1 Peter 1:5 - Chishemanituu Utayimuwin: Kaa Uskaach Testament

⁵ Chichii taapweyimaawaau Chishemanituu, wiya maak umaskuusiiwin chika kanuweyimikunaawaau piihiim maahchishtai chiishikaayiche. Ekw maak che pimaachihiitaakw wesh ekun muush kaa pe iteyihtahk che ihtuutaataakw.

ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ

⁵ ᒋᒌ ᑖᐺᔨᒫᐙᐤ ᒋᔐᒪᓂᑑ, ᐎᔭ ᒫᒃ ᐅᒪᔅᑰᓰᐎᓐ ᒋᑲ ᑲᓄᐌᔨᒥᑯᓈᐙᐤ ᐲᐦᐄᒻ ᒫᐦᒋᔥᑕᐃ ᒌᔑᑳᔨᒉ᙮ ᐁᒄ ᒫᒃ ᒉ ᐱᒫᒋᐦᐄᑖᒄ ᐌᔥ ᐁᑯᓐ ᒨᔥ ᑳ ᐯ ᐃᑌᔨᐦᑕᐦᒃ ᒉ ᐃᐦᑑᑖᑖᒄ᙮

1 Peter 1:5 Iomraidhean Croise

John 12:48

An awen yaatuweyimikwe, kaye ekaa nenahiihtamukwe nimiywaachimuwiniyuu, chika wiyaaskunaakanuu. Aniyuu uhchi taan kaa itweyaan eukw aniyuu che uhchi wiyaaskunaakanuut maahchishtai chiishikaayiche.

John 17:15

Namui wii chinitutamaatin chechii utinatwaau utah aschihch uhchi, chinitutamaatin chechii kanuweyimatwaau ekaa chechii pischeyimikutwaau machimanituuh.

John 4:14

Awen maak che minihkwekwe aniyuu nipiiyuu che miyak chechii minihkwet, namui wiiskaat miin chika uhchi paahkutaahtam. Wesh an nipii che miiweyaan kata piihchishkaakuu muyaam e uhchi muuschichuuniyich kata ishinaakuniyuu, eukw maak uu kaa pimaachihiiwemakahch nipii anit chechii uhchi ayaat awen kaachiche pimaatisiiwiniyuu minihkwete.”

John 5:24

“Kuiskw chiwiihtamaatinaawaau, an awen che pechi nituhtamukwe taan e iteuch kaye taapwehtawaate aniyuu kaa pechi itishahuyich kaachiche kata pimaatisiyuu. Namui kata uhchi wiyaaskunaakanuu wesh nipuwinihch chii uhchi utinaakanuu ekw pimaatisiiwinihch kaa ishi pachishtinaakanuut.

Romans 11:20

Taapwe kiipaa. Mikw maak, Chishemanituu chii iicheneu aniyuuh Jewa iinuuh wesa e chii aanuwehtaakut. Chiya maak wii, chimiyunihtaauchin anit an mistikw wesh chichii taapweyimaau Chishemanituu. Ekaawii chika uhchi nanaapeumun. Ihtakun teyakuch chechii yaakwaamiyin.

Romans 8:18

Niya e iteyihtamaan taan e ishi nanehkaateyimuyihkw anuhchiish namui mitun chekwaan chika uhchi iteyihtaakun che iteyihtaakuhch iskutak utihchipayihche anit che chisteyihtaakuhiitahkw Chishemanituu.

1 Corinthians 1:21

Ekw maak e ishpish kachehtaaweyihtahk Chishemanituu chii ihtuutam ekaa kachehtaaweyihtamuwinihch chechii uhchi chischeyimikut aweyuuh. Teyakuch chii naheyihtamihiikuu chechii pimaachihaat aniyuu aweyuuh kaa taapwehtamiyich aniyuu chiishkwe ayimuwiniyuu kaa ishinihkaataakanuyich aniyuu wiyaawiihtamuhkw.

2 Corinthians 1:24

Namui kiipaa wii chiwii wawiishuwaatitinaan chechii wiihtamaataahch chekwaan chipaa taapwehtenaawaau wesh chiyaaichikaapuunaawaau taapwehtamuwinihch ishi. Teyakuch wesin chiwii wiichaapatisiimitinaan chiyawaau chechii uhchi miyeyihtamekw.

Galatians 2:20

Wesh mwehch taapwe e chii wiich nipiimak Jesus kaa chiistaaskuhwaakanuut ishinaakun. Anuhchiish maak namui ekw niya nichischinupayihtaan nipimaatisiiwin. Wiya Jesus chischinupayihtaau nipimaatisiiwiniyuu wesh nipiihchishkaakw. Ekw maak uu anuhchiish e ishi pimaatisiyaan nipimaatisiin e taapweyimak an kaa saachihiit kaye kaa pachishtinisut chechii nipahaakanuut niya uhchi, eukw Chishemanituu Ukusisa.

Ephesians 2:8

Chishemanituu sehchei chichii shaweyimikunuu kaa pimaachihiitahkw an e taapwehtamukw uhchi. Namayeu wii chiyaanuu uhchi kaa uhchipayihch chechii pimaachihuyihkw. Chishemanituu uyuu umiiwewin.

Ephesians 3:17

Kaye maak nitayimihaan, Christ chechii ihtaat chipimaatisiiwiniwaahch an uhchi e taapwehtamekw. Kaye maak an e ati yaaichinihtaauchiyekw kaye e ati yaaichikaapuuyekw saachihiiwewinihch ishi, nitayimihaan

Philippians 1:6

Nicheshtinaahuun maak Chishemanituu chechii chiishihtaat taan kaa ishi chihchi miyuunaakuhtaat chipimaatisiiwinawaauh iskutak kaa pimaachihiitaakw kaye che wiichihiitaakw etituu chechii ati nihtaauchuwekw piihiim aniyuu e chiishikaayich takushiniyichen Jesus Christ.

Philippians 4:7

Ekw maak Chishemanituu che miitaakw chiyaameyihtamuwiniyuu ekaa chechii aayimeyihtamiskaakuwekw chekwaayuu chimituneyihchikaniwaahch maak chitehiiwaahch aniyuu e taapweyimekw Christ Jesus. Eukw uu chiyaameyihtamuwin kaa aayimuutech namui tekash chii nisituhtaakanuu taan e ishpish miyeyihtaakuhch.

2 Timothy 3:15

Wesh chichischisinaache mekwaach e awaashiiwiyin shaash chichii chiskutamaakuun taan kaa ishi masinahiikanuyich Chishemanituu utayimuwinihch. Ekut kaa uhchi ayaayin kachehtaaweyihtamuwin chechii chischeyihtaman e taapweyimaat awen Christ Jesus ekut chechii uhchi pimaachihut.

Titus 2:13

Eukuu e ishi pimaatisiihkw e ashuwaapahtamuhkw cheshtinaash che ispayihch an e shaweyihtaakuhch e chiishikaach che takushihk an kaa suuhkaatisiit Chishemanituu kaye chipimaachihiiweminuu Jesus Christ e pechi nuukusit uchisteyihtaakusuwinihch.

Hebrews 6:12

Namui chinituweyimitinaan chechii chihtimiyekw, teyakuch nispituwaahkuch anichii kaa taapwehtahkwaau ekaa kaa chiiwekaapuushtawaatwaau Chishemanituu, wesh eukw uchii che miikuutwaau Chishemanituuh taan aniyuuh kaa itweyich cheshtinaash che miikutwaau.

Hebrews 9:28

Kaye wiya maak Christ mikw peyakwaa chii pachishtinam upimaatisiiwin anit chechii uhchi ihtakuniyich misiwe awen chechii wepeyihtamuwaakanuut umachihtwaawinh. Mikw maak miin chika takushinuu, namui wii chechii nihiipayihtaat anit chechii uhchi wepeyihtamaachaanuyich machihtwaawinh, chika takushinuu mikw chechii pimaachihaat aniyuuh aweyuu kaa ashuwaapamikut che ishpish takushihk.

1 Peter 1:13

Suuhk maak muush wii ayeskuweyihtamukw taan mikw che ati ispayikwe chekwaan kaye suuhk nanaakatuweyimisukw taan e ihtiyekw. Tekash mitun aspeyimututamukw an chishewaatisiiwin che miikuyekw iskutak miin takushihke Jesus Christ.

1 Peter 4:13

Teyakuch chipaa miywaatenaawaau e wiichihiiweyekw taan kaa ishi waawiisacheyihtamihaakanuut Christ, ekw maak che saakaschineshkaakuyekw miywaatamuwin iskutak pechi nuukuhtaakanuyiche uchisteyihtaakusuwin.

1 Peter 5:1

Maauyuu waa itakwaau anichii kaa wiichihiiwetwaau e pimipayihtaakanuyich ayimiheukamikuyuu anit e ihtaayekw kaa ihtaatwaau wesh kaye niya niwiichihiiwen e pimipayihtaakanuuhch ayimiheukamikw. Nika chii tipaatutamuwaan kaye taan kaa ishi nanehkaateyimuhaakanuut Christ kaye maak nika chisteyihtaakuhiikuun kaye niya iskutak nuukuhtaakanuwiiche anit Christ che chisteyihtaakuhaakanuut. Maauyuu waa itakwaau,

2 Peter 1:3

Chichischeyimaanuu ekw Jesus Christ chipimaatisiiwinaahch, an awen kaa tepwaatitahkw chechii chischeyihtamihiitahkw wiya tipiiwe uchisteyihtaakusuwin kaye uchishemanituuwaatisiiwin. Ekut maak uu uhchi, uyuu e chischeyimakw Jesus, Chishemanituu wiya usuukaatisiiwinihch uhchi shaash misiwe chichii miikunuu taan e ishi nitaweyihtaakuniyich chipimaatisiiwinaahch taapwe wiya e ihtaat chechii ishi pimaatisiyuuhkw.

1 John 3:2

Niichishaanitikw kaa saachihiitakuch, kuutawaashiimitutaakunuu Chishemanituu anuhchiish, mikw maak eshkw namui nuukun taan che iteyihtaakusiihkw, mikw chichischeyihtenaanuu iskutak takushihke mwehch wiya kaa iteyihtaakusit ekun che iteyihtaakusiihkw. Wesh chika waapamaanuu taan nihaau e iteyihtaakusit.

Jude 1:1

Jude niya, James wiichiinuu. Jesus Christ nitatushkuwaau. Nimasinahamuwaauch anichii kaa tepwaatikutwaau kaye naashch kaa saachihiikutwaau Chishemanituu Uhtaawiimaauh. Miyu kanuweyimikuuch Jesus Christ uchii.

Jude 1:24

Ekw maak an kaa peyakut Chishemanituu chipimaachihiiweminuu, an kaa kaschihut chechii kanuweyimitaakw ekaa chechii pahchishinuwekw kaye kaa kaschihut chechii ituhtahiitaakw anite e chisteyihtaakuniyich e ihtaat ekaa chekwaayuu ataameyihtaakusuwekw kaye e miywaatamuwekw,