2 Peter 1:10 - Chishemanituu Utayimuwin: Kaa Uskaach Testament

¹⁰ E maamituneyihtamekw maak misiwe uu kaa ishi ihtuutamaakuyihkw, nichishaanitikw, suuhk etituu kuchihtaakw taapwe chechii nuukuhch, taapwe chechii nishituunaakuhch chipimaatisiiwiniwaahch e chii wiyeyimitaakw Chishemanituu kaye e ihtakuniyich taan kaa ishi tepwaatitaakw chechii itaapatisuwekw. Wesh chiishpin uu ihtiyekwe namui wiiskaat chika uhchi pahchishinaawaau chitaapwehtamuwinawaach uhchi.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁰ ᐁ ᒫᒥᑐᓀᔨᐦᑕᒣᒄ ᒫᒃ ᒥᓯᐌ ᐆ ᑳ ᐃᔑ ᐃᐦᑑᑕᒫᑯᔨᐦᒄ, ᓂᒋᔖᓂᑎᒄ, ᓲᐦᒃ ᐁᑎᑑ ᑯᒋᐦᑖᒄ ᑖᐺ ᒉᒌ ᓅᑯᐦᒡ, ᑖᐺ ᒉᒌ ᓂᔑᑑᓈᑯᐦᒡ ᒋᐱᒫᑎᓰᐎᓂᐙᐦᒡ ᐁ ᒌ ᐎᔦᔨᒥᑖᒄ ᒋᔐᒪᓂᑑ ᑲᔦ ᐁ ᐃᐦᑕᑯᓂᔨᒡ ᑖᓐ ᑳ ᐃᔑ ᑌᑆᑎᑖᒄ ᒉᒌ ᐃᑖᐸᑎᓱᐌᒄ᙮ ᐌᔥ ᒌᔥᐱᓐ ᐆ ᐃᐦᑎᔦᑴ ᓇᒧᐃ ᐐᔅᑳᑦ ᒋᑲ ᐅᐦᒋ ᐸᐦᒋᔑᓈᐙᐤ ᒋᑖᐺᐦᑕᒧᐎᓇᐙᒡ ᐅᐦᒋ᙮

2 Peter 1:10 Iomraidhean Croise

Matthew 22:14

Ekw Jesus kaa ati itwet, “Mihchetu awenichii tepwaataakanuuch, mikw maak namui mihchet wiyaapamaakanuuch.”

Romans 11:29

Taapaa wiiskaat iicheneu Chishemanituu aniyuuh kaa wiyaapamaat. Kaye namui nihtaa kaau utinam aniyuu taan shaash kaa ishi miyaat.

2 Timothy 2:19

Mikw maak aniyuu Chishemanituu uchiskutamaachewin taan e ishi taapwemakaniyich namui chika chii aahtinikanuuyuu e ishpish yaaitaniyich, kaye an kaa itashtech, “Utipeyihchikeu chischeyimeu aniyuuh aweyuuh wiya tepiyeusiit” kaye “Misiwe awen Utipeyihchikeu e ihtaayich kaa ishi tipeyihtaakusit chipaa nakatam machaatisiiwiniyuu.”

Hebrews 6:11

Chipukuseyimitinaan misiwe kanawaach chechii miyutuutamekw piihiim ati iskwaayaakwaawenh chipimaatisiiwinuwaauh. Ekw maak che cheshtinaahuyekw taapwe che miitaakw Chishemanituu misiwe taa waa ishi miitaakw.

Hebrews 6:19

E cheshtinaateyihtamuhkw maak uyuu kaa ishi naspich taapwet Chishemanituu che ishi ihtuutamaatahkw muyaam e itaapachisit puunasinaapaachikan chechii kayeutakuhtihch uut ishinaakun. An maak awen kaa cheshtinaateyimahkw eukw an paahchet anite aniyuu kaa aakuuyekahiikanuyich maauch kaa payehchisiimakahk kaa ishinihkaateyich anite kihchikiishikuhch kaa ihtakuniyich ayimiheukamikuyuu.

James 2:10

Wesh an awen misiwe aniyuu wiishuwewiniyuu kaa nanihiihtahk mikw maak peyakw chekwaayuu anit taan e itashteyich piikunahke misiwe aniyuu wiishuwewiniyuu e piikunahk ishinaakusuu.

1 Peter 1:2

Chishemanituu Uhtaawiimaau chichii wiyaapamikuwaau wiya tipiiwe chechii utawaashiimitutaataakw. Kaa payehchisiyich Ahchaahkwa uhchi ekut kaa uhchi pahkaanihiitaakw chechii nanihiihtuumekw Jesus Christ kaye chechii payehchihiikuwekw umihkw. Nitayimihaan chechii weyuuch ayaayekw shaweyihchichewin kaye chiyaameyihtamuwin.

1 Peter 1:5

Chichii taapweyimaawaau Chishemanituu, wiya maak umaskuusiiwin chika kanuweyimikunaawaau piihiim maahchishtai chiishikaayiche. Ekw maak che pimaachihiitaakw wesh ekun muush kaa pe iteyihtahk che ihtuutaataakw.

2 Peter 1:3

Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

2 Peter 1:5

E waapahtamekw maak uu kaa ishpish wesa chii miyutuutamaakuyihkw, suuhk kuchihtaakw kuiskutaatisiiwin chechii nuukuhch an e taapwehtamekw. Ekw maak chikuiskutaatisiiwiniwaahch suuhk che wii ati ayaayekw chischeyihtamuwin, wetaach che wii miyu chischeyimekw Chishemanituu kaye utayimuwin wetaach che wii ati miyuu chischeyihtamuwekw.

2 Peter 3:14

Ekw maak niichishaanitikw mekwaach uu e ashuwaapahtamekw an e chiishikaach kwaast e ishpish chii ihtiyekw wii payehchi pimaatisiikw kaye ekaawii chekwaan chika uhchi wii ataameyihtaakusinaawaau Chishemanituu ishi e ihtaat. Suuhk kata wii kuiskunaakunh chipimaatisiiwinawaauh ekw maak che ihtakuhch chiyaameyihtamuwin anit mekwesiinuu e ihtaayekw.

2 Peter 3:17

Chiyawaau maak wii niichishaanitikw shaash chichischeyihtenaawaau misiwe uu. Yaakwaamiikw maak ekaa chechii wanihtahiitutaakuch anichii ekaa kaa ayaapateyihtahkwaau taan e ishi wiishuwaanuyich. Wesh chiishpin uu ispayihche chika wanihtahiikunaawaau taanite an e ihtaayekw mekwaach, an e chii cheshtinaateyihtaakuhtaakanuuhch taanite naapuuyekw.

Jude 1:24

Ekw maak an kaa peyakut Chishemanituu chipimaachihiiweminuu, an kaa kaschihut chechii kanuweyimitaakw ekaa chechii pahchishinuwekw kaye kaa kaschihut chechii ituhtahiitaakw anite e chisteyihtaakuniyich e ihtaat ekaa chekwaayuu ataameyihtaakusuwekw kaye e miywaatamuwekw,

Revelation 22:14

Taapwe kata shaweyihtaakusuuch anichii kaa payehchihtaatwaau uchekwaanimuwaau. Eukw uchii che tepicheyihtaakusitwaau chechii piihchetwaau aniyuu ihtaawiniyuu kaye chechii utinamaasutwaau miinishah anite uhchi aniyuuh mistikw anit wehchi ayaayich aweyuuh pimaatisiiwiniyuu.