Nơm Nti 9:11 - Nau Brah Ndu Ngơi 2023

¹¹ Gâp saơ tay tâm dâng nar: Mâu di lĕ ngăch jâng jêng blau nchuăt, Suan ktang jêng dơi nau tâm lơh, Ăt mâu di lĕ blau mĭn jêng hơm tŏng, Gĭt rbăng jêng ndrŏng kuăng, Jêh ri blau ngăn jêng nau yô̆; Yorlah mông găl jêh ri nau ƀŭn lap tât da dê ăn ma lĕ rngôch bunuyh.

Nơm Nti 9:11 Iomraidhean Croise

II Samuel 17:14

Y-Apsalôm jêh ri lĕ rngôch phung Israel lah da dê: “Nau nchră Y-Husai, bunuyh Arkit, jêng ueh lơn ma nau nchră Y-Ahitôpel.” Yorlah Brah Yêhôva hŏ nal jêh ŭch ƀư roh nau nchră Y-Ahitôpel, gay ăn nau mhĭk tât ma Y-Apsalôm.

II Samuel 17:23

Tơlah Y-Ahitôpel saơ bu mâu ƀư tĭng nau nchră păng, păng dăp ưn seh bri păng hăn trong plơ̆ sĭt ma ngih păng tâm ƀon păng nơm. Jêh păng ƀư lôch lĕ kan ma ngih vâl păng, păng nkhĭt săk nơm. Bu tâp păng tâm môch mbơ̆ păng.

II Nau Rêh Jêng 20:15

Păng lah: “Ơ lĕ rngôch phung Yuđa jêh ri phung gŭ tâm ƀon Yêrusalem, jêh ri hađăch Jôsaphat, iăt hom! Brah Yêhôva lah ma khân may kơt aơ: ‘Lơi ta klach ôh, lơi krit ôh tanăp phung tahan âk râk nây, yorlah nau tâm lơh aơ mâu jêng kan khân may ôh, ƀiălah jêng kan Brah Ndu.

Ndrom Samƀŭt bơh Yôp 34:29

Lah Păng gŭ rklăk, mbu nơm dơi phong Păng? Lah Păng pôn muh măt, mbu nơm dơi saơ Păng? Nđâp lah Păng hôm mât uănh ăp phung ndŭl mpôl mâu lah ăp nau rêh bunuyh,

Nau Mprơ Ơm 76:5

Phung tahan janh ktang bu hŏ ntŭng pit jêh ndơ, Khân păng nơm gŭ tâm nau hăk bê̆ch; Mâu geh du huê nơm janh ktang Dơi mpư tur ti khân păng nơm.

Nau Hôr 1:5

Phung blau mĭn mra gŭ iăt jêh ri ntop nau gĭt blau lơn, Phung gĭt rbăng mra dơi joi nau bu ntĭm,

Nơm Nti 2:12

Gâp plăch mĭn rvê mpeh ma nau blau mĭn, nau rluk, jêh ri brŭt ndrăng; yorlah bunuyh chiă uănh ntrok hađăch moh mra dơi ƀư? Nĕ knŏng nau bunuyh êng hŏ ƀư bơh jŏ jêh.

Nơm Nti 3:14

Gâp saơ pô aơ lĕ kan Brah Ndu hŏ ƀư mra hôm e tât n'ho ro; bu mâu dơi ntop đŏng ôh, mâu đŏng dơi n'hŭch lơi. Mâm Brah Ndu ƀư kơt nây gay kon bunuyh klach yơk ma Păng.

Nơm Nti 3:17

Gâp mĭn êng: “Brah Ndu mra phat dôih bunuyh sŏng srăng jêh ri phung djơh mhĭk, yorlah geh năng tâm nal ăn lĕ ntil nau, lĕ rngôch kan.”

Nơm Nti 4:1

Gâp plơ̆ sek uănh tay lĕ rngôch nau tŭn jot nau tât geh tâm dâng nar: Ri, phung bu tŭn jot hoch hor dak măt Mâu geh nơm bonh leng khân păng! Phung tŭn jot mƀin nsing ma nau dơi, Ƀiălah phung bu tŭn jot mâu geh nơm bonh leng!

Nơm Nti 4:4

Gâp dơn saơ kon bunuyh pah kan đah nau hŏt rgănh jêh ri gĭt blau, knŏng yor ŭch nach bunuyh aơ đah nơm êng dơm yơh. Nau aơ nâm bu jêng nau dơm dam, tĭng rlong sial khôm.

Nơm Nti 7:13

Mĭn rvê hom ma nau kan Brah Ndu; Mbu nơm mra dơi ƀư ăn sŏng ndơ Păng hŏ nkê̆ch kue?

Nơm Nti 9:2

Ăp nau kan geh tât ăn ma lĕ rngôch bunuyh du ai tâm ban, nsum du mrô tâm nal: Bunuyh sŏng srăng tâm ban ma phung djơh mhĭk, Bunuyh ueh tâm ban ma phung mhĭk, Bunuyh geh nau kloh tâm ban ma phung ƀơ̆ ƀơch, Bunuyh nhhơr mpa ƀư brah tâm ban phung mâu nhhơr, Bunuyh sŏng tâm ban ma phung nau tih, Bunuyh tâm ton tâm ban phung mâu nănh tâm ton.

Nơm Nti 9:3

Aơ jêng nau mhĭk tât tâm lĕ rngôch moh nau geh tât tâm dâng nar: Yorlah ăp bunuyh dơn nsum du mrô tâm nal yor ri nuih n'hâm kon bunuyh bêng ma nau janh ƀai, jêh ri nau brŭt ndrăng chiă uănh nau mĭn khân păng du bông nau rêh, gay nglĕ dŭt mra hăn lăp tâm ma nau khĭt.

Yêrêmi 46:6

“Bunuyh ngăch jâng ăt mâu dơi du ôh, Nơm dăng ktang ăt mâu dơi klaih lĕ; Tâm mpeh pa lơ, ta kơh dak krong Ơphrat, Khân păng chêh prah sa mok!

Yêrêmi 48:14

Mâm khân may dơi lah: ‘Hên jêng phung janh nănh, Jêng phung tahan ktang ntŭk tâm lơh’?

Yêrêmi 9:23

Brah Yêhôva lah: “Bunuyh blau lơi rnê êng ma nau blau mĭn păng nơm; Bunuyh ktang lơi rnê êng ma nau dăng ktang păng nơm; Bunuyh ndrŏng lơi rnê êng ma nau ndrŏng păng nơm ôh.

Daniel 4:35

Lĕ rngôch bunuyh gŭ ta neh ntu jêng tâm ban ma dơm dam. Păng ƀư tĭng nâm nau Păng ŭch da dê ma lĕ manh tâm trôk Nđâp ma phung bunuyh gŭ ta neh ntu. Mâu geh du huê dơi nkân ti Păng Mâu lah ôp: “Moh nau May ƀư?”

Sakari 4:6

Păng lah ma gâp: “Aơ jêng nau ngơi bơh Brah Yêhôva lah ma Y-Sôrôƀaƀel: ‘Nau nây mâu di yor nau dơi ôh, kŏ mâu lĕ yor nau blau kan, ƀiălah yor Brah Huêng ueh Gâp.’ Brah Yêhôva ma phung tahan lah.

Malachi 3:18

Nôk nây, khân may mra plơ̆ sĭt jêh ri saơ nau êng ngăn tâm phung sŏng srăng jêh ri phung djơh mhĭk, tâm phung pah kan ma Brah Ndu jêh ri đah phung mâu pah kan ma Păng.”

Êphêsô 1:11

Tâm Păng đŏng, he dơi săch jêng phung sŏk dơn ndơn drăp hŏ tâm nal jêh tĭng nau Brah Ndu dăp, Nơm ƀư lôch lĕ ntil ndơ tĭng nau Păng ŭch,

Nau Vay Nkah Tay 8:17

Pôri, ăn blau njrăng, lơi khân may lah tâm nuih n'hâm pô aơ: ‘Nau brah jêh ri nau dăng bơh bar đah ti gâp hŏ njêng jêh ma gâp nau ndrŏng aơ.’

Nau Vay Nkah Tay 8:18

Ƀiălah ăn kah gĭt ma Yêhôva Brah Ndu khân may, yorlah Păng jêng Nơm ăn ma khân may n'hâm suan gay njêng nau ndrŏng aơ, gay ƀư nau tâm rnglăp Păng hŏ ton jêh ma phung chô yau khân may, nâm bu Păng dôl ƀư nar aơ.

I Samuel 17:50

Pônây, Y-Đavit dơi đah bu klâu Philistin ma du găr lŭ klŭp ma na rvĭt, nkhĭt păng mâu ŭch djôt đao tâm ti.

I Samuel 6:9

Khân may kâp uănh hom: Tơlah Hip Nau Tâm Rnglăp hăn hao tât mpeh n'gor bri păng nơm, jêng mpeh ma Bet-Sêmes, pôri Brah Yêhôva yơh nkhŭt nau mhĭk toyh aơ ta klơ he. Tơlah mâu di, pôri he mra gĭt pô aơ mâu di ti Păng rmal ma he, ƀiălah nau tât nây dơi tât tĭng nâm nau tât êng yơh.”