1 Peter 3:22 - Chishemanituu Utayimuwin: Kaa Uskaach Testament

²² Eukw uu Christ kihchikiishikuhch kaa ishi uhpiskaat kaye kaa waaweyipahiikut Chishemanituu unihiiwiniihch itehche anit maauch e chisteyihtaakuniyich chechii apit awen. Ekut maak kaa miyaakanuut chechii uchimaahkahtuwaat misiwe enchil kaye chechii tipeyihtahk misiwe kihchikiishikw tipeyihchewiniyuu kaye misiwe suuhkaatisiiwiniyuu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

²² ᐁᐅᒄ ᐆ ᙭ ᑭᐦᒋᑮᔑᑯᐦᒡ ᑳ ᐃᔑ ᐅᐦᐱᔅᑳᑦ ᑲᔦ ᑳ ᐙᐌᔨᐸᐦᐄᑯᑦ ᒋᔐᒪᓂᑑ ᐅᓂᐦᐄᐎᓃᐦᒡ ᐃᑌᐦᒉ ᐊᓂᑦ ᒫᐅᒡ ᐁ ᒋᔅᑌᔨᐦᑖᑯᓂᔨᒡ ᒉᒌ ᐊᐱᑦ ᐊᐌᓐ᙮ ᐁᑯᑦ ᒫᒃ ᑳ ᒥᔮᑲᓅᑦ ᒉᒌ ᐅᒋᒫᐦᑲᐦᑐᐙᑦ ᒥᓯᐌ ᐁᓐᒋᓪ ᑲᔦ ᒉᒌ ᑎᐯᔨᐦᑕᐦᒃ ᒥᓯᐌ ᑭᐦᒋᑮᔑᒄ ᑎᐯᔨᐦᒉᐎᓂᔫ ᑲᔦ ᒥᓯᐌ ᓲᐦᑳᑎᓰᐎᓂᔫ᙮

1 Peter 3:22 Iomraidhean Croise

Matthew 22:44

Utipeyihchikeu chii iteu Nitipeyihchikemh, ute pechi apih nihiiwinihch paatish chii ashpashihiikwaawenich anichii kaa uhkaatiskwaau.

Matthew 28:18

Ekw kaa naatikutwaau Jesus kaa itikutwaau, “Nichii miikuun niya tekash chechii uchimaahkahtamaan kihchikiishikw nesht aschii.

Mark 12:36

Kaa payehchisiyich Ahchaahkw chii ihtuutaakuu aniyaa David chechii itwet, Utipeyihchikeu chii iteu Nitipeyihchikemh, ute pechi apih nihiiwinihch paatish chii ashpashihiikwaawenich anichii kaa uhkaatiskwaau.

Mark 16:19

Paatimaa maak Jesus kaa chiishi ayimihaat uchischinuhamuwaakanh kihchikiishikuhch chii ishi uhpiskaau. Anite Chishemanituu unihiiwiniihch itehche ekute kaa ishi waweyapit.

Luke 20:42

David maak uyuu e chii ishi masinahamukupane anite unikamuwinihch, Utipeyihchikeu chii iteu Nitipeyihchikemh, ute pechi apih nihiiwinihch,

John 13:32

Ekw maak Chishemanituu uchisteyihtaakusuwin e nuukuhtaakanuyich Ukusisimaau e ihtaayich uhchi, ekw wiya Chishemanituu che waapahtiyaat iinuu taan e ishpish chisteyihtaakusiyich Ukusisimaau.

ᐊᐸᔅᑕᓚᒡ 1:11

Ekw kaa itikutwaau, “Chiyawaau naapeutikw Galileehch kaa uhchiyekw, chekwaan wehchi niipuuyekw utah, ishpimihch e iitaapiyekw. Uu Jesus taan kaa ishi pechi utinaakanuut kihchikiishikuhch ishi, kaa ishi waapamekw e ituhtet kihchikiishikuhch ekun mwehch che ishinaakusit miin takushihke.”

ᐊᐸᔅᑕᓚᒡ 3:21

Ekute maak anite kihchikiishikuhch che ihtaat paatish misiwe chekwaayuu uschihtaakanuyiche aniyuu taan kaa ishi niikaan wiihtahkwaau che ispayiyich aniyehkaanaanich weskach kaa payehchisiitwaau uchischiwehiichesuuch.

Romans 8:34

Namui maak awen chika chii nishuuwanaachimeu Chishemanituuh uwiyaapimaakaniyuuh chechii itwet e iteyihtaakuniyich chechii waweshihaakanuyich umachihtwaawiniyuu uhchi. Wesh namui mikw kuuhchi nipistamaakunuu Christ eyuu chii wanishkaanaakanuu nipuwinihch uhchi. Mekwaach maak Chishemanituuh unihiiwiniihch apuu e ayimiheshtamaatahkw.

Romans 8:38

Nicheshtinaahun ekaa chekwaan ihtakuhch chechii iichehtahiikuyihkw Christ usaachihiiwewinihch uhchi. Puunipimaatisiyuuhkw maak pimaatisiyuuhkw yaapach chipaa saachihiikunuu. Namui waawaach enchilich maak machi ahchaahkuhch chika chii iichehtahiikunuuch Christ usaachihiiwewiniihch uhchi. Namui chekwaan chika chii ispayuu anuhchiish maak anite niishtamihch chechii iichehtahiikuyihkw usaachihiiwewinihch uhchi.

1 Corinthians 15:24

Ekw maak Christ che wanaachihtaat misiwe uchimaawiniyuu, misiwe tipeyihchichewiniyuu kaye suuhkaatisiiwiniyuu. Ekw maak che iskwaapayihch aschii. Iskutak maak uu chii ispayihche ekw Christ che miyaat Chishemanituuh Uhtaawiimaauh chisheuchimaawiniyuu.

Colossians 3:1

Chichischeyihtenaawaau kaa wanishkaanaat Chishemanituu Christ nipuwinihch uhchi mwehch kaye chiyawaau e chii wanishkaanikuyekw ekun e ishinaakuhch. Ekw maak muush chipaa naanitaweyihtenaawaau aniyuuh chekwaayuuh ishpimihch kaa ihtakuhkwaauh, anite e apit Christ Chishemanituuh unihiiwiniihch.

Hebrews 1:13

namui maak nihtaa uhchi iteu Chishemanituu enchil taan kaa itaat Ukusisa. Chii iteu Ukusisa, Aashtam pechi apih ute nihiiwinihch. Nika shaakuuchihaauch anichii kaa uhkaatiskwaau. Nika ihtuutawaauch chechii pachishteyimutisuustaaskwaau. eukw uyuu Chishemanituu kaa itaat Ukusisa.

Hebrews 1:3

An Ukusisimaau e ihtaat ekut wehchi chischeyihtaakuniyich Chishemanituu uchisteyihtaakusuwin, kaye Ukusisimaau tekash nispituweu taan e iteyihtaakusiyich. Wiya Ukusisimaau uchimaahkahtam aschiiyuu kaye misiwe chekwaayuu ishpimihch kaa ihtakuniyich. Utayimuwin kaa suuhcheyihtaakuniyich uhchi uchimaahkahtam misiwe uyuu. Chii pachishteyimitisuu chechii nipahaakanuut chechii uhchi payehchihaakanuyich aweyuuh e wepeyihtamuwaakanuyich umachihtwaawiniyuuh. Iskutak kaa chiishihtaat uyuu kaa ishi pachishteyimitisut ekw kaa waweyapihaakanuut anite unihiiwiniih Chishemanituu e ihtaayich aniyuu maauch e ispeyihtaakusiyich kihchikiishikuhch.

Hebrews 1:6

Iskutak kaa pechi itishahwaat Chishemanituu Uniishtamuushaan utah aschiihch, chii itweu, Misiwe Chishemanituu utenchilamiyuu chika nuuchiishtaakuu.

Hebrews 10:12

Mikw maak iskutak Jesus kaa pachishtinahk upimaatisiiwin eukw mikw uu pachishtinichewin kaa nitaweyihtaakuhch anit chechii uhchi kaachiche wepeyihtamuwaakanuutwaau awenichii umachihtwaawinawaauh. Namui miin kutach pachishtinichewin uhchi nitaweyihtaakun. Anite maak Chishemanituu unihiiwiniihch ekute kaa ishi waweyapihaakanuut kaachiche chechii apit.

Hebrews 12:2

Kaye kanawaapamaataau Jesus, an kaa ihtuutaatahkw chechii taapwehtamuhkw. Wiya chiwiichihiikunuu wetaach chechii suuhchikaapuuyihkw chitaapwehtamuwinaahch paatish tekash chii nanihiiwehiihkwe Chishemanituu. Chii shaapushkam nipuwiniyuu asiteyaahtikuhch kaye namui mechim uhchi aapateyihtamihiikuu aat e chii maayeyimaakanuut kaye e chii nenehkaateyimuhaakanuut wesh mikw aniyuu taan che ishpish muuchicheyihtahk iskutak miyaaupayiche anit e nanehkaateyimut ekun aniyuu kaa maamituneyihtamihiikut. Ekw maak anuhchiish, wiya chuuchisheuchimaaminaanuu anite maak apuu Chishemanituu unihiiwiniihch iitehche.

Hebrews 4:14

Suuhk maak mamechiminihtaau an kaa ishi waawiihtamuhkw e ishi taapwehtamuhkw wesh chitayaawaanuu e chisteyihtaakusit chisheayimiheuchimaau shaash anite Chishemanituu e ihtaayich e ihtaat, eukuu Jesus, Chishemanituu Ukusisa.

Hebrews 6:20

Jesus maak uu kaa cheshtinaateyimahkw. Anite aniyuu kaa piihchet ekute e ayimiheshtamaatahkw. Wiya kaachiche chisheayimiheuchimaau Jesus mwehch Melchizedek.

Hebrews 8:1

Maau waa ititakuch. Chitayaawaanuu chisheayimiheuchimaau. Mwehch maak uu kaa ishi pechi aayimuutamaatakuch taan kaa ishi nituweyihtaakusikupane chechii iteyihtaakusit ayimiheuchimaau tekash chechii wepeyihtamuwaakanuutwaau awenichii umachihtwaawinuwaauh ekun nihaau e iteyihtaakusit uu chichisheayimiheuchimaaminuu. Anite Chishemanituuh maauch kaa suuhcheyihtaakusiyich unihiiwiniihch ekute wehtapit, anite kihchikiishikuhch.

Hebrews 9:24

Wesh Christ chii piihcheu aniyuu maauch kaa chisteyihtaakuniyich ayimiheu maahkiiyuu anite kihchikiishikuhch kaa ihtakuniyich, aniyuu ekaa naapeu uhchi ushihtaayich. Uu maahkii utah aschiihch kaa ihtakuhch nispitaachemakan e ishinaakuhch an maahkii kihchikiishikuhch kaa ihtakuhch. Jesus maak anite kihchikiishikuhch wechiihch chii piihcheu, anite muush e ayimiheshtamaatahkw Chishemanituu e ihtaayich.