2 Peter 3:10 - Chishemanituu Utayimuwin: Kaa Uskaach Testament

¹⁰ Mikw maak namui niyaakan chika uhchi muushihtaakanuyuu Utipeyihchikeu uchiishikaam, muyaam e iteyihtaakuhch chimutisk taanit waa piihchech waaskahiikaniyuu e wii kachemutit ekun che iteyihtaakuhch. Anit maak aniyuu Utipeyihchikeu uchiishikaam utihchipayiche uyuuh chiishikw chika paasikunaakun. Naasch taapwe chika chishewepayuu ati paasikunaakuhkwaawenh. Misiwe taan e ishi ihtakuhch chiishikuhch kata atihtiteuh che ishpish mista chishitech. Aschii kaye maak misiwe chekwaan utah kaa ihtakuhch, chika ati mestaahkahteu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁰ ᒥᒄ ᒫᒃ ᓇᒧᐃ ᓂᔮᑲᓐ ᒋᑲ ᐅᐦᒋ ᒨᔑᐦᑖᑲᓄᔫ ᐅᑎᐯᔨᐦᒋᑫᐤ ᐅᒌᔑᑳᒻ, ᒧᔮᒻ ᐁ ᐃᑌᔨᐦᑖᑯᐦᒡ ᒋᒧᑎᔅᒃ ᑖᓂᑦ ᐙ ᐲᐦᒉᒡ ᐙᔅᑲᐦᐄᑲᓂᔫ ᐁ ᐐ ᑲᒉᒧᑎᑦ ᐁᑯᓐ ᒉ ᐃᑌᔨᐦᑖᑯᐦᒡ᙮ ᐊᓂᑦ ᒫᒃ ᐊᓂᔫ ᐅᑎᐯᔨᐦᒋᑫᐤ ᐅᒌᔑᑳᒻ ᐅᑎᐦᒋᐸᔨᒉ ᐅᔫᐦ ᒌᔑᒄ ᒋᑲ ᐹᓯᑯᓈᑯᓐ᙮ ᓈᔅᒡ ᑖᐺ ᒋᑲ ᒋᔐᐌᐸᔫ ᐊᑎ ᐹᓯᑯᓈᑯᐦᒀᐌᓐᐦ᙮ ᒥᓯᐌ ᑖᓐ ᐁ ᐃᔑ ᐃᐦᑕᑯᐦᒡ ᒌᔑᑯᐦᒡ ᑲᑕ ᐊᑎᐦᑎᑌᐤᐦ ᒉ ᐃᔥᐱᔥ ᒥᔅᑕ ᒋᔑᑌᒡ᙮ ᐊᔅᒌ ᑲᔦ ᒫᒃ ᒥᓯᐌ ᒉᒀᓐ ᐅᑕᐦ ᑳ ᐃᐦᑕᑯᐦᒡ, ᒋᑲ ᐊᑎ ᒣᔅᑖᐦᑲᐦᑌᐤ᙮

2 Peter 3:10 Iomraidhean Croise

Matthew 24:35

Kihchikiishikw neshta aschii kata iskwaapayuu mikw maak nitayimuwin namui wiiskaat kata uhchi iskwaapayuu.”

Mark 13:31

Kihchikiishikw neshta aschii kata iskwaapayuu mikw maak nitayimuwin namui wiiskaat kata uhchi iskwaapayuu.”

Luke 12:39

Wii nisituhtamukw uu. Muyaam awen wiichihch e ihtaat chischeyimaat maak chimutiska che pechi takushiniyich, chipaa ayeskuwiishtuweu. Aatuchiwii chipaa uhchi pachishtineu mikw chechii ishi kachemutiyich anit uwaaskaahiikanimihch.

Romans 8:20

Wesh misiwe chekwaayuu kaa ishi ushihtaat Chishemanituu chii ishihtaau chek chechii ati wanaataniyich. Namayeu maak uu kaa ishi nituweyihtamuumakahch misiwe an kaa ishi ushihtaakanuuhch chechii ishinaakuhch. Wiya Chishemanituu kaa iteyihtahk uyuu chechii ishinaakuniyich.

1 Corinthians 1:8

Wiya chika wiichihiikuwaau muush chechii suuhchikaapuwekw taapwehtamuwinihch ekw maak namui chika uhchi ihtakun taan che ishi ataameyihtaakusiyekw iskutak utihchipayiche aniyuu e chiishikaayich che takushihk Utipeyihchikeu Jesus Christ.

1 Corinthians 5:5

Pachishtinaakw an naapeu anite machimanituu e ihtaayich chechii nishuuwanaachihtaakanuyich taan e ishi machi nituweyihtamuumakaniyich wiyaas. Ekw maak utahchaahkwa che pimaachihaakanuyich aniyuu e chiishikaayich pechi takushiniyichenh Utipeyihchikeuh Jesus.

2 Corinthians 1:14

Maaskuuch namui tekash chinisituhtuunaan anuhchiish. Nipukuseyimun maak tekash chechii ati nisituhtuuyaahch. Ekw maak aniyuu e chiishikaayich Jesus Chitipeyihchikeminuu takushihke ekw che maamihchihiitaahch mwehch chiyawaau che ishi maamihchihiyaahch.

1 Thessalonians 5:2

Wesh chimiyu chischeyihtenaawaau chiihtihtawii che utihchipayihch an e chiishikaach Utipeyihchikeu che takushinit, mwehch awen chimutiska e piihtukaakut e tipiskaayich namui niyaakan chischeyihtam.

1 Thessalonians 5:4

Chiyawaau maak wii niichishaanitikw, namui chit ishi pimaatisiinaawaau e ishi pimaatisiitwaau anichii ekaa kaa chischeyimaatwaau Chishemanituu kaye kaa machituutahkwaau ekw maak namui chipaa uhchi pisiiwiikunaawaau utihchipayihche an e chiishikaach mwehch e ishi pasiiwiikut awen e utihtikut chimutiska.

2 Peter 3:11

E chischeyihtamekw maak uu che ispayihch, taanite chipaa ishi pimaatisiinaawaau chititeyihtenaawaau. Namui aa payehchisiiwinihch chipaa ishi pimaatisiinaawaau, tekash e ishi pachishteyihtamihiikuyekw chipimaatisiiwinawaauh Chishemanituu ishi e ihtaat,

2 Peter 3:12

kaye e pukuseyihtamekw Chishemanituu uchiishikaam che utihchipayiyich. Suuhk chipaa atuskuwaatwaau Chishemanituu che ishpish utihchipayiyich aniyuu uchiishikaam. Wesh an e chiishikaach misiwe chiishikuh kata atihtiteuh kaye kata wanaatanh. Ekw misiwe aniyuu waashtewin anite chiishikuhch kaa ihtakuhkwaauh kata atihtiteuh che ishpish wesa mistihkuyepayihch ishkuteu misiwe anite chiishikuhch.

2 Peter 3:7

Uyuuh maak chiishikw kaye an nete etituu ishi ispimihch, ekw maak uu aschii anuhchiish kaa waapahtamukw, yaapach Chishemanituu utayimuwin uhchi kanuweyihtaakanuu che ishpish utihchipayihch anit che wanaachihtaakanuuhkwaau. Kanuweyihtaakanuu an e chiishikaach anichii ekaa kaa aapateyimaatwaau Chishemanituu upimaatisiiwiniwaahch che wiyaaskunaakanuutwaau kaye che wanaachihaakanuutwaau ishkutehch.

Jude 1:6

Chischisiitutawaahkuch kaye anichii enchilich ekaa uhchi nanaakataweyihtahkwaau taan kaa ishpish miyaakanuutwaau tipeyihchichewiniyuu kaye kaa nakatahkwaau taanit kaa pachishtinaakanuutwaau chechii ihtaatwaau. Mekwaach kaachiche puuchisiyaapiih maahchikwaapihkaasuuch anite nihtaamihch tekash kaa ukaashteyaayich. ekute chepahukuutwaau Chishemanituu paatish utihchipayiyiche aniyuu naashch chesteyihtaakuniyich e chiishikaayich che wiyaaskunaakanuutwaau.

Revelation 16:15

Utipeyihchikeu maak iteu, “Muyaam chimutisk e iteyihtaakuniyich e takushihk ekun che iteyihtaakuhch niya takushiniyaane. Chika shaweyihtaakusuu maak an awen ekaa che kauhkusit mekwaach e ashuwaapit kaye che ayeskuushtaakwe uchekwaanimh mikw chechii ishi pushchishkahk ekw maak namui chika uhchi musheshkateu wiiwiite chechii pimaameyimut mushe anite e waapamaakanuut.”

Revelation 20:11

Ekw kaa waapahtamaan e mishaach chisheuchimaau tehtapuwin. Chii waapaau an tehtapuwin. Nichii waapamaau maak an awen kaa apit anit. Misiwe chiishikw ekw maak aschiiyuu chii ati paasikunaakuniyuuh uhchishkuu e ihtaat. Namui maak miin uhchi ihtakuniyuuh.

Revelation 21:1

Ekw kaa waapahtamaan e uskaach kihchikiishikw kaye aschii e uskaach. Wesh an weskach kihchikiishikw kaye an weskach aschii shaash chii paasikunaakunh. Chihchikamii kaye namui uhchi ihtakun.

Revelation 3:3

Chischisikw maa taan kaa ishi pehtamekw anite pechi kaye taan kaa ishi chiskutamaakuyekw. Nanihiihtamukw kaye ihtuutamukw an kaa ishi chiskutamaakuyekw. Kaye maak kweskaatisiikw, nakatamukw chimachituutamuwinawaauh. Wesh ekaa che uhchi wanishkaawekwe, nika takushin che pechi nituu wiyaaskunitikuch. Namui maak chika uhchi chischeyiminaawaau taaishpish nihaau che takushiniyaan muyaam chimutisk e ishpish ekaa chischeyimaakanuut taaishpish che takushinit.

Revelation 6:14

Chiishikw maak chii paasikunaakun muyaam masinahiikan e ati tihtipinikanuuhch ekun kaa ispayihch. Misiwe wachuuh ekw maak ministikw chii aahchipayuuh taanit kaa ihtakuhkwaauh uhchi.