Colossians 3:3 - Chishemanituu Utayimuwin: Kaa Uskaach Testament

³ Wesh taapaa ekw ihtakun aniyene kaa chii ishi pimaatisiyekw. Kaachisteuh chihchiwe chipimaatisiiwinawaauh anite Chishemanituu e ihtaat e wiichichewekw Christ.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³ ᐌᔥ ᑖᐹ ᐁᒄ ᐃᐦᑕᑯᓐ ᐊᓂᔦᓀ ᑳ ᒌ ᐃᔑ ᐱᒫᑎᓯᔦᒄ᙮ ᑳᒋᔅᑌᐤᐦ ᒋᐦᒋᐌ ᒋᐱᒫᑎᓰᐎᓇᐙᐤᐦ ᐊᓂᑌ ᒋᔐᒪᓂᑑ ᐁ ᐃᐦᑖᑦ ᐁ ᐐᒋᒉᐌᒄ ᙭᙮

Colossians 3:3 Iomraidhean Croise

Matthew 11:25

Ekut maak Jesus kaa ayimihaat e itwet, “Nuuhtaawii, chinanaaskumitin e chii waapahtiitwaau anichii awenichii ekaa uhchi chiskutamuwaakanuutwaau aniyuuh chekwaayuuh kaa kaatuutwaau kaa kachehtaaweyihtahkwaau.

John 14:19

Namui naashch chineush nika uhchi waapamikuch iinuuch utah aschiihch, mikw chiyawaau chika waapaminaawaau. Chika pimaatisiinaawaau kaye chiyawaau wesh niya nipimaatisiin.

John 3:16

Wesh Chishemanituu e ishpish chii saachihaat misiwe aweyuu utah aschiihch chii miiweu kaa peyakushiyich Ukusisa, misiwe aweyuuh kaa taapweyimaayich ekaa chechii nishuunaatisiyich maak chechii ayaayich kaachiche pimaatisiiwiniyuu.

John 4:14

Awen maak che minihkwekwe aniyuu nipiiyuu che miyak chechii minihkwet, namui wiiskaat miin chika uhchi paahkutaahtam. Wesh an nipii che miiweyaan kata piihchishkaakuu muyaam e uhchi muuschichuuniyich kata ishinaakuniyuu, eukw maak uu kaa pimaachihiiwemakahch nipii anit chechii uhchi ayaat awen kaachiche pimaatisiiwiniyuu minihkwete.”

John 5:21

Uhtaawiimaau wanishkaaneu aweyuu nipuwinihch uhchi ekw maak maayaat pimaatisiiwiniyuu, ekun kaye nihaau e ihtit Ukusisimaau, miyeu aweyuu pimaatisiiwiniyuu aniyuu waa miyaat.

John 5:24

“Kuiskw chiwiihtamaatinaawaau, an awen che pechi nituhtamukwe taan e iteuch kaye taapwehtawaate aniyuu kaa pechi itishahuyich kaachiche kata pimaatisiyuu. Namui kata uhchi wiyaaskunaakanuu wesh nipuwinihch chii uhchi utinaakanuu ekw pimaatisiiwinihch kaa ishi pachishtinaakanuut.

John 5:40

Mikw maak namui chiwii pechi naasinaawaau chechii uhchi ayaayekw pimaatisiiwin.”

Romans 5:10

Eshkw maak mekwaach ekaa mitun uhchi aapateyimahkw Chishemanituu yaapach chii uhtinam taanite chechii uhchi ishinaakuniyich chechii ati miyu wiicheuhkw. Kaa nipistamaakuuhkw Christ ekut kaa uhchi nihiipayihtaat uyuu chechii ishinaakuniyich. Ekw maak anuhchiish e miyuwicheuhkw Chishemanituu cheshtinaateyihtaakun che pimaachihiitahkw Jesus upimaatisiiwiniihch uhchi.

Romans 5:21

Taapwe kiipaa suuhchipayuu machihtwaawin. Wesh mitun tipeyimikuuch awenichii eukw maak wehchii iteyihtaakuniyich chechii nipitwaau. Etituu maak Chishemanituu uchishewaatisiiwin suuhcheyihtaakuniyuu. Ukuiskutaatisiiuch chit ishi kanawaapamikunuu aniyuu uhchi taan kaa ishi ihtuutamaakuuhk Jesus Chitipeyihchikeminuuh. Ekut maak chechii uhchi ayaauhkw kaachiche pimaatisiiwiniyuu.

Romans 6:11

Mwehch awenichii e nipitwaau ekaa tipeyimikutwaau machaatisiiwiniyuu ekun chipaa ishi kanawaapamisunaawaau. Chipimaatisiinaawaau ekw chechii naheyihtamihekw Chishemanituu e wiicheumekw Jesus Christ.

Romans 6:2

Namui chika chii ishinaakun uu. Namui mechim chipaa uhchi ishi maamituneyihtam awen. Chipaa ishi kanawaapamisunaanuu mwehch e chii nipistamuhkw taan kaa ishi tipeyimikuyihkw machihtwaawin. Namui ekw machihtwaawinihch chipaa uhchi ishi pimaatisiinaanuu.

Romans 8:2

Wesh Chishemanituu Utahchaahkwa chitihtuutaakunuu chechii pimaatisiyuuhkw Christ Jesus uhchi. Eukuu kaa aapihkunit taan kaa ishi tipeyimikuch machaatisiiwiniyuu kaye nipuwiniyuu.

1 Corinthians 15:45

Masinaateu anite Chishemanituu utayimuwinihch e itashtech, “An niishtam naapeu, Adam, chii ishihaakanuu chechii pimaatisiit.” An maak maahchishtai Adam eukuu Christ, Ahchaahkuu wiya, wiya miiweu pimaatisiiwiniyuu.

1 Corinthians 2:14

An awen ekaa kaa ayaawaat Chishemanituuh Utahchaahkuyuu, namui katachii utinam aniyuuh miiwewinh taan e ishi miiweyich Chishemanituuh Utahchaahkuyuuh. Uu awen namui taapwe nisituhtam chekwaayuuh uyuuh, namui wiyesh itaapatanh iteyihtam. Wesh mikw anichii Payehchi Ahchaahkwa kaa ayaawaatwaau kata chii nisituhtamuch taan e ishi chihchiwe iteyihtaakuniyikwaauh uyuuh miiwewinh.

2 Corinthians 5:14

E chischeyihtamaahch taan e ishpish saachihiikuyaahch Jesus Christ eukw uu e shiihchimikuyaahch uu chechii itaapatisiyaahch. Wesh Chichischeyimaanuu wiya e chii nipuushtamuwaat misiwe aweyuuh ekw maak chechii ishi kanawaapahtaakanuuhch misiwe awen e chii nipit.

2 Corinthians 5:7

Wesh utah e pimaatisiihkw an taan e ishi taapwehtamukw chitaspeyimututenaanuu aat eshkw ekaa waapahtamuhkw taan che ishi miitahkw Chishemanituu.

Galatians 2:20

Wesh mwehch taapwe e chii wiich nipiimak Jesus kaa chiistaaskuhwaakanuut ishinaakun. Anuhchiish maak namui ekw niya nichischinupayihtaan nipimaatisiiwin. Wiya Jesus chischinupayihtaau nipimaatisiiwiniyuu wesh nipiihchishkaakw. Ekw maak uu anuhchiish e ishi pimaatisiyaan nipimaatisiin e taapweyimak an kaa saachihiit kaye kaa pachishtinisut chechii nipahaakanuut niya uhchi, eukw Chishemanituu Ukusisa.

Ephesians 3:9

Kaye maak, niya nichii miikw misiwe aweyuuh chechii chischeyihtamihiimach aniyuu chekwaayuu ekaa uhchi chischeyihtaakuniyich kaa ishi wiyeyihtamikupane Chishemanituu che ihtuutahk. Chishemanituu an misiwe chekwaayuu kaa ushihtaat chii kanuweyihtamikupane mikw uyuu taan kaa ishi wiyeyihtamikupane che ihtuutahk anite niishtamihch.

Philippians 4:7

Ekw maak Chishemanituu che miitaakw chiyaameyihtamuwiniyuu ekaa chechii aayimeyihtamiskaakuwekw chekwaayuu chimituneyihchikaniwaahch maak chitehiiwaahch aniyuu e taapweyimekw Christ Jesus. Eukw uu chiyaameyihtamuwin kaa aayimuutech namui tekash chii nisituhtaakanuu taan e ishpish miyeyihtaakuhch.

Colossians 1:5

Anit uskach kaa waawiihtamaakuyekw miywaachimuwin, uu taapwewin ayimuwin kaa ishinihkaatech, ekut kaa pehtamekw taan e ishi ihtakuhch aspeyimuwinihch. Ekw maak aspeyimuwin e ayaayekw ekut wehchi ishinaakuhch chechii taapweyimekw Christ kaye chechii saachihiiweyekw. Uu maak taan e ishi aspeyimuyekw kihchikiishikuhch kanuweyihtaakanuu.

Colossians 2:20

Christ kaa nipit mwehch kaye chiyawaau e chii nipiyekw ishinaakun. Namui maak ekw chitipeyimikuwaauch anichii ahchaahkuch kaa waawiishuwetwaau taan che ishi pimaatisiinaanuyich utah aschiihch. Chekwaan maak wehchi ishi pimaatisiyekw mwehch eshkw e tipeyimikuyekw uu aschii.

Colossians 2:3

Mikw Christ chimiikunuu taapwe chechii nisituhtamuhkw Chishemanituu uweyuuch kachehtaaweyihtamuwin kaye uweyuuch chischeyihtamuwin.

Colossians 3:4

Christ e wiichewekw chihchiwe pimaatisiiwin chitayaanaawaau. Kaau maak takushihke utah aschiihch ekut kaye chiyawaau che asich nuukuhiikuyekw kaye che asich chisteyihtaakuhiikuyekw chisteyihtaakuhaakanuute.

Hebrews 7:25

Tekash chika chii pimaachiheu misiwe aweyuuh kaa taapweyimikut e naataayich Chishemanituuh. Wesh kaachiche pimaatisiyuu ekw maak muush chechii ayimiheshtamuwaat utiiniim.

1 Peter 3:4

Uste iteyihtaakun kuiskw chechii ishi pimaatisiyekw kaye maak chechii chiyaamaatisiyekw chechii uhchi miyunaakusiyekw. Eukw uyuu maauch miyunaakusit iskweu e ishi pimaatisit kaye maak eukw uyuu e ihtuutaakut muush chechii miyunaakusit. Eukw uyuu maauch meyuunahk Chishemanituu iskweuh chechii ishi pimaatisiyich.

1 Peter 4:2

Ekw maak taan eshkw che ishpish pimaatisiikwe utah aschiihch namui ekw chipaa uhchi tipeyimikuu wiya taan e ishi mushteneyihtahk tipiiwe chechii itaatisiit maak uste Chishemanituu taan e ishi nituweyimikut eukw aniyuu chipaa wii nanaakatuweyihtamihiikuu chechii ihtuutahk.

1 John 3:2

Niichishaanitikw kaa saachihiitakuch, kuutawaashiimitutaakunuu Chishemanituu anuhchiish, mikw maak eshkw namui nuukun taan che iteyihtaakusiihkw, mikw chichischeyihtenaanuu iskutak takushihke mwehch wiya kaa iteyihtaakusit ekun che iteyihtaakusiihkw. Wesh chika waapamaanuu taan nihaau e iteyihtaakusit.

Revelation 2:17

“Misiwe chiyawaau kaa nituhtamekw, suuhk wii nisituhtamukw taan e itaat Kaa payehchisiit Ahchaahkw umaamuuayimihaauh. Anichii che shaakuuchihtaawaakwenich taan che ishi kakwechihiikutwaau machi chekwaayuu nika ashamaauch aniyuu kihchikiishikw aaihkunaauh kaa kaayaakanuyich. Nika miyaauch asinii e waapaapischisiyich anit mesinaateyich e uskaayich ishinihkaasuwiniyuu. Namui maak awen chischeyihtam uyuu ishinihkaasuwiniyuu mikw an awen che miyaakanuukwe eukun che chischeyihtahk.”