Yêrêmi 28:4 - Nau Brah Ndu Ngơi 2023

⁴ Brah Yêhôva lah: ‘Gâp mra njŭn sĭt Y-Jêkônia, kon bu klâu Y-Jêhôjakim, hađăch Yuđa, jêh ri lĕ rngôch phung Yuđa jêng bu nă hăn gŭ jêh tâm bri Babilôn, ăt plơ̆ sĭt tâm ntŭk aơ, yorlah Gâp nkê̆ch lơi mâng mbăk hađăch Babilôn.’”

Yêrêmi 28:4 Iomraidhean Croise

Nau Ntơm 27:40

May mra rêh yor ma đao, Jêh ri jêng oh mon ma oh may. Ƀiălah dôl may hôm rêh mblêng ta aơ ta ri, May mra nkê̆ch lơi mâng mbăk oh may ta trô ko may.”

II Phung Hađăch 24:14

Hađăch nhŭp lĕ rngôch bunuyh ƀon lan Yêrusalem hăn jêng bu nă, nđâp lĕ rngôch phung kôranh tahan jêh ri lĕ tahan janh ktang, lĕ rngôch jêng du rmưn bunuyh. Hađăch nhŭp đŏng lĕ rngôch phung trah meh jêh ri phung kan chiăr, mâu geh du huê hôm klen ôh, knŏng phung ƀon lan o ach lơn tâm n'gor bri.

Êsai 9:4

Lĕ rngôch ndrom jâng phung tahan soh tâm nôk tâm lơh, Jêh ri kho ao mprănh mham Bu mra prăp ma ndơ ăn ŭnh sa da dê.

Yêrêmi 13:19

Lĕ ƀon Nêgep bu nchueng jŭm da dê jêh Mâu geh bunuyh rklaih ăn khân păng. Lĕ rngôch phung Yuđa bu ƀư jêng bu nă, Lĕ rngôch bu nhŭp rdu.

Yêrêmi 2:20

“Bơh jŏ Gâp hŏ nkê̆ch pă mâng mbăk, Tôch lơi rse rvăk ma may, Ƀiălah may ngơi: ‘Gâp mâu mra pah kan đŏng ôh.’ N'hêl nanê̆ ngăn, klơ ăp yôk prêh, Tâm dâng ăp pŭm tơm si âk n'ha, May kŭnh bôk nâm bu bu ur văng tĭr.

Yêrêmi 22:10

Lơi ta nhĭm ôh ăn ma bunuyh lĕ khĭt jêh, Mâu lĕ nhĭm vơl ma khân păng; Ƀiălah nhĭm hom ma nơm du hăn, Yorlah păng mâu mra lŏ plơ̆ sĭt, Mâu hôm saơ ntŭk tâp sok koh klŏ păng nơm đŏng ôh.

Yêrêmi 22:24

Brah Yêhôva lah: “Nâm bu Gâp gŭ rêh mro mrăng, nđâp lah Y-Jêhôjakin, kon bu klâu Y-Jêhôjakim, hađăch Yuđa, jêng rgên chrăk ta ti ma Gâp, Gâp ăt doh lơi may.

Yêrêmi 24:1

Brah Yêhôva ăn gâp saơ bar mlâm bĭ play rvi dơm panăp ngih Brah Yêhôva. Nau aơ tât geh jêh Nêbukatnetsar, hađăch Babilôn, nhŭp Y-Jêkônia kon bu klâu Y-Jêhôjakim, hađăch Yuđa, ndrel ma phung kôranh bri Yuđa, phung blau rhăk jêh ri phung chiăr luh bơh Yêrusalem, njŭn leo ma bri Babilôn ƀư jêng bu nă.

Yêrêmi 24:5

“Yêhôva Brah Ndu phung Israel lah pô aơ: ‘Nâm bu play rvi ueh aơ, Gâp mra mât mray jêh ri ƀư nau ueh uĭn ăn ma phung bu nă tă bơh bri Yuđa, jêng phung Gâp hŏ njŭn leo jêh bơh ntŭk aơ ăn khân păng hăn rlet ma bri Kaldê.

Yêrêmi 27:8

Tơlah moh ƀon lan mâu lah moh ƀon bri hađăch mâu pah kan ôh ma hađăch nây, jêng Y-Nêbukatnetsar, hađăch Babilôn, jêh ri mâu anh mbăk hađăch Babilôn tâm trô ko păng, pôri Gâp mra tâm rmal ƀon lan nây ma đao, ma nau sa sât ji ngot, ma nau ji tưp, kŏ tât ti hađăch ƀư rai lĕ khân păng, Brah Yêhôva lah pônây.

Yêrêmi 28:10

Nơm mbơh lor Y-Hanania doh mâng mbăk bơh trô ko nơm mbơh lor Y-Yêrêmi, nkê̆ch pă lơi mâng mbăk,

Yêrêmi 28:2

“Brah Yêhôva ma phung tahan, Brah Ndu Israel, lah: ‘Gâp hŏ nkê̆ch lơi mâng mbăk hađăch Babilôn.

Yêrêmi 29:1

Aơ jêng nau ngơi tâm samƀŭt nơm mbơh lor Y-Yêrêmi njuăl tă bơh Yêrusalem ăn ma phung bu ranh hôm klen tâm phung ƀư bu nă, ăn ma phung kôranh ƀư brah, ma phung nơm mbơh lor, jêh ri ma lĕ rngôch phung ƀon lan, hađăch Y-Nêbukatnetsar hŏ nhŭp tă bơh Yêrusalem leo ma bri Babilôn.

Yêrêmi 29:2

Samƀŭt nchih pakơi hađăch Jêkônia, mê̆ hađăch, lĕ phung kôranh bu char, lĕ phung kôranh Yuđa jêh ri Yêrusalem, phung blau rhăk jêh ri nơm chiăr bu hŏ njŭn jêh tă bơh Yêrusalem.

Yêrêmi 30:8

Brah Yêhôva ma phung tahan lah: ‘Tâm nar nây, Gâp mra nkê̆ch lơi mâng mbăk bơh trô ko may, Tôch lơi rse kât ma may, Phung bu năch mâu mra đă may pah kan đŏng ôh.

Kan Lêvi 26:13

Gâp jêng Yêhôva Brah Ndu khân may, Nơm hŏ ngluh jêh khân may luh bơh Êjipt gay ma khân may mâu hôm đŏng ƀư dĭk. Gâp hŏ nkê̆ch lơi jêh mâng mbăk ma khân may gay ma ăn khân may n'gơr prêh bôk gay hăn sŏng.’

Nahum 1:13

Ƀiălah aƀaơ aơ, Gâp mra nkê̆ch pă mâng mbăk păng tă bơh khân may Jêh ri ăn tăch lơi rse chăp kât khân may.”