Yêrêmi 5:22 - Nau Brah Ndu Ngơi 2023

²² Brah Yêhôva lah: “Lĕ phung khân may mâu klach yơk ma Gâp Mâu râm nsâr hĕ tanăp măt Gâp? Gâp jêng Nơm hŏ sŏk jêh choih ƀư n'har ma dak mƀŭt, Du ntŭk nal n'ho ro mâu dơi rlau ôh. Rbuh geh nkŏch ăt mâu dơi; Dak Mƀŭt geh ngrông nteh ăt mâu ler rlau ôh.

Yêrêmi 5:22 Iomraidhean Croise

Nau Ntơm 1:9

Brah Ndu lah: “Ăn dak tâm dâng trôk rgum nsŭn tâm du ntŭk jêh ri ăn geh neh sơh mpơl,” nau nây geh kơt nĕ.

I Phung Hađăch 13:28

Păng hăn ro jêh ri saơ săk jăn khĭt ta trong, geh seh bri jêh ri yau mŭr gŭ grem êp meng săk jăn khĭt. Yau mŭr mâu sa hêk săk jăn khĭt jêh ri mâu kăp đŏng seh bri nây.

Ndrom Samƀŭt bơh Yôp 26:10

Păng hŏ kach rup du rvang ta klơ mpiăt dak, Ta n'har vah vang nau ang jêh ri nau ngo.

Ndrom Samƀŭt bơh Yôp 37:24

Yor nau nây yơh kon bunuyh klach yơk ma Păng, Păng mâu treng uănh ôh phung mĭn ma păng nơm geh nau blau mĭn.”

Ndrom Samƀŭt bơh Yôp 38:8

Mbu hŏ sŏk lĕ mpông nchăng king lơi dak mƀŭt Lah dak mƀŭt rlêng ler lip klơ tă bơh săt brŏng jru?

Nau Mprơ Ơm 104:9

May nal jêh n'har ma dak gay ma dak mâu rlau ôh, Mâu hôm plơ̆ nkŭm tay klơ neh ntu đŏng ôh.

Nau Mprơ Ơm 119:120

Nglay săk gâp râm sâr yor klach ma May, Gâp klach râm sâr đŏng gŭ tanăp nau May phat dôih.

Nau Mprơ Ơm 33:7

Păng rgum lĕ rngôch dak mƀŭt jêng mbŭch, Jêh ri prăp dak jru nsŭn du ntŭk jay.

Nau Mprơ Ơm 46:3

Nđâp tơlah dak mƀŭt ngrông luh mpŭnh Jêh ri lĕ yôk mpât n'gơ yor nau n'goh neh. (Sêla)

Nau Mprơ Ơm 99:1

Brah Yêhôva chiă uănh! Lĕ mpôl băl bunuyh râm sâr hom; Păng gŭ klơ phung Chêrubim; neh ntu geh nau mpât n'gơ.

Nau Hôr 8:29

Tâm nal n'har ăn dak mƀŭt, Gay ma dak mâu ler ôh bơh n'har Păng nal jêh, Jêh ri nôk Păng njêng mbon rplay neh,

Êsai 50:2

Mâm ƀư tơlah Gâp văch, mâu geh bunuyh ôh? Tơlah Gâp kuăl, mâu geh bunuyh plơ̆ lah ôh? Ti Gâp jêng gleh ir hĕ kŏ păng mâu dơi tâm chuai? Mâu lah Gâp mâu geh nau brah mâu dơi tâm rklaih hĕ? Aơ, Gâp knŏng nduyh du tong, dak mƀŭt suăt kro ro. Gâp rgâl dak krong jêng bri rdah; Ka tâm dâng dak krong khĭt yor mâu geh dak. Jêh ri ƀâu ôm.

Êsai 64:2

Tâm ban ma ŭnh sa long kro, Tâm ban ma ŭnh ƀư khuh dak, Gay ăn phung rlăng đah May gĭt amoh May, Jêh ri lĕ phung ndŭl mpôl bunuyh râm nsâr tanăp May.

Êsai 66:5

Ơ khân may jêng phung râm nsâr ma nau Ngơi Brah Yêhôva, Iăt hom nau Brah Yêhôva: “Phung oh nâu khân may tâm rmot ma khân may Jêh ri mƀăr lơi khân may yor amoh Gâp, khân păng geh lah pô aơ: ‘Ăn Brah Yêhôva geh nau chrêk rmah, Gay ma hên dơi saơ nau răm maak khân may!’ Ƀiălah khân păng yơh mra bêk.”

Yêrêmi 10:7

Ơ Hađăch ma lĕ bri dak! Mbu moh mâu klach yơk May? May dơi khư ma nau yơk mbah. Yorlah ta nklang phung bunuyh blau mĭn tâm lĕ bri dak, Tâm lam ƀon bri hađăch khân păng, Mâu geh nơm dơi tâm rđĭl đah May.

Yêrêmi 2:19

Nau tih mhĭk may mra tâm rmal may, Nau may tâm rdâng mra nduyh nkra may. Gĭt năl hom jêh ri saơ rah vah nau djơh mhĭk jêh ri rngot ngăn ngên Dôl chalơi Yêhôva Brah Ndu, Jêh ri mâu geh nuih n'hâm klach yơk Gâp.” Kôranh Brah jêng Brah Yêhôva ma phung tahan lah pônây.

Yêrêmi 31:35

Brah Yêhôva jêng Nơm ăn nar ƀư nau ang dôl nar, Tâm nal jêh nau vay dăp ăn ma khay, jêh ri mănh sol ang dôl măng; Nơm ƀư mpât dak mƀŭt ăn sial rbuh lŭng nter, Tâm amoh Păng jêng Brah Yêhôva ma phung tahan, lah pô aơ:

Daniel 6:26

Gâp ăn samƀŭt nau ntrŭnh pô aơ ta lam ntŭk tâm ƀon bri hađăch gâp lĕ rngôch bunuyh mra yơk mbah jêh ri râm nsâr klach tanăp Brah Ndu Y-Daniel Yorlah Păng jêng Brah Ndu gŭ rêh mro mrăng Jêh ri hôm gŭ rêh n'ho ro. Ƀon bri hađăch Păng mâu blau rai lôch ôh, Nau Păng chiă uănh mra dŭt toyh mâu blau lôch ôh.

Amôt 4:12

“Hơi Israel, yor nây, Gâp mra ƀư ma may tâm ban pônây; Hơi Israel, yorlah Gâp mra ƀư ma may tâm ban pônây, Pôri may nkra hom ma nau tâm mâp đah Brah Ndu may.”

Amôt 9:6

Kôranh Brah hŏ ndâk jrô Păng tâm lĕ ndâr trôk, Jêh ri ndâk rvang Păng ta klơ neh. Păng kuăl dak mƀŭt Jêh ri nkhŭt ta klơ neh. Amoh Păng jêng Brah Yêhôva.

Yônais 1:16

Yor nây, phung bunuyh nây klach yơk ma Brah Yêhôva. Khân păng nhhơr ndơ ƀư brah ma Brah Yêhôva jêh ri ƀư nau ton ma Păng.

Nahum 1:4

Păng nduyh dak mƀŭt jêh ri ăn păng suăt ro, Păng ƀư ăn suăt lĕ rngôch dak krong. Bri Basan jêh ri yôk Karmel kro nhop da dê, Kao bri Liban mra nhop tâm ban lĕ.

Mathay 10:28

Lơi klach ôh ma phung nkhĭt săk jăn ƀiălah mâu dơi nkhĭt huêng; ƀiălah ăn khân may klach ma nơm dơi nkhĭt huêng nđâp ma săk jăn tâm ndrung ŭnh.

Markôs 4:39

Păng kah rngăl, buay phŭt sial jêh ri lah ma dak mƀŭt pô aơ: “Đăp mpăn hom jêh ri rngân!” Sial nsrŭng ro jêh ri dak mƀŭt rngân njup.

Luka 12:5

Ƀiălah Gâp ntĭm ma khân may gĭt klach mbu nơm: Klach hom ma Nơm, nôk nkhĭt jêh, hôm geh nau dơi mƀăr jŭr ndrung ŭnh. Di kơt nây, Gâp đă ma khân may, klach hom ma Nơm nây!

Nau Vay Nkah Tay 28:58

Tơlah khân may mâu njrăng djôt prăp lĕ nau vay dơi nchih jêh tâm ndrom samƀŭt aơ, mâu yơk ôh ma amoh chrêk rmah jêh ri dŭt klach aơ jêng YÊHÔVA BRAH NDU KHÂN MAY,

Nau Tâm Mpơl 15:4

Ơ Kôranh Brah, mbu nơm mâu mra klach yơk Kôranh Brah, Jêh ri mâu tâm rnê amoh may? Yorlah knŏng êng Kôranh Brah jêng kloh ueh. Lĕ rngôch mpôl băl mra văch Yơk mbah tanăp Kôranh Brah, Yorlah lĕ nau sŏng srăng May tâm mpơl jêh.”