2 Peter 1:4 - Chishemanituu Utayimuwin: Kaa Uskaach Testament

⁴ Ekut maak kaye uyeyuu uhchi, uyuu taan shaash kaa ishi miitahkw chipimaatisiiwinaahch, ekut kaa uhchi miitahkw aniyuu miiwewinh naashch kaa chisteyihtaakuniyikwaau kaye naashch kaa miywaashiyikwaau. Eukun wesh kiipaa aniyuuh miiwewinh kaa ashutamuwaat misiwe aniyuu che taapweyimikut. Uyuuh maak miiwewinh kaa ashutamaatahkw eukw uyuuh che wiichihiikuyihkw ekaa chechii shaakuuchipitikuyihkw kaa nishuuwanaachihiiwemakahkwaau machi nituweyihtamuwinh utah aschiihch kaa ihtakuhkwaauh. Ekut kaye chechii uhchi wetaach iteyihtaakusiihkw taan e iteyihtaakusit wiya Chishemanituu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁴ ᐁᑯᑦ ᒫᒃ ᑲᔦ ᐅᔦᔫ ᐅᐦᒋ, ᐅᔫ ᑖᓐ ᔖᔥ ᑳ ᐃᔑ ᒦᑕᐦᒄ ᒋᐱᒫᑎᓰᐎᓈᐦᒡ, ᐁᑯᑦ ᑳ ᐅᐦᒋ ᒦᑕᐦᒄ ᐊᓂᔫ ᒦᐌᐎᓐᐦ ᓈᔥᒡ ᑳ ᒋᔅᑌᔨᐦᑖᑯᓂᔨᒀᐤ ᑲᔦ ᓈᔥᒡ ᑳ ᒥᔻᔑᔨᒀᐤ᙮ ᐁᐅᑯᓐ ᐌᔥ ᑮᐹ ᐊᓂᔫᐦ ᒦᐌᐎᓐᐦ ᑳ ᐊᔓᑕᒧᐙᑦ ᒥᓯᐌ ᐊᓂᔫ ᒉ ᑖᐺᔨᒥᑯᑦ᙮ ᐅᔫᐦ ᒫᒃ ᒦᐌᐎᓐᐦ ᑳ ᐊᔓᑕᒫᑕᐦᒄ ᐁᐅᒄ ᐅᔫᐦ ᒉ ᐐᒋᐦᐄᑯᔨᐦᒄ ᐁᑳ ᒉᒌ ᔖᑰᒋᐱᑎᑯᔨᐦᒄ ᑳ ᓂᔔᓈᒋᐦᐄᐌᒪᑲᐦᒀᐤ ᒪᒋ ᓂᑐᐌᔨᐦᑕᒧᐎᓐᐦ ᐅᑕᐦ ᐊᔅᒌᐦᒡ ᑳ ᐃᐦᑕᑯᐦᒀᐤᐦ᙮ ᐁᑯᑦ ᑲᔦ ᒉᒌ ᐅᐦᒋ ᐌᑖᒡ ᐃᑌᔨᐦᑖᑯᓰᐦᒄ ᑖᓐ ᐁ ᐃᑌᔨᐦᑖᑯᓯᑦ ᐎᔭ ᒋᔐᒪᓂᑑ᙮

2 Peter 1:4 Iomraidhean Croise

Romans 9:4

Wesh eukw anichii Israel iinuuch Chishemanituuh kaa wiyaapamikutwaau chechii utawaashiimituutaakutwaau kaye chechii chisteyihtaakuhiikutwaau. Chii ushihtamaakuch niskumuwiniyuu. Chii miikuuch wiishuwewiniyuu. Chii chischeyihtamihiikuuch taan che ishi nuuchiishtuwaatwaau. Nanaahkuu chekwaayuuh chii itikuuch cheshtinaash che ihtuutamaakutwaau.

2 Corinthians 1:20

Chishemanituu aapachiheu Jesus cheshtinaash chechii ihtuutahk taan kaa itwet che ihtuutahk kaye che ati chisteyihtaakuhaakanuut.

2 Corinthians 3:18

Chiyaanuu maak wii namui nituweyihtaakun chechii aakuuhwehusuyihkw chechii waapahtamuhkw Utipeyihchikeu uchisteyihtaakusuwin. E kanawaapahtamuhkw Utipeyihchikeu uchisteyihtaakusuwin wetaach chikweschinaakuhiikunaanuu wiya chechii nispituuhkw. Wetaach chitihtuutaakunaanuu kaye chiyaanuu etituu chechii chisteyihtaakusiihkw. Wiya maak Utipeyihchikeu uyuu chitishihiikunuu Utahchaahkwa uhchi.

2 Corinthians 6:17

Ekw maak e itwet Utipeyihchikeu, Nakataahkuch anichii ekaa kaa taapwehtahkwaau. Pahkaanihiisukw. An chekwaan e iteyihtaakuhch e wanaahiikut awen e ayimihaat kaye e nuuchiishtuwaat Chishemanituu ekaawii piskaatamukw. Nika miyeyihten maak pechi naasiyekwe, itweu Utipeyihchikeu.

Galatians 3:16

Ekun maak mwehch kaa ishinaakuniyich Chishemanituu ekw maak aniyaanaa Abraham kaa ushihtamaasutwaau taan taapishkun che ishi niskumutwaau. Chishemanituu chii itwekupane cheshtinaash che shaweyimaat Abrahamh ekw maak peyakw aniyuuh aweyuuh anit e ihtaayich che uhchi aanische pimaatisiyich. Namui itashteu Chishemanituu umasinahiikanihch, Chiya ekw maak anichii anit e ihtaayin che uhchi aanische pimaatisiitwaau chika miyutuutamaatinaawaau. Maau e itashtech, Chiya chika miyutuutamaatin ekw maak peyakw an anit e ihtaayin che uhchi aanische pimaatisiit. Christ maak uu kaa aayimuumaakanuut.

Galatians 6:8

Awen maak pisikw nitamukw kaa ishi pimaatisiit chika ishinaakuniyuu chek che ati wanaachihtaat upimaatisiiwin. Ekw maak awen mikw e ishi nituweyimikut Kaa payehchisiyich Ahchaahkw ishi pimaatisiite chika ayaau kaachiche pimaatisiiwiniyuu.

Ephesians 4:13

Eukw maak uu che ishi wiichihiikuyihkw paatish misiwe maamuu peyakunihch ishi taapwehtamuhkwe kaye tekash misiwe chischeyimahkwe Chishemanituu Ukusisa taan e iteyihtaakusiyich. Kaye maak paatish tekash chiishi nihtaauchiihkwe, nihaau e iteyihtaakusit Christ iteyihtaakusiihkwe.

Colossians 3:10

kaye maak tekash aahchiiuh ekw chit ishi pimaatisiinaawaau. Wetaach ati uschinaakun chimituneyihchikanawaauh chechii nispituwekw Chishemanituu an kaa ushihiitaakw.

Hebrews 12:10

Chuuhtaawiinuuch utah aschiihch chichii kuiskunikunuuch e chii iteyihtahkwaau aniyuu taan kaa iteyihtamihiikutwaau uste e ishi miywaayich. Mikw maak Chishemanituu chuuhtaawiinuu, chikuiiskunikunuu wesh chischeyihtam eukw aniyuu uste e miywaayich chechii ihtuutaakuyihkw. Chikuiskunikunuu ekw maak chechii payehchisiihkw mwehch wiya e ishi payehchisiit.

Hebrews 9:15

Ekw maak wiya tipiiwe umihkuhch uhchi Jesus chii ushihtaau e uskaayich niskumuwiniyuu. Ekw maak anichii Chishemanituuh kaa tepwaatikutwaau chechii utiiniimitutaakutwaau kaachiche che ayaatwaau aniyuu taan kaa itweyich Chishemanituu cheshtinaash che miikutwaau. Jesus unipuwinihch uhchi ekut e ihtakuhch chechii wepeyihtamuwaakanuutwaau awenichii umachihtwaawinawaau aniyuu taan kaa ishi machituutahkwaau eshkw e chii aapataniyich weskach niskumuwiniyuu.

James 1:27

An ayimihewin kaa iteyihtahk Chishemanituu kaa Uhtaawiimaaut e kuiskunaakuniyich kaye e payehchinaakuniyich maau e ishinaakuhch, ihtuutaakuu awen chechii miyu wiichihaat chiiyuusaanisha ekw maak kaa peyakuyitwaauh iskweuh mekwaach e aayimuhuyich kaye maak ihtuutaakuu awen ekaa mitun chechii wiinihiikuyich machaatisiiwiniyuu taan e ishi ihtakuniyich utah aschiihch.

2 Peter 1:1

Niya Simon Peter. Jesus Christ nitatushkuwaau, wiya nichii wiyaapamikw apastal chechii itaapatisuuch. Chimasinahamaatinaawaau chiyawaau kaa ayaayekw taapwehtamuwin mwehch an e iteyihtaakuhch niyaan kaa ayaayaahch. Eukw uyuu taapwehtamuwiniyuu chipimaachihiiweminuu kaye Chichishemanituuminuu Jesus Christ kaa miitahkw. Wiya chitihtuutaakunuu chechii kuiskunaakusiyuuhkw Chishemanituu ishi e ihtaat.

2 Peter 3:13

Chiyaanuu maak wii, aniyuu taan kaa itwet Chishemanituu cheshtinaash che ihtuutahk eukun an e ashuwaapahtamuhkw, eukuu che uskaakwaauh chiishikuh kaye aschii. ekute maak anite kuiskutaatisiiwin che ihtakuhch.

2 Peter 3:9

Taapaa pwaashtawiyuu Utipeyihchikeu chechii ihtuutahk taan aniyuuh kaa itwet che ihtuutahk. Pwaashtawiyuu iteyimeuch maak kutakach awenichii. Chisiipiiwesiistaakuwaau wesin, ekaa waachi peyakw aweyuu nitaweyimaat chechii wanaatisiyich, wesh misiwe aweyuuh nituweyimeu chechii nakatamiyich umachaatisiiwiniyuu.

1 John 2:25

Eukw maak uyuu kaa itwet Christ, cheshtinaash che miitahkw kaachiche pimaatisiiwiniyuu.

1 John 3:2

Niichishaanitikw kaa saachihiitakuch, kuutawaashiimitutaakunuu Chishemanituu anuhchiish, mikw maak eshkw namui nuukun taan che iteyihtaakusiihkw, mikw chichischeyihtenaanuu iskutak takushihke mwehch wiya kaa iteyihtaakusit ekun che iteyihtaakusiihkw. Wesh chika waapamaanuu taan nihaau e iteyihtaakusit.