1 Peter 5:10 - Chishemanituu Utayimuwin: Kaa Uskaach Testament

¹⁰ Iskutak maak chiishi nanehkaateyimuyekwe chika ihtuutaakuwaau Chishemanituu miin chechii wiikaapuwekw, chika miikuwaau maskuushiiwiniyuu, chika yaaichikaapuuhiikuwaau, kaye chika sakascheyimuhiikuwaau. Chishemanituu an kaa ayaat misiwe shaweyihchichewiniyuu chiwiishaamikunuu chechii wiichihiiweyihkw anite kaachiche uchisteyihtaakusuwinihch Christ e ihtaayich uhchi.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁰ ᐃᔅᑯᑕᒃ ᒫᒃ ᒌᔑ ᓇᓀᐦᑳᑌᔨᒧᔦᑴ ᒋᑲ ᐃᐦᑑᑖᑯᐙᐤ ᒋᔐᒪᓂᑑ ᒦᓐ ᒉᒌ ᐐᑳᐳᐌᒄ, ᒋᑲ ᒦᑯᐙᐤ ᒪᔅᑰᔒᐎᓂᔫ, ᒋᑲ ᔮᐃᒋᑳᐴᐦᐄᑯᐙᐤ, ᑲᔦ ᒋᑲ ᓴᑲᔅᒉᔨᒧᐦᐄᑯᐙᐤ᙮ ᒋᔐᒪᓂᑑ ᐊᓐ ᑳ ᐊᔮᑦ ᒥᓯᐌ ᔕᐌᔨᐦᒋᒉᐎᓂᔫ ᒋᐐᔖᒥᑯᓅ ᒉᒌ ᐐᒋᐦᐄᐌᔨᐦᒄ ᐊᓂᑌ ᑳᒋᒉ ᐅᒋᔅᑌᔨᐦᑖᑯᓱᐎᓂᐦᒡ ᙭ ᐁ ᐃᐦᑖᔨᒡ ᐅᐦᒋ᙮

1 Peter 5:10 Iomraidhean Croise

Luke 22:32

Chichii ayimihchikeshtamaatin maak chii ekaa chechii puuniyin e taapwehtaman. Iskutak maak chiishkwaa kakwechihiiske machimanituu miin maak kaau chii pechi naashiine che yaaichikaapuuhiitwaau chiichishaanich taapwehtamuwinihch ishi.”

Romans 15:13

Chishemanituu, an kaa ihtuutaatahkw chechii ayaayihkw aspeyimuwin eukun an netutamuuk tekash chechii miyeyihtamihiitaakw kaye chechii chiyaameyihtamuwekw e taapweyimekw. Ekw maak Kaa payehchisit Ahchaahkw usuuhcheyihtaakusuwin chechii ihtuutaakuyekw etituu chechii aspeyimitutawekw Chishemanituu.

Romans 15:5

Chishemanituu an kaa miiwet siipiiwesiiwiniyuu kaye kaa siihchimuwet eukw netutamuuk chechii ihtuutaataakw chechii miyu wiicheutuwekw e chischinuwaapamekw Christ taan kaa aihtit wiya.

Romans 16:25

Maamihchimaataau Chishemanituu. Wes wiya eukw keschihut chechii yaaichikaapuuhiitaakw chipimaatisiiwiniwaahch anit uhchi taan kaa ishi waawiihtamaatakuch miywaachimuwin. Ekut e aayimuumaakanuut uu Jesus Christ kaa tipaachimak. Eukw maak uyuu miywaachimuwiniyuu namui uhchi pachishtinam Chishemanituu chechii chischeyihtaakanuyich anite pechi weskach.

Romans 9:11

Eshkw maak ekaa uhchi pimaatisiyich uyuuh ukusisa Rebecca, “Eshkw ekaa mechim uhchi machituutamiyich kaye aat eshkw ekaa uhchi miyutuutamiyich,” chii itikuu Chishemanituuh,

Romans 9:24

Chiyaanuu chichii tepwaatikunuu Chishemanituu chechii utiiniimitutaatahkw. Namui maak mikw niyaan Jewa kaa itiskaanesiyaahch nuuhchi tepwaatikunuu kaye chiyawaau ekaa Jewa kaa itiskaanesiyekw chichii tepwaatikuwaau.

1 Corinthians 1:10

Niichishaanitikw, Chitipeyihchikeminuu Jesus Christ utishinihkaasuwinihch uhchi, chisiihchimitinaawaau maamuu chechii niskumuyekw chekwaan e itweyekw ekaa chechii papahkaanipayekw anit mekwesiinuu e ihtaayekw. Suuhk wii maamuupayihukw peyakunihch e ishi maamituneyihtamekw kaye peyakunihch e ishi nisituhtamekw.

1 Corinthians 1:9

Kuiskw ihtuu Chishemanituu. Eukw maak uu kaa tepwaatitaakw chechii wiicheumekw Ukusisa eukw uyuuh Chitipeyihchikeminuuh Jesus Christ.

2 Corinthians 13:11

Ekw maak niichishaanitikw, waachiye chititinaawaau. Suuhk kuchihtaakw nihaau chechii iteyihtaakusiyekw e ishi nituweyimitaakw Chishemanituu chechii iteyihtaakusuwekw. Yaakwaau nituhtamukw taan e ishi siihchimitakuch. Suuhk peyakunihch wii ishi pimaatisiikw. Suuhk miyu wiicheutukw. Chishemanituu an kaa saachihiiwet kaye kaa ayaat chiyaameyihtamuwiniyuu chika wiicheukuwaau.

2 Corinthians 4:17

Namui naashch chekwaan iteyihtaakun taan e ishi nachishkamuhkw kaye maak an taan e ishi nachishkamuhkw namui chineush chika uhchi pimipayuu. Wesh Chiwiichihiikunaanuu chechii ayaayihkw kaachiche chisteyihtaakusuwin. Etituu maak mistahii iteyihtaakun uu ishpishaat taan e ishi nachishkamuhkw.

Philippians 4:13

Taan mikw che ispayiwaane misiwe nika chii shaapushken wesh Christ nimiikw suuhkaatisiiwiniyuu.

Colossians 2:7

Pachishtinaahkw chechii ihtuutaataakw kuiskw chechii ishi pimaatisiiwekw kaye chechii miitaakw maskuusiiwiniyuu, muyaam mistikw nitaamihch aschiihch e ishi kutaaupayiyich utapiih chechii suuhchikaapuut ekun chipaa ishinaakusinaawaau. Ekun chipaa wii ishi suuhchikaapuunaawaau taan e ishi taapwehtamekw. Ekw maak wetaach muush che taapweyimekw mwehch kaa ishi chiskutamaakuyekw chechii ihtiyekw. Kaye maak muush chipaa nanaaskumaawaau.

1 Thessalonians 2:12

Suuhk chichii aashihchimitinaan. Chichii kaachiichihiitinaan kaye chichii siihchimitinaan chechii ishi pimaatisiyekw taan e ishi naheyihtamihiikut Chishemanituu e ishi pimaatisiinaanuyich. Wesh wiya Chishemanituu chiwiishaamikuwaau chechii wiichihiiweyekw anite kaa chisteyihtaakuniyich uchisheuchimaawinihch.

2 Thessalonians 2:14

Chishemanituu chichii wiyaapamikuwaau chechii taapwehtamekw taapwewin iskutak kaa wiihtamaataahch miywaachimuwin. Chichii wiyaapamikuwaau chechii ayaawekw Chitipeyihchikeminuu Jesus Christ uchisteyihtaakusuwin.

2 Thessalonians 2:17

Nitutamuwaanaanich chechii kaachiichihiikuyekw kaye chechii suuhchikaapuuyekw misiwe taan e ishi miyutuutamekw kaye taan e ishi ayimiyekw.

2 Thessalonians 3:3

Tepicheyihtaakusuu maak Utipeyihchikeu chechii taapweucheyimaakanuut. Chika ihtuutaakuwaau chechii suuhchikaapuwekw neshta chika miyu kanuweyimukuwaau ekaa chechii wanaachihiitaakw machimanituu.

1 Timothy 6:12

Suuhk yaaichikaapuushta an e ishi taapwehtaman anit chechii uhchi uhchisiyin kaachiche pimaatisiiwin. Eukw wesh kiipaa an kaa ishi wiyaapamikuyin chechii ishi ayaayin iskutak tekash kaa chischeyihtaakusiyin che atushkuwat Chishemanituu, kaa wiihtaman taapwe e taapwehtaman uhchishkuu mihchetu awenich e ihtaatwaau.

2 Timothy 1:9

Chishemanituu chichii pimaachihiikunuu kaye chichii tepwaatikunuu chechii payehchisiihkw e utiiniimitutaatahkw. Namui wii aniyuu taan kaa ishi atushcheuhkw uyuu wehchi ihtuutaatahkw. Eshkw ekaa uhchi ihtakuniyich uyuu aschiiyuu shaash chii wiyeyihtam uyuu che ihtuutaatahkw Chishemanituu. Chichii wii waapahtiikunuu uchishewaatisiiwin Christ e ihtaayich uhchi.

2 Timothy 2:10

Ekw maak e suuhchipayihch misiwe chekwaan chechii shaakuuchihtaayaan taan che ishi nanehkaachihiikuwaane, e pukuseyimuyaan aniyuuh Chishemanituu kaa wiyaapamaat che utiiniimit che ayaayich pimaachihiikusiiwiniyuu kaye kaachiche chisteyihtaakusuwiniyuu Christ Jesus e ihtaayich kaa uhchipayiyich.

Hebrews 9:15

Ekw maak wiya tipiiwe umihkuhch uhchi Jesus chii ushihtaau e uskaayich niskumuwiniyuu. Ekw maak anichii Chishemanituuh kaa tepwaatikutwaau chechii utiiniimitutaakutwaau kaachiche che ayaatwaau aniyuu taan kaa itweyich Chishemanituu cheshtinaash che miikutwaau. Jesus unipuwinihch uhchi ekut e ihtakuhch chechii wepeyihtamuwaakanuutwaau awenichii umachihtwaawinawaau aniyuu taan kaa ishi machituutahkwaau eshkw e chii aapataniyich weskach niskumuwiniyuu.

1 Peter 1:15

Payehtisiyuu an kaa tepwaatitaakw kaye chiyawaau maak payehchisiikw misiwe e ishi pimaatisiyekw.

1 Peter 4:10

Misiwe paahpeyakw awen ihtakuniyuu taan e ishi miikut Chishemanituu kaschihuwiniyuu. Eukw maak uyuu kaschihuwiniyuu chipaa aapachihtaau e waawiichihaat kutak aweyuuh, e aashuu miyaat aweyuuh Chishemanituuh ushaweyihchichewiniyuu.

1 Peter 4:11

Awen e chii miikut Chishemanituu chechii ayimit chipaa ayimuu taan aniyuuh e ishi miikut Chishemanituu chechii ishi ayimit. An awen kaa miyaakanuut kaschihuwiniyuu chechii wiichihaat kutak aweyuu kiipaa chipaa wiichiheu taan e ishi miikut Chishemanituu kaschihuwiniyuu. Ekw maak wiya Chishemanituu che chisteyihtaakuhaakanuut misiwe chekwaayuu taan e ishi ihtuutahk anite Jesus Christ e ihtaayich ishi, wiya Chishemanituu ekaa nihtaa che iskwaapayich uchisteyihtaakusuwin kaye umaskuusiiwin. Amen.

2 Peter 1:3

Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

1 John 2:25

Eukw maak uyuu kaa itwet Christ, cheshtinaash che miitahkw kaachiche pimaatisiiwiniyuu.

Jude 1:24

Ekw maak an kaa peyakut Chishemanituu chipimaachihiiweminuu, an kaa kaschihut chechii kanuweyimitaakw ekaa chechii pahchishinuwekw kaye kaa kaschihut chechii ituhtahiitaakw anite e chisteyihtaakuniyich e ihtaat ekaa chekwaayuu ataameyihtaakusuwekw kaye e miywaatamuwekw,