I Samuel 8:7 - Nau Brah Ndu Ngơi 2023

⁷ Brah Yêhôva lah ma Y-Samuel: “Gŭ iăt hom ma lĕ nau ngơi phung ƀon lan lah ma may, yorlah mâu di khân păng dun ma may ôh, ƀiălah dun ma Gâp, gay ma Gâp mâu hôm jêng hađăch khân păng đŏng ôh.

I Samuel 8:7 Iomraidhean Croise

Nau Ngluh Êjipt 16:8

Y-Môis lah: “Mhaơ aơ Brah Yêhôva mra ăn puăch ma khân may sa, jêh ri kêng ôi ăn piăng let mra rmeh ler yorlah Brah Yêhôva hŏ tăng jêh nau khân may nduyh Păng. Bi ma hên mbu jêng? Mâu di ma hên ôh khân may nduyh, ƀiălah nduyh ma Brah Yêhôva ya.”

Êsai 66:4

Gâp mra săch lĕ nau ƀư rêh ni ma khân păng, Mra ăn tât ma khân păng nau klach kir. Yorlah Gâp kuăl jêh ƀiălah mâu geh nơm plơ̆ lah ôh, Gâp ngơi jêh ƀiălah khân păng mâu iăt ôh; Khân păng ƀư jêh nau mhĭk tâm dâng măt Gâp, Jêh ri săch nau Gâp mâu maak.”

Yêrêmi 34:14

‘Tât năm tal pơh, ăn ăp nơm tâm lĕ khân may mplơ̆ ăn kon me ma bunuyh Hêbrơ hŏ bu tăch jêh ma may. Pakơi prao năm pah kan, may mra mplơ̆ ăn kon me ma bunuyh nây.’ Ƀiălah phung chô yau khân may mâu iăt ôh nau, mâu lĕ rkêng tôr iăt ma Gâp.

Êsêkiêl 2:3

Păng lah ma gâp: “Hơi kon bunuyh, Gâp prơh may hăn tât ma phung ƀon lan Israel, hăn tât ma phung vay mơng tâm rdâng đah Gâp. Khân păng jêh ri phung chô yau khân păng ƀư tih vay mơng tâm rdâng đah Gâp kŏ tât nar aơ.

Êsêkiêl 3:7

Ƀiălah ngih Israel mâu mra iăt nau may ôh yorlah khân păng mâu ŭch iăt Gâp. Yorlah lĕ rngôch ngih Israel dăng bôk dăng nuih n'hâm da dê.

Nau Kơp Bunuyh 22:20

Dôl măng, Brah Ndu tât ma Y-Balaam jêh ri lah ma păng: “Yorlah phung nây văch jă, pôri may hăn hom ndrel ma khân păng, ƀiălah ăn may ƀư tĭng kơt lĕ nau Gâp ntĭnh ma may.”

Mathay 10:40

“Mbu nơm rom khân may jêng rom Gâp, mbu nơm rom Gâp jêng rom Nơm hŏ njuăl Gâp.

Luka 10:16

Mbu nơm iăt khân may, jêng iăt Gâp; mbu nơm dun khân may, jêng dun Gâp. Mbu dun Gâp, jêng dun Nơm hŏ njuăl Gâp.”

Luka 19:14

Ƀiălah phung ƀon lan păng ta bri nây tâm rmot ma păng, rĭ dĭng khân păng njuăl bunuyh mbơh tĭng pakơi păng jêh ri lah: ‘Hên mâu ŭch ôh ma bunuyh aơ chiă uănh hên!’

Luka 19:27

Bi ma phung rlăng đah gâp, mâu ŭch gâp chiă uănh khân păng, njŭn leo hom khân păng văch ta aơ jêh ri nkhĭt lơi khân păng tanăp gâp.’ ”

Yôhan 13:16

Nanê̆, Gâp lah ngăn ma khân may: Oh mon mâu toyh lơn ma kôranh ôh, phung mbơh mâu lĕ toyh lơn ma nơm njuăl păng nơm.

Phung Kôranh Phat Dôih 8:23

Y-Gidêôn plơ̆ lah: “Gâp mâu mra chiă uănh ôh khân may, phung kon bu klâu gâp mâu đŏng chiă uănh khân may, ƀiălah Brah Yêhôva mra chiă uănh khân may.”

I Samuel 10:19

Nar aơ khân may dun jêh ma Brah Ndu khân may, jêng Nơm tâm rklaih jêh khân may tă bơh lĕ rngôch nau mhĭk jêh ri nau o ach. Khân may hŏ lah jêh ma Păng pô aơ: ‘Dăn ndâk hom du huê hađăch chiă uănh hên!’ Pôri aƀaơ, tâm mpơl măt hom tanăp măt Brah Yêhôva tĭng ăp ndŭl mpôl jêh ri ăp ngih mbơ̆ khân may.”

I Samuel 12:1

Nôk nây, Y-Samuel lah ma lĕ rngôch phung Israel: “Aơ, gâp tăng jêh lĕ nau ngơi khân may lah jêh ma gâp, jêh ri gâp hŏ njêng jêh du huê hađăch ma khân may.

I Samuel 12:12

Ƀiălah tơlah khân may saơ Y-Nahas, hađăch phung Ammôn, văch lơh khân may, khân may lah ma gâp pô aơ: ‘Mâu ôh, ăn geh du huê hađăch chiă uănh hên;’ nđâp lah Yêhôva Brah Ndu khân may hŏ jêng Hađăch ma khân may jêh.

I Samuel 8:22

Brah Yêhôva lah ma Y-Samuel: “Gŭ iăt hom nau khân păng jêh ri njêng ma khân păng du huê hađăch.” Jêh nau nây, Y-Samuel lah ma phung Israel: “Lĕ rngôch bunuyh plơ̆ sĭt hom ma ƀon khân may nơm.”

I Samuel 8:8

Tâm ban nau khân păng ƀư đah Gâp ntơm bơh Gâp ngluh khân păng du luh bơh n'gor bri Êjipt n'ho tât nar aơ: Khân păng hŏ dun chalơi jêh Gâp gay pah kan ma lĕ brah êng, nar aơ khân păng ƀư đŏng ma may kơt nĕ!