1 Peter 4:7 - Chishemanituu Utayimuwin: Kaa Uskaach Testament

⁷ Shaash peshunaakun misiwe chekwaan che iskwaapayihch. Chinituweyihtaakusinaawaau chechii ishi nanaakatuweyihtamekw taan e ihtiyekw kaye ashuwaapikw e ayimihaayekw.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁷ ᔖᔥ ᐯᔓᓈᑯᓐ ᒥᓯᐌ ᒉᒀᓐ ᒉ ᐃᔅᒀᐸᔨᐦᒡ᙮ ᒋᓂᑐᐌᔨᐦᑖᑯᓯᓈᐙᐤ ᒉᒌ ᐃᔑ ᓇᓈᑲᑐᐌᔨᐦᑕᒣᒄ ᑖᓐ ᐁ ᐃᐦᑎᔦᒄ ᑲᔦ ᐊᔓᐙᐱᒄ ᐁ ᐊᔨᒥᐦᐋᔦᒄ᙮

1 Peter 4:7 Iomraidhean Croise

Matthew 24:42

Yaakwaamiikw maak wesh namui chichischeyihtenaawaau taaishpish che takushihk Chitipeyihchikemuwaau.

Matthew 25:13

Ekw Jesus kaa ati itwet, “Eukw maak uu uhchi kaye chiyawaau muush chipaa ayeskuwiinaawaau wesh namui chichischeyihtenaawaau taaishpish nihaau che takushinit Iinuu Ukusisa.”

Luke 21:34

“Yaakwaamiikw taan e ishi pimaatisiyekw. Ekaawii utamihiisukw pisikw chechii minihkweyekw maak pisikw chechii miichisuyekw maak pisikw chechii aayimeyihtamekw taan e ishi pimaatisiinaanuuhch, wesh eukw e ihtitwaau kutakach awenichii. An ihtiyekwe chika chii ishinaakun sischikuuch chechii takushiniyaan mekwaach anit ekaa iteyihtamekwe. An maak sischikuuch takushiniyaane, muyaam nakwaakan ekaa peshuweyihtahk awesiis che nakwaasut eukun che iteyihtaakuhch.

Luke 21:36

Yaakwaamiikw. Ekaawii puuniikw e ayimihaayekw e nitutamaayekw chechii yaaichikaapuyekw kaye chechii shaapushkamekw misiwe taan che ispayihch. Kaye maak ekaa chechii aatuweyimitaakw Iinuu Ukusisa iskutak uhchishkuukaapuushtawekwe.” Eukw maak uyuu kaa ishi wiihtamuwaat Jesus aniyuu uchischinuhamuwaakan.

Luke 22:46

Jesus maak chii iteu, “Taan e ihtiyekw wehchi nipaayekw. Wanishkaakw che ayimihaayekw ekaa chechii shaakuuchihiikuyekw kakwechihiiwewin.”

Romans 12:12

Chitaspeyimututawaawaau Chishemanituu muush maak miywaatamukw. Suuhk siipiiwesikw nenehkaateyimuyekw. Muush kaye ayimihaakw.

1 Corinthians 15:24

Ekw maak Christ che wanaachihtaat misiwe uchimaawiniyuu, misiwe tipeyihchichewiniyuu kaye suuhkaatisiiwiniyuu. Ekw maak che iskwaapayihch aschii. Iskutak maak uu chii ispayihche ekw Christ che miyaat Chishemanituuh Uhtaawiimaauh chisheuchimaawiniyuu.

1 Corinthians 7:29

Niichishaanitikw, maau netaweyimitakuch chechii chischeyihtamekw. Namui naashch shaash tawaau anit chechii atushkuwaakanuut Utipeyihchikeu. Anichii maak kaa ihtaayich wiichiskweuwaau ekaawii chika uhchi utamihiikuuch aniyuu e niipuutwaau chechii ihtitwaau taan aniyuuh chihchiwe e ishi nituweyihtaakusitwaau chechii ihtitwaau eukw chechii atushkuwaatwaau Utipeyihchikeuh.

Ephesians 6:18

Ahchaahkuwinihch muush ishi ayimihaataau nanaahkuu e ishi ayimihchikeyihkw kaye nanaahkuu e ishi nitutamaayihkw. Uu maak e ishi chischisiihkw ayeskuwiitaau kaye ekaawii puuniitaau e ayimihaayihkw, muush kaye ayimiheshtamuwaataawenich anichii kaa taapwehtahkwaau.

Philippians 4:5

Iishi pimaatisiikw misiwe awenichii chechii chischeyimitaakuch e ishpish miyuhtwaawekw. Shaash peshunaakuniyuu che ishpish takushihk Utipeyihchikeu.

Colossians 4:2

Tasine ayimihaahkw. E ayimihaayekw maak suuhk wii piyekascheyihtamukw kaye nanaaskumaahkw Chishemanituu.

2 Timothy 4:5

Mikw maak suuhk nanaakataweyimisuu chiya, kuiskw chechii ishi maamituneyihtaman taan mikw che ispayuwane. Siipiiwesiistah taan che ishi nanehkaachihiikuwane. Suuhk wiichihiich kutakach e waawiihtamuutwaau miywaachimuwiniyuu. Kaye maak mitun tekash ihtuut misiwe aniyuu taan kaa wii itaapachihiisk Chishemanituu.

Titus 2:12

Uchishewaatisiiwinihch chuuhchi chiskutamaakunuu chechii nakatamuhkw machaatisiiwin kaye ekaa chechii machimushteneyihtamuhkw chekwaan utah aschiihch. Kaye uchishewaatisiiwinihch chuuhchi chiskutamaakunuu chechii yaakwaamiihkw taan e itaatisiihkw, kaye chechii kuiskutaatisiihkw kaye chechii Chishemanituuwaatisiihkw utah aschiihch e ihtaayihkw,

Hebrews 10:25

Mikw maak namui chika chii ihtuutenaanuu uu ekaa wiichihiiweyihkwe anite e nishtuwiitwaau kaa taapwehtahkwaau. Ihtaauch anichii ekaa wiichihiiwetwaau taanit nestawiyich kaa taapwehtamiitwaauh. Chipaa nishtuwiinaanuu anit chechii uhchi kaachiichimituyihkw. Naashch maak iteyihtaakun uu chechii ihtiihkw wesh chiwaapahtenaanuu e peshunaakuhch an e chiishikaach miin che takushihk Christ.

Hebrews 9:26

Michihpin maak peyakwaau e chii pachishteyimitisut namui uhchi nituweyihtaakuniyuu tasine chechii pachishtinisut chechii nanehkaachihaakanuut. Chii nitaweyihtaakuniikupane maak uyuu chechii ihtit tasine ekun chipaa pechi ihtuu kaa ishpish ihtakuhch uu aschii. Iskutak maak wetihchipayikwaau uyuu e maahchichiishikaakwaauh peyakwaau mikw chii pachishtinam upimaatisiiwin chechii uhchi wepeyihtamuwaakanuyich aweyuu umachihtwaawiniyuuh.

1 Peter 1:13

Suuhk maak muush wii ayeskuweyihtamukw taan mikw che ati ispayikwe chekwaan kaye suuhk nanaakatuweyimisukw taan e ihtiyekw. Tekash mitun aspeyimututamukw an chishewaatisiiwin che miikuyekw iskutak miin takushihke Jesus Christ.

1 Peter 3:7

Ekun maak kaye chiyawaau kaa niipuuyekw naapeutikw che ihtiyekw. Suuhk wii nanaakatuweyimaahkuch chiichiskweuwaauch e wiichimekuch e chischeyimekuch ekaa ishpish suuhchisiitwaau chiyawaau e ishpish suuhchisiiwekw. Chihkaateyimaahkuch wesh kaye wiyawaau chika aanische miyaakanuuch kaachiche pimaatisiiwiniyuu mwehch chiyawaau che ishi miikuyekw. Ihtuutamukw uu e itashumitakuch ekaa chekwaan chechii chipishkaakuyekw e ayimihekw Chishemanituu.

1 Peter 5:8

Muush yaakwaamiishtuwaahkw machimanituu, an muush kaa wii naanituu machipayihiikuyekw, wesh muyaam mistatim muush kaa papaamuhtet e papaanemut e naanituu miichisut ekun e ishinaakusit. Machimanituu muush naanituuweyimeu aweyuu chechii wanaachihaat.

Revelation 16:15

Utipeyihchikeu maak iteu, “Muyaam chimutisk e iteyihtaakuniyich e takushihk ekun che iteyihtaakuhch niya takushiniyaane. Chika shaweyihtaakusuu maak an awen ekaa che kauhkusit mekwaach e ashuwaapit kaye che ayeskuushtaakwe uchekwaanimh mikw chechii ishi pushchishkahk ekw maak namui chika uhchi musheshkateu wiiwiite chechii pimaameyimut mushe anite e waapamaakanuut.”