Yêrêmi 27:13 - Nau Brah Ndu Ngơi 2023

¹³ Mâm ƀư may jêh ri phung ƀon lan may rŏng khĭt đah đao, sa sât ji ngot, nau ji tưp nâm bu nau Brah Yêhôva hŏ lah ma mbu ƀon lan mâu mra pah kan ôh ma hađăch Babilôn?

Yêrêmi 27:13 Iomraidhean Croise

Nau Hôr 8:36

Ƀiălah mbu nơm ngơi djơh ma gâp jêng ƀư mhĭk ma huêng păng nơm; Lĕ rngôch phung tâm rmot ma gâp jêng rŏng ma nau khĭt.”

Yêrêmi 17:4

May mra ƀư roh êng Drăp ndơn Gâp ăn jêh. Gâp mra nhŭp may pah kan ma phung rlăng đah may Tâm du n'gor may ê hŏ mâp gĭt; Yorlah may hŏ sŭnh ŭnh hao ji nuih ma Gâp, Pôri păng mra su hit mro mrăng.”

Yêrêmi 24:9

Gâp mra njêng ăn khân păng plơ̆ jêng nau nkrit, du nau mhĭk tât ma lĕ rngôch ƀon bri hađăch ta neh ntu; du nau prêng, du nau bu gơm mưch, du nau ngơi mhĭk, du nau bu rak rtăp tâm lĕ rngôch ntŭk Gâp mprơh khân păng tât.

Yêrêmi 27:8

Tơlah moh ƀon lan mâu lah moh ƀon bri hađăch mâu pah kan ôh ma hađăch nây, jêng Y-Nêbukatnetsar, hađăch Babilôn, jêh ri mâu anh mbăk hađăch Babilôn tâm trô ko păng, pôri Gâp mra tâm rmal ƀon lan nây ma đao, ma nau sa sât ji ngot, ma nau ji tưp, kŏ tât ti hađăch ƀư rai lĕ khân păng, Brah Yêhôva lah pônây.

Yêrêmi 38:2

“Brah Yêhôva lah: ‘Mbu nơm hôm gŭ tâm ƀon aơ mra khĭt ma tak đao, ma nau sa sât ji ngot, mâu lah ma nau ji tưp; ƀiălah mbu nơm luh jao săk păng nơm ma phung Kaldê mra dơi rêh; khân păng mra dơi rklaih nau rêh nâm bu geh drăp ndơ jêh ri mra rêh.’

Yêrêmi 38:20

Y-Yêrêmi lah: “Bu mâu mra jao may ôh. Knŏng ŭch may tông tĭng bâr Brah Yêhôva moh nau gâp hŏ lah jêh ma may, pônây may mra dơi geh nau ueh jêh ri hôm dơi geh nau rêh.

Yêrêmi 38:23

Lĕ rngôch phung ur kon hađăch bu mra njŭn leo ăn ma phung Kaldê; bi ma hađăch ăt mâu mra klaih ôh bơh ti khân păng, ƀiălah hađăch Babilôn mra nhŭp jêh ri bu mra su ƀon aơ ma ŭnh.”

Êsêkiêl 14:21

Pônây Kôranh Brah Yêhôva lah: ‘Gâp sŏk puăn ntil nau tâm rmal jru rlau lơn ma nây jêng gưm đao, nau sa sât ji ngot, mpô mpa bri janh jêh ri nau ji tưp nkhĭt ăn ma ƀon Yêrusalem gay ƀư rai lơi bunuyh jêh ri mpô mpa tâm bri tâm nây.

Êsêkiêl 18:24

Ƀiălah tơlah bunuyh sŏng srăng chalơi nau sŏng srăng păng jêh ri ƀư tih, ƀư nau ƀơ̆ ƀơch nâm bu phung ƀai hŏ ƀư, bunuyh nây dơi geh nau rêh lĕ? Mâu, mâu geh du ntil nau sŏng srăng păng hŏ ƀư dơi kah gĭt tay. Yor nau mâu răp jăp jêh ri nau tih păng hŏ ƀư yor nây păng mra khĭt.’

Êsêkiêl 18:31

Mƀăr ngai hom đah khân may lĕ rngôch nau tih khân may ƀư jêh. Ƀư hom ma khân may nơm nuih n'hâm mhe jêh ri huêng brah mhe! Hơi ngih Israel, mâm ƀư khân may ŭch khĭt?’

Êsêkiêl 33:11

Lah hom ma khân păng pô aơ: ‘Kôranh Brah Yêhôva lah: Tĭng nâm Gâp gŭ rêh mro mrăng, Gâp mâu maak ôh ma nau khĭt nơm mhĭk, ƀiălah maak yor nau păng chalơi trong păng jêh ri dơi rêh. Khân may chalơi hom, chalơi trong djơh mhĭk khân may! Mâm ƀư khân may ŭch khĭt, hơi ngih Israel?’