Yêrêmi 16:15 - Nau Brah Ndu Ngơi 2023

¹⁵ Ƀiălah mra lah: ‘Tĭng nâm bu Brah Yêhôva gŭ rêh mro mrăng, jêng Nơm hŏ njŭn leo kon sau phung ƀon lan Israel plơ̆ sĭt tă bơh mpeh pa lơ jêh ri tă bơh lĕ rngôch bri dak khân păng bu hŏ mprơh tât.’ Yorlah Gâp mra njŭn tay khân păng plơ̆ sĭt ma bri Gâp hŏ ăn jêh ma phung chô yau khân păng.”

Yêrêmi 16:15 Iomraidhean Croise

Nau Ntơm 28:15

Aơ, Gâp gŭ ndrel ma may, ăp ntŭk may hăn, Gâp mra tĭng mât mray may ta ntŭk nây, jêh ri njŭn leo may sĭt ta n'gor aơ. Gâp mâu ôh chalơi may kŏ tât Gâp ƀư rĭng lĕ moh nau Gâp hŏ ton ma may.”

Nau Mprơ Ơm 106:47

Ơ Yêhôva Brah Ndu hên, dăn sâm rklaih hên, Tâm rƀŭn hên bơh nklang lĕ bri dak, Gay ma hên mra tâm rnê ma amoh kloh ueh May Jêh ri dơi mprơ tâm rnê ma May.

Êsai 14:1

Ngăn yơh, Brah Yêhôva mra yô̆ nđach ma Yakôb jêh ri hôm du tơ̆ đŏng săch Israel. Păng mra ăn ma khân păng gŭ tâm bri khân păng nơm. Phung bu năch mra tâm rnglăp đah khân păng jêh ri mra gŭ ndrel đah ngih Yakôb.

Yêrêmi 12:15

Ƀiălah hŏ lôch jêh rôk khân păng, Gâp mra yô̆ nđach tay khân păng jêh ri djôt ăp bunuyh plơ̆ sĭt ma drăp ndơn jêh ri ƀon tơm khân păng.

Yêrêmi 23:3

Gâp nơm mra rgum biăp hôm klen luh bơh lĕ rngôch bri dak Gâp hŏ mprơh jêh khân păng tât. Gâp mra njŭn khân păng plơ̆ sĭt ma ndrêch gơ̆ khân păng nơm; khân păng mra bĭk rơ̆ dŭt âk ngăn.

Yêrêmi 23:7

Brah Yêhôva lah: “Yor nây, aơ, nar mra tât, phung bunuyh mâu mra hôm lah đŏng ôh: ‘Tĭng nâm Brah Yêhôva gŭ rêh mro mrăng, jêng Nơm hŏ njŭn jêh phung ƀon lan Israel du luh bơh bri Êjipt.’

Yêrêmi 23:8

Ƀiălah bu mra lah: ‘Tĭng nâm Brah Yêhôva gŭ rêh mro mrăng, jêng Nơm hŏ njŭn jêh noi deh ngih Israel sĭt bơh mpeh pa lơ, bơh lĕ rngôch bri dak Păng hŏ mprơh jêh khân păng tât.’ Khân păng mra gŭ tâm bri khân păng nơm.”

Yêrêmi 24:6

Gâp mra ntreng măt tât ma khân păng, ƀư nau ueh ma khân păng jêh ri njŭn leo khân păng plơ̆ sĭt ma bri aơ. Gâp mra ndâk njêng mâu di ƀư rai ôh; mra brôi tăm mâu di rôk lơi ôh.

Yêrêmi 29:14

Brah Yêhôva lah: “Gâp mra ăn khân may dơi mâp Gâp jêh ri gâp mra njŭn leo khân may bơh ntŭk ƀư dĭk. Gâp mra rgum tay khân may bơh lĕ rngôch bri dak jêh ri bơh lĕ rngôch ntŭk Gâp hŏ mprơh khân may. Gâp mra njŭn khân may sĭt tă bơh ntŭk Gâp hŏ nhŭp veng leo jêh khân may.”

Yêrêmi 3:18

Tâm nar nây, ngih Yuđa mra hăn ndrel ma ngih Israel, jêh nây khân păng mra nsum ndrel luh bơh neh mpeh pa lơ, plơ̆ sĭt ma n'gor Gâp hŏ ăn ma phung chô yau khân may ƀư drăp ndơn.

Yêrêmi 30:10

Brah Yêhôva lah: ‘Ơ Y-Yakôb, oh mon Gâp, lơi klach ôh. Ơ phung Israel, lơi klach krit ôh! Yorlah aơ, Gâp mra rklaih may luh bơh ntŭk ngai ngăn, Jêh ri phung kon sau may bơh bri bu nă. Y-Yakôb mra plơ̆ sĭt jêh ri rêh ueh lăng đăp rmên, Mâu hôm geh klach nuyh đŏng ôh.’

Yêrêmi 30:3

Brah Yêhôva lah: ‘Aơ, nar panăp Gâp mra njŭn leo phung ƀon lan Israel jêh ri Yuđa Gâp plơ̆ sĭt tă bơh ntŭk jêng dĭk, Gâp mra njŭn leo khân păng sĭt tâm bri dak Gâp hŏ ăn jêh ma phung chô yau khân păng, jêh ri khân păng mra sŏk dơn bri dak nây ƀư drăp ndơn.’ Brah Yêhôva lah pônây.”

Yêrêmi 31:8

Aơ, Gâp mra njŭn khân păng sĭt bơh bri mpeh pa lơ, Rgum tâm rƀŭn khân păng bơh nglĕ dŭt rplay neh. Ta nklang khân păng mra geh nơm chieh măt, nơm rvĕn, Phung bu ur ntreo jêh ri bu ur veng deh, Jêng du phung âk ngăn ngên mra sĭt ta aơ.

Yêrêmi 32:37

‘Aơ, Gâp mra rgum tâm rƀŭn khân păng tă bơh lĕ rngôch bri Gâp hŏ mprơh jêh khân păng tâm nau hao nuih, nuih hâu ngăn jêh ri tâm nau ji nuih Gâp mra njŭn khân păng plơ̆ sĭt ma ntŭk aơ jêh ri ăn ma khân păng gŭ pah kan đăp mpăn.

Yêrêmi 50:19

Ƀiălah Gâp mra njŭn Israel sĭt ma ntŭk ndrêch gơ̆ nse păng nơm, păng mra sa gơ̆ hơm mpay ta Karmel jêh ri tâm bri Basan, jêh ri ta klơ yôk bri Êphraim jêh ri tâm bri Gilêat.”

Êsêkiêl 36:24

Gâp mra sŏk sĭt lơi phung khân may tă bơh ta nklang lĕ phung ƀon lan, rgum tay khân may tă bơh lĕ rngôch bri dak jêh ri leo sĭt tâm bri êng khân may nơm.

Êsêkiêl 39:28

Khân păng mra gĭt Gâp jêng Yêhôva Brah Ndu khân păng, nđâp lah Gâp hŏ mprơh khân păng jêng bu nă tâm lĕ bri dak êng jêh nây rgum tay khân păng sĭt ta bri dak khân păng nơm, mâu ăn klen du huê bunuyh ôh.

Yôel 3:1

“Yor aơ, tâm lĕ nar nây, jêh ri jêng rnôk Gâp mra njŭn phung bu nă bơh Yuđa jêh ri Yêrusalem plơ̆ sĭt,

Amôt 9:14

Gâp mra njŭn leo phung ƀon lan Israel Gâp plơ̆ sĭt bơh bu nă; Khân păng mra ndâk tay lĕ ƀon toyh lĕ rai jêh, jêh ri gŭ ta nây. Khân păng mra tăm đang krăk ƀâu jêh ri nhêt ndrănh păng, Khân păng mra jik mir khân păng jêh ri sa play păng.

Amôt 9:15

Gâp mra tăm tay Israel tâm bri khân păng nơm Jêh ri bu mâu mra hôm rôk ôh khân păng bơh bri Gâp ăn jêh ma khân păng.” Brah Yêhôva jêng Brah Ndu may lah kơt nây.