Yêrêmi 11:8 - Nau Brah Ndu Ngơi 2023

⁸ Ƀiălah khân păng mâu iăt, mâu rkêng tôr iăt; ăp nơm chuat hăn tĭng nau mĭn nuih n'hâm djơh mhĭk jêh ri nau rôih ko khân păng nơm. Yor nây, Gâp hŏ djôt tât ăn ma khân păng ăp nau tâm nau rnglăp aơ, jêng nau tâm rnglăp Gâp hŏ ntĭnh khân păng tĭng kơt ƀiălah khân păng mâu ƀư ôh.”

Yêrêmi 11:8 Iomraidhean Croise

Nêhêmi 9:26

Nđâp lah pônây, khân păng mâu tông bâr lĕ jêh ri tâm rdâng đah May, Chalơi nau vay Kôranh Brah pakơi, Nkhĭt phung nơm mbơh lor May, jêng phung mbơh ăn khân păng gay ăn khân păng plơ̆ sĭt tay ma Kôranh Brah, Jêh ri khân păng ƀư rngot lơ hâu lơn ma May.

Nêhêmi 9:29

Kôranh Brah mbơh đŏng ăn khân păng njrăng, gay ƀư ăn khân păng plơ̆ sĭt ma nau vay May. Ƀiălah khân păng gŭ ngao ma nau sưr, mâu tông tĭng ôh ma nau vay ntăm bơh Kôranh Brah. Khân păng ƀư tih đah nau vay ƀư bơh Kôranh Brah, jêng nau vay ƀư ngăn tơlah mbu nơm tông, nanê̆ mra dơi rêh. Khân păng dăng bôk, dăng ko jêh ri mâu ŭch tông bâr ôh.

Yêrêmi 13:10

Phung ƀon lan mhĭk aơ mâu ŭch iăt ôh nau Gâp, sŏl ko ƀư tĭng nau mĭn nuih n'hâm khân păng nơm, nchuăt tĭng ndô̆ phung brah êng ŭch pah kan jêh ri yơk mbah. Khân păng mra jêng mâu hôm dŏng nâm bu rse vân bŭt aơ.”

Yêrêmi 3:17

Rnôk nây bu mra ntơ Yêrusalem jêng sưng Hađăch Brah Yêhôva. Lĕ rngôch mpôl bunuyh mra tâm rƀŭn tâm amoh Brah Yêhôva ta ƀon Yêrusalem, khân păng mâu mra dăng bôk ôh rêh tĭng nuih n'hâm mhĭk khân păng nơm đŏng.

Yêrêmi 31:32

Nau tâm rnglăp aơ mâu di nâm bu nau tâm rnglăp Gâp ƀư jêh đah phung chô yau khân păng tâm nar Gâp kuăn ti têk njŭn khân păng du luh tă bơh n'gor Êjipt, nau tâm rnglăp khân păng hŏ ƀư rai lơi jêh, nđâp lah Gâp jêng Sai khân păng,” Brah Yêhôva lah pônây.

Yêrêmi 32:23

Khân păng hŏ lăp jêh ri dơn bri aơ ƀư drăp ndơn, ƀiălah khân păng mâu ŭch tông bâr May ôh, mâu rêh tĭng nau vay May, mâu ƀư tĭng ôh du ntil tâm lĕ rngôch nau May ntĭnh. Yor nây, May ăn tât jêh lĕ nau mhĭk aơ ma khân păng.

Yêrêmi 34:14

‘Tât năm tal pơh, ăn ăp nơm tâm lĕ khân may mplơ̆ ăn kon me ma bunuyh Hêbrơ hŏ bu tăch jêh ma may. Pakơi prao năm pah kan, may mra mplơ̆ ăn kon me ma bunuyh nây.’ Ƀiălah phung chô yau khân may mâu iăt ôh nau, mâu lĕ rkêng tôr iăt ma Gâp.

Yêrêmi 35:15

Gâp ƀaƀơ prơh hăn jêh lĕ rngôch phung oh mon Gâp, jêng phung nơm mbơh lor, hăn tât lah ma khân may: “Ăp nơm tâm khân may mra chalơi trong mhĭk jêh ri tâm rgâl nau khân may ƀư. Lơi ta tĭng ôh gay pah kan ma lĕ brah êng, ri mơ khân may mra gŭ tâm bri Gâp hŏ ăn jêh ma khân may jêh ri ma phung chô yau khân may.” Ƀiălah khân may mâu mâp rkêng tôr, jêh ri mâu iăt ôh nau Gâp.

Yêrêmi 35:17

Yor nây, Yêhôva Brah Ndu ma phung tahan, Brah Ndu Israel lah: ‘Aơ, Gâp ăn tât ma phung Yuđa jêh ri lĕ rngôch phung gŭ tâm ƀon Yêrusalem lĕ rngôch nau mhĭk djơh Gâp hŏ mbơh lor jêh ăn ma khân păng, yorlah Gâp ngơi khân păng mâu iăt, Gâp kuăl khân păng mâu plơ̆ lah ôh.’”

Yêrêmi 38:20

Y-Yêrêmi lah: “Bu mâu mra jao may ôh. Knŏng ŭch may tông tĭng bâr Brah Yêhôva moh nau gâp hŏ lah jêh ma may, pônây may mra dơi geh nau ueh jêh ri hôm dơi geh nau rêh.

Yêrêmi 44:16

“Nau may ngơi jêh ma hên tâm amoh Brah Yêhôva, hên mâu mra iăt ôh.

Yêrêmi 44:17

Ƀiălah, hên mra ƀư nŭm lĕ nau hŏ ton jêh luh bơh ma mbung hên, mra nhhơr ndơ ƀâu kah jêh ri ƀư nau ndơ nhhơr nhêt ma hađăch bu ur tâm trôk, nâm bu hên jêh ri phung chô yau hên, phung hađăch jêh ri phung kôranh hên hŏ ƀư jêh tâm ƀon n'gor Yuđa jêh ri n'gŏ trong toyh ƀon Yêrusalem. Nôk nây, hên hŏ geh ndơ sông sa âk rmeh, gŭ rêh geh nau chăt hao, mâu geh nau mhĭk tât ôh.

Yêrêmi 44:5

Ƀiălah khân păng mâu iăt ôh, mâu lĕ rkêng tôr iăt, mâu chalơi ôh nau ƀai jêh ri hôm nhhơr ndơ ƀâu kah ăn ma phung brah êng.

Yêrêmi 7:13

Brah Yêhôva lah: ‘Aƀaơ ri, yorlah khân may hŏ ƀư jêh lĕ nau nây, Gâp vay ngơi ƀaƀơ lah ma khân may ƀiălah khân may mâu iăt ôh; Gâp hŏ kuăl khân may khân may mâu plơ̆ sĭt lah.

Yêrêmi 7:24

Ƀiălah khân păng mâu iăt, mâu srâng iăt; sŏl ko chuat hăn tĭng lĕ nau mĭn êng khân păng nơm, tĭng tâm nau nuih n'hâm djơh mhĭk jêh ri dăng ko păng nơm; khân păng plơ̆ sĭt pakơi mâu hăn ôh rlet panăp.

Yêrêmi 7:26

Ƀiălah khân păng mâu ŭch iăt Gâp, mâu ŭch lĕ srâng iăt, lơ hâu dăng bôk dăng ko, gŭ ngao mhĭk lơn ma phung chô yau khân păng.”

Êsêkiêl 20:8

Ƀiălah khân păng ŭch tâm rdâng đah Gâp jêh ri mâu ŭch iăt Gâp ôh; ăp nơm mâu mƀăr ôh lĕ nau ƀơ̆ măt khân may jêh ri mâu chalơi phung rup brah bri Êjipt. Rnôk nây, Gâp lah pô aơ Gâp mra nkhŭt nau Gâp ji nuih ta klơ khân păng, nkhŭt lĕ nau ji nuih Gâp mra tâm rdâng ma khân păng ta nklang bri Êjipt.

Sakari 1:4

Lơi ta ƀư nâm bu phung chô yau khân may, phung nơm mbơh lor kăl e hŏ kuăl jêh khân păng, Brah Yêhôva ma phung tahan lah: ‘Chalơi hom trong mhĭk jêh ri nau djơh janh khân may ƀư.’ Ƀiălah khân păng mâu iăt ôh, mâu lĕ ŭch gŭ mĭn ma Gâp. Pôri Brah Yêhôva lah.

Sakari 7:11

Ƀiălah khân păng dun mâu ŭch iăt, dăng bôk jêh ri ndôn kơi, nsêt lơi tôr khân păng nơm gay lơi ăn tăng ôh nau ngơi.