2 Peter 1:3 - Chishemanituu Utayimuwin: Kaa Uskaach Testament

³ Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³ ᒋᒋᔅᒉᔨᒫᓅ ᐁᒄ ᒌᓴᔅ ᙭ ᒋᐱᒫᑎᓰᐎᓈᐦᒡ, ᐊᓐ ᐊᐌᓐ ᑳ ᑌᑆᑎᑕᐦᒄ ᒉᒌ ᒋᔅᒉᔨᐦᑕᒥᐦᐄᑕᐦᒄ ᐎᔭ ᑎᐲᐌ ᐅᒋᔅᑌᔨᐦᑖᑯᓱᐎᓐ ᑲᔦ ᐅᒋᔐᒪᓂᑑᐙᑎᓰᐎᓐ᙮ ᐁᑯᑦ ᒫᒃ ᐆ ᐅᐦᒋ, ᐅᔫ ᐁ ᒋᔅᒉᔨᒪᒄ ᒌᓴᔅ, ᒋᔐᒪᓂᑑ ᐎᔭ ᐅᓲᑳᑎᓰᐎᓂᐦᒡ ᐅᐦᒋ ᔖᔥ ᒥᓯᐌ ᒋᒌ ᒦᑯᓅ ᑖᓐ ᐁ ᐃᔑ ᓂᑕᐌᔨᐦᑖᑯᓂᔨᒡ ᒋᐱᒫᑎᓰᐎᓈᐦᒡ ᑖᐺ ᐎᔭ ᐁ ᐃᐦᑖᑦ ᒉᒌ ᐃᔑ ᐱᒫᑎᓯᔫᐦᒄ᙮

2 Peter 1:3 Iomraidhean Croise

Matthew 28:18

Ekw kaa naatikutwaau Jesus kaa itikutwaau, “Nichii miikuun niya tekash chechii uchimaahkahtamaan kihchikiishikw nesht aschii.

Romans 8:32

Namui waawaach Ukusisa chuuhchi manaatinamaakunuu. Chii pachishtineu chechii nipistamaakuuhkw. Aniyuu maak waawaach tipiiwe Ukusisa e chii pachishtinaat chechii nipahaakanuyich chiyaanuu uhchi ekut che uhchi cheshtinaahuyihkw mikw che ishi miikuyihkw kutak chekwaayuuh.

Romans 9:24

Chiyaanuu chichii tepwaatikunuu Chishemanituu chechii utiiniimitutaatahkw. Namui maak mikw niyaan Jewa kaa itiskaanesiyaahch nuuhchi tepwaatikunuu kaye chiyawaau ekaa Jewa kaa itiskaanesiyekw chichii tepwaatikuwaau.

1 Corinthians 1:9

Kuiskw ihtuu Chishemanituu. Eukw maak uu kaa tepwaatitaakw chechii wiicheumekw Ukusisa eukw uyuuh Chitipeyihchikeminuuh Jesus Christ.

2 Corinthians 12:9

Ekw kaa pechi iishit, “Nichishewaatisiiwin mikw chinataweyihten wesh anit mekwaach ekaa siyaapisiyin ekut maauch e suuhcheyihtaakuhch nisuuhkaatisiiwin.” Eukw uyuu kaa iishit. Ekw maak muush pechi miite Christ uyuu suuhkaatisiiwiniyuu, kiipaa che miyeyihtamaan e wiihtamaan taan e ishpish ekaa saapisiyaan.

Ephesians 4:1

E chii papaawiihtamuch Utipeyihchikeu umiywaachimuwin ekun wehchi chipahukuyaan. Eukw maak wehchi siihchimitakuch aniyuu e ishi nitaweyimitaakw Chishemanituu chechii ishi pimaatisiiwekw chechii ishi pimaatisiyekw.

Ephesians 4:4

Misiwe anichii kaa taapweyimaatwaau Chishemanituu peyakw miiyuu ishinaakusuuch. Kaye maak mikw peyakushuu Kaa payehchisiit Ahchaahkw. Peyakun kaye aspeyimuwin, aniyuu Chishemanituu kaa miitahkw iskutak kaa wiyaapamitahkw.

Philippians 3:8

Namui maak mikw aniyuuh chekwaayuuh kaa aayimuutamaan nuuhchi wepinen. Misiwe kutach chekwaan namui mitun nitaapateyihtamihiikun e ishpish etituu iteyihtaakuhch e chischeyimak Christ Jesus taapwe e Utipeyihchikemiyaan. Wiya uhchi eukuu wehchii pachishteyihtamihiikuyaan misiwe uyuuh chekwaayuu, wepinaasun nititeyihtamihiikun uyuuh chekwaayuuh, wiya chechii wiicheuk,

Philippians 4:8

Niichishaanitikw, eshkw ekaa chiishihtaayaan e masinahamaatakuch peyakw miin chekwaan chika wiihtamaatinaawaau, Suuhk muush maamituneyihtamukw anihiih chekwaayuuh kaa miywaashikwaauh, anihiih kaa maamihchihiiwekwaauh, muyaam chekwaan e kuiskunaakuhch, chekwaan e chisteyihtaakuhch, kaye kuiskw ihtuwin, payehchi pimaatisiiwin, chekwaan e naheyihtamihiiwech ekw maak chekwaan e miyu tipaatutech.

Colossians 1:16

Wesh Christ uhchi, Chishemanituu misiwe chekwaayuu kihchikiishikuhch kaye utah aschiihch kaa ihtakuniyich chii ushihtaau, aniyuu chekwaayuu kaa nuukuniyikwaau kaye aniyuuh ekaa kaa nuukuniyikwaau. Chii ushiheu kaye misiwe kaa waauchimaawiyich ahchaahkwah, kaye aniyuuh aweyuuh kaa uchimaawiyich, kaye misiwe kaa tipeyihchicheyich. Misiwe chekwaayuu Christ e ihtaat chii uhchi ushihtaakanuuyuu kaye maak wiya chii ushihtamuwaakanuu.

1 Thessalonians 2:12

Suuhk chichii aashihchimitinaan. Chichii kaachiichihiitinaan kaye chichii siihchimitinaan chechii ishi pimaatisiyekw taan e ishi naheyihtamihiikut Chishemanituu e ishi pimaatisiinaanuyich. Wesh wiya Chishemanituu chiwiishaamikuwaau chechii wiichihiiweyekw anite kaa chisteyihtaakuniyich uchisheuchimaawinihch.

1 Thessalonians 4:7

Wesh taapaa kuuhchi tepwaatikunuu Chishemanituu wiinisuuwaatisiiwinihch chechii ishi pimaatisiyuuhkw. Payehchisiiwinihch chinituweyimikunuu chechii ishi pimaatisiyuuhkw.

2 Thessalonians 2:14

Chishemanituu chichii wiyaapamikuwaau chechii taapwehtamekw taapwewin iskutak kaa wiihtamaataahch miywaachimuwin. Chichii wiyaapamikuwaau chechii ayaawekw Chitipeyihchikeminuu Jesus Christ uchisteyihtaakusuwin.

1 Timothy 4:8

Ihtakuniyuu kiipaa taan e ishi wiichihiikut awen e sasaaupayihut. Ekw maak an awen suuhk muush kaa wii nanihiiwehaat Chishemanituu eukw uyuu etituu che wiichihiikut anuhchiish utah e pimaatisiit kaye maak anite ishi niishtaamihch.

2 Timothy 1:9

Chishemanituu chichii pimaachihiikunuu kaye chichii tepwaatikunuu chechii payehchisiihkw e utiiniimitutaatahkw. Namui wii aniyuu taan kaa ishi atushcheuhkw uyuu wehchi ihtuutaatahkw. Eshkw ekaa uhchi ihtakuniyich uyuu aschiiyuu shaash chii wiyeyihtam uyuu che ihtuutaatahkw Chishemanituu. Chichii wii waapahtiikunuu uchishewaatisiiwin Christ e ihtaayich uhchi.

Hebrews 1:3

An Ukusisimaau e ihtaat ekut wehchi chischeyihtaakuniyich Chishemanituu uchisteyihtaakusuwin, kaye Ukusisimaau tekash nispituweu taan e iteyihtaakusiyich. Wiya Ukusisimaau uchimaahkahtam aschiiyuu kaye misiwe chekwaayuu ishpimihch kaa ihtakuniyich. Utayimuwin kaa suuhcheyihtaakuniyich uhchi uchimaahkahtam misiwe uyuu. Chii pachishteyimitisuu chechii nipahaakanuut chechii uhchi payehchihaakanuyich aweyuuh e wepeyihtamuwaakanuyich umachihtwaawiniyuuh. Iskutak kaa chiishihtaat uyuu kaa ishi pachishteyimitisut ekw kaa waweyapihaakanuut anite unihiiwiniih Chishemanituu e ihtaayich aniyuu maauch e ispeyihtaakusiyich kihchikiishikuhch.

1 Peter 1:15

Payehtisiyuu an kaa tepwaatitaakw kaye chiyawaau maak payehchisiikw misiwe e ishi pimaatisiyekw.

1 Peter 1:5

Chichii taapweyimaawaau Chishemanituu, wiya maak umaskuusiiwin chika kanuweyimikunaawaau piihiim maahchishtai chiishikaayiche. Ekw maak che pimaachihiitaakw wesh ekun muush kaa pe iteyihtahk che ihtuutaataakw.

1 Peter 2:21

Wesh eukuu wehchii wiishaamikuyekw, aniyuu Christ e chii wawiisacheyihtamihaakanuut chichii nakatamaakuwaau chekwaayuu che chischinuwaapahtamuwekw, chechii taahtaapahamewekw taanite kaa pimuhtet.

1 Peter 2:9

Chiyawaau an kaa itiskaanesiyekw chichii wiyaapamikuwaau Chishemanituu kaye eukw chiyawaau maauch kaa niikaaneyihtaakusit chisheuchimaau utayimiheuchimaamh. Eukw chiyawaau kaa payehchisiitwaau kaa itiskaanesitwaau iinuuch, eukw chiyawaau Chishemanituu tipiiwe utiiniimih. Chiyawaau chichii wiyaapamikunaawaau chechii waawiihtamuwekw taan e ishi chisteyihtaakuniyikwaauh utayihtuwinh an kaa wiishaamitaakw wanitipiskusiiwinihch uhchi anite ishi umaamishkaach waashtewinihch.

1 Peter 3:9

Ekaawii yaaitei wii taapishtaa awen e wanituutaask maak e mamaayeyimisk. Yaapach uste miyutuutamuu kaye ayimihchike chechii shaweyimikut Chishemanituu wesh eukw uu kaa ishi wiyaapihtaakanuuhch chipimaatisiiwin chechii ishinaakuhch. Ekut chechii uhchi aanische miikawiyin shaweyihchichewin.

1 Peter 5:10

Iskutak maak chiishi nanehkaateyimuyekwe chika ihtuutaakuwaau Chishemanituu miin chechii wiikaapuwekw, chika miikuwaau maskuushiiwiniyuu, chika yaaichikaapuuhiikuwaau, kaye chika sakascheyimuhiikuwaau. Chishemanituu an kaa ayaat misiwe shaweyihchichewiniyuu chiwiishaamikunuu chechii wiichihiiweyihkw anite kaachiche uchisteyihtaakusuwinihch Christ e ihtaayich uhchi.

2 Peter 1:10

E maamituneyihtamekw maak misiwe uu kaa ishi ihtuutamaakuyihkw, nichishaanitikw, suuhk etituu kuchihtaakw taapwe chechii nuukuhch, taapwe chechii nishituunaakuhch chipimaatisiiwiniwaahch e chii wiyeyimitaakw Chishemanituu kaye e ihtakuniyich taan kaa ishi tepwaatitaakw chechii itaapatisuwekw. Wesh chiishpin uu ihtiyekwe namui wiiskaat chika uhchi pahchishinaawaau chitaapwehtamuwinawaach uhchi.

2 Peter 1:2

Shaweyihchichewin kaye chiyaameyihtamuwin chika wii ayahchihtamaakunaawaau an uhchi e chischeyimekw Chishemanituu kaye Jesus Chitipeyihchikeminuu.

2 Peter 1:5

E waapahtamekw maak uu kaa ishpish wesa chii miyutuutamaakuyihkw, suuhk kuchihtaakw kuiskutaatisiiwin chechii nuukuhch an e taapwehtamekw. Ekw maak chikuiskutaatisiiwiniwaahch suuhk che wii ati ayaayekw chischeyihtamuwin, wetaach che wii miyu chischeyimekw Chishemanituu kaye utayimuwin wetaach che wii ati miyuu chischeyihtamuwekw.

2 Peter 1:6

Miin maak chekwaan che wii ati ayaayekw eukw uu chechii miyu nanaakataweyimisuyekw chipimaatisiiwiniwaahch. Iskutak maak e ati miyu nanaakataweyimisuyekw ekw che ati suuhchikaapushtamekw nanaahkuu chekwaan. Uu maak e ati suuhchikaapuuyekw ekw che ati manituuwaatisiyekw.

2 Peter 1:8

Eukw maak uyuu chekwaayuu wetaach chipaa weyuuch ayaanaawaau chipimaatisiiwiniwaahch. Wesh chiishpin taapwe weyuuch ayaayekwe chika ihtuutaakunaawaau taapwe chechii weyuuch atuskuwekw Chitipeyihchikeminuu Jesus Christ aniyuu taan e ishi chischeyimekw chipimaatisiiwiniwaahch. Kaye naashch taapwe chika miyu atuskawaawaau.

2 Peter 2:20

Chiishpin kaa wiihkuchihuuwaakwenich awenichii taan e ishi machituutaachemakaniyich uyuu aschiiyuu aniyuu taan e ishi chischeyimaatwaau ekw Jesus Christ e Tipeyichikeyich kaye e Pimaachihiiweyich miin maak kaau e kaahchitinikutwaau kaye e shaakuuchihiikutwaau uyuu chekwaayuu etituu iteyihtaakuniyuu taanit e ihtaatwaau anuhchiish ishpishaat wii taanit kaa pechi ihtaatwaau niishtam.

2 Peter 3:18

Suuhk etituu wii ishi nihtaauchikw ushaweyihchichewinihch chitipeyihchikeminuu kaye chipimaachihiiweminuu Jesus Christ, kaye suuhk etituu wii chischeyimaahkw chipimaatisiiwiniwaahch. Wiya maak katawii chisteyihtaakuhaakanuu anuhchiish kaye kaachiche. Amen.