James 1:12 - Chishemanituu Utayimuwin: Kaa Uskaach Testament

¹² Shaweyihtaakusuu an awen ekaa kaa shaakuuchihiikut taan e ishi kakwechihaakanuut. Wesh shaapushkahke taan e ishi kakwechihaakanuut chika miikuu Chishemanituuh e weyuuch miyeyihtaakuniyich pimaatisiiwiniyuu, aniyuu kaa itweyich cheshtinaash che miyaayich aniyuu kaa saachihiikut.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹² ᔕᐌᔨᐦᑖᑯᓲ ᐊᓐ ᐊᐌᓐ ᐁᑳ ᑳ ᔖᑰᒋᐦᐄᑯᑦ ᑖᓐ ᐁ ᐃᔑ ᑲᑴᒋᐦᐋᑲᓅᑦ᙮ ᐌᔥ ᔖᐳᔥᑲᐦᑫ ᑖᓐ ᐁ ᐃᔑ ᑲᑴᒋᐦᐋᑲᓅᑦ ᒋᑲ ᒦᑰ ᒋᔐᒪᓂᑑᐦ ᐁ ᐌᔫᒡ ᒥᔦᔨᐦᑖᑯᓂᔨᒡ ᐱᒫᑎᓰᐎᓂᔫ, ᐊᓂᔫ ᑳ ᐃᑗᔨᒡ ᒉᔥᑎᓈᔥ ᒉ ᒥᔮᔨᒡ ᐊᓂᔫ ᑳ ᓵᒋᐦᐄᑯᑦ᙮

James 1:12 Iomraidhean Croise

Matthew 10:22

Misiwe awenichii chika uhkaatikuwaauch e nuushuushkuwiyekw. An maak awen ekaa che nuuhtipuuniyikwe e pechi nuushuushkuut eukw an che pimaachihaakanuut.

Matthew 25:34

Ekw che itaat an Chisheuchimaau aniyuu iinuu anite unahiiwinihch kaa ihtaayich, ‘Aashtamukw chiyawaau kaa shaweyimitaakw Nuuhtaawii. Aashtamukw, utinamukw an chisheuchimaawin an kaa ashutamaakuyekw iskutak maauch niishtam kaa usihtaakanuuhch uu aschii.

Luke 6:22

Chishaweyihtaakusinaawaau chiyawaau kaa uhkaateyimikuyekw, ekaa piskaatikuyekw, e maayeyimikuyekw kaye e machaayimuumikuyekw niya uhchi e nuushuushkuuyekw, Iinuu Ukusisa.

Romans 5:4

Ekw maak an wetaach e siipiiwesiikw chipimaatisiiwinaahch Chishemanituu naheyihtamihiikuu. Uyuu maak e ishi naheyihtamihiihkw ekut wehchi cheshtinaateyihtamuhkw eshkw tekash che chischeyihtamihiitahkw uchisteyihtaakusuwin.

Romans 8:28

Chichischeyihtenaanuu maak misiwe chekwaayuu e ispayiyich upimaatisiiwiniihch aniyuuh kaa saachihiikut Chishemanituu ihtuutamuweu misiwe chechii miyutuutaakuyich. Ekun e ihtuutamuwaat aniyuuh wiya kaa iteyihtahk chechii wiyaapamaat chechii utiiniimit.

1 Corinthians 2:9

Wesh itashteu Chishemanituu utayimuwinihch, Namui awen uhchi waapahtam kaye namui awen uhchi pehtam nesht namui awen uhchi chischeyihtam taan kaa ishi ayeskuushtamuwaat Chishemanituuh aniyuuh kaa saachihiikut.

1 Corinthians 8:3

An awen kaa saachihaat Chishemanituu eukw uu chescheyimikut Chishemanituu.

1 Corinthians 9:25

Misiwe awen kaa kakwechiskatihiichet pisikw kakwechipayihiisuu etituu chechii kaschihut. Ekute mitun e ishi pachishtinahk upimaatisiiwin. Uchii maak kaa kakwechiskatihiichetwaau eukw uyuu e ihtitwaau e wii ayaatwaau kaaniyuwiniyuu weipishchiish mikw che ihtakuniyich. Ekun maak e ihtiihkw kaye chiyaanuu chechii ayaayihkw an kaaniyuwin kaachiche che ayaayihkw.

2 Timothy 2:15

Suuhk muush ihtuut an maauch e kaschihuyin e ihtuutaman chekwaan aniyuu che naheyihtamahiikut Chishemanituu, mwehch awen suuhk kaa aapatisiit ekaa ihtakuniyich taan che ishi pimaamihiikut utaapatisuwin. Awen kuiskw kaa ishi chiskutamaachet taan e ishi taapwemakaniyich Chishemanituu utayimuwin ekun chipaa ihtin.

2 Timothy 4:8

Shaash ayeskuushteu an chisheuchimaau astuutin aniyuu che miiyaakanuutwaau anichii che kuiskutaatisiitwaau. Eukw maak uyuu che pechi miit Utipeyihchikeu an kuiskw kaa ishi wiyaaskunichet miin pechi takushihke. Namui maak mikw niya nika uhchi miikuun uu e ishinaakuhch astutin, misiwe anichii saachihiiwewinihch kaa ishi pukuseyimutwaau Utipeyihchikeuh miin che takushiniyich kaye wiyawaau kata miyaakanuuch.

Hebrews 10:32

Suuhk maak maamituneyihtamihiikuukw niishtam taan kaa ishi pehtamekw e aayimuumaakanuut Christ. Maamituneyihtamukw taan kaa ishi suuhchikaapuuyekw kaa nanehkaachihiikuyekw iskutak kaa pimaachihuyekw. Naashch taapwe chii yaaitan chitaapwehtamuwinawaau.

Hebrews 11:17

Miin maa maamituneyimaahkw Abraham. Aniyuu e chii ishpish taapwehtahk mitun chii wii ihtuutam chechii machishtawehamaat ukusisa Isaac. Eukw uyuu kaa wii ihtit Abraham wesh ekun kaa itashumikut Chishemanituu chechii ihtit e chii wii nituu chischeyimikut taapwe che nanihiihtamukwe. Mitun maak chii ayeskuwiyuu Abraham chechii ihtuutamuwaat taan kaa itashumikut Chishemanituu, aat e chii wiihtamuwaakanuut cheshtinaash che shaweyimaakanuut.

Hebrews 12:5

Chichii wanichischisin aa taan kaa itisk Chishemanituu. Chichii wii kaachiichimikw, chiyawaau tipiiwe utawaashiim. Chii itweu, Nikus, iskutak Utipeyihchikeu e kuiskunisk suuhk yaakwaau ishi utinh. Ekaawii niihteyihta iskutak e wii kuiskunisk.

Hebrews 6:15

Chii siipiiwesiyuu maak Abraham e ashuwaapit che ishpish ihtuutamuwaakanuut aniyuu kaa itaakanuut cheshtinaash che ihtuutamuwaakanuut. Chek mihchetu pipunh kaa ashuwaapit. Ekw kaa miikut Chishemanituu aniyuu kaa itweyich cheshtinaash che miikut.

James 2:5

Yaakwaau nituhtamukw niichishaanitikw. Namui aa aniyuu kaa chistimaatisiyich utah aschiihch kaa ihtaayich uhchi wiyeyimeu Chishemanituu mistahii chechii ayaayich taapwehtamuwiniyuu kaye chechii ayaayich chisheuchimaawiniyuu aniyuu kaa itwet cheshtinaash che miyaat aniyuu kaa saachihiikut.

James 5:11

Wesh taapwe shaweyihtaakusuuch chititeyimaanuuch anichii ekaa uhchi nuuhtipuuniitwaau. Chichii pehtenaawaau taan kaa ishpish siipiiwesiit Job mekwaach kaa aayimuhut. Chichischeyimaanuu maak taan kaa ishi miyupayihtamaakut Utipeyihchikeu iskutak kaa chiishi aayimuhut. Saakaschineshkaakuu chishewaatisiiwiniyuu Utipeyihchikeu kaye saakaschineshkaakuu e chistimaacheyimaat aweyuu.

1 Peter 3:14

Aat ishinaakuhch chechii nanehkaachihiikuyekw e kuiskutaatisiyekw uhchi, chika shaweyimikuwaau Chishemanituu. Ekaawii kakushtaahkuch wiyesh e wii ihtuutaataakuch awenichii, ekaawii chika uhchi mukushkaateyihtenaawaau,

1 Peter 4:13

Teyakuch chipaa miywaatenaawaau e wiichihiiweyekw taan kaa ishi waawiisacheyihtamihaakanuut Christ, ekw maak che saakaschineshkaakuyekw miywaatamuwin iskutak pechi nuukuhtaakanuyiche uchisteyihtaakusuwin.

1 Peter 4:14

Wesh chiishpin maayeyimikuyekwe Christ e nuushuushkuwekw, chishaweyihtaakusinaawaau wesh ekut wehchi chischeyihtaakuhch taapwe e wiicheutaakw kaa chisteyihtaakusit Ahchaahkw, Chishemanituu Utahchaahkwa.

1 Peter 5:10

Iskutak maak chiishi nanehkaateyimuyekwe chika ihtuutaakuwaau Chishemanituu miin chechii wiikaapuwekw, chika miikuwaau maskuushiiwiniyuu, chika yaaichikaapuuhiikuwaau, kaye chika sakascheyimuhiikuwaau. Chishemanituu an kaa ayaat misiwe shaweyihchichewiniyuu chiwiishaamikunuu chechii wiichihiiweyihkw anite kaachiche uchisteyihtaakusuwinihch Christ e ihtaayich uhchi.

1 Peter 5:4

Ekw maak iskutak pechi nuukusite an maauch kaa niikaaneyihtaakusit maanishchaanishuiinuu che miikuyekw an maauch e chisteyihtaakuhch kaaniyuwin an ekaa wiiskach che uhchi paasikunaakuhch.

1 John 4:19

Wiya niishtam chichii saachihiikunuu Chishemanituu. Ekun maak wehchi saachihiiweyihkw.

Revelation 2:10

Ekaawii kushtaachikw taan che ishi nanehkaateyimuyekw. Machimanituu chika kakwechihiikuwaau e ihtuutaataakw pasch chechii chipahukuwekw chipahutuukamikuhch. Mitaahtw chiishikaauh chika ishpish nanehkaateyimunaawaau. Ekaawii maak puuniikw e taapweyimiyekw aat wii nipahiikuyekwe. Ekw maak che kaaniyuwiyekw chisheuchimaau astutin eukuu kaachiche pimaatisiiwin.”

Revelation 3:19

Wesh niwiihtamuwaauch wenipayitwaauh anichii kaa saachihiikwaau kaye nikuiskunaauch. Suuhk maak chihchiwe iteyihtamukw e taapweyimiyekw, kweskaatisiikw, nakatamukw chimachihtwaawinawaauh.

Revelation 3:21

An awen che shaakuuchihtaakwe taan che ishi kakwechihiikut machi chekwaayuu nika miyaau chechii wiitapimit nichisheuchimaau tehtapuwinihch. Mwehch niya e chii shaakuuchihtaayaan misiwe machi chekwaan Nuuhtaawii nichii miikw chechii wiitapamak uchisheuchimaau tehtapuwinihch.”