Ndrom Samƀŭt bơh Ôsê 8:8 - Nau Brah Ndu Ngơi 2023

⁸ Israel bu sa rvăn jêh. Aƀaơ aơ khân păng gŭ ta nklang phung ƀon lan Nâm bu ndô ndơ bu mâu ŭch rŏng ôh.

Ndrom Samƀŭt bơh Ôsê 8:8 Iomraidhean Croise

II Phung Hađăch 18:11

Hađăch Asiri njŭn leo phung Israel ma n'gor bri Asiri, dơm khân păng tâm ƀon Hala, ta kơh dak krong Habôr, tâm n'gor Gôsan, jêh ri tâm lĕ ƀon n'gor Mêdơ.

Êsai 30:14

Păng mra nchah hăch tâm ban ma glah uk bu nchah lơi ăn hăch, Nchah hăch jêng âk rngơl mâu nhhuach ôh; Kŏ tât bu mâu dơi joi du rsong uk ôh Gay ŭch sŏk ŭnh bơh năk, Mâu lah bâk dak bơh nglau.”

Yêrêmi 22:28

Pônây di lĕ Y-Jêhôjakin aơ jêng yăng chah rai jêh lĕ bu mưch rmot hĕ? Yăng mâu geh nơm ŭch rŏng ôh? Mâm ƀư hađăch nây jêh ri lĕ rngôch noi deh păng bu mƀăr lơi, Bu klŭp mƀăr tâm du bri khân păng mâu gĭt năl ôh?

Yêrêmi 25:34

Hơi phung rmăk biăp, nhĭm vơl hom, ntơm ngơi vah vơl hom! Ơ phung kôranh phung biăp, rlă hom tâm ŭnh buh! Yorlah nar bu sreh nkhĭt khân may, nar bu ƀư nchah rai pru pra hŏ tât jêh, Khân may mra cha lôt nâm bu du mlâm yăng khlay.

Yêrêmi 48:38

Tâm ăp ta klơ chor ngih Môap, tâm ntŭk nhuang ƀon mâu geh padih nau nhĭm vơl, yorlah Gâp hŏ mbang chah jêh bri Môap nâm bu du mlâm yăng bu mâu hôm ŭch đŏng ôh.” Brah Yêhôva lah pônây.

Yêrêmi 50:17

Israel jêng du mlâm biăp nhhơt jêh phung yau mŭr tĭng kăp. Ntơm saơm hađăch Asiri tĭng rvăn păng, jêh ri rlet pakơi aơ jêng Y-Nêbukatnetsar, hađăch Babilôn, gĭnh nting păng.”

Yêrêmi 51:34

“Y-Nêbukatnetsar, hađăch Babilôn, hŏ rvăn jêh hên, Ƀư nchah rai hên; Hađăch nây ƀư ăn ma phung hên jêng du mlâm yăng nsoih, Rvăn hên nâm bu mpa bri toyh rvăn ndơ sa, Păng sŏk ndơ sa kah hên mbêng bêng ndŭl păng, Jêh ri mprơh hên hăn du.”

Nau Nhĭm Vơl 2:16

Lĕ rngôch phung rlăng may Hă mbung tâm rdâng đah may; Khân păng nsŭch, rket sêk, jêh nây lŭng nter: “He ƀư rai jêh păng! Aơ jêng nar he gŭ kâp gân, He hŏ dơi ngăn jêh, hŏ dơi saơ jêh!”

Nau Nhĭm Vơl 2:2

Kôranh Brah rvăn lĕ ntŭk Yakôb gŭ Mâu geh nau yô̆ djê̆ lê̆ ôh; Tâm nau ji nuih, Păng ƀư rlâm lơi lĕ pôih nâp kon druh Yuđa; Ƀư rai jêh ri ƀư nau bêk prêng, Lĕ rngôch ƀon bri hađăch nđâp ma phung kôranh chiă uănh.

Nau Nhĭm Vơl 2:5

Kôranh Brah lĕ jêng phung rlăng, Păng rvăn phung Israel; Păng rvăn lĕ rngôch ngih hađăch păng, Ƀư rai lĕ ƀhiau pôih nâp, Ƀư ăn ma kon bu ur Yuđa Ntop nau klâng ndrê rêh ni.

Nau Nhĭm Vơl 4:2

Phung kon bu klâu Siôn ueh ngăn, Khlay ngăn nâm bu mah chrêk, Aƀaơ bu uănh tâm ban ma yăng bu mon uk, Tă bơh kan ti phung mon uk ƀư!

Nau Nhĭm Vơl 5:2

Drăp ndơn hên lĕ sĭt ma ti phung bu năch jêh, Ngih vâl hên jêng ndơ phung bu năch.

Êsêkiêl 36:3

Yor ri, mbơh lor hom pô aơ: “Kôranh Brah Yêhôva lah: ‘N'hêl nanê̆, yorlah khân păng hŏ ƀư ăn khân may jêng rngol jêh ri rduh lơh khân may tă bơh ăp njônh gay ma khân may jêng drăp ndơn ma phung ƀon lan hôm e klen lĕ bri dak jêh ri khân may jêng ndơ phung ƀon lan ntêh rmot, ngơi mưch.’

Kan Lêvi 26:33

Gâp mra nkhah khân may lam phung ndŭl mpôl bunuyh jêh ri tŏk đao gưm tĭng lơh khân may. Neh khân may mra jêng ntŭk rngol, ƀon toyh khân may mra jêng rngot rklăk.

Samƀŭt Pôl Njuăl Ăn Ma Phung Nsing Ta Ƀon Rôm 9:22

Tơlah Brah Ndu ŭch tâm mpơl nau ji nuih jêh ri mbơh nau brah Păng, Păng hŏ srôih ŭn nuih tâm lĕ yăng khư geh nau ji nuih prăp ma nau roh rai, mhâm hơh?

Nau Vay Nkah Tay 28:25

Brah Yêhôva mra ƀư ăn khân may rai jot tanăp phung rlăng khân may. Khân may mra tâm lơh đah khân păng bơh du trong, jêh nây khân may mra nchuăt du bơh khân păng tâm pơh trong. Khân may mra jêng du ntil ndơ tâm rmot đah lĕ rngôch ƀon bri hađăch tâm neh ntu.

Nau Vay Nkah Tay 28:64

Brah Yêhôva mra ăn khân may chah rai ta nklang lĕ rngôch phung ƀon lan, ntơm bơh dŭt bri neh đah aơ ma dŭt bri neh đah ri. Ta nây, khân may mra pah kan ma phung brah êng ƀư ma si, ƀư ma lŭ, lĕ khân may nđâp phung chô yau khân may mâu hŏ mâp gĭt ôh.