2 Peter 1:8 - Chishemanituu Utayimuwin: Kaa Uskaach Testament

⁸ Eukw maak uyuu chekwaayuu wetaach chipaa weyuuch ayaanaawaau chipimaatisiiwiniwaahch. Wesh chiishpin taapwe weyuuch ayaayekwe chika ihtuutaakunaawaau taapwe chechii weyuuch atuskuwekw Chitipeyihchikeminuu Jesus Christ aniyuu taan e ishi chischeyimekw chipimaatisiiwiniwaahch. Kaye naashch taapwe chika miyu atuskawaawaau.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁸ ᐁᐅᒄ ᒫᒃ ᐅᔫ ᒉᒀᔫ ᐌᑖᒡ ᒋᐹ ᐌᔫᒡ ᐊᔮᓈᐙᐤ ᒋᐱᒫᑎᓰᐎᓂᐙᐦᒡ᙮ ᐌᔥ ᒌᔥᐱᓐ ᑖᐺ ᐌᔫᒡ ᐊᔮᔦᑴ ᒋᑲ ᐃᐦᑑᑖᑯᓈᐙᐤ ᑖᐺ ᒉᒌ ᐌᔫᒡ ᐊᑐᔅᑯᐌᒄ ᒋᑎᐯᔨᐦᒋᑫᒥᓅ ᒌᓴᔅ ᙭ ᐊᓂᔫ ᑖᓐ ᐁ ᐃᔑ ᒋᔅᒉᔨᒣᒄ ᒋᐱᒫᑎᓰᐎᓂᐙᐦᒡ᙮ ᑲᔦ ᓈᔥᒡ ᑖᐺ ᒋᑲ ᒥᔪ ᐊᑐᔅᑲᐙᐙᐤ᙮

2 Peter 1:8 Iomraidhean Croise

Matthew 13:22

Ekw maak an kutak shuumin kaa pahchishihk anite e ihtakuniyikwaauh kaa kaasutewaaskuhkwaauh niipisiyaahtikw, e ati nihtaauchit maak mwehch eukw e ishinaakusitwaau iinuuch kaa nituhtahkwaau Chishemanituu utayimuwiniyuu. Aniyuu naashch e mukushkaachishtaatwaau aschiiyuu chekwaayuuh kaye naashch mikw e wii ushuuliyaamitwaau e ihtitwaau kaye pishikw e mushtenahkwaau chekwaayuu chechii ayaatwaau eukw uyuu wehchi chek wanaataniyich utaapwehtamuwinawaau. Ekw maak namui chii miinisuuch upimaatisiiwiniwaahch.

Matthew 20:3

Ekw miin kaa chistuhtet wiyesh peyakushteu e ispayiyich e chechishepaayaayich, kaa waapamaat anite naapeu mikw e naaniipuyich ekaa wiyesh itaapatisiyich anite kaa chii nishtuwiitwaau awenichii.

Matthew 20:6

Chekaat maak niyaayin chii ispayiyiche ekw miin kaa ituhtet anite kaa chii nishtuwiyich aweyuu miin maak chii waapameu naapeu anite e naaniipuyich, ekw kaa itaat, ‘Chekwaan wehch mikw naaniipuuyekw utah iskan chiishikaau ekaa chekwaan ihtuutamekw.’ ”

Matthew 25:26

Ekw kaa itikut aniyuu uchimaam, ‘Taapwe kaa nuuhtesiyin kaye taapwe kaa machikuuhpaanewiyin. Chichii chischeyihten uste mistahii e nituweyihtamaan ishpish wii taan e ishpish miiweyaan.

John 15:2

Misiwe watihkunh niya e ihtaayaan kaa ihtakuhkwaauh ekaa kaa miinisuuhkwaau nuuhtaawii manisham. Ekw aniyuuh watihkunh kaa miinisuuhkwaau misiwe waweshtuutam etituu chechii miinisuuniyikwaau.

John 17:3

Maaute maak chechii uhchi ayaat awen kaachiche pimaatisiiwiniyuu, chischeyimiske chiya mikw e peyakushiyin e Chishemanituwiyin, kaye maak Jesus Christ chischeyimaate, aniyuu kaa pechi itishahumat.

John 5:42

Wesh chichischeyimitinaawaau taan e iteyihtaakusiyekw. Namui chisaachihaawaau Chishemanituu anite chitehiiwaahch.

Romans 12:11

Suuhk aashihcheyihtamukw e aapatisiyekw. Ekaawii chika uhchi chihtiminaawaau. Suuhk aashihcheyihtamukw chitahchaahkuwaahch. Atushkuwaahkw Utipeyihchikeu.

1 Corinthians 15:58

Eukw maak uu wehchi siihchimitakuch niichishaanitikw kaa saachihiitakuch, yaaichikaapukw e pimaatisiistuwekw Utipeyihchikeu. Ekaawii nuuhtapuuniikw. Suuhk muush aapatisiishtuwaahk Utipeyihchikeu. Wesh chichischeyihtenaawaau cheshtinaash ekaa sheshkwaaht aapatisiishtawekw Utipeyihchikeu.

2 Corinthians 13:5

Yaakwaau nituu chischeyimisukw. Nituu chischeyimisukw eshkw taapwe tiyaapwehtamuwekwe. Chinisituhtenaawaau aa Jesus Christ e piihchishkaataakw. Ekaa tiyaapwehtamuwekwe namui kiipaa taapwe chipiihchishkaakuwaau.

2 Corinthians 8:2

Naashch taapwe chii pechi aayimihuuch. Aat aniyuu e ishpish naashch chistimaatisiitwaau yaapach naashch taapwe mistahii chii pachishtinicheuch. Kaye maak naashch taapwe chii miyeyihtamuch e pachishtinichetwaau.

2 Corinthians 8:7

Misiwe chekwaan naashch taapwe chikaschihunaawaau. Suuhcheyihtaakun chitaapwehtamuwinawaau. Chikaschihunaawaau e aayimuutamekw taan e ishi taapwehtamekw. Mistahii chichischeyihtamuwaanaawaau Chishemanituu utiteyihtamuwin. Naashch taapwe suuhk chititeyihtenaawaau chechii wiichihekuch kutakach awenichii kaye maak naashch taapwe chisaachihiinaan. Chipaa wii miyu miiwenaawaau maak.

2 Corinthians 9:14

Kaa ishpish chii weyuuch shaweyimitaakw Chishemanituu chika saachihiikuwaauch kaye maak chika ayimiheshtamaakuwaauch.

Philippians 1:9

Chitayimiheshtamaatinaawaau wetaach chechii ati saachihiituyekw, wetaach chechii ati kachehtawehtamekw kaye wetaach chechii miyu kachescheyihtamekw chekwaan.

Philippians 2:5

Taan kaa ishi maamituneyihtahk Christ ekun kaye chiyaanuu chipaa ishi maamituneyihtenaanuu.

Philippians 3:8

Namui maak mikw aniyuuh chekwaayuuh kaa aayimuutamaan nuuhchi wepinen. Misiwe kutach chekwaan namui mitun nitaapateyihtamihiikun e ishpish etituu iteyihtaakuhch e chischeyimak Christ Jesus taapwe e Utipeyihchikemiyaan. Wiya uhchi eukuu wehchii pachishteyihtamihiikuyaan misiwe uyuuh chekwaayuu, wepinaasun nititeyihtamihiikun uyuuh chekwaayuuh, wiya chechii wiicheuk,

Colossians 1:10

Ekw maak chechii ishi pimaatisiyekw taan e ishi nituweyimitaakw Chishemanituu chechii ishi pimaatisiiwekw. Muush chika ihtuutamuwaanaawaau taan aniyuuh e ishi naheyihtamihiikut. Nanaahkuu chika ishi mamiyuutuutamuwaawaauch awenichii kaye wetaach chika miyu chischeyimaawaau Chishemanituu taan e iteyihtaakusit.

Colossians 2:7

Pachishtinaahkw chechii ihtuutaataakw kuiskw chechii ishi pimaatisiiwekw kaye chechii miitaakw maskuusiiwiniyuu, muyaam mistikw nitaamihch aschiihch e ishi kutaaupayiyich utapiih chechii suuhchikaapuut ekun chipaa ishinaakusinaawaau. Ekun chipaa wii ishi suuhchikaapuunaawaau taan e ishi taapwehtamekw. Ekw maak wetaach muush che taapweyimekw mwehch kaa ishi chiskutamaakuyekw chechii ihtiyekw. Kaye maak muush chipaa nanaaskumaawaau.

Colossians 3:16

Muush maamituneyihtamihiikuwaahkw misiwe kaa ishi aayimuutamaataakw Christ, chitehiiwaahch e kanuweyihtamuwekw. Suuhk wii kachehtaaweyihtamukw e chiskutamaatuyekw kaye e kacheschimituyekw. Chitehiiwaahch uhchi nikamuushtuwaahkw Chishemanituu. Nanaaskumaahkw e nikamuushtuwekw ayimiheu nikamuwinh, David unikamuwinh ekw maak taan e ishi miitaakw kaa payehchisiit ahchaahkw nikamuwinh.

1 Thessalonians 3:12

Nitutamuwaanaan Utipeyihchikeu chechii ihtuutaataakw wetaach chechii saachihiituwekw kaye kutak aweyuuh wetaach chechii saachihiimekw, chechii ati ishpish saachihiituyekw kaye chechii ati ishpish saachihekuch kutakach awenichii muyaam niyaan e ishpish saachihiitaahch.

1 Thessalonians 4:1

Maahchishtai maak niichishaanitikw, chichii chiskutamaatinaan taan chipaa ishi pimaatisiinaawaau chechii naheyihtamihekw Chishemanituu. Eukw maak taapwe e ishi pimaatisiyekw. Chipukuseyimitinaan maak kaye chisiihchimitinaan suuhk etituu uu chechii ihtiyekw e nuushuushkuwekw kaye chiyawaau Utipeyihchikeu Jesus.

2 Thessalonians 1:3

Niichishaanaanich, iteyihtaakun muush chechii nanaaskumachiht Chishemanituu chiyawaau uhchi wesh etituu chit ati taapweucheyimaawaau Christ kaye maak wetaach etituu chisaachihiitunaawaau.

1 Timothy 5:13

Kutakach uchii kaa ushchipimaatisiitwaau kaa peyakutwaau iskweuch wetaach namui wiyesh chika uhchi iteyihtamuch ekaa mitun chekwaayuu ihtuutahkwaau. Mikw papaa piihtakuweuch aweyuu wiichiihch, mikw e papaa chiiutetwaau. Namui maak mikw uyuu ihtuuch, chek papaa pakunuumuweuch kaye papiichiskwehtaasuuch e aayimuutahkwaau chekwaayuu aniyuu ekaa chipaa uhchi aapateyihtamihiikuuch.

Titus 3:14

Anichii maak chiyaanuu chitiiniiminuuch chipaawii chischeyihtamuch taan chipaa chii ishi miyu atushcheuch, e wiichihaatwaau aweyuuh naashch e nituweyihtamiyich chechii wiichihaakanuyich. Namui chipaa uhchi ishinaakusuuch ekaa wiyesh itaapatisitwaau.

Philemon 1:6

Nitutamaan aniyuu e ati aayimuutamuutwaau awenichii taan e ishi taapwehtaman chechii wiichihiiwemakahch etituu chechii ati chischeyihtaman taan chechii ishi miyutuutamaakuyihkw Christ Jesus.

Hebrews 6:12

Namui chinituweyimitinaan chechii chihtimiyekw, teyakuch nispituwaahkuch anichii kaa taapwehtahkwaau ekaa kaa chiiwekaapuushtawaatwaau Chishemanituu, wesh eukw uchii che miikuutwaau Chishemanituuh taan aniyuuh kaa itweyich cheshtinaash che miikutwaau.

2 Peter 1:2

Shaweyihchichewin kaye chiyaameyihtamuwin chika wii ayahchihtamaakunaawaau an uhchi e chischeyimekw Chishemanituu kaye Jesus Chitipeyihchikeminuu.

2 Peter 1:3

Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

2 Peter 2:20

Chiishpin kaa wiihkuchihuuwaakwenich awenichii taan e ishi machituutaachemakaniyich uyuu aschiiyuu aniyuu taan e ishi chischeyimaatwaau ekw Jesus Christ e Tipeyichikeyich kaye e Pimaachihiiweyich miin maak kaau e kaahchitinikutwaau kaye e shaakuuchihiikutwaau uyuu chekwaayuu etituu iteyihtaakuniyuu taanit e ihtaatwaau anuhchiish ishpishaat wii taanit kaa pechi ihtaatwaau niishtam.

2 Peter 3:18

Suuhk etituu wii ishi nihtaauchikw ushaweyihchichewinihch chitipeyihchikeminuu kaye chipimaachihiiweminuu Jesus Christ, kaye suuhk etituu wii chischeyimaahkw chipimaatisiiwiniwaahch. Wiya maak katawii chisteyihtaakuhaakanuu anuhchiish kaye kaachiche. Amen.