James 2:18 - Chishemanituu Utayimuwin: Kaa Uskaach Testament

¹⁸ Kata chii ishinaakun pasch awenichii chechii itwetwaau, “Chitayaan taapwehtamuwin chiya, ekw niya nimiyu atushchen.” Nipaa itaau uu awen, “Pechi waapahtiih aahch chitaapwehtamuwin ekaa asitinaman chimiyuu atushchewin ekw maak che waapahtiitaan niya nimiyu atushchewin e asitinamaan anit nitaapwehtamuwin.”

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁸ ᑲᑕ ᒌ ᐃᔑᓈᑯᓐ ᐸᔅᒡ ᐊᐌᓂᒌ ᒉᒌ ᐃᑗᑣᐤ, ᒋᑕᔮᓐ ᑖᐺᐦᑕᒧᐎᓐ ᒋᔭ, ᐁᒄ ᓂᔭ ᓂᒥᔪ ᐊᑐᔥᒉᓐ᙮ ᓂᐹ ᐃᑖᐤ ᐆ ᐊᐌᓐ, ᐯᒋ ᐙᐸᐦᑏᐦ ᐋᐦᒡ ᒋᑖᐺᐦᑕᒧᐎᓐ ᐁᑳ ᐁ ᐊᓯᑎᓇᒪᓐ ᒋᒥᔫ ᐊᑐᔥᒉᐎᓐ ᐁᒄ ᒫᒃ ᒉ ᐙᐸᐦᑏᑖᓐ ᓂᔭ ᓂᒥᔪ ᐊᑐᔥᒉᐎᓐ ᐁ ᐊᓯᑎᓇᒫᓐ ᐊᓂᑦ ᓂᑖᐺᐦᑕᒧᐎᓐ᙮

James 2:18 Iomraidhean Croise

Romans 14:23

An awen yaapach kaa miichit miichimiyuu e iteyihtahk ekaa chipaa uhchi miichuu ihtakuniyuu e ishi ataameyihtaakusit aniyuu e ihtit. Wesh ihtuutam aniyuu chekwaayuu e taapwehtahk ekaa chipaa uhchi ihtuutam. Michihpin e ihtuutamuwaauhkwe chekwaan e taapwehtamukw ekaa chipaa uhchi ihtuutenaanuu chimachituutenaanuu.

Romans 3:28

Eukw maak uu e ishi wiihtamuhkw. E taapweyimaat awen Jesus ekut mikw wehchi ishinaakuniyich ukuiskutaatisiiu chechii ishi kanawaapamikut Chishemanituu, namui wii aniyuu e nanihiihtamuwaat uwiishuwewiniyuu.

Romans 4:6

Eukw uyeyuu kaa aayimuutahk aniyaa chisheuchimaau David. Chii aayimuumeu e ishpish shaweyihtaakusiyich aniyuu aweyuu ukuiskutaatisiiu kaa ishi kanawaapamikuyich Chishemanituu. Namui wii aniyuu taan e ishi miyu atushchetwaau wehchi ukuiskutaatisiiuch ishi kanawaapamikutwaau Chishemanituu.

Romans 8:1

Namui ekw nishuuwanaachimikuuch Chishemanituu anichii awenichii Jesus Christ kaa wiichewaatwaau.

Romans 9:19

Maaskuuch peyakw awen anit e tashiyekw nipaa chii itikw, “Taapwe uu e ishinaakunikwe taanite yaapach wehchi ataameyimaat Chishemanituu aweyuuh chekwaayuu. Ihtaau aa awen chechii niskaustamuwaat utiteyihtamuwiniyuu.”

1 Corinthians 13:2

Kaye maak aat miikuyaan chechii kaschihuyaan e chischiwehiicheyaan, kaye maak aat misiwe chischeyihtamaan niya taan e ishi ekaa chischeyihtahkwaau kutakach awenich, kaye aat miikuyaan misiwe chechii chischeyihtamaan chekwaan ekaa uhchi chischeyihtamihiiwaanuuhch anite utaahch kaye maak aat ayaayaan taapwehtamuwin chechii aahtinamaan wachiih ekaa maak ayaayaan saachihiiwewin yaapach namui mitun chekwaan nipaa uhchi iteyihtaakusin.

2 Corinthians 5:17

Iskutak Christ e ihtaayich e ishi tipeyihtaakusit awen tekash ushchihtaakanuyuu upimaatisiiwin. Taan kaa iteyihtaakusit weskach shaash miyaaupayiniyuu. Misiwe chii ishi uschihaakanuu upimaatisiiwinihch.

2 Corinthians 7:1

Niwiichewaakanitikw, misiwe taan kaa itwet Chishemanituu cheshtinaash che ihtuutamaatahkw taapwe kata ihtuutam. Payehchihiisutaau maak ekaa mitun chechii ihtakuhch machihtwaawin chiiyuunaahch kaye chitahchaahkunaahch. Wesh ekut e nuuhkuhtaayihkw e nanihchiishtuuhkw Chishemanituu tekash e pachishteyimisuyihkw chechii atushkuukw.

Galatians 5:6

Namui wiyeshin chestinuwaachishukuwaahche maak ekaa chestinuwaachishukuwaahche e wiichewachiht Jesus Christ. An chihchiwe e iteyihtaakuhch eukuu chechii saachihiituyihkw e taapweyimahkw.

1 Timothy 1:5

Wesh uyuu itashumitwaawenich ekut chechii uhchi saachihaatwaau aweyuu e payehkaniyikwaau utehiiwaau kaye e chischeyihtahkwaau kuiskw e chii ihtitwaau kaye maak e suuhcheyihtaakuniyich utaapwehtamuwinawaau. Wesh uu ishi nanaakataweyihtamihiikuyine chechii ishi wiihtamuutwaau ekute chechii uhchi tekash saachihaatwaau aweyuu utehiiwaahch.

Titus 2:7

Chiya maak kaye chipaawii waapahtiyaauch taan che ishi chischinuwaapamiskwaau e miyutuutamin misiwe taan e ihtiyin. E chiskutamaacheyin kaye chipaa nuukuhtaan e iipwaahkaayin kaye kuiskw chipaa ishi chischinuhamaachen.

Hebrews 11:31

Kaye maak aniyaanaa iskweu kaa chii ataawet wiiyuu, Rahab kaa ishinihkaasut, kaye wiya chii taapweyimeu Chishemanituu iskutak kaa piihtakahaat anite wiichihch aniyuu Israel iinuu kaa chiimuusaapahtamiyich aniyuu ihtaawiniyuu kaye kaa wiichihaat ekaa chechii nipahaakanuyich. Aniyuu maak kaa ihtit namui uhchi nipahaakanuu iskutak kaa nipahaakanuyich aniyuu iinuu anite Jericho kaa wiichiyich ekaa kaa nanihiihtuwaayich Chishemanituuh.

Hebrews 11:33

Wesh kaye wiyawaau, muyaam aniyuuh kutak kaa ihtiyich, chii taapweyimeuch kaye wiyawaau Chishemanituu ekw maak kaa shaakuuchistaatwaau uchimaawinh utah aschiihch, kaye kuiskw chii ihtuuch e niikaanishkuwaatwaau iinuu, kaye mihchetu chii waapahtamuch chekwaayuuh e ispayikwaauh taan aniyuuh Chishemanituu kaa itweyich cheshtinaash che ispayiyikwaauh. Chii chipahamuweuch mistatimuh utuuniyuuh ekaa chechii nipahiikutwaau.

Hebrews 11:6

Namui awen chika chii naheyihtamiheu Chishemanituu paatish taapweyimaate. Wesh an awen kaa wii pechi naataat Chishemanituu chipaa taapwehtam e ihtaayich Chishemanituu kaye e miyutuutawaayich aniyuu suuhk kaa wii chischeyimikut.

James 2:14

Niichishaanitikw, taan ishi wiyaahpach awen e itwet, nitaapweyimaau Chishemanituu, ekaa maak miyutuutamuwaat aweyuu. Katachii pimaachihiikuu aa mikw e itwet, nitaapwehten.

James 3:13

Ihtaau aa awen anit e tashiyekw e kachehtaaweyihtahk kaye e ayaat nisituhtamuwiniyuu. Ekush kata waapahtiiweu uyuu kuiskw e ishi pimaatisiit kaye maak e atushchet chipaa nuukuniyuu e kachehtaaweyihtahk aniyuu uhchi e tipihteyimisut.