James 3:17 - Chishemanituu Utayimuwin: Kaa Uskaach Testament

¹⁷ An maak kachehtaaweyihtamuwin ishpimihch kaa uhchipayihch niishtam tekash payehkan, ekw miin e chiyaameyihtaakuhiiwemakahch, yuuspeyihtaakuhiiwemakahch, kaye ihtuutaakuu awen yaakwaau chechii nituhtawaat aweyuuh. Awen e ayaat uyuu kachehtaaweyihtamuwiniyuu naashch kata weyuuch chishewaatutaweu aweyuuh kaye mistahii chika miyutuutamaacheu, peyakunihch chika ishi kanawaapameu misiwe aweyuuh kaye namui mitun chika uhchi wii kakaataau taan nihaau e iteyihtaakusit.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁷ ᐊᓐ ᒫᒃ ᑲᒉᐦᑖᐌᔨᐦᑕᒧᐎᓐ ᐃᔥᐱᒥᐦᒡ ᑳ ᐅᐦᒋᐸᔨᐦᒡ ᓃᔥᑕᒻ ᑌᑲᔥ ᐸᔦᐦᑲᓐ, ᐁᒄ ᒦᓐ ᐁ ᒋᔮᒣᔨᐦᑖᑯᐦᐄᐌᒪᑲᐦᒡ, ᔫᔅᐯᔨᐦᑖᑯᐦᐄᐌᒪᑲᐦᒡ, ᑲᔦ ᐃᐦᑑᑖᑰ ᐊᐌᓐ ᔮᒀᐤ ᒉᒌ ᓂᑐᐦᑕᐙᑦ ᐊᐌᔫᐦ᙮ ᐊᐌᓐ ᐁ ᐊᔮᑦ ᐅᔫ ᑲᒉᐦᑖᐌᔨᐦᑕᒧᐎᓂᔫ ᓈᔥᒡ ᑲᑕ ᐌᔫᒡ ᒋᔐᐙᑐᑕᐌᐤ ᐊᐌᔫᐦ ᑲᔦ ᒥᔅᑕᐦᐄ ᒋᑲ ᒥᔪᑑᑕᒫᒉᐤ, ᐯᔭᑯᓂᐦᒡ ᒋᑲ ᐃᔑ ᑲᓇᐙᐸᒣᐤ ᒥᓯᐌ ᐊᐌᔫᐦ ᑲᔦ ᓇᒧᐃ ᒥᑐᓐ ᒋᑲ ᐅᐦᒋ ᐐ ᑲᑳᑖᐤ ᑖᓐ ᓂᐦᐋᐤ ᐁ ᐃᑌᔨᐦᑖᑯᓯᑦ᙮

James 3:17 Iomraidhean Croise

Matthew 23:28

Ekun taapwe mwehch e ishinaakusiyekw. Naashch chimiyunaakusinaawaau uschich anit e kanawaapamukuyekw mikw piihch anite chiiyuuwaahch pisikw ayimihehkaasuwin ekw maak machituutamuwin chitishinaakusinaawaau.”

Matthew 5:8

Shaweyihtaakusuuch anichii kaa payehchisiitwaau utehiiwaahch, wesh chika waapameuch Chishemanituu.

Matthew 5:9

Shaweyihtaakusuuch anichii kaa miyupayihaatwaau aweyuu e machipayihkahtaatuyich, wesh Chishemanituu utawaashiimh chika ishinihkaataakanuuch.

Luke 21:15

Wesh chika wiihtamaatinaawaau taan che itweyekw kaye kachehtaaweyihtamuwin chika miitinaawaau chechii kachehtaaweyihtamuuhtaakusiyekw ayimiyekwe, ekw maak anichii kaa uhkaatitaakuch namui chika chii aanuwehtamuch che itwewekw.

Luke 6:36

Chistimaacheyimuwe kaye chiya mwehch Kuuhtaawii kihchikiishikuhch kaa ihtaat kaa ishpish chistimaacheyimuwet.”

John 1:14

An maak Ayimuwin iinuu chii ishinaakuhaakanuu. An kaa saakaschineshkaakut chishewaatisiiwiniyuu kaye taapwewiniyuu, chichii wiichimikunuu utah aschiihch. Chichii waapamaanuu maak e chisteyihtaakusit mwehch e ishpish chisteyihtaakusiyich Chishemanituuh aniyuuh Uhtaawiih wesh wiya mikw peyakushuu e Ukusiitutaakut Chishemanituu.

John 1:47

Iskutak maak Jesus wiyaapamaat Nathanael e petaashtamuhteyich chii iteu, “Eukuu chihchiwe Israel iinuu, naashch taapwe kuiskutaatisiyuu.”

ᐊᐸᔅᑕᓚᒡ 11:24

Wesh uu naapeu Barnabas naashch chii kuiskutaatisiyuu, kaye chii saakaschineshkaakuu Kaa payehchisiyich Ahchaahkwa, kaye chii suuhcheyihtaakuniyuu utaapwehtamuwin. Ekw maak etituu mihchetu iinuuch kaa taapweyimaatwaau Utipeyihchikeu Jesus.

ᐊᐸᔅᑕᓚᒡ 9:36

Anite ihtaawinihch Joppa kaa ishinihkaatech chii ihtaau iskweu e taapweyimaat Jesus, Tabitha e chii ishinihkaasut, uu maak ishinihkaasuwin e itweshtamaataakanuuhch atihkw iinaanuu. Muush chii miyutuutamuweu aweyuu an iskweu kaye chii wiichiheu kaa chistimaatisiitwaau aweyuuh.

Romans 12:18

Kwaast che ishpish chii ihtuwane, kuchihtaa misiwe awen chechii miyu wiicheut.

Romans 12:9

Chihchiwe saachihaahkuch awenichii. Uhkaateyihtamukw an chekwaan kaa maayaatahch. Mamechiminamakw an chekwaan meywaashich.

Romans 15:14

Niichishaanitikw, nicheshtinaahun taapwe e Saakaschineshkaakuyekw e wii miyutuutamekw, misiwe e chischeyihtamuwekw taan e ishi nituweyimitaakw Chishemanituu chechii chischeyihtamuwekw kaye maak e kaschihuyekw chechii chiskutamaatuyekw.

1 Corinthians 12:8

Eukw maak uu Kaa payehchisiit Ahchaahkw maayaat pasch aweyuu chechii waawiihtamiyich Chishemanituuh ukachehtaaweyihtamuwiniyuu, ekw kutak maayaat chechii wiihtamaacheyich taan waa ishi chischeyihtamihaayich Chishemanituuh aweyuuh.

2 Corinthians 10:1

Ihtakun che ishi pukuseyimitakuch. Uu maak che aayimuutamaatakuch an e ishpish chishewaatisiit kaye e ishpish chiyaamisiit Jesus Christ niwii iteyihtaakusin an e ishi ayimihiitakuch. Ihtaauch awenichii e itwetwaau naashch ekaa saapihtaakusuuch anit e ihtaawekw e ihtaauch. Mikw anite aahchiiuh e ihtaauch e uhchi suuhcheyihtaakuhiisuch itweuch.

2 Corinthians 6:6

Nichii nuukuhtaanaan taapwe e atushkuwachiht Chishemanituu e payehkaatisiyaahch, taan e ishi miyu nisituhtamaahch taapwewin, e siipiiwesiyaahch taan e ishi nachishkaamaahch, e miyutuutuwachihtwaau awenichii. Kaa payehchisiit Ahchaahkw kaye niwiichihiikunaan kaye maak ninuukuhtaanaan taapwe e saachihiichiht misiwe awen.

2 Corinthians 7:11

Chiyawaau maak wii chii naheyihtamihiikuu Chishemanituu taan kaa ishi mihchiiweyihtamekw. Chiwaapahtenaawaau kaye taan e ishi wiichihiikuyekw. Etituu suuhk chititeyihtenaawaau. Etituu suuhk chiwii waapahtiiwenaawaau taan e ishi miyutuutamekw. Chitihtuutaakunaawaau chechii macheyihtamekw e machituutaakanuuhch kaye chechii chishuwaasiistamekw machituutamuwin. Chitaascheyihtenaawaau chechii waweshihaakanuut an kaa machituutahk kaye maak chechii kuiskunaakanuut. Taapwe chichii waapahtiiwenaawaau kuiskw e ihtiyekw.

2 Corinthians 9:10

Chishemanituu eukw maayaat nihtaauchihchesuu chekwaayuu che nihtaauchihtaayich. Wiya kaye ashameu misiwe aweyuuh. Kaye chiyawaau maak chika weyuuch miikuwaau mihchetu awenichii chechii wiichihekuch. Ekw maak uu e ishi miyutuutamaacheyekw mihchetu awenichii mistahii chika miyutuutamaakuuch Chishemanituu.

Ephesians 5:9

Taapwe waashtewinihch ishi pimaatisiyekwe chika nuukun miyuhtwaawin kaye kuiskutaatisiiwin kaye taapwewin anite chipimaatisiiwiniwaahch.

Philippians 1:11

Chitayimiheshtamaatinaawaau muush chechii miyutuutawekuch awenichii wesh chikuiskutaatisiinaawaau. Christ chitihtuutaakuwaau chechii miyutuutawekuch awenichii. Ekw maak Chishemanituu che chisteyimaakanuut kaye che maamihchimaakanuut.

Philippians 4:8

Niichishaanitikw, eshkw ekaa chiishihtaayaan e masinahamaatakuch peyakw miin chekwaan chika wiihtamaatinaawaau, Suuhk muush maamituneyihtamukw anihiih chekwaayuuh kaa miywaashikwaauh, anihiih kaa maamihchihiiwekwaauh, muyaam chekwaan e kuiskunaakuhch, chekwaan e chisteyihtaakuhch, kaye kuiskw ihtuwin, payehchi pimaatisiiwin, chekwaan e naheyihtamihiiwech ekw maak chekwaan e miyu tipaatutech.

Colossians 1:10

Ekw maak chechii ishi pimaatisiyekw taan e ishi nituweyimitaakw Chishemanituu chechii ishi pimaatisiiwekw. Muush chika ihtuutamuwaanaawaau taan aniyuuh e ishi naheyihtamihiikut. Nanaahkuu chika ishi mamiyuutuutamuwaawaauch awenichii kaye wetaach chika miyu chischeyimaawaau Chishemanituu taan e iteyihtaakusit.

1 Thessalonians 2:7

chichii wii manaachihiitinaan mwehch e ishi manaachihaat ukaawiimaau utawaashiim.

1 Timothy 5:21

Uu maak chititashumitin Chishemanituu kaye Jesus Christ kaye maak kaa payehchisiitwaau enchilich e pehtuutwaau, nanihiihta uu taan kaa itashumitaan anuhchiish. Misiwe chekwaan e ihtuutaman nuukuhtaa taapituu e iteyimitwaau misiwe awenichii.

2 Timothy 2:24

Wesh an kaa aapachihiikut Utipeyihchikeu namui chipaa uhchi ayaashitemuweu. Chipaa chistimaacheyimeu misiwe aweyuu kaye maak aniyuu e miyu chiskutamaachesuut chipaa siipiiwesiistuweu aweyuuh.

Titus 1:15

An awen kaa payehchi pimaatisiit misiwe chekwaayuu payehchinaakuniyuu, ekw an awen kaa machaatisiit kaye ekaa kaa taapwehtahk namui chekwaayuu payehchinaakuniyuu wesh naashch taapwe wiinaayuu umituneyihchikan kaye utehii.

Titus 3:2

Wiihtamuch ekaa chechii machaayimuumaatwaau aweyuu, chechii chiyaameyihtaakusitwaau kaye chechii miyeyihtaakusitwaau. Muush chipaa yuuspaatisiistuweuch misiwe aweyuuh.

Hebrews 12:11

Mikw maak namui naashch miyeyihtaakun e kuiskunaakanuut awen. Chitaahkuhiikunaanuu mekwaach e kuiskunikuyihkw. Mikw maak paatimaa chiwaapahtenaanuu taan e ishpish miyu wiichihiikuyihkw an e chii kuiskunikuyihkw. Ekw maak e ayaayihkw chiyaameyihtamuwin kaye kuiskutaatisiiwinihch chii wii ishi pimaatisiinaanuu.

Hebrews 12:14

Suuhk kuchihtaakw chechii ishi pimaatisiyekw chechii miyu wiichewekuch kutakach awenich. Suuhk kuchihtaakw kuiskw chechii ishi pimaatisiyekw. Wesh taapaa kata chii naateu awen Chishemanituu ekaa kuiskutaatisiite.

James 1:17

Misiwe miiwewin kaa miywaashich kaye kaa mitunesiimakahch anite ishpimihch uhchipayuu, anite Chishemanituu e ihtaat. Eukuu Chishemanituu kaa ushihtaat misiwe waashtewiniyuu anite chiishikuhch. Muush peyakunihch iteyihtaakusuu, namui ishinaakusuu mwehch e takaashtehtihch chekwaan weipishchiish mikw kaachii nuukuhch.

James 1:5

E ihtaakwe awen ekaa chischeyihtahk taan nihaau che ishikaapuushtahk chekwaayuu e nachishkahk Chishemanituu chipaa nitutamuweu kachehtaaweyihtamuwiniyuu. Chika miikuu maak. Wesh Chishemanituu weyuuch miyeu misiwe aweyuuh taan e ishi nitaweyihtamaakut chekwaayuu.

James 2:13

Awen ekaa kaa chistimaacheyimaat kutak aweyuu namui kaye wiya kata uhchi chistimaacheyimaakanuu iskutak wiyaaskunaakanuute. Mikw maak an awen kaa chistimaacheyimaat kutak aweyuuh namui kata uhchi kushtaachuu chechii wiyaaskunaakanuut.

James 2:4

kuiskw aa chitihtinaawaau uu e ihtiyekw. Chimiyutuutawaau peyakw ekw an kutak namui muyaam chitihtuutawaau mikw aniyuu e ishinaakusitwaau uschich. Chiwanipayinaawaau aniyuu e ishi kanawaapamekuch.

James 3:15

Namui Chishemanituu e ihtaat uhchipayuu uu kaa iteyihtaakuhch kachehtaaweyihtamuwin, utah aschiihch uhchiimakan, naapeu uyuu ukachehtaaweyihtamuwin, machimanituu e ihtaat uhchipayuu.

James 4:8

Peshuwaapamaahkw Chishemanituu ekw maak che peshuwaapamitaakw kaye chiyawaau. Kaasiitihchekw chiyawaau umachihtwaauch, ekw chiyawaau kaa ayimihehkaasuyekw payehchihtaakw chitehiiwaau.

1 Peter 1:22

E chii payehchihaakanuutwaau chitahchaahkuwaauch an uhchi e nanihiihtamekw taapwewin kaye maak e ishinaakusiyekw chihchiwe e saachihekuch chiichishaanuwaauch, suuhk saachihiitukw misiwe chitehiiwaahch uhchi.

1 Peter 2:1

Tekash maak ekw puunihtaakw misiwe maayaatisiiwin. Puuniikw ekw e nanatayekw, kaye ekaawii wii iteyihtaakuhiisukw taan an ekaa chihchiwe iteyihtaakusiyekw, ekaawii chika uhchi ihtakun e wauhteyimituyekw. Kaye maak ekaawii nitamukw ishi aayimuumaahkuch awenichii.

1 Peter 2:18

Chiyawaau kaa utaapachihaakanitutaataakw awen, chipaa pachishteyimitisuustawaawaauch kuuchimaamuwaauch kaye chipaa nanihiihtuwaawaauch. Namui mikw anichii kaa miyuhtwaatwaau chipaa uhchi chisteyimaawaauch kaye anichii kaa machihtwaatwaau chipaa chisteyimaawaauch.

1 John 3:18

Nitawaashiimitikw, namui mikw chipaa uhchi itwenaanuu e saachihiiweyihkw. Mikw taan e ihtiihkw ekut chipaa nuukun taapwe e saachihiiweyihkw.

1 John 3:3

Misiwe maak awen uyeyuu kaa ishi aspeyimut nanaakataweyimisuu chechii payehchisiit mwehch Christ e ishi payehtisiyich.