2 Peter 2:14 - Chishemanituu Utayimuwin: Kaa Uskaach Testament

¹⁴ Namui wiiskaat puunipayuu nitawiin e ishi kanawaapamaatwaau iskweu. Namui chii puunihtaauch machituutamuwiniyuu. Wawiyesimeuch kaye aniyuu aweyuuh ekaa kaa yaaichikaapuyich taapwehtamuwinihch. Saakaschineyuu utehiiwaahch mushtenamaachewiniyuu. Maayaatisiyuuch uchii uyuu kaa iteyihtaakusitwaau,

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁴ ᓇᒧᐃ ᐐᔅᑳᑦ ᐴᓂᐸᔫ ᓂᑕᐐᓐ ᐁ ᐃᔑ ᑲᓇᐙᐸᒫᑣᐤ ᐃᔅᑴᐤ᙮ ᓇᒧᐃ ᒌ ᐴᓂᐦᑖᐅᒡ ᒪᒋᑑᑕᒧᐎᓂᔫ᙮ ᐗᐎᔦᓯᒣᐅᒡ ᑲᔦ ᐊᓂᔫ ᐊᐌᔫᐦ ᐁᑳ ᑳ ᔮᐃᒋᑳᐳᔨᒡ ᑖᐺᐦᑕᒧᐎᓂᐦᒡ᙮ ᓵᑲᔅᒋᓀᔫ ᐅᑌᐦᐄᐙᐦᒡ ᒧᔥᑌᓇᒫᒉᐎᓂᔫ᙮ ᒫᔮᑎᓯᔫᒡ ᐅᒌ ᐅᔫ ᑳ ᐃᑌᔨᐦᑖᑯᓯᑣᐤ,

2 Peter 2:14 Iomraidhean Croise

Matthew 12:34

Taanite chechii uhchi itweyekw chekwaan e miyuuhtaakuhch e machaatisiyekw maak mwehch chinepukuch e iteyihtaakusiyekw. Taan e ishi ayimit awen ekut wehchi chischeyihtaakusit taan e ishitehet.

Matthew 23:14

Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw. Naashch chiwii kuiskunaakuhiisunaawaau an uhchi chineush e ayimihaayekw, mikw maak anit e utinamuwekw maan kaa paahpeyakutwaau iskweuch taan e ishi tipiyeusiitwaau ekut e nuukuhch chihchiwe taan e iteyihtaakusiyekw. Uu maak kaa ishi ihtuutamekw etituu chiyawaau chika waweshihiikunaawaau.”

Matthew 25:41

“Ekw che itaat aniyuu unimihchiiwinihch kaa ihtaayich aniyuu kaa machaatisiyich, ‘Aushikw nete chiyawaau Chishemanituu che waweshihiitaakw anite ishi kaachiche machishkutehch aniyuu kaa ishi ayeskuushtamuwaakanuyich machimanituuh ekw maak utaapachihaakaniyuuh.

Matthew 5:28

Mikw maak chititinaawaau niya, awen kanawaapamaate iskweu, nitamukw maak ishi maamituneyimaate, shaash ishinaakuniyuu e wiichipisikwaatisiimat anite utehiihch.

Mark 13:22

Kata ihtaauch awenichii e wiyeshihiiwetwaau e itwetwaau Niya Christ. Kata ihtaauch kaye machi uchischiwehiichesuuch. Eukunich maak uchii nanaahkuu maamishkaach waapahtiiwewinh che waapahtiiwetwaau kaye kata ihtuutamuch e maamishkaateyihtaakuniyikwaauh chekwaayuuh. Ekut maak che uhchi wiyeshihaatwaau aweyuu nitamukw chechii ishi taapwehtamiyich. Aniyuuh maak Chishemanituu kaa wiyaapamaayich aweyuuh eukunh aniyuuh che wii wiyeshihaatwaau.

John 5:44

Taanite chechii uhchi taapwehtamekw mikw naapeu e wii nanihiiwehekw ekaa wii nanihiiwehekw Chishemanituu.

Romans 16:18

Namui Chitipeyihchikeminuuh Christ atushkuweuch uchii uyuu e ihtitwaau, mikw taan aniyuuh chekwaayuuh chechii miichitwaau maak taan aniyuuh ekaa chechii miichitwaau eukunh mekushkaateyihtamihiikutwaau. Naashch taapwe miyuuhtaakuhiisuuch taan e ishi ayimitwaau kaye nitamukw ihtuuch aniyuu e miywaachimaatwaau aweyuu. Ekut maak wehchi wiyeshimaatwaau aniyuuh naashch kaa wehchipayihch chechii wiyeshimaakanuyich.

1 Corinthians 11:19

Yaaitei puut nituweyihtaakuniyiche chechii ihtakuhch pahkaanipayihuwin yaakw chechii nisituunaakusitwaau taan anichii tiyaapwetwaau Chishemanituu ishi e ihtaayich.

Ephesians 2:3

Ekun maak peyakwaau misiwe kaa ishinaakusiihkw kaye chiyaanuu, mikw taan waa ihtiihkw chichii ihtinaanuu. Chichii ihtuutenaanuu mikw taan e ishi nituweyihtamuumakahkwaau chiyaasinuuh kaye chimituneyihchikanuuh. An maak kaa ishpish chii machaatisiihkw chii iteyihtaakuniyikupane taapwe kaye chiyaanuu chechii waweshihiitahkw Chishemanituu.

Ephesians 4:14

Ekw maak namui chika uhchi awaashiyuuweyihtaakusinaanuu. Muyaam e papaamuwepahukuyihk taan e ishi Chiskutamaachetwaau kaa wiyeshihiiwetwaau chechii ishinaakusiihkw, eukw uchii kaa ihtuutuwaatwaau aweyuu chechii machituutamiyich nanaahkuu e ishi pisiiwiyaatwaau.

Colossians 2:18

Ekaawii chika uhchi pachishtinaawaauch anichii awenichii ayaahch kaa ihtitwaau e tipihteyimisutwaau kaye enchilh kaa nuuchiishtuwaatwaau chechii pisiiwiitaakuch e wii ayaayekw chikaaniyuwinawaau. Euk uchii naashch taapwe piichishkweuhiikuuch taan e ishi waapahtahkwaau waapahtiiwewinh. Namui maak aapateyihtaakuniyuu aniyuu taan e ishi aayimuutahkwaau, wesh mikw e ishi maamituneyihtaakanuyich utah aschiihch ekun pishikw e ishi maamituneyihtahkwaau.

James 1:8

Uu maak e ishinaakusuwane ekaawii pukuseyim Chishemanituu chechii miisk chekwaayuu.

2 Peter 2:18

Wesh naashch taapwe chistaachimisuuch kaye chiishkwe ayimuuch. Taan e ishi machi nitaweyihtamuumakaniyich maak wiyaasuu pimaatisiiwiniyuu ekut wehtaapachihuutwaau chechii kaahchitinaatwaau aniyuu aweyuu anuhchiish kaa uhchii wiihkuchihuyich anite e waanipayinaanuyich e chii ishi wiichihiiweyich.

2 Peter 2:3

Aniyuu maak che ishpish wii weyuuch ayaatwaau uchii naspaach chiskutamaachesuuch nitamukw tipaachimuwin chika waawiihtamaakuwaauch. Ekut maak niyaanitam aniyuu nitamukw e itaachimushtaataakuch che uhchi wii itaapachihiitaakuch chechii uhchi ushuuliyaamihkaasutwaau. Eukunich maak uchii shaash weskach kaa ayeskushteyich taan che ishi waweshihaakanuutwaau kaye muush chii cheshtinaachisteyuu taan che ishi wanaatisiitwaau.

2 Peter 3:16

Ekun wesh e ishi aayimuutahk kaye wiya misiwe anit kaa mamasinahamaachet. Ihtakuniyuuh kiipaa e wii aayimihtaakuniyikwaau pasch chekwaayuu taan e ishi aayimuutahk. Eukunh maak uyuuh chekwaayuuh nitamukw waa ishi itweshtamuwaatahkwaau anichii ekaa kaa nisituhtahkwaau Chishemanituu utayimuwiniyuu kaye anichii ekaa kaa suuhchikaapuutwaau. Ekun kaye e ihtuutahkwaau nanaahkuu taan e ishi aayimuuteyich Chishemanituu utayimuwinihch. Wiyawaau maak niyaanitam ati wanaachihiisuuch uyuu e ihtitwaau.

1 John 2:16

Misiwe taan e itaatisiinaanuuhch utah aschiihch, e machi mushtenaapahtahk awen chekwaayuu, e ishi machi mushteneyihtahk, kaye aniyuu e maamihchisiit taan e ishi pimaatisiit, namui Chishemanituu e ihtaat uhchipayuu uu itaatisiiwin, utah aschiihch uhchiimakan.

Jude 1:11

Taapwe kata aahkwaach machipayuuch. Mwehch aniyaa Cain kaa ihtiyich ekun e ihtitwaau. Chii pachishteyimisuuch mwehch aniyaa Balaam kaa ishi machituutamiyich chechii ishi machituutahkwaau mikw shuuliyaayuu e wii uhchistamaasutwaau. Kaye mwehch aniyaa Korah kaa ishi suuhcheyimuyich ekun e ishi suuhcheyimutwaau. Ekun maak e ishi wanaatisiitwaau kaye wiyawaau.

Revelation 12:9

Ekw kaa niihchiwepinaakanuut an mista maanichuus kihchikiishikuhch uhchi. Eukw maak an chinepukw weskach anite kaa ihtaat, Machimanituu maak Satan kaa ishinihkaataakanuut. Eukw uu kaa chii wiyeshihaat misiwe aweyuu utah aschiihch. Anite maak aschiihch chii ishuwepinaakanuu kaye misiwe aniyuu utenchilamh.