I Samuel 22:14 - Nau Brah Ndu Ngơi 2023

¹⁴ Y-Ahimalek lah ma hađăch: “Tâm mpôl phung oh mon may, mbu nơm jêng răp jăp nâm bu Y-Đavit, nơm jêng klay ma hađăch, jêh ri kôranh chiă uănh ma phung tahan gak njrăng may, jêh ri nơm bu yơk lơn tâm ngih may?

I Samuel 22:14 Iomraidhean Croise

I Samuel 17:25

Du huê Israel lah: “May saơ lĕ bu klâu aơ rduh ran tât? Păng văch ran gay ƀư bêk prêng phung Israel! Tơlah tâm phung Israel, mbu moh dơi nkhĭt păng, hađăch mra ăn nau nkhôm ma păng âk drăp ndơ, ăn kon bu ur păng ma nơm nây, jêh ri păng mâu hôm sŏk riu pi ma ngih mbơ̆ păng.”

I Samuel 18:13

Y-Sôl ăn Y-Đavit gŭ ngai đah păng, njêng păng kôranh chiă uănh toyh du rbăn tahan. Y-Đavit njŭn leo phung tahan luh lăp tă bơh ntŭk tâm lơh.

I Samuel 18:27

Y-Đavit dâk hăn, ndrel ma phung tahan păng jêh ri lơh nkhĭt bar rhiăng nuyh phung Philistin. Y-Đavit djôt sĭt ntâu proch nhôm khân păng, jêh ri chê̆ ma hađăch nŭm rnoh gay dơi jêng klay. Pônây, Y-Sôl ăn H'Mikal, kon bu ur păng, jêng ur ma Y-Đavit.

I Samuel 20:32

Y-Jônathan ngơi ma Y-Sôl, mbơ̆ păng: “Mâm ƀư Y-Đavit mra khĭt? Moh nau păng hŏ ƀư jêh?”

I Samuel 21:2

Y-Đavit plơ̆ lah ma kôranh ƀư brah Y-Ahimalek: “Hađăch prơh gâp hăn geh du ntil kan jêh ri ntĭnh pô aơ: ‘Lơi ăn du huê bunuyh gĭt ôh ma nau gâp prơh may hăn, lơi ăn mbu gĭt nau gâp ntăm jêh ma may.’ Gâp hŏ tâm nal jêh mra tâm mâp đah phung bu klâu ndăm ta du ntŭk ri.

I Samuel 22:13

Y-Sôl lah tay: “Mâm ƀư may du ai tâm chră jêh ndrel ma kon Y-Yêsê ŭch tâm rdâng đah gâp? May geh ăn piăng let ma păng jêh ri njŭn ma păng du n'gâr đao, jêh ri ôp jêh ma Brah Ndu yor păng, gay ma păng tâm rdâng đah gâp, mĭn ŭch ƀư mhĭk ma gâp, nâm bu păng hŏ ƀư jêh nar aơ?”

I Samuel 24:11

Aơ, uănh hom! Măt may nơm lĕ saơ jêh nar aơ, tâm trôm lŭ, Brah Yêhôva hŏ jao jêh hađăch tâm ti gâp. Bu nsŭk gâp nkhĭt hađăch, ƀiălah gâp chalơi om hađăch, jêh ri lah: ‘Gâp mâu mra yơr ti ƀư mhĭk ma kôranh gâp ôh, yorlah hađăch jêng nơm Brah Yêhôva tŏ dak ƀâu kah jêh.’

I Samuel 25:28

Dăn yô̆ an nau tih ma oh mon bu ur kôranh! N'hêl nanê̆ Brah Yêhôva mra njêng ma kôranh gâp geh du ngih nâp, yorlah kôranh gâp tâm lơh ăn ma Brah Yêhôva, jêh ri lôch nau rêh kôranh mâu mra geh du nau mhĭk tâm may ôh.

I Samuel 26:23

Brah Yêhôva mra nkhôm ăn ăp nơm tĭng nâm nau sŏng srăng jêh ri nuih n'hâm răp jăp păng. Nar aơ, Păng hŏ jao jêh hađăch tâm ti gâp, ƀiălah gâp mâu ŭch yơr ti gâp ƀư ma nơm Brah Yêhôva hŏ tŏ jêh dak ƀâu kah.