1 Peter 5:8 - Chishemanituu Utayimuwin: Kaa Uskaach Testament

⁸ Muush yaakwaamiishtuwaahkw machimanituu, an muush kaa wii naanituu machipayihiikuyekw, wesh muyaam mistatim muush kaa papaamuhtet e papaanemut e naanituu miichisut ekun e ishinaakusit. Machimanituu muush naanituuweyimeu aweyuu chechii wanaachihaat.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁸ ᒨᔥ ᔮᒀᒦᔥᑐᐙᐦᒄ ᒪᒋᒪᓂᑑ, ᐊᓐ ᒨᔥ ᑳ ᐐ ᓈᓂᑑ ᒪᒋᐸᔨᐦᐄᑯᔦᒄ, ᐌᔥ ᒧᔮᒻ ᒥᔅᑕᑎᒻ ᒨᔥ ᑳ ᐸᐹᒧᐦᑌᑦ ᐁ ᐸᐹᓀᒧᑦ ᐁ ᓈᓂᑑ ᒦᒋᓱᑦ ᐁᑯᓐ ᐁ ᐃᔑᓈᑯᓯᑦ᙮ ᒪᒋᒪᓂᑑ ᒨᔥ ᓈᓂᑑᐌᔨᒣᐤ ᐊᐌᔫ ᒉᒌ ᐗᓈᒋᐦᐋᑦ᙮

1 Peter 5:8 Iomraidhean Croise

Matthew 13:39

An maak awen kaa uhkaataat aniyuu kaa nihtaauchihcheyich an kaa wewepinahk machishuumin anite nihtaauchihchikan aschiihch eukw an machimanituu. An maak che utihchipayihch chechii maamuushtinikanuuhkwaauh aniyuu nihtaauchihchikan eukw an che iskwaapayihch aschii. Anichii maak kaa maamuushtinahkwaau aniyuu nihtaauchihchikan kaa itweyaan, eukw anichii enchilich.

Matthew 24:42

Yaakwaamiikw maak wesh namui chichischeyihtenaawaau taaishpish che takushihk Chitipeyihchikemuwaau.

Matthew 25:41

“Ekw che itaat aniyuu unimihchiiwinihch kaa ihtaayich aniyuu kaa machaatisiyich, ‘Aushikw nete chiyawaau Chishemanituu che waweshihiitaakw anite ishi kaachiche machishkutehch aniyuu kaa ishi ayeskuushtamuwaakanuyich machimanituuh ekw maak utaapachihaakaniyuuh.

Matthew 4:1

Ekw Kaa payehchisiyich Ahchaahkwa kaa ituhtahiikut Jesus anite pakwaatiskamikaahch chechii kakwechihiikuyich machimanituu.

Matthew 4:11

Chek maak machimanituu kaa nakataat aniyuu Jesus, ekw enchilh kaa utihtikut che wiichihiikut.

Mark 4:15

Anihiih maak shuuminh patuteskanuu kaa pahchishtihkwaau eukunich uchii awenichii iskutak piyehtahkwaau miywaachimuwiniyuu, tiiwehch machimanituu takushiniyuu e ati utinamiyich aniyuu chipaa ishi nihtaauchiniyuu utehiiwaahch.

Luke 21:34

“Yaakwaamiikw taan e ishi pimaatisiyekw. Ekaawii utamihiisukw pisikw chechii minihkweyekw maak pisikw chechii miichisuyekw maak pisikw chechii aayimeyihtamekw taan e ishi pimaatisiinaanuuhch, wesh eukw e ihtitwaau kutakach awenichii. An ihtiyekwe chika chii ishinaakun sischikuuch chechii takushiniyaan mekwaach anit ekaa iteyihtamekwe. An maak sischikuuch takushiniyaane, muyaam nakwaakan ekaa peshuweyihtahk awesiis che nakwaasut eukun che iteyihtaakuhch.

Luke 21:36

Yaakwaamiikw. Ekaawii puuniikw e ayimihaayekw e nitutamaayekw chechii yaaichikaapuyekw kaye chechii shaapushkamekw misiwe taan che ispayihch. Kaye maak ekaa chechii aatuweyimitaakw Iinuu Ukusisa iskutak uhchishkuukaapuushtawekwe.” Eukw maak uyuu kaa ishi wiihtamuwaat Jesus aniyuu uchischinuhamuwaakan.

Luke 22:31

Ekw maak Jesus kaa kweschikaapuushtawaat Simon Peter kaa itaat, “Simon Peter, Simon Peter, machimanituu naashch chiwii ayaaukw. Chii kakwechihcheyimuu chechii kakwechihiisk muyaam e saapupayihiisk chechii ihtuutaask. Chiwii ihtuutaakw taapishkuuch kaa chii ihtuutawaat nihtaauchihchesuu pahkweshikanh e saapupayihaat.

John 8:44

Machimanituu eukw wehtaawiyekw, aniyuu e ishi nituweyimitaakw chechii ishi machituutamuwekw eukun mikw waa ihtuutamekw. Muush chii nipahiiweu kaa ishpish ihtakuniyich uyuu aschiiyuu. Namui wiiskaat uhchi nituweyihtam kuiskw chechii ishi wiihtaakuniyich chekwaayuu wesh namui mitun ihtakuniyuu taapwewiniyuu anit e ihtaat. Muush nanatayuu wesh ekun chihchiwe e itaatisiit, eukw maak an taapwe weuhtaawiitutawaat aniyuuh kaa nanatayich.

2 Corinthians 2:11

Uu maak chitihtinaanuu ekaa chechii pisiiwiitahkw machimanituu. Wesh chichischeyimaanuu taan waa ihtit.

Ephesians 4:27

Kaye ekaawii mitun tawiishtamuwaahkw machimanituu chechii ihtuutaataakw taan waa ihtuutaataakw.

Ephesians 6:11

Misiwe maak aapachihtaataau taan kaa ishi miitahkw Chishemanituu chechii ishi maasihchewaacheuhkw eukw maak chechii naanikaahamaasuyihkw taan e ishi kakwechihiikuyihkw machimanituu.

1 Timothy 2:15

Yaapach maak kata pimaachihaakanuu iskweu aniyuu uhchi e waapamaausut tepiyaahch tekash ishi nanaakataweyimisute taapwehtamuwinihch kaye saachihiiwewinihch ekw maak payehchi pimaatisiiwinihch chechii ishi pimuhtet.

1 Timothy 2:9

Nipukuseyimaauch kaye iskweuch yaakwaau chechii itaaspisutwaau. Namui chipaa uhchi mista wawetuwehamaauch kaye namui e mista shuuliyaaunaakuniyikwaau chekwaayuu chipaa uhchi kachichishkamuch.

1 Timothy 3:11

Wiichiskwewaauh chipaa taapweucheyihtaakusiyuu kaye namui chipaa uhchi nitamukw itaachimeuch aweyuu kaye pehkaach chipaa ishi pimaatisiyuuch kaye maak yaakwaau chipaa ihtuutamuch misiwe chekwaayuu.

1 Timothy 3:2

An maak awen kaa niikaanishkuwaat umaamuuayimihaauh nitaweyihtaakusuu ekaa chechii ihtakuniyich chekwaayuu chechii ishi ataameyihtaakusit, kaye yaaitei chechii peyakuhaat wiichiskweu naapuukwe. Nitaweyihtaakusuu eyuu pehkaach chechii ishi pimaatisiit, kaye chechii miyu nanaakataweyihtamihiikut taan e ishi pimaatisiit, kaye yaakwaau chipaa ishi wiipayihtaau chekwaayuu taan e ishi ihtuutahk. An awen kaa miyeyihtahk maaniteuh e piihtakahaat ekun chipaa iteyihtaakusuu. Chipaa kaschihuu kaye e chiskutamaachet.

2 Timothy 4:17

Mikw maak Utipeyihchikeu nichii wiichikaapuushtaakw kaye wiya nichii miikw suuhkaatisiiwiniyuu. Chii ispayuu maak yaapach tekash chechii waawiihtamuch uyuu miywaachimuwiniyuu kaye anichii ekaa Jewa kaa itiskaanesitwaau chechii uhchi pehtahkwaau, kaye maak nichii wiihkuchihiikuun ekaa chechii muut mistatimu.

Titus 1:8

Teyakuch chipaa chishewaatutaweu maaniteuh, kaye chipaa saachihtaau aniyuu taan e ishi kuiskunaakuniyich e ihtinaanuyich. Chipaa kachehtaaweyihtam kaye chipaa kuiskutaatisiyuu, chipaa payehchi pimaatisiyuu, kaye chipaa nanaakataweyihtam taan e ihtit.

Titus 2:12

Uchishewaatisiiwinihch chuuhchi chiskutamaakunuu chechii nakatamuhkw machaatisiiwin kaye ekaa chechii machimushteneyihtamuhkw chekwaan utah aschiihch. Kaye uchishewaatisiiwinihch chuuhchi chiskutamaakunuu chechii yaakwaamiihkw taan e itaatisiihkw, kaye chechii kuiskutaatisiihkw kaye chechii Chishemanituuwaatisiihkw utah aschiihch e ihtaayihkw,

Titus 2:2

Wiihtamuuch anichii kaa chisheinuutwaau chechii nanaakataweyihtahkwaau taan e ihtitwaau, kaye chechii iipwaahkaatwaau, kaye chechii ishi pimaatisiitwaau chechii uhchi chisteyimaakanuutwaau. Chipaawii suuhchikaapuuch taapwehtamuwinihch, kaye saachihiiwewinihch kaye siipiiwesiiwinihch ishi.

Titus 2:4

chipaa chischinuhamuweuch uschiniichiskweu chechii saachihaayich unaapemiyuu kaye utawaashiimiyuu.

Titus 2:6

Kaye maak siihchimach uschiniichuuch chechii yaakwaamiitwaau misiwe taan e ihtitwaau.

James 4:7

Pachishteyimitisuustuwaahkw Chishemanituu. Nishkuushtuwaahkw machimanituu ekw maak che usimitaakw.

1 Peter 1:13

Suuhk maak muush wii ayeskuweyihtamukw taan mikw che ati ispayikwe chekwaan kaye suuhk nanaakatuweyimisukw taan e ihtiyekw. Tekash mitun aspeyimututamukw an chishewaatisiiwin che miikuyekw iskutak miin takushihke Jesus Christ.

1 Peter 4:7

Shaash peshunaakun misiwe chekwaan che iskwaapayihch. Chinituweyihtaakusinaawaau chechii ishi nanaakatuweyihtamekw taan e ihtiyekw kaye ashuwaapikw e ayimihaayekw.

Revelation 12:10

Ekw maak kaa pehtuuk awen e chishewet anite kihchikiishikuhch e ayimit. Chii iteu, “Ekw maak wiyaapahtamaahch Chishemanituu che pimaachihaat utiiniimh. Chii waapahtiiweu taan e ishpish suuhcheyihtaakusit chechii chisheuchimaaut kaye niwaapahtamuwaanaan taan e ishi ihtakuniyich chechii tipeyihchicheyihch aniyuuh Christ kaa pechi itishahwaat. Wesh an e chiishikaayich kaye e tipiskaayich muush kaa mamishimaat Chishemanituu utiiniimiyuuh uhchishkuu Chishemanituu e ihtaayich shaash chii niihchiwepinaakanuu.

Revelation 12:12

Miywaatamukw maak misiwe chiyawaau kihchikiishikuhch kaa ihtaayekw. Ekw chiyawaau aschii ekw maak chihchikamii chika aahkwaach machipayinaawaau wesh ekute anite e ihtaayekw kaa ituhtet machimanituu. Nuwach maak chishuwaasuu wesh chischeyihtam shaash e tahkwaayich utipahiikan.”

Revelation 12:9

Ekw kaa niihchiwepinaakanuut an mista maanichuus kihchikiishikuhch uhchi. Eukw maak an chinepukw weskach anite kaa ihtaat, Machimanituu maak Satan kaa ishinihkaataakanuut. Eukw uu kaa chii wiyeshihaat misiwe aweyuu utah aschiihch. Anite maak aschiihch chii ishuwepinaakanuu kaye misiwe aniyuu utenchilamh.

Revelation 20:10

Ekw maak machimanituu, an kaa wiyeshimaat uyuuh aweyuu, kaa kaahchitinaakanuut ekw anite machishkuteu saakahiikanihch kaa ishuwepinaakanuut anite e ishkwaateyich chekwaayuu e usaawaapahteyich naashch e wiinimaasteyich. ekute shaash kaa ishuwepinaakanuyich aniyuu machi awesiis ekw maak aniyuu machi uchischiwehiichesuu. Kaachiche maak chika wiisacheyihtamuch e chiishikaayich kaye e tipiskaayich.

Revelation 20:2

Ekw kaa maakunaat aniyuuh mista manichuusha. Eukw uu chishe chinepukw machimanituu maak Satan kaa ishinihkaasut. Ekw an enchil kaa maahkupitaat aniyuuh mista manichuusha. Peyakwaau chishe mitaahtumitanuu pipun maak chika ishpish maahkupisuyuuh.