James 3:13 - Chishemanituu Utayimuwin: Kaa Uskaach Testament

¹³ Ihtaau aa awen anit e tashiyekw e kachehtaaweyihtahk kaye e ayaat nisituhtamuwiniyuu. Ekush kata waapahtiiweu uyuu kuiskw e ishi pimaatisiit kaye maak e atushchet chipaa nuukuniyuu e kachehtaaweyihtahk aniyuu uhchi e tipihteyimisut.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹³ ᐃᐦᑖᐤ ᐋ ᐊᐌᓐ ᐊᓂᑦ ᐁ ᑕᔑᔦᒄ ᐁ ᑲᒉᐦᑖᐌᔨᐦᑕᐦᒃ ᑲᔦ ᐁ ᐊᔮᑦ ᓂᓯᑐᐦᑕᒧᐎᓂᔫ᙮ ᐁᑯᔥ ᑲᑕ ᐙᐸᐦᑏᐌᐤ ᐅᔫ ᑯᐃᔅᒄ ᐁ ᐃᔑ ᐱᒫᑎᓰᑦ ᑲᔦ ᒫᒃ ᐁ ᐊᑐᔥᒉᑦ ᒋᐹ ᓅᑯᓂᔫ ᐁ ᑲᒉᐦᑖᐌᔨᐦᑕᐦᒃ ᐊᓂᔫ ᐅᐦᒋ ᐁ ᑎᐱᐦᑌᔨᒥᓱᑦ᙮

James 3:13 Iomraidhean Croise

Matthew 11:29

Pushchishkamutiisukw nimiiskwaapan, pechi chischinuwaapamukw maak, wesh nitayuuspaatisiin niya kaye nitipihteyimun nitehiihch. Kaye maak chika chii ayiwepuuch chitahchaahkuwaauch.

Matthew 21:5

Wiihtamuwaahkuch anichii iinuuch anite Zionihch kaa uhchiitwaau, kanawaapamaahkw maa chichisheuchimaamuwaau. Chipechi nituwaapamikuwaau e tipihteyimisut uhkaan muyaam kaa apishiishit kaapalakaskweu kaa ishinaakusiyich e tehtapit. Eukw uyuu kaa itwekupane aniyaa peyakw uchischiwehiichesuu.

Matthew 5:5

Shaweyihtaakusuuch anichii kaa yuuspaatisiitwaau wesh chika miyaakanuuch uyuu aschiiyuu.

Matthew 7:24

“Misiwe awen kaa nituhtahk nitayimuwiniyuu kaa ati ihtuutahk maak aniyuu kaa itweuch, mwehch naapeu kaa kachehtaaweyihtahk anite e paahpaachipiskaayich kaa wiikaapuuhtaat waaskaahiikaniyuu iteyihtaakusuu.”

1 Corinthians 6:5

Namui aa chimamahteyimunaawaau uu e ihtiyekw. Namui aa mechim ihtaau peyakw wiichishaanimaau anit e tashiyekw e kachehtaaweyihtahk chechii wiichihiitaakw taan chechii ishi nihiipayihtaatuwekw taan e ishi mamachipayihkahtaatuwekw.

2 Corinthians 10:1

Ihtakun che ishi pukuseyimitakuch. Uu maak che aayimuutamaatakuch an e ishpish chishewaatisiit kaye e ishpish chiyaamisiit Jesus Christ niwii iteyihtaakusin an e ishi ayimihiitakuch. Ihtaauch awenichii e itwetwaau naashch ekaa saapihtaakusuuch anit e ihtaawekw e ihtaauch. Mikw anite aahchiiuh e ihtaauch e uhchi suuhcheyihtaakuhiisuch itweuch.

2 Corinthians 8:24

Suuhk maak waapahtiyaahkuch uchii naapeuch e saachihekuch chechii waapahtahkwaau umaamuuayimihaauch chisaachihiiwewinawaayuu kaye chechii chischeyihtahkwaau chekwaan wehchi naashch maamihchihiyaahch.

Galatians 5:23

naashch yuuspaatisiyuuch kaye miyu naanaakachihtaauch taan e ishi pimaatisiitwaau. Namui ihtakuniyiche wiishuwewin e chistahamaachemakahch uu chechii ishi pimaatisiinaanuuhch.

Galatians 6:1

Niichishaanitikw, chiishpin shaakuuchihiikute awen machaatisiiwiniyuu chiyawaau kaa piichishkaataakw kaa payehchisiit ahchaahkw chipaa wiichihaawaau an awen chiyaam chechii miinupitekw taan waa ishi paschepayit. Yaakwaamiishtaasukw kaye, ekaa chechii asichipayiyekw kaye chiyawaau chechii ati machituutamekw.

Galatians 6:4

Misiwe paahpeyakw awen chipaa naanituu chischeyimisuu kuiskw kaa ihtikwe. Kuiskw maak kaa ihtikwe, kiipaa che maamihchihiisut, namui mechim kata uhchi kanawaapahtamuweu kutak aweyuu taan kaa ihtiyich.

Ephesians 4:2

Chipaa tipihteyimisunaawaau kaye chipaa chiyaameyihtaakusinaawaau kaye muush chipaa wii siipiiwesinaawaau. Nuukuhtaakw e saachihiituyekw ekaa saskachiyekw e waawiichihiituyekw.

Philippians 1:27

Mikw maak, eukw uu wehchi yaaitei nituweyihtaakusiyekw chechii ishi pimaatisiyekw taan e itashumukuyihkw miywaachimuwin chipaa ishi pimaatisiinaanuu. Ekw maak aat ekaa miin chii waapamitakuche maak nihiipayihche miin chechii waapamitakuch che chischeyimitakuch ekaa mitun chekwaan chii aahtinikuyekw misiwe peyakunihch e iteyihtamekw taan waa ihtiyekw kaye taapwe peyakunihch e ishi pukuseyihtamekw e maamuu aahchiishtamekw e waawiihtamekw miywaachimuwin.

Colossians 3:12

Chiyawaau Chishemanituu kaa wiyaapamitaakw kaa payehchisiyich utiiniimh kaye kaa saachihaat, chishewaatisiikw, chistimaacheyimaahkuhch awenichii, tipihteyimisukw, yuuspaatisiikw kaye siipiiwesiikw.

1 Timothy 4:12

Ekaawii chika uhchi aatuwaahiikuuch awenich aniyuu e uschipimaatisiyuut uyuu e itaapatisuut. Mikw ishi pimaatisii anit chechii uhchi chischinuwaapahtahkwaau chipimaatisiiwiniyuu anichii kaa taapwehtahkwaau, taan e itihtaakuniyich chitayimuwiniyuu, kaye taan e ishinaakuhch chipimaatisiiwin kaye taan e ishi saachihiiweyin maak e ishi taapwehtaman kaye taan e ishi payehkaatisiyin.

1 Timothy 6:11

Chiya maak Timothy, Chishemanituu kaa atushkuwat, ekaawii aapateyihta uyuuh machi chekwaayuuh. Uste iteyihtamahiikuh kuiskutaatisiiwin, Chishemanituuwaatisiiwin, taapwehtamuwin, saachihiiwewin, yaaiteyihtaakusuwin, kaye chiyaamisiiwin.

2 Timothy 2:25

Kaye chiyaam chipaa ihtuutaweu e wii kuiskunaat aniyuu kaa naniskuustaakut aweyuuh. Chek maa chipaa chii ihtuutaakuyuuh Chishemanituu chechii kweskaatisiyich kaye chechii chischeyihtamiyich taapwewiniyuu.

Titus 3:2

Wiihtamuch ekaa chechii machaayimuumaatwaau aweyuu, chechii chiyaameyihtaakusitwaau kaye chechii miyeyihtaakusitwaau. Muush chipaa yuuspaatisiistuweuch misiwe aweyuuh.

Hebrews 13:5

Ekaa wii chika uhchi ishinaakusinaawaau chechii saachihtaayekw shuuliyaau. Chipaa miyeyihtenaawaau taan e ishi ayaayekw. Wesh Chishemanituu chii itweu, Namui wiiskaat chika uhchi nakatitinaawaau, namui wiiskaat chika uhchi ishinaakusinaawaau ekaa chechii piskaatitakuch.

James 1:21

Wepinamukw misiwe wiinisuwin kaye misiwe machaatisiiwin. Pachishteyimisukw Chishemanituu e ihtaat, ihtuutamuwaahkw utayimuwin chitehiiwaahch kaa piihtahahk aniyuu chechii pimaachihiikuwekw.

James 2:18

Kata chii ishinaakun pasch awenichii chechii itwetwaau, “Chitayaan taapwehtamuwin chiya, ekw niya nimiyu atushchen.” Nipaa itaau uu awen, “Pechi waapahtiih aahch chitaapwehtamuwin ekaa asitinaman chimiyuu atushchewin ekw maak che waapahtiitaan niya nimiyu atushchewin e asitinamaan anit nitaapwehtamuwin.”

James 3:1

Niichishaanitikw, ekaawii chika uhchi mihchetinaawaau e chiskutamaacheyekw. Chichischeyihtenaawaau chiyaanuu kaa chiskutamaacheyihkw uste che aahkwaateyihtaakuhch taan che ishi wiyaaskunikuyihkw.

James 3:17

An maak kachehtaaweyihtamuwin ishpimihch kaa uhchipayihch niishtam tekash payehkan, ekw miin e chiyaameyihtaakuhiiwemakahch, yuuspeyihtaakuhiiwemakahch, kaye ihtuutaakuu awen yaakwaau chechii nituhtawaat aweyuuh. Awen e ayaat uyuu kachehtaaweyihtamuwiniyuu naashch kata weyuuch chishewaatutaweu aweyuuh kaye mistahii chika miyutuutamaacheu, peyakunihch chika ishi kanawaapameu misiwe aweyuuh kaye namui mitun chika uhchi wii kakaataau taan nihaau e iteyihtaakusit.

1 Peter 1:15

Payehtisiyuu an kaa tepwaatitaakw kaye chiyawaau maak payehchisiikw misiwe e ishi pimaatisiyekw.

1 Peter 2:12

Suuhk wii kuiskupimaatisiikw mekwesiinuu anichii ekaa kaa taapwehtahkwaau e ihtaatwaau. Ekut chechii nisituunahkwaau chimiyuutuutamuwinawaau ekw maak che maamihchimaatwaau Chishemanituu iskutak takushiniyichen. Ekun che ihtitwaau aat anuhchiish nitamukw e ishi mamishimitaakuch mwehch e machituutamuwekw.

1 Peter 2:9

Chiyawaau an kaa itiskaanesiyekw chichii wiyaapamikuwaau Chishemanituu kaye eukw chiyawaau maauch kaa niikaaneyihtaakusit chisheuchimaau utayimiheuchimaamh. Eukw chiyawaau kaa payehchisiitwaau kaa itiskaanesitwaau iinuuch, eukw chiyawaau Chishemanituu tipiiwe utiiniimih. Chiyawaau chichii wiyaapamikunaawaau chechii waawiihtamuwekw taan e ishi chisteyihtaakuniyikwaauh utayihtuwinh an kaa wiishaamitaakw wanitipiskusiiwinihch uhchi anite ishi umaamishkaach waashtewinihch.

1 Peter 3:4

Uste iteyihtaakun kuiskw chechii ishi pimaatisiyekw kaye maak chechii chiyaamaatisiyekw chechii uhchi miyunaakusiyekw. Eukw uyuu maauch miyunaakusit iskweu e ishi pimaatisit kaye maak eukw uyuu e ihtuutaakut muush chechii miyunaakusit. Eukw uyuu maauch meyuunahk Chishemanituu iskweuh chechii ishi pimaatisiyich.