehtamiyich aniyuu chiishkwe ayimuwiniyuu kaa ishinihkaataakanuyich aniyuu wiyaawiihtamuhkw.

Galatians 1:10

Mikw wii ihtuutaweu aweyuu chechii mamiywaachimikut chititeyiminaawaau aa. Namui, Chishemanituu eukw waa chischeyihtamuch taan e ishi miywaachimit. Mikw wii naheyihtamiheu aweyuuh chititeyiminaawaau aa. Wesh mikw iinuuch wii naheyihtamahiikwaau namui nipaa uhchi atushkuwaau Christ.

James 1:27

An ayimihewin kaa iteyihtahk Chishemanituu kaa Uhtaawiimaaut e kuiskunaakuniyich kaye e payehchinaakuniyich maau e ishinaakuhch, ihtuutaakuu awen chechii miyu wiichihaat chiiyuusaanisha ekw maak kaa peyakuyitwaauh iskweuh mekwaach e aayimuhuyich kaye maak ihtuutaakuu awen ekaa mitun chechii wiinihiikuyich machaatisiiwiniyuu taan e ishi ihtakuniyich utah aschiihch.