San Juan 21:15 - Koreguaje

¹⁵ Ãu ãni pi'nisirʉmʉ Jesús Simón Pedro'te sẽesi'kʉa'mʉ. —Simón, Juan mamakʉ, ina chiime chʉ'ʉre. Jã'ata'ni, ¿mʉ'ʉ chʉ'ʉre na'a rʉa chiima'kʉ? —chiisi'kʉa'mʉ. Chiiʉna Pedro i'kasi'kʉa'mʉ. —Jʉ̃jʉ, Chʉ'ʉre Paakʉ, mʉ'ʉre rʉa chiimʉ chʉ'ʉ. Masimʉ mʉ'ʉ jã'a —chiisi'kʉa'mʉ repaʉ. Chikʉna Jesús i'kasi'kʉa'mʉ. —Jã'aja'ñe pa'ito ovejachĩiva'nare kuiracheja'che kuirakaijʉ̃'ʉ mʉ'ʉ chʉ'ʉ neenare —chiisi'kʉa'mʉ repaʉ.

San Juan 21:15 Iomraidhean Croise

San Mateo 10:37

’Mʉja'kʉpãi cuasajʉ pa'ito re'omʉ. Jã'ata'ni mʉsanʉkonapi chʉ'ʉni na'a rʉa cuasajʉ pa'imaneni chʉ'ʉ neena pa'imanejanaa'me. Ũcuachi'a mʉsanʉkona chĩiva'nare cuasajʉ pa'ito re'omʉ. Jã'ata'ni mʉsanʉkonapi chʉ'ʉni na'a rʉa cuasajʉ pa'imaneni chʉ'ʉ neena pa'imanejanaa'me.

San Mateo 16:17

Chikʉna Jesús i'kasi'kʉa'mʉ repaʉ'te. —Mʉ'ʉre Simonre, Jonás mamakʉ'te pãiʉ te'eʉjẽ'e kʉamanesinaa'me jã'a, mʉ'ʉ cuasakʉ i'kasi'e. Chʉ'ʉ Ja'kʉ Cʉnaʉmʉ Pa'ikʉji mʉ'ʉ rekochona kʉa jñauʉna masikʉ i'kasi'kʉa'mʉ mʉ'ʉ.

San Mateo 18:10

Ũcuarʉmʉ Jesús chʉkʉna'te jo'e ija'che i'kasi'kʉa'mʉ: —Iva'nare chĩiva'nare te'eʉ'terejẽ'e cu'ache cuasajʉ cuhemanejʉ̃'ʉ mʉsanʉkona. Iva'na chĩiva'na, chʉ'ʉ Ja'kʉre Cʉnaʉmʉ Pa'ikʉ'te Diore si'arʉmʉ ja'me pa'ina ángeles kuiracojñova'naa'me.

San Mateo 26:33

Chikʉna Pedro i'kasi'kʉa'mʉ repaʉ'te. —Chekʉna ũcuanʉko mʉ'ʉre jo'kasõto chʉ'ʉta'ni mʉ'ʉre jmamakarʉjẽ'e jo'kamaneja'mʉ —chiisi'kʉa'mʉ.

San Mateo 26:35

Chikʉna Pedro jo'e i'kasi'kʉa'mʉ. —Pãipi chʉ'ʉni vanisõñu chiitojẽ'e, “Jesure ñama'kʉa'mʉ chʉ'ʉ”, chiima'ñe mʉ'ʉna'me chuenisõja'mʉ chʉ'ʉ —chiisi'kʉa'mʉ. Chikʉna asa chʉkʉna ũcuanʉko Jesús neena ũcuaja'che i'kasinaa'me.

San Marcos 14:29

Chikʉna Pedro i'kaasomʉ repaʉ'te. —Chekʉna ũcuanʉko mʉ'ʉre jo'kasõto chʉ'ʉta'ni mʉ'ʉre jmamakarʉjẽ'e jo'kamaneja'mʉ —chiniasomʉ.

San Lucas 12:32

Ũcuarʉmʉ Jesús repaʉ neenare jo'e chʉ'vaasomʉ. —Te'eva'naa'me mʉsanʉkona. Jã'ata'ni pãi ovejava'nare re'oja'che kuiracheja'che re'oja'che kuiramʉ chʉ'ʉ mʉsanʉkonare. Jã'ajekʉna vajʉchʉmanejʉ̃'ʉ. Mai Ja'kʉ Dios re'oja'chere ĩsija'mʉ mʉsanʉkonare, Repaʉ pa'ichejana satena. Jã'aja'ñe cho'ora chiimʉ Dios mʉsanʉkonare.

San Lucas 22:32

Jã'ata'ni mʉ'ʉre Dioni rʉa sẽekaimʉ chʉ'ʉ, mʉ'ʉpi chʉ'ʉre cuasache'te ũhasõmanea'kʉ chini. “Jesure ñama'kʉa'mʉ chʉ'ʉ”, chiija'mʉ mʉ'ʉ. Jã'ata'ni chʉ'ʉre jachasi'kʉjekʉ cuasa oiʉ, “Cu'ache cho'osi'kʉa'mʉ chʉ'ʉ. Jo'e jã'aja'ñe cho'omaneja'mʉ chʉ'ʉ”, chini cuasaja'mʉ mʉ'ʉ. Jã'aja'ñe cuasasirʉmʉ chʉ'ʉ neenare chekʉnare chʉ'vajʉ̃'ʉ, repanapi chʉ'ʉni na'a rʉa cuasajʉ paapʉ —chiniasomʉ Jesús repaʉ'te.

San Juan 1:42

I'ka pi'ni majaa'chʉre Simonre Jesús pa'ichejana saasomʉ repaʉ. Saʉna ña Jesús repaʉ'te Simonre ija'che i'kaasomʉ: —Mʉ'ʉ mamia'me Simón. Juan mamakʉ'mʉ mʉ'ʉ. Jo'e chekere mami ve'oja'mʉ chʉ'ʉ mʉ'ʉre Cefa'te —chiniasomʉ repaʉ Jesús. (“Cefas” chini “Pedro” chiimʉ griego chʉ'o.)

San Juan 13:37

Chikʉna Pedro i'kasi'kʉa'mʉ. —Chʉkʉna'te Paakʉ, ¿je'se pa'iʉna mʉ'ʉna'me churana saicu'akʉ chʉ'ʉre? Pãipi mʉ'ʉni vanisõñu chiito chuenisõñejẽ'e vajʉchʉma'ñe mʉ'ʉni ʉ̃sechiiʉ chuenisõra chiimʉ chʉ'ʉ, mʉ'ʉpi chuenisõmanea'kʉ chini —chiisi'kʉa'mʉ repaʉ.

San Juan 21:12

Jã'aja'ñe cho'o pi'niʉna Jesús i'kasi'kʉa'mʉ chʉkʉna'te. —Rani ãijʉ̃'ʉ ãu —chiisi'kʉa'mʉ. Chʉkʉna repaʉ neena te'eʉjẽ'e, “¿Jeeja'iʉ'ʉ mʉ'ʉ?”, chiimanesinaa'me, repaʉni ña masijʉ. “Chʉkʉna'te Paakʉ'mʉ ikʉ”, chini cuasasinaa'me.

San Juan 21:7

Ũcuarʉmʉ chʉ'ʉ Jesús rʉa chiicojñokʉji i'kasi'kʉa'mʉ Pedro'te. —Maire Paakʉ'mʉ jã'ʉ —chiisi'kʉa'mʉ chʉ'ʉ. Jã'aja'ñe i'kaʉna asa Simón Pedro Jesuni ñara chini sẽ'sevʉ ju'ikãa repaʉ tĩtosikãa mini sacha chiarana sʉ'a tuãni runi chu'asi'kʉa'mʉ.

San Juan 8:42

Chitena i'kasi'kʉa'mʉ repaʉ. —Diopi raoʉna ichejare rani pa'imʉ chʉ'ʉ. Dios mʉsanʉkona Ja'kʉrepaʉ pa'ito chʉ'ʉre Repaʉ raosi'kʉre chiira'ame mʉsanʉkona. Chʉ'ʉchi'a te'eʉ cuasa cajesi'kʉma'mʉ chʉ'ʉ. Diopi raosi'kʉa'mʉ chʉ'ʉre.

Los Hechos 20:28

Asarepajʉ̃'ʉ, mʉsanʉkona pãi chʉ̃'ʉna. Ñarepajʉ pa'ijʉ re'oja'che pa'ijʉ̃'ʉ. Dios Rekocho mʉsanʉkonare Jesure cuasanare kuirache'te jo'kasi'kʉa'mʉ, mʉsanʉkonapi repanani re'oja'chere chʉ'vajʉ paapʉ chini. Masi kuirajʉ̃'ʉ repanare Jesure cuasakuanupʉ Repaʉ jũni Ũcuaʉ chiepi ro'ikani chẽa paakuanupʉ.

Los Hechos 20:29

Chʉ'ʉ sanisosirʉmʉ chai ovejava'nani ãnisoñu chini raicheja'che pãi rani rʉa cu'ache cho'ojanaa'me repanare.

Romanos 14:1

Jesucristo'te cuasanapi chuta'a masi cuasama'to repanare cuhema'ñe repana cuasache ke'remairo cavama'ñe pe'kerʉ i'kajʉ̃'ʉ.

Romanos 15:1

Mai Jesucristo'te masi cuasanapi na'a vesʉva'nani oijʉ cho'okañu, maire ʉachechi'a cuasama'ñe.

1 Corintios 8:11

Jã'aja'ñe cho'oni mʉsanʉkona majapãijanare re'oja'che pa'ivesʉnani na'a masinapi cu'ache cho'oche'te che'chojanaa'me. Jesucristo re'oja'che pa'ivesʉnare ũcuachi'a jũni ro'ikaisi'kʉa'mʉ, Diona'me re'oja'che paapʉ chini.

Gálatas 5:6

Jesucristo'te cuasajʉ jovo pa'inare, “¿Jĩko ca'nirʉ chʉto tʉacojñoja'ñe chʉ'ʉ? ¿Pãaja'ñe?”, chiiʉ cuasachejẽ'e peomʉ. “Repaʉni masi cuasajʉ chekʉnani pãire ña oijʉ re'oja'che cho'okaijʉ pañu”, chiijʉ cuasache'me re'oja'che.

Efesios 4:14

Maipi sãiñechi'a re'oja'che cho'okani chĩiva'na vesʉcheja'che vesʉma'ñe pãi jorena ũcuaʉana rani chekere che'choto tuta saoma'ñeja'ñe repana che'choche asa chẽamanejanaa'me. Ũcuarepare Dios chʉ'o jo'kasoma'ñe cuasajʉ tĩiñe pa'ina chʉ'o asa chẽamanejanaa'me mai.

Efesios 6:24

Maire Paakʉni Jesucristoni chiijʉ cuhasoma'ñe cuasanare ũcuanʉkore oiʉ re'oja'che cho'okaaʉ Dios. Re'omʉ. Pablo

Hebreos 13:20

Mʉsanʉkonare ũcuachi'a sẽekaimʉ chʉ'ʉ Repaʉ'te. Mai rekoñoã re'oja'che pa'iche cho'okaikʉ'mʉ Dios. Ũcuaʉji maire ovejava'nare masi kuiracheja'che re'oja'che kuirakʉ'te Maire Paakʉ'te Jesure jũniso tãcojñosi'kʉre vasosi'kʉa'mʉ. Mai cu'are ro'ikasa chini jũnisoʉna Repaʉ raosi'e chiere ña, “Pãi cu'ache cho'osi'e ro'i peore ro'iche'me ie”, chiniasomʉ. Jã'aja'ñe cho'osi'ejekʉna irʉmʉ Diona'me si'arʉmʉ re'oja'che pa'ire'omʉ maire, Repaʉ mamare, “Ija'che cho'oñu”, chiisi'e cho'osi'epi si'arʉmʉ pa'iʉna.

Hebreos 4:13

Repaʉ cho'osina pa'iche Diopi ñato chavechejẽ'e peoche masi ñokʉasomʉ. Ũcuaʉji sẽeʉna mai cuasachena'me cho'osi'e kʉajanaa'me mai Repaʉ'te.

1 San Pedro 1:8

Mʉsanʉkona Jesucristo'te jmamakarʉjẽ'e ñamanata'ni Repaʉ'te rʉa chiijʉ cuasarepame, “Dios maire Jesuni cuasajʉna Repaʉ pa'ichejana sara chini chẽa paamʉ”, chiijʉ. Jã'aja'ñe cuasanajejʉ mʉsanʉkona Repaʉ'te ñamanata'ni cuasajʉ rʉa pojojʉ pa'ime. Repa pojoche Dios cho'okaichejekʉ rʉarepajekʉ kʉavesamʉ.

1 San Pedro 2:2

Vĩjachĩiva'na ojeneeñeja'ñe Dios chʉ'o re'oja'chere asaneejʉ, re'oja'che pa'iche'te na'a rʉa che'chejʉ pa'ijʉ̃'ʉ,

1 San Pedro 2:25

Aperʉmʉ mai ovejava'na ma'are vesʉjʉ cavesʉsõsinaja'ñe pa'isinaa'me. Jã'ata'ni chura Cristoni oveja kuirakʉja'che pa'ikʉni jo'e co'icheja'che cuasajʉ jovorena kuirakʉ cu'ache ʉ̃sekaimʉ Repaʉ maire.

1 San Juan 4:19

Pãi te'eʉjẽ'e chuta'a Repaʉ'te cuasamarʉmʉpi pãi ũcuanʉkore oikʉ'mʉ Dios. Jã'ajekʉna mai ũcuachi'a Repaʉ'te maire charo cuasasi'kʉjekʉna chura sãiñe cuasame.

1 San Juan 5:1

“Pãi ũcuanʉkore chʉ̃'ʉa'kʉ chini Dios Raosi'kʉa'mʉ Jesús”, chini cuasana Dios chĩia'me. Dios chĩi chekʉna Repaʉ'te cuasanare mai Ja'kʉ Dios chĩijejʉna cuasame.

El Apocalipsis 2:23

Repao mamachĩi ũcuachi'a vanisõja'mʉ chʉ'ʉ. Chʉ'ʉpi jã'aja'ñe cho'oʉna asani chʉ'ʉre cuasakuanupʉã ũcuanʉko chʉ'ʉ pãi ũcuanʉko cuasachena'me repana rekoñoã pa'iche peore masiche masijanaa'me. Ũcuachi'a mʉsanʉkonare te'enarechi'a re'oja'che cho'osi'ena'me cu'ache cho'osi'e ro'iche chʉ̃'ʉja'mʉ chʉ'ʉ.