Yôsuê 13:13 - Nau Brah Ndu Ngơi 2023

¹³ Ƀiălah phung ƀon lan Israel mâu mprơh ôh phung Gêsur jêh ri phung Makatit. Yor ri, phung Gêsurit jêh ri phung Makatit hôm gŭ vah vang phung Israel kŏ tât ta nar aơ.

Yôsuê 13:13 Iomraidhean Croise

Nau Ntơm 35:22

Tâm rnôk Y-Israel gŭ ta n'gor nây, Y-Ruben hăn bê̆ch ndrel ma H'Bilha, ur yông mbơ̆ păng. Y-Israel tăng nau nây.

II Samuel 10:6

Tơlah phung Ammôn saơ ma khân păng nơm lĕ phung Y-Đavit tâm rmot, khân păng prơh phung tahan hăn lơh nkhôm klăp lah bar rmưn nuyh tahan hăn jâng bơh phung Aram ta Bêt-Rêhôp jêh ri ta Sôba, du rbăn nuyh bơh hađăch phung Maka jêh ri du rmưn bar rbăn nuyh bơh n'gor bri Tôp.

II Samuel 3:3

kon rơh bar jêng Y-Chêliap, kon bơh H'Abigêl, ur drô Y-Nabal ta yôk Karmel; kon rơh pe jêng Y-Apsalôm, kon bơh H'Maka, kon bu ur Y-Talmai, hađăch n'gor Gêsur;

Nau Kơp Bunuyh 33:55

Ƀiălah tơlah khân may mâu mprơh ôh phung ƀon lan tơm bri hăn luh, pônây lĕ rngôch phung ƀon lan khân may hôm e om mra jêng nâm lok tâm măt khân may jêh ri nâm lok ta pŭng khân may. Khân păng mra ƀư rkhŭk khân may tâm n'gor khân may mra gŭ.

Nau Vay Nkah Tay 3:14

Y-Jar bơh ndŭl mpôl Manasê hŏ sŏk lĕ n'gor Argôp kŏ tât n'har phung Gêsurit jêh ri phung Makatit, jêh ri rnha ma ƀon jê̆ Basan ma amoh păng nơm, jêng ƀon jê̆ Jar, kŏ tât ta nar aơ.)

Yôsuê 12:5

Hađăch nây chiă uănh n'gor yôk Hermôn, nkual Salêka, jêh ri lĕ bri Basan, tât ta n'har phung Gêsurit jêh ri phung Makatit, jêh ri du n'gul bri Gilêat tât ta n'har neh Y-Sihôn, hađăch ƀon Hêsbôn.

Yôsuê 13:11

Gilêat nđâp ma n'gor neh phung Gêsurit jêh ri phung Makatit, lĕ yôk Hermôn, lĕ Basan tât ta Salêka,

Yôsuê 13:12

jêh ri lĕ ƀon bri hađăch Ôk ta Basan. Hađăch nây chiă uănh jêh ta Astarôt jêh ri ta Êdrei, jêh ri păng jêng nơm hôm rêh klen bơh phung Rêphaim, Y-Môis dơi jêh đah phung nây jêh ri mprơh lơi khân păng.

Yôsuê 13:14

Y-Môis mâu ăn drăp ndơn ma ndŭl mpôl Lêvi yor lĕ ndơ ƀư brah nhhơr ăn ŭnh sa ma Yêhôva Brah Ndu Israel jêng drăp ndơn khân păng tĭng nâm Păng lah jêh ma Y-Môis.

I Samuel 27:8

Y-Đavit jêh ri phung tahan păng hăn hao lơh phung Gêsurit, phung Girsit, jêh ri phung Amalek. Nĕ jêng lĕ phung ƀon lan gŭ lĕ jŏ jêh tâm n'gor bri Sur tât ta n'gor bri Êjipt.