James 4:1 - Chishemanituu Utayimuwin: Kaa Uskaach Testament

¹ Taanite wehchipayihch an e mashihiituyekw kaye e ayaasitemituyekw. Piihch anite e ihtaat awen mwehch e maasihchepayikwaauh ishinaakuniyuuh aniyuu chekwaayuu kaa mushteneyihtahk chechii naniheyihtamihiikut.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹ ᑖᓂᑌ ᐌᐦᒋᐸᔨᐦᒡ ᐊᓐ ᐁ ᒪᔑᐦᐄᑐᔦᒄ ᑲᔦ ᐁ ᐊᔮᓯᑌᒥᑐᔦᒄ᙮ ᐲᐦᒡ ᐊᓂᑌ ᐁ ᐃᐦᑖᑦ ᐊᐌᓐ ᒬᐦᒡ ᐁ ᒫᓯᐦᒉᐸᔨᒀᐤᐦ ᐃᔑᓈᑯᓂᔫᐦ ᐊᓂᔫ ᒉᒀᔫ ᑳ ᒧᔥᑌᓀᔨᐦᑕᐦᒃ ᒉᒌ ᓇᓂᐦᐁᔨᐦᑕᒥᐦᐄᑯᑦ᙮

James 4:1 Iomraidhean Croise

Matthew 15:19

Wesh mitehiihch uhchipayiyuu machi maamituneyihtamuwin, nipahiiwewin, pisikwaatisiiwin, nitamukw ihtuwin, kachemutuwin, nanatayuwin, kaye maak paashtaamuwin.

John 8:44

Machimanituu eukw wehtaawiyekw, aniyuu e ishi nituweyimitaakw chechii ishi machituutamuwekw eukun mikw waa ihtuutamekw. Muush chii nipahiiweu kaa ishpish ihtakuniyich uyuu aschiiyuu. Namui wiiskaat uhchi nituweyihtam kuiskw chechii ishi wiihtaakuniyich chekwaayuu wesh namui mitun ihtakuniyuu taapwewiniyuu anit e ihtaat. Muush nanatayuu wesh ekun chihchiwe e itaatisiit, eukw maak an taapwe weuhtaawiitutawaat aniyuuh kaa nanatayich.

Romans 7:23

Ekw mikw maau e ishi waapahtamaan muush e wii ispayaan. Ihtakun e ishi maasihchepayihch utah e ihtaayaan, an e wii miyutuutamaan ekw maak an e wii machituutamaan maasihchepayuu. An maak muush e ihtakuhch e wii machituutamaan eukw tepeyimikuyaan.

Romans 7:5

Wesh eshkw weskach chititaatisiiwinuuh e chii tipeyimikuyihkw, an maak e ihtakuhch wiishuwewin kaye maak e chii chischeyihtamuhkw an wiishuwewin, ekut kaa uhchipayihch aahch e muushchipayihch chechii machituutamuhkw. Uu maak e chii ishi pimaatisiihkw mwehch e nipiihkw chichii ishinaakusinaanuu.

Romans 8:7

Wesh anichii nitamukw chechii ishi naniheyihtamihiisutwaau kaa ishi maamituneyihtahkwaau nishkuushtaweuch Chishemanituuh. Namui ihtuutamuweuch taan e itashuweyich. Namui mechim chii ihtuutamuweuch.

Galatians 5:17

Wesh aniyuu e ishi nituweyimitahkw Kaa payehchisiit Ahchaahkw chechii ishi pimaatisiyuuhkw namui chinaheyihtenaanuu chechii ihtuutamuhkw. Naashch taapwe aahchiiuh iteyihtaakun chiyaanuu taan waa ishi pimaatisiihkw e iteyihtaakuniyich Kaa payehchisiit Ahchaahkw e ishi nituweyimatahkw chechii ishi pimaatisiyuuhkw. Maashihiituumakanh uyuu niishu iteyihtamuwin utah e ihtaayihkw. Ekw maak Kaa payehchisiit Ahchaahkw waa nakaahutahkw e wii machituutamuhkw.

Colossians 3:5

Wanaachihtaakw machaatisiiwin taan e ishi ihtakuhch chipimaatisiiwiniwaahch. Wanaachihtaakw wiinisuu pimaatisiiwin, wiinisuu maamituneyihtamuwin, machi nituweyihtamuwin, ekw maak an e mushteneyihtamekw chechii weyuuch ayaayekw chekwaan utah aschiihch. An awen muush kaa mushteneyihtahk chechii weyuuch ayaat chekwaayuuh mwehch e umanituuhkaanamit aniyuu chekwaayuuh ishinaakuniyuu.

2 Timothy 2:23

Ekaawii nanituhta nitamukw ayimuwin kaye chiishkwe ayimuwin, wesh ekut wehchipayihch chechii uhchi machipayihkahtaatunaanuuhch.

Titus 3:3

Wesh kaye chiyaanuu peyakwaau chichii chiishkwepimaatisiinaanuu, namui chuuhchi nanihiihtuwaanuu Chishemanituu, chichii wiyeshihiikunaanuu kaye chichii shaakuuchihiikunaanuu nanaahkuu machi nituweyihtamuwinh kaye machi miyeyihtamuwinh. Pisikw chichii machaatisiinaanuu kaye chichii uhteyimaanuuch awenichii. Chichii uhkaataanuuch awenich kaye wiyawaau maak chichii uhkaateyimikunuuch.

Titus 3:9

Ihtaauch awenichii e machipayitwaau e aayimuutahkwaau Jewa iinuu wiishuwewinh taan aniyuuh chipaa kanuweyihtaakanuuyuuh kaye e aayimuutahkwaau taan e itiskaatuyich utaanische waahkumaakanawaauh. Ekaawii aapateyihtamukw chechii aayimuutamekw uyuuh chekwaayuuh wesh taapaa wiyesh itaapatan kaye namui mitun wiichihiikuuch awenichii.

James 1:14

Kakwechihaakanuu awen chechii machituutahkw iskutak peschepitikuch wiya tipiiwe umachinituweyihtamuwin kaye e kakweteyihtahk chechii machituutahk.

James 4:3

E nitutamaayekw namui chimiskenaawaau taan kaa ishi nitutamaayekw wesh namui miywaashuu chekwaan wehchi nitaweyihtamekw uyuuh chekwaayuuh. Chinitaweyihtenaawaau chekwaayuuh mikw chiyawaau chechii naniheyihtamihiisuyekw taan e ishi machi nituweyihtamekw.

1 Peter 1:14

Suuhk nanihiihtuwaakw Chishemanituu. Ekaawii miin chika uhchi nihtaauchihuumakan taan kaa chiishi machi nanitaweyihtamekw anite utaahch eshkw ekaa mitun chekwaan uhchi papaameyihtamihiikuyekw kaye eshkw ekaa uhchi chischeyihtamuwekw Chishemanituu utiteyihtamuwin.

1 Peter 2:11

Niwiichewaakanitikw kaa saachihiitakuch, mikw wesin chimaaniteunaawaau kaye mikw chipapaa ihtaanaawaau utah aschiihch. Eukw maak uu wehchi wii siihchimitakuch tekash ekaa chechii papiskaateyihtamihiikuyekw aniyuu machi nitaweyihtamuwinh aniyuu muush miyaashihchepayihkwaau chitahchaahkuwaahch.

2 Peter 2:18

Wesh naashch taapwe chistaachimisuuch kaye chiishkwe ayimuuch. Taan e ishi machi nitaweyihtamuumakaniyich maak wiyaasuu pimaatisiiwiniyuu ekut wehtaapachihuutwaau chechii kaahchitinaatwaau aniyuu aweyuu anuhchiish kaa uhchii wiihkuchihuyich anite e waanipayinaanuyich e chii ishi wiichihiiweyich.

2 Peter 3:3

Niishtam maak chekwaan waa ititakuch, che wii chischisiyekw iskutak ati peshunaakuhche che takushihk Utipeyihchikeu chika ihtaauch maayeyihchesuuch, naashch chika tipeyimikuuch umachinituweyihtamuwinawaauh uchii. Chika maayeyimikuwaauch.