Nêhêmi 10:37 - Nau Brah Ndu Ngơi 2023

³⁷ Hên hŏ ton tâm ban lĕ djôt leo tât ta lĕ jay kloh ueh ngih Brah Ndu rnih ueh lor lơn, lĕ ndơ ƀư brah, kao play tâm lĕ ntil tơm play, ndrănh mhe jêh ri dak ngi ôlive, jêh nây jao ma phung kôranh ƀư brah. Hôm du kô̆ tâm jât kao play luh tă tâm neh, hên djôt leo chê̆ ma phung Lêvi jêng phung sŏk du kô̆ tâm jât kao play bơh neh lŏ tâm lĕ rngôch ƀon hên.

Nêhêmi 10:37 Iomraidhean Croise

II Nau Rêh Jêng 31:6

Phung Israel jêh ri phung Yuđa gŭ tâm ăp ƀon n'gor Yuđa, ăt djôt đŏng ndrôk jêh ri biăp tât gay nhhơr du kô̆ tâm jât, ndrel ma lĕ ndơ du kô̆ tâm jât prăp êng jêh ma nau kloh ueh ăn ma Yêhôva Brah Ndu khân păng. Lĕ ndơ nhhơr nây dơi dăp tĭng mbŭch.

Nêhêmi 13:10

Gâp lĕ gĭt tâm ban lĕ, bu mâu ăn ôh ndơ sông sa ma phung Lêvi, yor nây, phung mprơ jêh ri phung Lêvi gŭ pah kan hŏ du sĭt da dê jêh rlet ma mir khân păng nơm.

Nêhêmi 13:12

Rnôk nây lĕ rngôch phung Yuđa djôt leo da dê du kô̆ tâm jât ba ƀlê, ndrănh mhe jêh ri dak ngi ôlive ăn tâm jay prăp.

Nêhêmi 13:5

jêh ri jêng mpôl băl ma Y-Tôbia, hŏ ăn ma Y-Tôbia du jrô toyh jêng ta ntŭk nây ntơm saơm bu dŏng gay prăp ndơ ƀư brah rnih môi, ndơ ƀâu kah, ndơ dŏng, du kô̆ tâm jât ma ba ƀlê, ndrănh mhe jêh ri dak ngi ôlive, jêng lĕ ndơ tĭng nau vay ntăm prăp ma phung Lêvi, ma phung mprơ jêh ri ma phung gak njrăng mpông pêr, nđâp ma ndơ nhhơr prăp ma phung kôranh ƀư brah.

Nêhêmi 13:9

Jêh nây gâp ntĭnh rao kloh ma jrô nây, gâp djôt leo lăp đŏng lĕ ndơ dŏng ngih Brah Ndu, ndơ ƀư brah rnih môi jêh ri ndơ ƀâu kah.

Nau Ngluh Êjipt 13:12

ăn khân may nhhơr hom ma Brah Yêhôva kon bu klâu bôk rah nđâp lĕ kon nkuăng dak bôk tâm phung mpô mpa rong khân may, yorlah khân păng jêng ndơ Brah Yêhôva.

Nau Ngluh Êjipt 13:2

“Ăn may nhhơr hom ma Gâp lĕ rngôch kon bôk rah bu deh jêh tâm phung Israel, nđâp bunuyh nđâp mpô mpa, yorlah lĕ rngôch kon dak bôk jêng ndơ Gâp da dê.”

Kan Lêvi 23:17

Ăp rnăk vâl ăn khân may njŭn bar mlâm piăng let gay ƀư mpa nhhơr, tĭng nau vay ƀư ndơ̆ đah aơ ndơ̆ đah ri; ăp mpơng ƀănh dơi ƀư tâm di ma bar kilô rnih môi geh pot ndrui jêh ri gŭch, nây jêng ndơ dak bôk nhhơr ma Brah Yêhôva.

Malachi 3:10

Lĕ ndơ du kô̆ tâm jât, ăn khân may nhhơr ăn nŭm ta jay prăp, gay geh ndơ sa tâm ngih brah Gâp. Jêh ri ntơm bơh aƀaơ, Brah Yêhôva ma phung tahan, sŏk hom nau aơ gay rlong uănh Gâp, gĭt lah Gâp pơk mpông bloh tâm trôk, nkhŭt nau ueh lăng ma khân may âk ngăn kŏ tât mâu tŏng ntŭk khân may ma dơ!

Malachi 3:8

“Bu dơi sa ntŭng đŏng ndơ Brah Ndu? Ƀiălah khân may lĕ sa ntŭng jêh ndơ Gâp!” Ƀiălah khân may hŏ lah: “Hŏ geh hên sa ntŭng ndơ Kôranh Brah?” “Khân may hŏ ntŭng jêh tâm lĕ ndơ du kô̆ tâm jât jêh ri tâm lĕ ndơ ƀư brah nhhơr.

Nau Kơp Bunuyh 18:15

Lĕ rngôch kon bôk rah bơh bunuyh mâu lah mpô mpa rong, jêng ndơ phung ƀon lan Israel nhhơr ma Brah Yêhôva, mra jêng ndơ may. Ƀiălah may mra tâm chuai tay kon bôk rah bơh bunuyh jêh ri kon bôk rah bơh mpô mpa mâu kloh.

Nau Kơp Bunuyh 18:18

Puăch khân păng mra jêng ndơ may, tâm ban đŏng ntang ntơh nhhơr ryeng pa tê̆ ryeng pa djaơ jêh ri nglik pa ma prăp ma may.

Nau Kơp Bunuyh 18:21

Bi ma kon sau Lêvi, aơ Gâp hŏ ăn ma lĕ rngôch pi kô̆ tâm jât bơh phung Israel, jêng drăp ndơn gay plơ̆ ma nau kan khân păng ƀư, kan khân păng ƀư tâm Ngih Bok Nau Tâm Rƀŭn.

Samƀŭt Pôl Njuăl Ăn Ma Phung Nsing Ta Ƀon Rôm 11:16

Tơlah kô̆ rnih lor lơn nhhơr jêng kloh ueh, lĕ rngôch mbŭch rnih jêng kloh ueh tâm ban lĕ; tơlah reh jêng kloh ueh, đơ n'gĭng păng kloh ueh tâm ban lĕ.

Nau Vay Nkah Tay 14:22

“Ăn khân may prăp êng du kô̆ tâm jât lĕ rngôch ndơ bơh găr ntil khân may srih jêh ndơ nây luh tă bơh mir ăp năm.

Nau Vay Nkah Tay 18:4

Khân may mra ăn đŏng ma kôranh ƀư brah play dak bôk tă bơh ba, ndrănh, dak ngi jêh ri rsau biăp mhe kreh dak bôk.

Nau Vay Nkah Tay 26:2

pôri ăn khân may sŏk du kô̆ play dak bôk yan tâm n'gor Yêhôva Brah Ndu ăn jêh ma khân may, nklăch tâm du mlâm bĭ, jêh ri djôt leo tât ta ntŭk Yêhôva Brah Ndu khân may mra săch amoh păng gŭ ta nây.