Yêrêmi 46:5 - Nau Brah Ndu Ngơi 2023

⁵ Mâm ƀư Gâp hŏ saơ jêh nau aơ? Khân păng klach ngăn jêh ri rŭch plơ̆; Phung tahan bu lơh rai lĕ jêh, Ngăch ma du ro, Khân păng mâu hôm plơ̆ n'gĭl pakơi ôh; Geh nau nkrit toyh jŭm chiau meng!” Brah Yêhôva lah pônây.

Yêrêmi 46:5 Iomraidhean Croise

Nau Ntơm 19:17

Lah bar hê phung tông mpăr hŏ njŭn jêh khân păng luh padih, tâm bar hê khân păng geh du huê ngơi: “Nchuăt du hom gay rklaih nau rêh khân may, lơi dĭng uănh ôh pakơi jêh ri mâu đŏng dơi nsrŭng ta ăp ntŭk tâm neh lâng! Nchuăt hom hao klơ yôk klach lah khân may mra khĭt!”

Êsai 13:8

Khân păng mra râm nsâr. Nau ji ktang jêh ri nau rngot mra tât ma khân păng; Khân păng mra ji tâm ban ma nau ji rngot klâng bu ur dôl deh kon. Khân păng mra tâm uănh ndrăng khân păng nơm ma nau klach, Muh măt khân păng chăng tâm ban ma ŭnh!

Êsai 19:16

Tâm nar nây, phung Êjipt mra tâm ban ma phung bu ur râm nsâr klach kir dôl khân păng saơ ti Brah Yêhôva ma phung tahan yơr, yơr tâm rdâng đah khân păng.

Êsai 42:17

Bi phung rnơm nsing ma lĕ rup brah, Ngơi ma lĕ rup tŏ chiăr: “Khân may jêng phung brah hên,” Mra rle ndŭr kơi da dê jêh ri bêk brêng âk ngăn!

Êsai 5:25

Yor nây, Brah Yêhôva hŏ ji nuih đah phung ƀon lan Păng. Păng yơr jêh ti tâm rdâng đah khân păng jêh ri dong khân păng, Yôk n'găr mpât da dê. Săk jăn khĭt khân păng jêng tâm ban ma ndŏk ta nklang trong. Nđâp lah kơt nĕ, nau Păng ji nuih ê bah ôh, Ƀiălah ti Păng ăt hôm yơr ƀư ƀaƀơ.

Yêrêmi 20:10

Yorlah gâp tăng nau ngơi ƀŭk dŭk suyh: “Nau krit klach puăn mpeh! Phong hom! Ăn he phong hom păng!” Lĕ rngôch phung mĭt jiăng may Ŭch ma gâp chêh prah da dê. Khân păng lah: “Gĭt lah păng tŭp tâm nau ndơm, He mra dơi đah păng, Jêh ri plơng bôk păng.”

Yêrêmi 46:15

Mâm ƀư brah ndrôk Apis may du krap, Ndrôk may mâu dơi tâm rdâng ôh? Yorlah Brah Yêhôva hŏ mprơh jêh khân păng du.

Yêrêmi 46:21

Nđâp ma phung tahan tâm lơh nkhôm gŭ ta nklang păng Nâm bu kon ndrôk lay ueh; Ƀiălah ndôn kơi nchuăt du da dê, Mâu dơi tâm rđâng ôh. Yorlah nar mhĭk tât, nar tâm rmal, Hŏ tât jêh ta klơ khân păng.

Yêrêmi 49:29

Bu mra sŏk lơi ngih bok jêh ri mpa rong khân păng, Nđâp ma bok nching jêh ri ndô ndơ, Djôt rdu nđâp ma seh samô khân păng, Bu mra nter huy: ‘Geh nau klach krit nchueng jŭm!’”

Yêrêmi 49:5

Kôranh Brah jêng Brah Yêhôva ma phung tahan, lah: “Aơ, Gâp mra ƀư ăn nau klach krit Tă bơh ăp njônh tât ta may; Ăp nơm tâm khân may, bu mra mprơh jêh ri nchuăt rlet panăp, Mâu geh bunuyh mra rgum phung nchuăt du ôh.

Yêrêmi 6:25

Lơi ta luh padih mir ôh, Lơi hăn nsong rŏ trong, Yorlah phung rlăng cheng đao, Srih nau klach krit lam ntŭk.

Êsêkiêl 32:10

Gâp mra ăn âk phung ƀon lan geh nau klach krit yor may, Jêh ri phung hađăch khân păng mra râm nsâr yor may, Tơlah Gâp yơr đao tanăp măt khân păng. Tâm nar may rlâm tŭp jêh, Lĕ rngôch bunuyh klach da dê ăp nar ăp mông Mĭn rvê ma nau rêh păng nơm.’

Êsêkiêl 39:18

Khân may mra sa puăch phung janh ktang, nhêt mham phung kôranh chiă uănh tâm neh ntu, phung biăp nkuăng, biăp kon, be nkuăng, ndrôk nkuăng lay bri Basan.

Nahum 2:8

Bơh kăl e, Ninive nâm bu nglao bêng dak. Abaơ ri, khân păng lĕ du jêh! Geh bâr nter: “Dâk hom, dak hom!” Ƀiălah mâu geh du huê rle n'gĭl ôh!

Nahum 2:9

Pit in hom prăk, pit in mah Yorlah jay ndơ khlay mâu geh dŭt ôh, Lĕ ndơ khlay âk râk.

Sôphôni 1:14

“Nar toyh bơh Brah Yêhôva lĕ dăch tât jêh, Dăch ngăn jêh, păng tât gơnh ngăn ro. Geh bâr nter lah rêh ni ngăn tâm nar Brah Yêhôva, Nôk nây phung janh mra nter nhĭm tâm ban lĕ.