James 4:11 - Chishemanituu Utayimuwin: Kaa Uskaach Testament

¹¹ Niichishaanitikw ekaawii machaayimuumitukw. Awen e machaayimuumaat wiichishaan maak e wiyaaskunaat aatuweyihtam wiishuwewiniyuu kaye maak wiyaaskunam. Chiishpin weyaaskunamuwane wiishuwewin namui chinanihiihten kaye maak wiyaaskunichesuu chititahiisun.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹¹ ᓃᒋᔖᓂᑎᒄ ᐁᑳᐐ ᒪᒑᔨᒨᒥᑐᒄ᙮ ᐊᐌᓐ ᐁ ᒪᒑᔨᒨᒫᑦ ᐐᒋᔖᓐ ᒫᒃ ᐁ ᐎᔮᔅᑯᓈᑦ ᐋᑐᐌᔨᐦᑕᒻ ᐐᔓᐌᐎᓂᔫ ᑲᔦ ᒫᒃ ᐎᔮᔅᑯᓇᒻ᙮ ᒌᔥᐱᓐ ᐌᔮᔅᑯᓇᒧᐗᓀ ᐐᔓᐌᐎᓐ ᓇᒧᐃ ᒋᓇᓂᐦᐄᐦᑌᓐ ᑲᔦ ᒫᒃ ᐎᔮᔅᑯᓂᒉᓲ ᒋᑎᑕᐦᐄᓱᓐ᙮

James 4:11 Iomraidhean Croise

Luke 6:37

“Ekaawii wiyaaskunichekw, ekw maak namui chika uhchi wiyaaskunikuwaau Chishemanituu. Ekaawii nishuuwanaachimuwekw ekw maak namui chika uhchi nishuuwanaachimikuwaau Chishemanituu. Wepeyihtamaachekw ekw maak kaye chiyawaau che wepeyihtamaataakw Chishemanituu.

Romans 2:1

Eukw maak uu wehchi ekaa mitun ishinaakuhch chechii wiyaaskunit awen. Wesh chiishpin e wiyaskunitwaau awenichii, chiya maak e ihtuutamuwane aniyuu kaa ishi wiyaskunitwaau, chiya tipiiwe chinishuuwanaachimisun.

Romans 2:13

Wesh taapaa anit e pehtahk awen Moses uwiishuwewiniyuu kata uhchi kuiskunaakusuu Chishemanituu ishi e ihtaayich. Ihtuutahke taan e itashteyich anit ekut che uhchi kuiskunaakusit Chishemanituu ishi e ihtaayich.

Romans 7:7

Itwet aahch awen, maayaatanuuche an wiishuwewin wesh ekut kaa uhchipayihch aahch chechii machituutamaan. Mwaau nipaa ishi nishkweushihaau uu awen, taapaa namayeu an wiishuwewin kaa ihtuutaakuyaan chechii machituutamaan. Mikw maak ekut kaa uhchi chischeyihtamaan taapwe e machituutamaan anite uhchi taan e itashuwemakahch an wiishuwewin. Mwehch anit an kaa itashtech, “Ekaawii machi mushteneyihche,” ekut kaa uhchi chischeyihtamaan e machituutamaan e machi mushteneyihcheyaan.

1 Corinthians 4:5

Eukw maak uu uhchi ekaawii chika uhchi wiyaaskunen chekwaan eshkw ekaa utihchipayihch chechii wiyaaskunikanuuhch. Wiya Utipeyihchikeu mushe chika nuukuhtaau misiwe chekwaayuu kaa kaataakanuyich. Mechim aniyuu taan nihaau kaa iteyihtamiyich aweyuuh. Ekw maak misiwe awen che wiihtamaakut Chishemanituu e naheyihtamiyich aniyuu taan kaa ishi miyutuutahk.

2 Corinthians 12:20

Nikuspaneyihten utihtitakuche aahchiiuh che iteyihtaakusiyekw taan kaa ishi pukuseyimuyaan che iteyihtaakusiyekw. Maaskuuch kaye chiyawaau aahchiiuh chika iteyiminaawaau taan kaa ishi pukuseyimuyekw che iteyihtaakusiyaan. Nikuspaneyihten mihchetu anit e tashiyekw chechii aasitemituyekw chechii uhteyimituyekw chishuwaasuwin chechii ihtakuhch maak machipayihkahtaatuwin. Nikuspaneyihten mihchetu anit e tashiyekw chechii papukunuumuweyekw chechii maamaayeyimekuch kutakach awenichii maak chihchiwe chechii iteyimisuyekw kaye chechii mamukushkaachihekuch kutakach awenichii.

Ephesians 4:31

Puuniikw e iskaayeyihtamekw, e aahkuyuwesiyekw kaye e chishuwaasiyekw. Puuniikw kaye e maayeyihcheyekw kaye e kachiihkaamituyekw. Namui mitun chipaa uhchi ayaanaawaau uhkaasiwewin.

1 Timothy 3:11

Wiichiskwewaauh chipaa taapweucheyihtaakusiyuu kaye namui chipaa uhchi nitamukw itaachimeuch aweyuu kaye pehkaach chipaa ishi pimaatisiyuuch kaye maak yaakwaau chipaa ihtuutamuch misiwe chekwaayuu.

2 Timothy 3:3

Namui kata uhchi kachistimaacheyimeuch aweyuu kaye namui mitun kata uhchi wii wepeyihtamaacheuch. Kata wii naanituu ayaahkuheuch aweyuu taan e itaatwaau, kaye naashch kata aahkuyuwesuuch, kaye naashch kata wiihchi chishuwaasuuch kaye naashch kata uhkaateuch aniyuu kaa miyutuutamiyitwaauh.

Titus 2:3

Kaye maak wiihtamuuch chisheiskweshach upimaatisiiwiniwaahch chipaa nuukuniyuu Chishemanituu e pimaatisiistuwaatwaau. Namui chipaa uhchi papaamaachimeuch aweyuu chechii machaachimaatwaau, namui kaye chipaa uhchi wiihchipeuch, teyakuch

James 1:16

Niichishaanitikw kaa saachihiitakuch suuhk kuiskw wii ishi nisituhtamukw uu.

James 1:19

Ekaawii wanichischisikw uu niichishaanitikw kaa saachihiitakuch. Misiwe awen suuhk muush yaakwaau chipaawii nituhtam, chipaa maamituneyihtam kaye taan waa itwet kaye namui tiiwehch chipaa uhchi chishuwaasuu.

James 1:25

Chishemanituu uwiishuwewin naashch taapwe miyeyihtaakuniyuu kaye aapihkunikuuch awenichii. An maak awen yaakwaau kaa nituu chischeyihtahk uyuu wiishuwewiniyuu ekaa maak puuniit uyuu e ihtit, ekaa wanichischisit taan kaa ishi pehtahk, ihtuutahke taan e itashteyich anit, eukuu che shaweyimikut Chishemanituu misiwe taan e ihtit.

James 2:8

Taapwe maak chika miyutuutenaawaau nanihiihtamekwe an maauch kaa chisteyihtaakuhch wiishuwewin, an kaa itashtech Chishemanituu utayimuwinihch, “Saachihii kutak awen mwehch chii e ishpish saachihiisuyin.”

James 5:10

Niichishaanitikw maamituneyimaahkuch maa uchischiwehiichesuuch anichii Chishemanituuh kaa pechi itishahukutwaau chechii ayimistamuwaatwaau. Naashch taapwe chii siipiiwesiyuuch e nanehkaachihaakanuutwaau. Eukun maak chipaa ihtinaawaau kaye chiyawaau.

James 5:7

Niichishaanitikw, siipiiwesiikw che ishpish ekaa takushihk Utipeyihchikeu. Chichischeyimaau kaa nihtaauchihchet e ishpish siipiiwesiit e ashuwaapahtahk chechii chiishi nihtaauchiniyikwaauh e miywaashiyikwaauh nihtaauchihchikan anite kaa nihtaauchihchet. Siipiiwesiyuu e ashuwaapahtahk chechii chimuuniyich e miyuuskamiyich kaye e takwaatiniyich.

James 5:9

Ekaawii memehch ititikw, niichishaanitikw, ekw maak namui chika uhchi wiyaaskunikunaawaau. Shaash peshuch pechi ihtaau wiyaaskunichesuu, shaash chekaat nuukushuu.

1 Peter 2:1

Tekash maak ekw puunihtaakw misiwe maayaatisiiwin. Puuniikw ekw e nanatayekw, kaye ekaawii wii iteyihtaakuhiisukw taan an ekaa chihchiwe iteyihtaakusiyekw, ekaawii chika uhchi ihtakun e wauhteyimituyekw. Kaye maak ekaawii nitamukw ishi aayimuumaahkuch awenichii.