1 Peter 4:11 - Chishemanituu Utayimuwin: Kaa Uskaach Testament

¹¹ Awen e chii miikut Chishemanituu chechii ayimit chipaa ayimuu taan aniyuuh e ishi miikut Chishemanituu chechii ishi ayimit. An awen kaa miyaakanuut kaschihuwiniyuu chechii wiichihaat kutak aweyuu kiipaa chipaa wiichiheu taan e ishi miikut Chishemanituu kaschihuwiniyuu. Ekw maak wiya Chishemanituu che chisteyihtaakuhaakanuut misiwe chekwaayuu taan e ishi ihtuutahk anite Jesus Christ e ihtaayich ishi, wiya Chishemanituu ekaa nihtaa che iskwaapayich uchisteyihtaakusuwin kaye umaskuusiiwin. Amen.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹¹ ᐊᐌᓐ ᐁ ᒌ ᒦᑯᑦ ᒋᔐᒪᓂᑑ ᒉᒌ ᐊᔨᒥᑦ ᒋᐹ ᐊᔨᒨ ᑖᓐ ᐊᓂᔫᐦ ᐁ ᐃᔑ ᒦᑯᑦ ᒋᔐᒪᓂᑑ ᒉᒌ ᐃᔑ ᐊᔨᒥᑦ᙮ ᐊᓐ ᐊᐌᓐ ᑳ ᒥᔮᑲᓅᑦ ᑲᔅᒋᐦᐅᐎᓂᔫ ᒉᒌ ᐐᒋᐦᐋᑦ ᑯᑕᒃ ᐊᐌᔫ ᑮᐹ ᒋᐹ ᐐᒋᐦᐁᐤ ᑖᓐ ᐁ ᐃᔑ ᒦᑯᑦ ᒋᔐᒪᓂᑑ ᑲᔅᒋᐦᐅᐎᓂᔫ᙮ ᐁᒄ ᒫᒃ ᐎᔭ ᒋᔐᒪᓂᑑ ᒉ ᒋᔅᑌᔨᐦᑖᑯᐦᐋᑲᓅᑦ ᒥᓯᐌ ᒉᒀᔫ ᑖᓐ ᐁ ᐃᔑ ᐃᐦᑑᑕᐦᒃ ᐊᓂᑌ ᒌᓴᔅ ᙭ ᐁ ᐃᐦᑖᔨᒡ ᐃᔑ, ᐎᔭ ᒋᔐᒪᓂᑑ ᐁᑳ ᓂᐦᑖ ᒉ ᐃᔅᒀᐸᔨᒡ ᐅᒋᔅᑌᔨᐦᑖᑯᓱᐎᓐ ᑲᔦ ᐅᒪᔅᑰᓰᐎᓐ᙮ ᐊᒣᓐ᙮

1 Peter 4:11 Iomraidhean Croise

Matthew 6:13

Ekaawii maak ituhtahiinaan anite chechii kakwechihiikuyaahch. Pechi kanuweyiminaan taan waa ishi kakwechihiikuyaahch machimanituu. Wesh chiya chitipiyeusiyin chuuchimaawin kaye chiya chitayaan suuhkaatisiiwin kaye chisteyihtaakusuwin kaachiche kaye kaachiche. Eukw maak uyuu Jesus kaa ishi chiskutamaachet che ishi ayimihaanuyich.”

John 13:31

Iskutak maak kaa wiiwiit Judas, Jesus chii iteu, “Ekw maak Iinuu Ukusisa chesteyihtaakuhaakanuyich ekw maak kaye Chishemanituu chesteyihtaakuhaakanuut Iinuu Ukusisa uhchi.

ᐊᐸᔅᑕᓚᒡ 7:38

Eukw uu Moses chii ihtaau kaye wiya anite pakwaatiskamikaahch mekwaach kaa ihtaatwaau anite anichii weskach chitiiniiminuuch. Kaye maak chii ihtaau anite Sinai wachiihch Sinai anit kaa ayimihiikut enchil. Wiya Moses chii miyaakanuu chechii aashuuwiihtamaatahkw Chishemanituu utayimuwiniyuu an ekaa wiiskaat che puunipayihch.”

Romans 11:36

Wiya Chishemanituu misiwe chekwaayuu chii ushihtaau. Wiya misiwe chekwaayuu naanaakachihtaau. Wiya misiwe chekwaayuu tipiyeusiiu. Wiya maak kaachiche kata wii chisteyimaakanuu. Amen.

Romans 12:3

Chishemanituu nichii chishewaatutaakw e chii miit chechii atushkuukw. Ekun maak wehchi ititakuch misiwe e tashiyekw ekaa uste chechii iteyimisuyekw taan chipaa iteyimisunaawaau. Kuiskw wiishi maamituneyimisukw. Misiwe e tashiyekw chika wiyeyihtenaawaau taan taapwe chechii ihtuutamekw. Uu maak e wiyeyihtamekw chika wii nanaakatuweyihtenaawaau taan kaa ishpish miitaakw Chishemanituu taapwehtamuwiniyuu.

Romans 16:27

Chishemanituu mikw wiya kaa Chishemanituut kaye tekash kaa kachehtaaweyihtahk, kata maamihchimaakanuu aniyuu uhchi taan e ishi ihtuutamiyich Jesus Christ. Amen.

Romans 3:2

Mistahii kiipaa chekwaan iteyihtaakun Jewa e itiskaanesit awen. Mistahii taapwe iteyihtaakun. Niishtam chekwaan. Eukw uchii Jewa kaa itiskaanesitwaau iinuuch kaa miyaakanuutwaau chechii aapatisiihkahtamuwaatwaau Chishemanituuh utayimuwiniyuu.

1 Corinthians 10:31

Maau chipaa ihtinaawaau. Misiwe chekwaan e ihtiyekw, e miichisuyekw maak e minihkweyekw, chipaa ihtuutenaawaau Chishemanituu mikw chechii chisteyimaakanuut.

1 Corinthians 12:4

Nanaahkuu miiwewinh chichii miikunaanuu, peyakushuu maak an Kaa payehchisiit Ahchaahkw kaa miitahkw uyuuh miiwewinh.

1 Corinthians 3:10

Chishemanituu kaa ishi chishewaach miyutuutamuut nichii itikw chechii atushkuuk. Nichii ishi aapatisin maak muyaam an awen naashch kaa kaschihut e ushihtaat taanit che tehchikaapuuniyich waaskaahiikaniyuu. Ekw maak kutakach e ati chiishihtaatwaau aniyuu kaa ishi chihchi wiikaapuuhtaauch. Mikw maak misiwe anichii kaa ati aapatisiihkahtahkwaau aniyuu kaa ishi chihchi wiikaapuuhtaauch yaaitei kuiskw kata wii ishi wiikaapuuhtaauch aniyuu waaskaahiikaniyuu.

1 Corinthians 6:20

Wesh chekwaayuu chii ishi tipahiicheu chechii ayaausk. Aapachihtaa chiiyuu Chishemanituu chechii chisteyihtaakuhiit.

2 Corinthians 2:17

Pasch awenichii kaa papaa kacheskwetwaau muyaam e papaa ataawewaatwaau Chishemanituuh utayimuwiniyuu ekun e ishinaakusitwaau, e wii uhtisiitwaau shuuliyaayuu e ihtitwaau. Namui wii niyaan uu nitishinaakusinaan. Nikuiskutehenaan kaye chihchiwe nititeyihtenaan taan e itashumiyimiht Christ chechii ishi atushkuwachiht wesh nichischeyimikunaan taan e ihtuuchiht.

2 Corinthians 9:13

Eyuu maak kata chishtaachimeuch Chishemanituu waapahtahkwaawenich e nuukuniyich taapwe e taapwehtamuwekw kaye e nanihiihtamuwekw Jesus Christ umiywaachimuwin. Kaye maak kata chishtaachimeuch Chishemanituuh aniyuu taan kaa ishpish wiichihekuch kaye taan kaa ishpish wiichihiimekw kutak aweyuuh.

Ephesians 1:19

Nitutamuwaau kaye chechii nisituhtamekw e ishpish suuhcheyihtaakuniyich aniyuu umaskuusiiwin Chishemanituu kaa aapatisiimakaniyich piihch e ihtaauhkw, chiyaanuu kaa taapwehtamukw.

Ephesians 4:29

Ekaawii nitamukw ayimuwin aapachihtaakw, teyakuch ishi ayimukw aniyuu che miyu wiichihiikutwaau anichii kaa pehtaataakuch awenichii mikw taan e ispayiwaakwenich upimaatisiiwinawaahch.

Ephesians 5:20

Muush nanaaskumaahkw Chishemanituu Kuuhtaawiinuu misiwe chekwaayuu taan e ati ispayiyich Jesus Christ Chitipeyihchikeminuu uhchi.

Ephesians 6:10

Eukw maahchishtai che ititakuch chekwaan, niichishaanitikw. Anite Utipeyihchikeu usuuhkaatisiiwinihch kaye umaskuusiiwinihch ekute wii ishi yaaichikaapuukw.

Philippians 1:11

Chitayimiheshtamaatinaawaau muush chechii miyutuutawekuch awenichii wesh chikuiskutaatisiinaawaau. Christ chitihtuutaakuwaau chechii miyutuutawekuch awenichii. Ekw maak Chishemanituu che chisteyimaakanuut kaye che maamihchimaakanuut.

Philippians 2:11

Misiwe awen chika itweu, Jesus eukw Utipeyihchikeu, e maamihchimaat Chishemanituu, Uhtaawiimaau.

Colossians 4:6

Muush chipaa miyuuhtaakusinaawaau kaye chipaa iipwaahkaahtaakusinaawaau e ayimiyekw ekw maak che chischeyihtamekw taan che ishi nishkweushihekw awen e wii naanituu kachesteyihtahkw taan e ishi taapwehtamuwekw.

1 Thessalonians 2:4

Teyakuch muush mikw taan e ishi nituweyimiyimiht Chishemanituu chechii ishi waawiihtamuchiht ekun e ishi waawiihtamaahch, wesh wiya nichii iteyimikunaan e taapweucheyihtaakusiyaahch chechii aapatisiihkahtamuchiht miywaachimuwiniyuu. Ekw maak wiyaawiihtamaahch namui wii naapeu e wii naheyihtamihiichiht, Chishemanituu eukw chechii naheyihtamihiichiht wesh wiya chinituu chischeyimikunuu taan e ihtuuhkw.

1 Timothy 1:17

Ekw maak kaachiche katawii chisteyimaakanuu kaye wiya maauch katawii chisteyihtaakuhaakanuu an kaachiche kaa chisheuchimaaut, an ekaa nihtaa che nipit, ekaa kaa nuukusit kaye an mikw payekut Chishemanituu. Amen.

1 Timothy 6:16

Wiya mikw kaachiche pimaatisiyuu, anite maak ekaa nihtaa muhch chechii naataakanuyich waashtewiniyuu ekut e ihtaat, anite ekaa aweyuu chechii naatikut. Namui nihtaa muhch uhchi waapamikuu aweyuu kaye namui nihtaa chika chii waapamikuu. Wiya maak chika chisteyihtaakuhaakanuu kaye maak wiya ayaau kaachiche suuhkaatisiiwiniyuu. Amen.

Titus 2:1

Chiya maak, e chiskutamuutwaau chipaa wiihtamuwaauch taan che ishi pimaatisiitwaau e wii kuiskutaatisiitwaau.

Titus 2:15

Chiskutamuuch uyuu chekwaayuu kaye aapachihtaa an tipeyihchichewin kaa miikuyin chechii kaachiichimitwaau, kaye chechii wiihtamuutwaau taanit e wanipayitwaau. Ekaawii awen chika uhchi wii aatuweyimukw.

Hebrews 13:7

Miin kutach chekwaan, maamituneyimaahkuch maa anichii maauch niishtam kaa wawiihtamaataakuch Chishemanituu utayimuwiniyuu, anichii kaa niikaanishkahkwaau ayimiheukamikuyuu. Maamituneyimaahkuch taan kaa itaatisiitwaau kaye kaa ishi puunipimaatisiitwaau eshkw e taapweyimaatwaau Jesus. Ekun an che wii wiichihiikuyekw chechii taapwehtamekw taan kaa ishi taapwehtahkwaau.

Hebrews 5:12

Shaash chipaa chiskutamuwaawaauch awenichii taan e ishi taapwemakaniyich Chishemanituu utayimuwin wesh shaash weskach kaa uhchi taapwehtamekw chiyawaau miywaachimuwin. Mikw maak netuweyihtaakunikwe miin chechii chiskutamaakuyekw taan kaa ishi chiskutamaakuyekw uskach kaa chihchi taapwehtamekw muyaam apistawaashach mikw chuuchuusinaapuih kaa minihaakanuutwaau chititeyihtaakusinaawaau. Wesh namui chii miichuuch wiyaasiyuu apistawaashach.

James 1:19

Ekaawii wanichischisikw uu niichishaanitikw kaa saachihiitakuch. Misiwe awen suuhk muush yaakwaau chipaawii nituhtam, chipaa maamituneyihtam kaye taan waa itwet kaye namui tiiwehch chipaa uhchi chishuwaasuu.

James 1:26

Awen e iteyimisut e kuiskutaatisiit mikw maak ekaa chii naanaakachihtaat taan e itwet, wiyeshihiisuu an awen. Namui wiyesh itaapataniyuu utayimihewin.

1 Peter 2:12

Suuhk wii kuiskupimaatisiikw mekwesiinuu anichii ekaa kaa taapwehtahkwaau e ihtaatwaau. Ekut chechii nisituunahkwaau chimiyuutuutamuwinawaau ekw maak che maamihchimaatwaau Chishemanituu iskutak takushiniyichen. Ekun che ihtitwaau aat anuhchiish nitamukw e ishi mamishimitaakuch mwehch e machituutamuwekw.

1 Peter 2:5

Muyaam e pimaatisiitwaau asiniich chitishinaakusinaawaau anit wehchi wiikaapuuhtaat Chishemanituu uwaaskaahiikanim, anit e ihtaat kaa payehchisiit ahchaahkw. ekute maak anite muyaam ayimiheuchimaauch e payehchi pimaatisiitwaau e itaapachihiitaakw. Misiwe taan che ishi pachishtinamuwekwe chekwaan Jesus Christ e ihtaat, chika nahiiwehiikuu Chishemanituu.

1 Peter 4:10

Misiwe paahpeyakw awen ihtakuniyuu taan e ishi miikut Chishemanituu kaschihuwiniyuu. Eukw maak uyuu kaschihuwiniyuu chipaa aapachihtaau e waawiichihaat kutak aweyuuh, e aashuu miyaat aweyuuh Chishemanituuh ushaweyihchichewiniyuu.

1 Peter 4:16

Maak chiishpin niyehkaachihuuwekwe e nuushuushkuwekw Christ ekaawii chika uhchi pimaameyimunaawaau. Chipaa nanaaskumaawaau Chishemanituu Christ e ayaautaakw.

1 Peter 5:11

Wiya maak Chishemanituu kaachiche ayaau misiwe suuhkaatisiiwiniyuu. Amen.

Jude 1:25

chika miyaakanuu chisteyihtaakusuwiniyuu, chisheuchimaawiniyuu, suuhkaatisiiwiniyuu ekw maak tipeyihchewiniyuu, Chitipeyihchikeminuu Jesus Christ uhchi, kaachiche kaye kaachiche. Amen.