1 Peter 2:5 - Chishemanituu Utayimuwin: Kaa Uskaach Testament

⁵ Muyaam e pimaatisiitwaau asiniich chitishinaakusinaawaau anit wehchi wiikaapuuhtaat Chishemanituu uwaaskaahiikanim, anit e ihtaat kaa payehchisiit ahchaahkw. ekute maak anite muyaam ayimiheuchimaauch e payehchi pimaatisiitwaau e itaapachihiitaakw. Misiwe taan che ishi pachishtinamuwekwe chekwaan Jesus Christ e ihtaat, chika nahiiwehiikuu Chishemanituu.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁵ ᒧᔮᒻ ᐁ ᐱᒫᑎᓰᑣᐤ ᐊᓯᓃᒡ ᒋᑎᔑᓈᑯᓯᓈᐙᐤ ᐊᓂᑦ ᐌᐦᒋ ᐐᑳᐴᐦᑖᑦ ᒋᔐᒪᓂᑑ ᐅᐙᔅᑳᐦᐄᑲᓂᒻ, ᐊᓂᑦ ᐁ ᐃᐦᑖᑦ ᑳ ᐸᔦᐦᒋᓰᑦ ᐊᐦᒑᐦᒄ᙮ ᐁᑯᑌ ᒫᒃ ᐊᓂᑌ ᒧᔮᒻ ᐊᔨᒥᐦᐁᐅᒋᒫᐅᒡ ᐁ ᐸᔦᐦᒋ ᐱᒫᑎᓰᑣᐤ ᐁ ᐃᑖᐸᒋᐦᐄᑖᒄ᙮ ᒥᓯᐌ ᑖᓐ ᒉ ᐃᔑ ᐸᒋᔥᑎᓇᒧᐌᑴ ᒉᒀᓐ ᒌᓴᔅ ᙭ ᐁ ᐃᐦᑖᑦ, ᒋᑲ ᓇᐦᐄᐌᐦᐄᑰ ᒋᔐᒪᓂᑑ᙮

1 Peter 2:5 Iomraidhean Croise

Romans 12:1

Aniyuu e ishpish mishaayich Chishemanituu uchishewaatisiiwin, chinituweyimitinaawaau, niichishaanitikw, chechii pachishteyihtamuwekw Chishemanituu chipimaatisiiwinawaauh muyaam e pimaatahkwaauh miiwewinh e ishinaakuhkwaauh, e payehkahkwaau kaye e naheyihtamihiikut Chishemanituu. Eukw chipaa ihtinaawaau chihchiwe chechii ishi nuuchiishtuwekw Chishemanituu.

Romans 15:16

Niya nichii wiyaapamukw Chishemanituu Jesus Christ chechii atushkaamach, anite chiyawaau ekaa Jewa kaa itiskaanesiyekw e ihtaayekw chechii ishi ayimiheu aapatisiyaan, miywaachimuwiniyuu e waawiihtamaatakuch. Eukw uyuu waa itaapachihiit Chishemanituu chechii uhchi naheyihtamihaatwaau Chishemanituuh anichii ekaa Jewa kaa itiskaanesitwaau e pachishteyimitisuutwaau wiya e ihtaayich. Kaa payehchisiit Ahchaahkw maak chitihtuutaakuwaau Chishemanituu chechii utiiniimitutaataakw.

1 Corinthians 3:16

Namui aa chichischeyihtenaawaau mwehch Chishemanituu uchisheayimiheukamikw e ishinaakusiyekw, kaye maak Chishemanituu Utahchaahkwa e piihchishkaataakw.

1 Corinthians 3:9

Taapishkun niwiichi atuschemaanaan Chishemanituu. Chiyawaau maak mwehch nihtaauchihchikan aschii chitishinaakusinaawaau. Maak ute chipaa chii ishi kanawaapahtenaawaau. Mwehch Chishemanituu uwaaskaahiikanim chitishinaakusinaawaau.

1 Corinthians 6:19

Kaye maak namui aa chichischeyihtenaawaau Kaa payehchisiit Ahchaahkw e utayimiheukamikut chiiyuuwaauh. Eukw uyuuh Ahchaahkwa Chishemanituu kaa miitaakw. Namui chii chitipiyeusiin chiiyuu. Chishemanituu tipiweusiyu chiiyuuyuu.

2 Corinthians 6:16

Namui chika chii tayaakanuuch manituuhkaanich anite Chishemanituu utayimiheukamikuwiihch. Chiyaanuu wesh Chishemanituu kaa pimaatisiit utayimiheukamikw. Mwehch Chishemanituu kaa itwet, Nika piihchishkuwaauch kaye muush nika wiichewaauch. Niya nika Uchishemanituumitutaakuch. Wiyawaau nika utiiniimitutuwaauch.

Galatians 6:10

Mikw maak che ishpish miikuwaauhkwe chechii miyutuutamuhkw ekun muush ishi kuchihtaataau chechii ishi miyutuutamuhkw, muush misiwe awen chechii waawiichihiihkw. Etituu maak anichii kaa taapweyimaatwaau Jesus chipaa wii miyutuutawaanuuch.

Philippians 1:11

Chitayimiheshtamaatinaawaau muush chechii miyutuutawekuch awenichii wesh chikuiskutaatisiinaawaau. Christ chitihtuutaakuwaau chechii miyutuutawekuch awenichii. Ekw maak Chishemanituu che chisteyimaakanuut kaye che maamihchimaakanuut.

Philippians 2:17

Maaskuuch nika nipahiikuun. Ekw maak an taapishkun tekash e chii pachishteyihtamuuhkw Chishemanituu chipimaatisiiwinuuh aat nipahiikuyaane nika miyeyihten kaye taapishkun chika miyeyihtenaanuu wesh ekut che uhchi asich pachishtinamuwaakanuut Chishemanituu taan e ishi taapweyimekw.

Philippians 4:18

Ekut uu waahtamaatakuch shaash misiwe e chii miskamaan an kaa ishi pechi wiichihiyekw. Shaash paashich nit ishpish ayaan taan kaa ishi nuuhtepayaan. Ekw maak misiwe e ayaayaan taan kaa ishi nuuhtepayaan Epaphroditus e chii petuut aniyuuh chimiiwewinawaauh. Uu kaa ishi miyekw naashch e miywaashich pachishtinichewin ishi kanawaapahtam Chishemanituu kaye naashch naheyihtamihiikuu.

Colossians 3:17

Misiwe chekwaan e ihtuutamekw kaye taan e itweyekw, Utipeyihchikeu Jesus utishinihkaasuwinihch chipaa ishi ihtuutenaawaau e nanaaskumekw Chishemanituu Kuuhtaawinuu wiya Jesus uhchi.

1 Timothy 3:15

Ekaa maak wiipach takushiniyaane, uu kaa masinahamaatakuch eukw uu che wiichihiikuyekw chechii chischeyihtamekw taan chipaa iteyihtaakusinaanuu anite e ishi peyakuteusiihkw Chishemanituu e ihtaat. Wesh uu e ishi peyakuteusiihkw eukw uyuu utayimiheukamikw an kaa pimaatisiit Chishemanituu kaye ekut wehchi yaaichikaapuyihkw kaye eukuu wehchi yaaiteyihtaakusiihkw taapwewinihch ishi.

Hebrews 3:6

Aniyuu maak Chishemanituuh e Ukusitutaakut Jesus, kuiskw ishi atushkuweu Chishemanituu e niikaanishkuumaat utiiniimiyuuh. Christ eukw Chishemanituu Uukusisa. Chiyaanuu maak chika utiiniimitutaakanuu Chishemanituu, chiishpin suuhchiteheyihkwe taapwehtamuwinihch kaye suuhk mamechiminamuhkwe taan e ishi aspeyimuyihkw.

1 Peter 2:9

Chiyawaau an kaa itiskaanesiyekw chichii wiyaapamikuwaau Chishemanituu kaye eukw chiyawaau maauch kaa niikaaneyihtaakusit chisheuchimaau utayimiheuchimaamh. Eukw chiyawaau kaa payehchisiitwaau kaa itiskaanesitwaau iinuuch, eukw chiyawaau Chishemanituu tipiiwe utiiniimih. Chiyawaau chichii wiyaapamikunaawaau chechii waawiihtamuwekw taan e ishi chisteyihtaakuniyikwaauh utayihtuwinh an kaa wiishaamitaakw wanitipiskusiiwinihch uhchi anite ishi umaamishkaach waashtewinihch.

1 Peter 4:11

Awen e chii miikut Chishemanituu chechii ayimit chipaa ayimuu taan aniyuuh e ishi miikut Chishemanituu chechii ishi ayimit. An awen kaa miyaakanuut kaschihuwiniyuu chechii wiichihaat kutak aweyuu kiipaa chipaa wiichiheu taan e ishi miikut Chishemanituu kaschihuwiniyuu. Ekw maak wiya Chishemanituu che chisteyihtaakuhaakanuut misiwe chekwaayuu taan e ishi ihtuutahk anite Jesus Christ e ihtaayich ishi, wiya Chishemanituu ekaa nihtaa che iskwaapayich uchisteyihtaakusuwin kaye umaskuusiiwin. Amen.

1 Peter 4:17

Wesh shaash utihchipayuu che wiyaaskunaat Chishemanituu utiiniim. Chiishpin maak chiyaanuu kaa taapwehtamukw niishtam che wiyaaskunikuwaauhkwe, eishimaa kata ispayuuch anichii ekaa kaa wii nanihiihtamuwaatwaau Chishemanituu umiywaachimuwiniyuu.

Revelation 1:6

Chii ihtuutam chechii masinaasuuhkw anite uchisheuchimaawinihch e atushkaamahkw Chishemanituuh Uhtaawii e ayimiheuchimaau aapatisuuhkw. Wiya chika chisteyihtaakuhaakanuu kaye chika tipeyichicheu kaachiche kaye kaachiche. Amen.

Revelation 20:6

Shaweyihtaakusuuch kaye nuwach payehchisiyuuch anichii kaa wiichihiiwetwaau anite niishtam kaa wanishkaanaakanuyich kaa nipiitwaauh. Namui machi ishkuteu saakahiikaniyuu chika uhchi tipeyimikuuch wiyawaau. Chika atushkuweuch Chishemanituuh ekw maak Jesus Christ kaye chika wiich tipeyihchikemeuch Jesus Christ peyakwaau chishemitaahtumitanuu pipun ishpish.

Revelation 3:12

Anichii awenichii che shaakuuchihtaawaakwenich taan che ishi kakwechihiikutwaau machi chekwaayuu nika ishihaauch muyaam siituuwaaskuhiikan chihchiwe e aapatahch anite uchisheayimiheukamikuhch an Chishemanituu kaa atushkuuk chechii ishinaakusitwaau. Namui maak miin wiiskaat chika uhchi nakatamuch. Nika masinahamuwaan Chishemanituuh utishinihkaasuwiniyuu anit e ihtaatwaau. Nika masinahamuwaan taan e ishinihkaateyich Chishemanituuh utihtaawiniyuu anit e ihtaatwaau eukw uu kaa uskaach Jerusalem. Chishemanituu chika pechi itishaham uyuu kihchikiishikuhch uhchi. Kaye nika masinahamuwaan kaa uskaayich nitishinihkaasuwiniyuu anit e ihtaatwaau.”

Revelation 5:10

Misiwe chichii maamuunaauch anite e ihtaayin ishi chechii atushkuwaatwaau Chishemanituuh e ayimiheuchimaau aapatisitwaau. Chika uchimaauch maak utah aschiihch.”