1 Peter 2:16 - Chishemanituu Utayimuwin: Kaa Uskaach Testament

¹⁶ Taapwe kiipaa chichii wiihkuchihiikunaawaau, mikw maak Chishemanituu utaapachihaakanh chiyawaau. Ekaawii iteyihtamukw chechii machituutamekw an uhchi e chii wiihkuchihiikawiyekw machihtwaawinihch uhchi.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

¹⁶ ᑖᐺ ᑮᐹ ᒋᒌ ᐐᐦᑯᒋᐦᐄᑯᓈᐙᐤ, ᒥᒄ ᒫᒃ ᒋᔐᒪᓂᑑ ᐅᑖᐸᒋᐦᐋᑲᓐᐦ ᒋᔭᐙᐤ᙮ ᐁᑳᐐ ᐃᑌᔨᐦᑕᒧᒄ ᒉᒌ ᒪᒋᑑᑕᒣᒄ ᐊᓐ ᐅᐦᒋ ᐁ ᒌ ᐐᐦᑯᒋᐦᐄᑲᐎᔦᒄ ᒪᒋᐦᑣᐎᓂᐦᒡ ᐅᐦᒋ᙮

1 Peter 2:16 Iomraidhean Croise

Matthew 23:13

“Chekwaan chika ishi machipayinaawaau chiyawaau wiishuwewin kaa chiskutamaacheyekw kaye chiyawaau Phariseech, chiyawaau kaa ayimihehkaasuyekw, chiyawaau kaa kachipiskuwekuch awenichii chechii piihchetwaau anite kihchikiishikw chisheuchimaawinihch, ekaa maak mechim chechii piihcheyekw chiyawaau. Namui chipachishtinaawaauch anichii kaa wii piihchetwaau anite kihchikiishikw chisheuchimaawinihch chechii piihchetwaau.

John 15:22

Ekaa uhchi pechi ayimihaauchipanenich namui chipaa uhchi ataameyihtaakusuuch machihtwaawiniyuu. Anuhchiish maak taapwe e chii pechi ayimihiikwaau kiipaa e ataameyihtaakusitwaau e chii machituutahkwaau.

Romans 6:18

Chichii wiihkuchihiikunaawaau machihtwaawinihch uhchi ekw maak kuiskutaatisiiwin kaa ati tipeyimikuyekw.

Romans 6:22

Anuhchiish maak wii, chichii wiihkuchihiikuun machihtwaawinihch uhchi Chishemanituu ekw chechii utaapachihaakanitutaask. Ekw maak tekash Chishemanituu e ihtaat ekw e ishi pahkaanishtech chipimaatisiiwin, chika ati utihten maak kaachiche pimaatisiiwin.

1 Corinthians 7:22

Wesh an awen kaa utaapachihaakanitutuuwaakanuut iskutak kaa pimaachihiikut Utipeyihchikeuh, kaa tipeyimisut ishi kanawaapamikuu Utipeyihchikeuh, ekw an awen wiya kaa tipeyimisut kaa pimaachihaakanuut eukun an Christ wetaapachihaakanitutaakut.

Galatians 5:1

Christ chichii pimaachihiikunuu ekaa miin chechii maahchikwaapihkaatikuyihkw chekwaan. Wii suuhchikaapuukw maak. Ekaawii miin chika uhchi maahchikwaapihkaatikunaawaau Jewa ayimiheu wiishuwewinh.

Galatians 5:13

Niichishaanitikw. Chichii wiyeyimikunaawaau chechii wiihkuchihiikuyekw taan e ishi maahchikwaapihkaasuyekw. Ekaawii mikw chika uhtaapachihunaawaau uu e chii wiihkuchihiikuyekw chechii tawiishtamekw chechii machituutamekw. Teyakuch chipaa waawiichihiitunaawaau e saachihiituyekw.

Ephesians 6:6

Ekaawii mikw e kanawaapamisk kuuchimaam suuhk wii aapatisih muyaam mikw naapeuh kaa wii nanihiiwehaat chechii ishinaakusiyin wesh Christ utaapachihaakanh nituweyihtaakusiyuu mitun utehiihch chechii uhchi ihtuutamiyich Chishemanituuh utiteyihtamuwiniyuu.

Colossians 3:24

Wesh Utipeyihchikeu Christ eukw chihchiwe kuuchimaamuwaau. Chischisikw maak Utipeyihchikeu che miitaakw tipahamaakusiiwiniyuu aniyuu kenaweyihtahk cheshtinaash che miyaat aniyuu kaa atushkaakut.

1 Thessalonians 2:5

Sehchei chichii ayimihiitinaan ekaa uhchi nituweyihtamaataahch chekwaan. Chiyawaau niyaanitam chichischeyihtenaawaau uu. Chishemanituu chischeyihtam e taapweyaahch uu kaa itweyaahch.

James 1:25

Chishemanituu uwiishuwewin naashch taapwe miyeyihtaakuniyuu kaye aapihkunikuuch awenichii. An maak awen yaakwaau kaa nituu chischeyihtahk uyuu wiishuwewiniyuu ekaa maak puuniit uyuu e ihtit, ekaa wanichischisit taan kaa ishi pehtahk, ihtuutahke taan e itashteyich anit, eukuu che shaweyimikut Chishemanituu misiwe taan e ihtit.

James 2:12

Chipaa ishi ayiminaawaau maak kaye chipaa ihtinaawaau mwehch awenichii eshkw che wiyaaskunaakanuutwaau aniyuu wiishuwewiniyuu kaa aapihkuniwemakaniyich uhchi.

2 Peter 2:19

Aayimuutamuweuch aweyuuh wiihkuchihiikusiiwiniyuu. Wiyawaau maak naashch taapwe ihtakuniyuu taan e ishi maahchikwaapihkaatikutwaau machi ihtuwiniyuu, wesh mikw chekwaayuu e shaakuuchihiikut awen eukun aniyuu tepeyimikut.

Jude 1:4

Wesh ihtaauch ekaa mitun Chishemanituuwaatisiitwaau naapeuch chiimuut e chii uhchi ihtaatwaau mekwesiinuu anit e ihtaawekw. Nitamukw ishi chiskutamaacheuch e iteyihtaakuniyich Chishemanituuh ushaweyihchichewiniyuu. Itweuch ekaa wiyesh iteyihtaakuniyich awen aat nitamukw e itaatisiit wesh yaapach chika wepeyihtamaakuu Chishemanituu. Namui uhchi wii nanihiihtaweuch Utipeyihchikeu Jesus aniyuu wechimaamiihkw. Weskach maak anite, Chishemanituu umasinahiikanihch chii niikaan wiihtaakun anit eshkw che waweshihaakanuutwaau uchii.