James 2:5 - Chishemanituu Utayimuwin: Kaa Uskaach Testament

⁵ Yaakwaau nituhtamukw niichishaanitikw. Namui aa aniyuu kaa chistimaatisiyich utah aschiihch kaa ihtaayich uhchi wiyeyimeu Chishemanituu mistahii chechii ayaayich taapwehtamuwiniyuu kaye chechii ayaayich chisheuchimaawiniyuu aniyuu kaa itwet cheshtinaash che miyaat aniyuu kaa saachihiikut.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁵ ᔮᒀᐤ ᓂᑐᐦᑕᒧᒄ ᓃᒋᔖᓂᑎᒄ᙮ ᓇᒧᐃ ᐋ ᐊᓂᔫ ᑳ ᒋᔅᑎᒫᑎᓯᔨᒡ ᐅᑕᐦ ᐊᔅᒌᐦᒡ ᑳ ᐃᐦᑖᔨᒡ ᐅᐦᒋ ᐎᔦᔨᒣᐤ ᒋᔐᒪᓂᑑ ᒥᔅᑕᐦᐄ ᒉᒌ ᐊᔮᔨᒡ ᑖᐺᐦᑕᒧᐎᓂᔫ ᑲᔦ ᒉᒌ ᐊᔮᔨᒡ ᒋᔐᐅᒋᒫᐎᓂᔫ ᐊᓂᔫ ᑳ ᐃᑗᑦ ᒉᔥᑎᓈᔥ ᒉ ᒥᔮᑦ ᐊᓂᔫ ᑳ ᓵᒋᐦᐄᑯᑦ᙮

James 2:5 Iomraidhean Croise

Matthew 11:5

Wiihtamuwaahkw maak e waapahtamiitwaauh aniyuu ekaa uhchii waapahtamiyich, e pimuhteyich aniyuu ekaa uhchii pimuhteyitwaauh, kaye maak e payehchisiitwaauh aniyuu kaa ayaayich kaa maayaataniyich umichiiwaaspinewiniyuu, e chii miinuwaachihaakanuyich. Kaye e pehtamiyich aniyuu ekaa uhchii pehtamiyich. Kaye e chii wanishkaanaakanuyich aniyuu kaa nipiitwaau. Kaye miywaachimuwiniyuu e waawiihtamuwaakanuyich kaa chistimaatisiyich aweyuuh.

Matthew 25:34

Ekw che itaat an Chisheuchimaau aniyuu iinuu anite unahiiwinihch kaa ihtaayich, ‘Aashtamukw chiyawaau kaa shaweyimitaakw Nuuhtaawii. Aashtamukw, utinamukw an chisheuchimaawin an kaa ashutamaakuyekw iskutak maauch niishtam kaa usihtaakanuuhch uu aschii.

Matthew 5:3

“Shaweyihtaakusuuch anichii kaa chistimaatisiitwaau anite ahchaahkuwinihch, wesh wiyawaau tipiyeusiyuuch kihchikiishikw chisheuchimaawiniyuu.

Mark 7:14

Ekw Jesus miin kaa wiishaamaat aniyuu iinuuh chechii pechi ituhteyich ekw kaa itaat, “Nituhtuukw maa, misiwe e tashiyekw, kaye wii nisituhtuukw taan che itweyaan.

Luke 12:21

Jesus kaa itwet, “Ekun maak mwehch e ishinaakuhch awen wiya kaa maauchihtamaasut chekwaayuu. Namui miisitisiyuu iteyimikuu Chishemanituu e kanawaapamikut.”

Luke 12:32

“Ekaawii sechisikw, e chikawaashishiyekw, wesh Kuuhtaawaau kihchikiishikuhch kaa ihtaat naashch taapwe naheyihtamihiikuu chechii miitaakw uchisheuchimaawin.

Luke 16:22

An kaa chistimaatisiit naapeu chek chii nipuu, chii pechi utinikuu enchil, anite maak uhpime Abraham e ihtaayich ekute kaa pachishtinikut. Chek kaye an kaa miisitisiit naapeu kaa nipit, chii nahiihkuwaakanuu maak.

Luke 16:25

“Ekw Abraham kaa itaat, ‘Chichischisin aa nikus, mekwaach kaa pimaatisiyin anite aschiihch miyu chekwaan chichii ayaan, Lazarus maak namui uhchi miyu ayaau chekwaayuu. Ekw maak anuhchiish miyeyimuu wiya utah, chiya maak chinanehkaateyimun.

Luke 22:29

Nuuhtaawii nichii pachishtinamaakw tipeyihchichewiniyuu anite uchisheuchimaawinihch, ekw maak niya che pachishtinamaatakuch

Luke 6:20

Jesus chii kanawaapameu aniyuu kaa nuushunehukut, ekw kaa itaat, “Chishaweyihtaakusinaawaau chiyawaau kaa chistimaatisiyekw anuhchiish, wesh anite Chishemanituu uchisheuchimaawinihch chimasinaasunaawaau.

John 7:48

Namui wiiskaat awen e niikaanishkaachet maak anichii Phariseech uhchi taapwehtamuch Jesus e aawiyich Christ. Namui kaye niyaan nitaapwehtenaan.

ᐊᐸᔅᑕᓚᒡ 7:2

Ekw Stephen kaa itaat, “Niichishaanitikw kaye uhtaawiimaautikw. Pechi nituhtuukw. Chishemanituu kaa chisteyihtaakusit chii nuukushiishtaweu weskach aniyaa kuuhtaawiinuuh Abraham mekwaach kaa wiichiyich anite Mesopotamia aschiihch, eshkw ekaa Haran kaa ishinihkaateyich ihtaawiniyuu uhchi ishi aahtucheyich.

Romans 8:17

Ekw maak e utawaashiimitutaatahkw Chishemanituu cheshtinaash chika miikunuu aniyuuh kaa ishi miywaashiyikwaauh shaweyihchichewinh kaa ayeskuushtamuwaat utawaashiimh. Kaye maak taapishkun Jesus ekw maak chiyaanuu chika ayaanaanuu taan kaa ishi ayeskuushtamuwaakanuut Jesus. Wesh chiishpin wiich nanehkaateyimuumahkwe Jesus aniyuu e taapweyimahkw kaye chiyaanuu chika chisteyihtaakuhiikunaanuu chisteyihtaakuhaakanuute.

1 Corinthians 2:9

Wesh itashteu Chishemanituu utayimuwinihch, Namui awen uhchi waapahtam kaye namui awen uhchi pehtam nesht namui awen uhchi chischeyihtam taan kaa ishi ayeskuushtamuwaat Chishemanituuh aniyuuh kaa saachihiikut.

2 Corinthians 4:15

Chiyawaau maak eukuu wehchi ihtuutamaahch uu. Wesh wetaach e chischeyihtamihaakanuutwaau awenichii Chishemanituuh uchishewaatisiiwiniyuu ekw wetaach che ihtakuniyich e nanaaskumaakanuut Chishemanituu kaye e chishtaachimaakanuut.

2 Corinthians 6:10

Ihtakun e ishi misimeyihtamaahch. Yaapach maak nimiywaatenaan. Namui niweyuutisiinaan. Yaapach maak nitihtutawaanaanich awenichii chechii ayaatwaau chihchiwe weyuutisiiwiniyuu. Aat ekaa chekwaan tipiyeusiyaahch, yaapach misiwe chekwaan e tipiyeusiyaahch nitishinaakusinaan.

2 Corinthians 8:9

Chichischeyimaawaau taan kaa ishi miyutuutamaachet Chitipeyihchikeminuu Jesus Christ. Chii weyuutisiyuu yaapach maak chii ihtuutaasuu chechii chistimaatisiit chiyaanuu uhchi. Chii nakatam wiya misiwe uweyuutisiiwin.

Ephesians 1:18

Ninitutamaan kaye chechii chischeyihtamuwekw chekwaayuu aniyuu kaa miitahkw Chishemanituu chechii aspeyimututamuhkw iskutak kaa wiyaapamitahkw. Kaye maak chechii chischeyihtamekw taan e ishpish weyuutaniyikwaauh e chisteyihtaakuniyikwaauh miyu miiwewinh taan e ishi ayeskuushtamuwaat kaa taapwehtamiyich che miyaat.

Ephesians 3:8

Aat maak niya maauch nuuhtaash e iteyihtaakusiyaan e iteyihtaakusitwaau kaa taapwehtahkwaau, yaapach niya nichii shaweyimikw Chishemanituu e chii miit chechii waawiihtamuumach aniyuuh ekaa Jewa kaa itiskaanesiitwaauh taan e ishpish naaspich weyuutaniyich kaye e ishpish ekaa nihtaa puunipayiyich taan waa ishi shaweyimitahkw Chishemanituu Christ e ihtaayich uhchi.

1 Thessalonians 2:12

Suuhk chichii aashihchimitinaan. Chichii kaachiichihiitinaan kaye chichii siihchimitinaan chechii ishi pimaatisiyekw taan e ishi naheyihtamihiikut Chishemanituu e ishi pimaatisiinaanuyich. Wesh wiya Chishemanituu chiwiishaamikuwaau chechii wiichihiiweyekw anite kaa chisteyihtaakuniyich uchisheuchimaawinihch.

2 Thessalonians 1:5

Ekut maak utah che uhchi chischeyihtamekw taan e ishpish kuiskw ihtit Chishemanituu e wiyaaskunichet. An maak taan e ispayekw chika tepicheyihtaakusinaawaau chechii wiichihiiweyekw anite Chishemanituu uchisheuchimaawinihch.

1 Timothy 6:18

Wiihtamuuch anichii kaa miisitisiitwaau chechii miyutuutamaachetwaau, miyutuutamaachewinihch chechii ishi miisitisiitwaau, chechii ishinaakusitwaau naashch kaa miyeyihtahkwaau e miiwetwaau kaye naashch kaa wehchipayiyich chechii papahkwenamuwaatwaau aweyuu taan e ishi ayaatwaau.

2 Timothy 4:18

Wesh Utipeyihchikeu nika wiihkuchihiihkw misiwe taan che ishi utihtahukuyaan chekwaan e maayaatahch kaye wiya nika peshiikw anite aniyuu uchimaawiniyuu kihchikiishikuhch kaa ihtakuniyich. Wiya kata wii chisteyihtaakuhaakanuu kaachiche neshta kaachiche. Amen.

2 Timothy 4:8

Shaash ayeskuushteu an chisheuchimaau astuutin aniyuu che miiyaakanuutwaau anichii che kuiskutaatisiitwaau. Eukw maak uyuu che pechi miit Utipeyihchikeu an kuiskw kaa ishi wiyaaskunichet miin pechi takushihke. Namui maak mikw niya nika uhchi miikuun uu e ishinaakuhch astutin, misiwe anichii saachihiiwewinihch kaa ishi pukuseyimutwaau Utipeyihchikeuh miin che takushiniyich kaye wiyawaau kata miyaakanuuch.

Hebrews 11:26

Aniyuu maak Moses e chii taapwehtahk, chii iteyihtam uste e miywaayich chechii maayeyimaakanuut aniyuu uhchi e chischeyimaat aniyuu Christ che takushiniyich ishpish wii chechii ayaat miisitisiiwiniyuu anite Egypt aschiihch. Shaash chii ayeskuweyihtam chechii pachishtinahk misiwe aniyuu wesh anite niikaanihch chii ishi ashuwaapahtam aniyuu chekwaayuu che miikut Chishemanituu e tipahamaakut.

James 1:12

Shaweyihtaakusuu an awen ekaa kaa shaakuuchihiikut taan e ishi kakwechihaakanuut. Wesh shaapushkahke taan e ishi kakwechihaakanuut chika miikuu Chishemanituuh e weyuuch miyeyihtaakuniyich pimaatisiiwiniyuu, aniyuu kaa itweyich cheshtinaash che miyaayich aniyuu kaa saachihiikut.

James 1:16

Niichishaanitikw kaa saachihiitakuch suuhk kuiskw wii ishi nisituhtamukw uu.

James 1:19

Ekaawii wanichischisikw uu niichishaanitikw kaa saachihiitakuch. Misiwe awen suuhk muush yaakwaau chipaawii nituhtam, chipaa maamituneyihtam kaye taan waa itwet kaye namui tiiwehch chipaa uhchi chishuwaasuu.

James 1:9

Chiichishaanuu kaa chistimaatisiit chipaa miyeyihtam Chishemanituu e chisteyihtaakuhiikut.

1 Peter 1:4

ekw maak pekuseyimuyihkw chechii ayaayihkw an taan e ishi ayaat Chishemanituu che ishi miyaat utiiniimh chechii tipiyeusiyich. Kihchikiishikuhch maak chichii kanuweyihtamaakuwaau anite ekaa wiiskaat che wiinipayiyihch, kaye ekaa wiiskaat che wanaataniyich maak chechii paashikunaakuniyich.

2 Peter 1:11

Ekut kaye chechii uhchi mikw ishi piihtakahiikuyekw Chitipeyihchikemanuu kaye Chipimaachihiiweminuu Jesus Christ uchimaawinihch, aniyuu kaachiche che ihtakuniyich.

Revelation 2:9

Nichischeyihten taan e ishi nanehkaateyimuhiikuyekw. Nichischeyihten e chistimaatisiyekw mikw maak yaapach chimiisitisiinaawaau. Nichischeyihten taan e ishpish machaayimuumitaakuch anichii Jewa nititiskaanesinaan kaa itwetwaau, ekaa maak Jewa itiskaanesitwaau. Machimanituu e ihtaayich uhchiyuuch anichii.

Revelation 21:7

Eukw uyuu che ishi aanische miyak an awen che shaakuuchihtaakwe taan che ishi kakwechihiikut machi chekwaayuu. Kaye maak niya nika Uchishemanituumitutaakw ekw maak wiya che utawaashiimitutawak.

Revelation 3:18

Eukw uu che uhchi wiihtamaatakuch taan che ihtiyekw. E ihtaayaan utinaahkw ushaaushuuliyaanaapiskw. Uu ushaaushuuliyaanaapiskw ishkutehch chii tataakanuu chechii payehchihtaakanuuhch. Ayaawekwe maak ekw che weyuuchisiyekw Chishemanituu ishi e ihtaat. Utinamukw kaye e waapaasikwaauh machunisha chechii chichishkamekw ekaa chechii shaakweyimuyekw wesh namui ekw chika uhchi musheshkatenaawaau. Kaye utinamukw nituhkuiin che ashtaayekw chischiisikuwaahch chechii waapahtamekw.