1 Peter 4:3 - Chishemanituu Utayimuwin: Kaa Uskaach Testament

³ Wesh ispayuu ekw taan kaa ishpish chii pechi machaatisiyekw anite utaahch muyaam anuhchiish taan e ishi machaatisiitwaau anichii ekaa kaa taapwehtahkwaau. Wiinisuuwinihch chichii ishi pimaatisiinaawaau, naashch chichii tipeyimikunaawaau nanaahkuu machi nituweyihtamuwinh. Kaye naashch chichii miyeyihtenaawaau e minihkweyekw, chichii miyeyihtenaawaau e wiichihiiweyekw anite e minihkwaanuuhch kaye anite e wiinisinaanuuhch, chichii nuuchiishtuwaawaauch kaye naashch e machinaakusitwaau manituuhkaanich.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

³ ᐌᔥ ᐃᔅᐸᔫ ᐁᒄ ᑖᓐ ᑳ ᐃᔥᐱᔥ ᒌ ᐯᒋ ᒪᒑᑎᓯᔦᒄ ᐊᓂᑌ ᐅᑖᐦᒡ ᒧᔮᒻ ᐊᓄᐦᒌᔥ ᑖᓐ ᐁ ᐃᔑ ᒪᒑᑎᓰᑣᐤ ᐊᓂᒌ ᐁᑳ ᑳ ᑖᐺᐦᑕᐦᒀᐤ᙮ ᐐᓂᓲᐎᓂᐦᒡ ᒋᒌ ᐃᔑ ᐱᒫᑎᓰᓈᐙᐤ, ᓈᔥᒡ ᒋᒌ ᑎᐯᔨᒥᑯᓈᐙᐤ ᓇᓈᐦᑰ ᒪᒋ ᓂᑐᐌᔨᐦᑕᒧᐎᓐᐦ᙮ ᑲᔦ ᓈᔥᒡ ᒋᒌ ᒥᔦᔨᐦᑌᓈᐙᐤ ᐁ ᒥᓂᐦᑴᔦᒄ, ᒋᒌ ᒥᔦᔨᐦᑌᓈᐙᐤ ᐁ ᐐᒋᐦᐄᐌᔦᒄ ᐊᓂᑌ ᐁ ᒥᓂᐦᒀᓅᐦᒡ ᑲᔦ ᐊᓂᑌ ᐁ ᐐᓂᓯᓈᓅᐦᒡ, ᒋᒌ ᓅᒌᔥᑐᐙᐙᐅᒡ ᑲᔦ ᓈᔥᒡ ᐁ ᒪᒋᓈᑯᓯᑣᐤ ᒪᓂᑑᐦᑳᓂᒡ᙮

1 Peter 4:3 Iomraidhean Croise

Mark 7:22

maak che pisikwaatisiit, maak chechii mushteneyihtamuwaat aweyuu chekwaayuu e ishi ayaayich, maak chechii machihtwaat, maak chechii wiyeshihiiwet, maak chechii wiinishuwaatisiit, maak chechii uhteyihtahk, kaye chechii machaayimuumaat aweyuu, maak naashch chihchiwe chechii iteyimisut, kaye chechii chiishkwe pimaatisiit.

ᐊᐸᔅᑕᓚᒡ 17:30

Weskach iinuuch ekaa uhchi chischeyihtahkwaau taan nihaau e iteyihtaakusiyich Chishemanituu chii ushiheuch manituuhkaan, namui maak pitamaa uhchi waweshihiikuuch Chishemanituu. Anuhchiish maak Chishemanituu itashumeu iinuuh misiwe utah aschiihch chechii kweskaatisiyich.

Romans 13:13

Kuiskw ishi pimaatisiitaau che nuukuhch maak taapwe waashtewinihch e ishi pimaatisiihkw. Ekaawii chika uhchi wiichihiiwenaanuu e miyuuhkasunaanuuhch e wiinisuu ihtinaanuuhch kaye ekaawii wiichihiiwekw anite e minihkwaanuuhch. Ekaawii nanaahkuu chika uhchi ishi wiinisuu pimaatisiinaanuu. Ekaawii chika uhchi kachiihkaamitunaanuu. Ekaawii kaye chika uhchi wauhteyimitunaanuu.

1 Corinthians 12:2

Chichischeyihtenaawaau eshkw ekaa uhchi taapweyimekw Chishemanituu, chichii nuushuushkuwaawaauch manituuhkaanich ekaa chii ayimitwaau. Muush maak chichii paschehtahiikuwaauch anichii manituuhkaanich.

1 Corinthians 6:11

Pasch anit e tashiyekw ekun kaa chii ishi pimaatisiyekw. Mikw maak shaash chichii chishtaapawiikunaawaau, chichii payehchihiikunaawaau, kaye chichii kuiskunaakuhiikunaawaau Utipeyihchikeu Jesus Christ utishinihkaasuwinihch neshta Chishemanituu Utahchaahkuhch ishi.

2 Corinthians 12:21

Nikuspaneyihten miin chiiutamitakuche Chishemanituu che ihtuutahk chechii pimaameyimitakuch waapamitakuche. Naashch taapwe nika misimeyihtamihiikuch anichii kaa machituutahkwaau anite utaahch ekaa maak uhchi mihchiiweyihtahkwaau kaye ekaa uhchi nakatahkwaau taan kaa ishi machituutahkwaau, anichii ekaa uhchishkuu Chishemanituu e ihtaayich kaa mihchiiweyihtahkwaau taan kaa ishpish ekaa uhchi payehchi pimaatisiitwaau kaye taan kaa ishpish chii wiinisuupimaatisiitwaau kaye kaa ishpish chii ihtuutahkwaau wiinisuwiniyuu.

Galatians 5:19

Piyekasch nisituunaakuniyuu taan e ihtit awen nitamukw kaa wii ishi naniheyihtamihiisut. Miyeyihtam e pisikwaatisiit, e wiinisuu ihtit, e wiinisuu pimaatisiit, e wiinisuu maamituneyihtahk,

Galatians 5:21

Wiihch mushteneyihtamuch, muush chiishkwepeuch, maausikuwiyuuch chechii wiinisuu ihtuutaatutwaau, kaye naashch namui mamestinamuch che ishi mamachi ihtuutahkwaau. Shaash chichii ayaakwaamitinaawaau miin maak chika ayaakwaaitinaawaau anichii uyuu kaa ishi pimaatisiitwaau namui Chishemanituuh uchisheuchimaawiniihch chika uhchi ishi tipeyihtaakusuuch.

Ephesians 5:18

Ekaawii chiishkwepekw e minihkweyekw shuuminaapuu, wesh eukuu che wanaachihiikuyekw. Teyakuch pachishtinaahkw Payehchi Ahchaahkw chechii saakaschineshkaataakw.

1 Thessalonians 4:5

Anichii ekaa kaa chischeyimaatwaau Chishemanituuh pisikw tipeyimikuuch nitamukw chechii ihtitwaau. Chiyawaau maak wii namui uu chipaa uhchi iteyihtaakusinaawaau.

Titus 3:3

Wesh kaye chiyaanuu peyakwaau chichii chiishkwepimaatisiinaanuu, namui chuuhchi nanihiihtuwaanuu Chishemanituu, chichii wiyeshihiikunaanuu kaye chichii shaakuuchihiikunaanuu nanaahkuu machi nituweyihtamuwinh kaye machi miyeyihtamuwinh. Pisikw chichii machaatisiinaanuu kaye chichii uhteyimaanuuch awenichii. Chichii uhkaataanuuch awenich kaye wiyawaau maak chichii uhkaateyimikunuuch.

1 Peter 1:14

Suuhk nanihiihtuwaakw Chishemanituu. Ekaawii miin chika uhchi nihtaauchihuumakan taan kaa chiishi machi nanitaweyihtamekw anite utaahch eshkw ekaa mitun chekwaan uhchi papaameyihtamihiikuyekw kaye eshkw ekaa uhchi chischeyihtamuwekw Chishemanituu utiteyihtamuwin.

Jude 1:4

Wesh ihtaauch ekaa mitun Chishemanituuwaatisiitwaau naapeuch chiimuut e chii uhchi ihtaatwaau mekwesiinuu anit e ihtaawekw. Nitamukw ishi chiskutamaacheuch e iteyihtaakuniyich Chishemanituuh ushaweyihchichewiniyuu. Itweuch ekaa wiyesh iteyihtaakuniyich awen aat nitamukw e itaatisiit wesh yaapach chika wepeyihtamaakuu Chishemanituu. Namui uhchi wii nanihiihtaweuch Utipeyihchikeu Jesus aniyuu wechimaamiihkw. Weskach maak anite, Chishemanituu umasinahiikanihch chii niikaan wiihtaakun anit eshkw che waweshihaakanuutwaau uchii.