Yêrêmi 8:3 - Nau Brah Ndu Ngơi 2023

³ Ndrel đah lĕ phung hôm e klen bơh phung ndŭl mpôl ƀai nây tâm lam ntŭk Gâp mprơh khân păng tât, pôri khĭt ueh lơn đah rêh.” Brah Yêhôva ma phung tahan lah pônây.

Yêrêmi 8:3 Iomraidhean Croise

I Phung Hađăch 19:4

Bi păng hăn trong du nar đŏng lăp tâm bri rdah. Păng gŭ tâm dâng du tơm si n'ho toyh jêh ri mbơh sơm dăn ma păng khĭt: “Hơi Kôranh Brah! Lĕ găp jêh. Dăn ma May nglôch lơi nau rêh gâp, yorlah gâp mâu jêng ueh lơn ôh đah phung chô yau gâp.”

Yêrêmi 23:3

Gâp nơm mra rgum biăp hôm klen luh bơh lĕ rngôch bri dak Gâp hŏ mprơh jêh khân păng tât. Gâp mra njŭn khân păng plơ̆ sĭt ma ndrêch gơ̆ khân păng nơm; khân păng mra bĭk rơ̆ dŭt âk ngăn.

Yêrêmi 23:8

Ƀiălah bu mra lah: ‘Tĭng nâm Brah Yêhôva gŭ rêh mro mrăng, jêng Nơm hŏ njŭn jêh noi deh ngih Israel sĭt bơh mpeh pa lơ, bơh lĕ rngôch bri dak Păng hŏ mprơh jêh khân păng tât.’ Khân păng mra gŭ tâm bri khân păng nơm.”

Yêrêmi 29:14

Brah Yêhôva lah: “Gâp mra ăn khân may dơi mâp Gâp jêh ri gâp mra njŭn leo khân may bơh ntŭk ƀư dĭk. Gâp mra rgum tay khân may bơh lĕ rngôch bri dak jêh ri bơh lĕ rngôch ntŭk Gâp hŏ mprơh khân may. Gâp mra njŭn khân may sĭt tă bơh ntŭk Gâp hŏ nhŭp veng leo jêh khân may.”

Yêrêmi 29:28

Păng nơm yơh njuăl jêh samƀŭt tât ma bri Babilôn lah ma phung he: Rnôk rô̆ bu nhŭp veng hôm jŏ ngăn; ndâk hom ngih vâl jêh ri gŭ, tăm hom đang tơm si jêh ri sa play!’”

Yêrêmi 40:12

pôri lĕ phung Yuđa nây tă bơh ăp ntŭk bu hŏ mprơh plơ̆ sĭt da dê ma n'gor bri Yuđa, tât ma Y-Gêdalia ta ƀon Mispa. Khân păng bun prăp âk ngăn ndrănh jêh ri kao play si yan vai.

Yêrêmi 44:2

Brah Yêhôva ma phung tahan, Brah Ndu Israel, lah: “Khân may nơm hŏ saơ jêh lĕ rngôch nau mhĭk Gâp hŏ ăn tât jêh ma ƀon Yêrusalem jêh ri ma lĕ rngôch ƀon n'gor bri Yuđa. Ri, lĕ ƀon toyh nây nar aơ jêng rngol, mâu geh du huê bunuyh gŭ.

Yêrêmi 44:6

Yor nây, Gâp nkhŭt nau ji nuih jêh ri ji nuih ngăn jŭr su lĕ rngôch ƀon bri Yuđa jêh ri tâm lĕ trong toyh ƀon Yêrusalem, ƀư ma khân păng jêng ntŭk rngot njăp rjăp, roh rai.

Yêrêmi 6:9

Brah Yêhôva ma phung tahan lah: “Khân păng mra mban lĕ rngôch ƀon lan hôm e klen phung Israel, Nâm bu du huê mban play krăk ƀâu. Yơr hom ti pĕ du tơ̆ đŏng, Nâm bu bunuyh pĕ krăk ƀâu mban play klen ta klơ n'gĭng.”

Daniel 9:7

Ơ Kôranh Brah, nau sŏng srăng jêng ndơ May bi ma nau bêk jêng ma hên, nâm bu nar aơ, jêng ma phung Yuđa, phung gŭ tâm ƀon Yêrusalem, lĕ rngôch phung Israel, phung gŭ dăch tâm ban lĕ nâm bu phung gŭ ngai, tâm lĕ rngôch bri dak May nsot jêh khân păng văch yor nau djơh mhĭk khân păng hŏ ƀư jêh đah May.

Kan Lêvi 26:33

Gâp mra nkhah khân may lam phung ndŭl mpôl bunuyh jêh ri tŏk đao gưm tĭng lơh khân may. Neh khân may mra jêng ntŭk rngol, ƀon toyh khân may mra jêng rngot rklăk.

Amôt 3:1

Hơi phung kon sau Israel, iăt hom nau aơ, jêng nau Brah Yêhôva ngơi tâm rdâng đah khân may, jêng tâm rdâng đah lĕ ndŭl mpôl Gâp hŏ ngluh jêh bơh n'gor bri Êjipt.

Yônais 4:3

Ơ Brah Yêhôva, aƀaơ aơ gâp vơl dăn ma May sŏk hom nau rêh gâp, yorlah ma gâp, khĭt ueh lơn đah hôm rêh!”

Mika 2:3

Yor ri, Brah Yêhôva lah: “Nĕ, Gâp mĭn ŭch ƀư nau mhĭk tât tâm ƀon lan aơ Ƀiălah phung khân may mâu dơi doh ôh bơh trô ko; Khân may kŏ mâu dơi đŏng ngơk bôk Yorlah nây jêng rnôk rêh ni ngăn.

Nau Vay Nkah Tay 30:1

“Lah lĕ rngôch nau aơ hŏ tât ma khân may, jêng lĕ nau ueh lăng jêh ri nau rak rtăp gâp hŏ tâm mpơl jêh tanăp khân may, jêh ri lah khân may dôl rêh ta nklang ăp bri dak Yêhôva Brah Ndu nsot jêh ăn khân may tât, khân may kah gĭt mĭn rvê tay ma nau nây

Nau Vay Nkah Tay 30:4

Nđâp lah bu nsot khân may gŭ tâm ntŭk ngai dŭt trôk, bơh nây Yêhôva Brah Ndu khân may mra rgum tay khân may jêh ri djôt leo khân may plơ̆ sĭt.

Nau Tâm Mpơl 6:16

Khân păng lah ma yôk jêh ri ma lŭ toyh pô aơ: “Tŭp hom ta hên jêh ri pôn hên bơh muh măt Nơm gŭ ta sưng hađăch jêh ri bơh nau ji nuih Kon Biăp;

Nau Tâm Mpơl 9:6

Tâm lĕ nar nĕ, bunuyh mra joi nau khĭt ƀiălah mâu dơi geh ôh; khân păng ŭch ngăn nau khĭt ƀiălah nau khĭt der ngai.