James 3:15 - Chishemanituu Utayimuwin: Kaa Uskaach Testament

¹⁵ Namui Chishemanituu e ihtaat uhchipayuu uu kaa iteyihtaakuhch kachehtaaweyihtamuwin, utah aschiihch uhchiimakan, naapeu uyuu ukachehtaaweyihtamuwin, machimanituu e ihtaat uhchipayuu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁵ ᓇᒧᐃ ᒋᔐᒪᓂᑑ ᐁ ᐃᐦᑖᑦ ᐅᐦᒋᐸᔫ ᐆ ᑳ ᐃᑌᔨᐦᑖᑯᐦᒡ ᑲᒉᐦᑖᐌᔨᐦᑕᒧᐎᓐ, ᐅᑕᐦ ᐊᔅᒌᐦᒡ ᐅᐦᒌᒪᑲᓐ, ᓈᐯᐤ ᐅᔫ ᐅᑲᒉᐦᑖᐌᔨᐦᑕᒧᐎᓐ, ᒪᒋᒪᓂᑑ ᐁ ᐃᐦᑖᑦ ᐅᐦᒋᐸᔫ᙮

James 3:15 Iomraidhean Croise

Luke 16:8

Iskutak an uchimaau piyehtahk taan kaa ihtiyich aniyuu uchimaashiim chii maamihchihiikuu, iipwaahkaau e iteyimaat ekaa maak kuiskw uhchi ihtiyich. Wesh anichii ekaa kaa kuiskutaatisiitwaau utah aschiihch naashch taapwe kaschihuuch e wiihkuchihtamaasutwaau chekwaayuu ishpishaat wii anichii kaa kuiskutaatisiitwaau.”

John 3:17

Wesh Chishemanituu chii pechi itishahweu Ukusisa utah aschiihch chechii pimaachihaayich aweyuuh namui wii chechii pechi nishuuwanaachimaayich.

John 8:44

Machimanituu eukw wehtaawiyekw, aniyuu e ishi nituweyimitaakw chechii ishi machituutamuwekw eukun mikw waa ihtuutamekw. Muush chii nipahiiweu kaa ishpish ihtakuniyich uyuu aschiiyuu. Namui wiiskaat uhchi nituweyihtam kuiskw chechii ishi wiihtaakuniyich chekwaayuu wesh namui mitun ihtakuniyuu taapwewiniyuu anit e ihtaat. Muush nanatayuu wesh ekun chihchiwe e itaatisiit, eukw maak an taapwe weuhtaawiitutawaat aniyuuh kaa nanatayich.

ᐊᐸᔅᑕᓚᒡ 13:10

ekw kaa itaat, “Muyaam machimanituu utawaashiim e iteyihtaakusiyin, e uhkaataman misiwe kuiskutaatisiiwin. Ekun ekw ishpish wiyeshihiiwe kaye puunii ekw e wii wanaachihtaawat aniyuu taan e ishi nituweyihtahk Chishemanituu chechii itaatisiinaanuyich.

Romans 1:22

Muyaam naashch e kachehtaaweyihtahkwaau chii iteyihtaakuhiisuuch mikw maak tekash chiishkwehkaanihch iteyihtaakusuuch.

1 Corinthians 1:27

Mikw maak Chishemanituu aniyuuh aweyuuh ekaa mitun chekwaan kaa iteyimaakanuyich chii wiyaapameu chechii uhchi waapahtiyaat aniyuuh chihchiwe kaa iteyimaakanuyich ekaa mitun chekwaan iteyihtaakusiyich wiya ishi e ihtaat. Kaye maak aniyuuh ekaa suuhcheyihtaakusiyich kaa iteyimaakanuyich utah aschiihch chii wiyaapameu aniyuu chechii uhchi waapahtiyaat aniyuuh kaa suuhcheyihtaakusiyich ekaa mitun suuhcheyihtaakusiyich wiya ishi e ihtaat.

1 Corinthians 2:14

An awen ekaa kaa ayaawaat Chishemanituuh Utahchaahkuyuu, namui katachii utinam aniyuuh miiwewinh taan e ishi miiweyich Chishemanituuh Utahchaahkuyuuh. Uu awen namui taapwe nisituhtam chekwaayuuh uyuuh, namui wiyesh itaapatanh iteyihtam. Wesh mikw anichii Payehchi Ahchaahkwa kaa ayaawaatwaau kata chii nisituhtamuch taan e ishi chihchiwe iteyihtaakuniyikwaauh uyuuh miiwewinh.

1 Corinthians 3:19

Wesh aniyuu e ishi kachehtaaweyihtahkwaau awenich utah aschiihch, chiishkwenaakun iteyihtam wiya Chishemanituu. Wesh itashteu Chishemanituu utayimuwinihch, Chishemanituu aapachihtaaweu naapeuh ukachehtaaweyihtamuwiniyuu chechii uhchi chischeyihtamihaat taan e ishi chiishkwenaakuniyich ukachehtaaweyihtamuwiniyuu.

1 Corinthians 3:3

Eshkw ekun e ishi pimaatisiyekw e ishi pimaatisiitwaau anichii eshkw ekaa kaa pachishtinaatwaau Payehchi ahchaahkwa chechii pimipayihtaayich upimaatisiiwinawaauh. Wesh chimamacheyimitunaawaau kaye chimamachipayihkahtaatunaawaau. Ekut maak e nuukuhch eshkw e ishi pimaatisiyekw aniyuu taan e ishi pimaatisiitwaau anichii ekaa kaa taapwehtahkwaau.

2 Corinthians 1:12

Maau maak e ishi maamihchisiyaahch, mitun nicheshtinaahunaan muush kuiskw e chii ihtiyaahch taanite mikw kaa ati ihtaayaahch, etituu maak mekwaach anite e ihtaayekw kaa ihtaayaahch. Kaye maak muush e chii taapweucheyihtaakusiyaahch. Chishemanituu nichii miikunaan ushaweyihchichewin uu chechii ihtiyaahch. Namui niyaan nikachehtaaweyihtamuwinaahch uhchipayuu.

2 Corinthians 11:3

Nikushpanaateyihten chechii pisiiwiikuyekw, muyaam taan kaa ishi pisiiwiikut Eve chinepukw e chii nanataimikut, nikushpanaateyihten chek ekaa chechii iteyimekw Christ taan e iteyimekw anuhchiish, tekash chit ishi nuushuushkuwaawaau kaye mikw wiya chinanaakataweyimaawaau.

Philippians 3:19

Eshkw kata nachishkamuch wanaachihiiwewiniyuu. Taan e ishi nituweyihtamuumakaniyikwaauh wiiyuuwaauh eukw chihchiwe niyaakataweyihtamihiikutwaau. Mamihchihiikuuch taan e ihtitwaau. Chipaa pimaameyimuhiikuuch maak aniyuuh ihtuwinh. Mikw taan e itaatisiinaanuyich utah aschiihch eukun mikw miyaamituneyihtamihiikutwaau.

2 Thessalonians 2:9

Eshkw maak ekaa ispayihch uu an ekaa mitun kaa aapateyihtamuwaat Chishemanituu uwiishuwewiniyuu machimanituu chika miikuu suuhkaatisiiwiniyuu. Maamishkaach waapahtiiwewinh chika waapahtiiweu kaye maak e maamishkaateyihtaakuniyikwaauh chekwaayuuh chika ihtuutam. Eukw uyuu che ihtit chechii uhchi wiyeshihaat aweyuuh.

1 Timothy 4:1

Kaa payehchisiit Ahchaahkw piyekasch wiihtamaacheu taan che ati ispayiyich e maahchich chiishikaayikwaauh. Kata ihtaauch awenich e puuniitwaau e taapweyimaatwaau Jesus. Chika wiyeshimikuuch taan e ishi wawiyesimuweyich machiahchaahkwa ekw che nuushunehamuwaatwaau taan e ishi chiskutamaacheyich.

James 1:17

Misiwe miiwewin kaa miywaashich kaye kaa mitunesiimakahch anite ishpimihch uhchipayuu, anite Chishemanituu e ihtaat. Eukuu Chishemanituu kaa ushihtaat misiwe waashtewiniyuu anite chiishikuhch. Muush peyakunihch iteyihtaakusuu, namui ishinaakusuu mwehch e takaashtehtihch chekwaan weipishchiish mikw kaachii nuukuhch.

James 1:5

E ihtaakwe awen ekaa chischeyihtahk taan nihaau che ishikaapuushtahk chekwaayuu e nachishkahk Chishemanituu chipaa nitutamuweu kachehtaaweyihtamuwiniyuu. Chika miikuu maak. Wesh Chishemanituu weyuuch miyeu misiwe aweyuuh taan e ishi nitaweyihtamaakut chekwaayuu.

James 3:17

An maak kachehtaaweyihtamuwin ishpimihch kaa uhchipayihch niishtam tekash payehkan, ekw miin e chiyaameyihtaakuhiiwemakahch, yuuspeyihtaakuhiiwemakahch, kaye ihtuutaakuu awen yaakwaau chechii nituhtawaat aweyuuh. Awen e ayaat uyuu kachehtaaweyihtamuwiniyuu naashch kata weyuuch chishewaatutaweu aweyuuh kaye mistahii chika miyutuutamaacheu, peyakunihch chika ishi kanawaapameu misiwe aweyuuh kaye namui mitun chika uhchi wii kakaataau taan nihaau e iteyihtaakusit.

Jude 1:19

Eukw uchii naapeuch e ihtuutaataakuch chechii papahkaanipayihuwekw. Aniyuu taan e ishi machi nituweyihtahkwaau eukw aniyuu tepeyimikutwaau chechii ishi pimaatisiitwaau. Namui ayaaweuch Kaa payehchisiyich Ahchaahkwa.

Revelation 12:9

Ekw kaa niihchiwepinaakanuut an mista maanichuus kihchikiishikuhch uhchi. Eukw maak an chinepukw weskach anite kaa ihtaat, Machimanituu maak Satan kaa ishinihkaataakanuut. Eukw uu kaa chii wiyeshihaat misiwe aweyuu utah aschiihch. Anite maak aschiihch chii ishuwepinaakanuu kaye misiwe aniyuu utenchilamh.

Revelation 2:24

Misiwe maak chiyawaau Thyatira kaa ihtaayekw ekaa kaa aapatahtamekw uu kaa ishi machi chiskutamaakaanuuhch, chiyawaau ekaa kaa chischeyihtamuwekw machimanituu uchiimuuch ihtuwinh, namui chinitaweyihtamaatinaawaau kutach chekwaan chechii ihtuutamekw,

Revelation 9:11

Aniyuuh enchilh kaa uchimaaututamiyich aniyuu kaa mista pukuneyaayich ekun aniyuuh kaa uchimaamitwaau. Hebrew e ishi ayiminaanuyich Abaddon chii ishinihkaasuyuuh. Greek maak e ishi ayiminaanuyich Apollyon chii ishinihkaasuyuuh. Kaa wanaachihiiwet ishi itweshtamuwaataakanuuyuu aniyuu utishinihkaasuwin.