Daniel 9:26 - Nau Brah Ndu Ngơi 2023

²⁶ Jêh tăch prao jât ma bar năng pơh nây, bu mra nkhĭt lơi Nơm Dơn Tŏ Dak Ƀâu Kah jêh ri mâu mra geh ndơ ôh. Phung tahan du huê kôranh tât pakơi mra ƀư rai lơi ƀon jêh ri ngih brah. Nau dăch dŭt mra tât nâm bu dak lip. Kêng dŭt mra geh tât nau tâm lơh, nau rngol hŏ nal jêh.

Daniel 9:26 Iomraidhean Croise

II Samuel 21:5

Khân păng lah ma hađăch: “Ma bunuyh hŏ ƀư mhĭk hên jêh ri mĭn ŭch ƀư rai hên, gay ma hên mâu geh ntŭk ôh tâm lam n'gor bri Israel,

Nau Mprơ Ơm 22:15

N'hâm suan gâp sơh kro tâm ban ma neh bŏk pêt Jêh ri mpiăt gâp krêp ta trô ko; May dơm gâp bê̆ch tâm neh muy nau khĭt.

Êsai 28:2

Aơ, bơh ntŭk Kôranh Brah geh du huê nơm ktang jêh ri geh nau dơi, Nâm bu mih tŭp pler, phŭt chuănh ƀư rai, Tâm ban ma dak toyh pling ntôr, dak lip lam ntŭk; Păng mra dong ti klŭp păng ta neh.

Êsai 28:22

Yor nây aƀaơ aơ, lơi hôm mưch ôh, Klach lah rse kât khân may lơ hâu rêt tay; Yorlah gâp tăng jêh nau ntăm mra ƀư rai lam bri dak aơ. Bơh Kôranh Brah Yêhôva ma phung tahan.

Êsai 53:8

Bu hŏ tŭn jot Păng, phat dôih jêh ri nkhĭt lơi Păng. Tâm phung rêh rơh Păng, mâu geh du huê mĭn rvê Bu hŏ dong rmal Păng jêh ri sŏk lơi bơh neh phung rêh Yor ma nau tih phung ƀon lan Gâp?

Êsai 8:7

yor nây, Kôranh Brah mra ƀư ăn dak bơh Dak Krong Me hoch thăng ta khân păng, nâm bu ntĭt hađăch bri Asiri ndrel ma lĕ rngôch nau chrêk rmah păng. N'hong dak aơ mra hao ler bêng n'hong jêh ri lip lĕ rngôch kơh,

Yêrêmi 46:7

Mbu nơm hŏ hao jêh nâm bu dak krong Nil, Nâm bu dak krong geh rbuh ktang?

Yêrêmi 51:42

Dak Mƀŭt lip bŭk jêh bri Babilôn, Lĕ nau rbuh dak ji nuih nkŭm ngâm păng.

Daniel 11:10

Phung kon bu klâu hađăch mpeh pa lơ mra nkra ma nau tâm lơh. Khân păng tâm rƀŭn âk phung tahan jêh nây leo phung tahan văch lơh, pit in, nchueng ăp ntŭk; khân păng njŭn nau tâm lơh tât ta pôih hađăch pa dâng.

Daniel 11:17

Păng mra mĭn ntrâng hăn tâm lơh ma nau ktang ƀon bri hađăch păng. Păng mra ăn nau tâm rnglăp đah hađăch mpeh pa dâng, ăn kon bu ur păng gŭ ma hađăch aơ gay ƀư rai ƀon bri hađăch păng, ƀiălah nau nây mâu jêng ôh, mâu lĕ jêng khlay ma păng.

Daniel 11:22

Phung tahan bu năch lăp ler nâm bu dak lip mra geh dak bŭk jêh ri nchah rai tanăp hađăch nây, nđâp kôranh ma nau tâm rnglăp tâm ban lĕ.

Daniel 11:36

Hađăch mpeh pa lơ mra ƀư tĭng nâm păng ŭch, păng mra n'hao êng păng nơm, yơk păng nơm ta klơ lơn ma lĕ rngôch brah. Păng mra ngơi nau sưr tâm rdâng đah Brah Ndu ma lĕ rngôch brah. Păng mra dơi kŏ tât lôch nau ji nuih, yorlah moh nau Brah Ndu lĕ nal pôri mra dơi ƀư ngăn.

Daniel 9:27

Kôranh nây mra ƀư nau tâm rnglăp nâp đah âk bunuyh tâm du pơh. Ƀiălah tât ta n'gul pơh nây, păng mra rlu lơi nau nhhơr mpa ƀư brah jêh ri nau nhhơr ndơ ƀư brah rnih môi. Nơm ƀư rai mra tât klơ năr lĕ nau ƀơ̆ ƀơch kŏ tât nau gưl ƀư rai nglĕ dŭt hŏ nal jêh klơ phung ƀư rai.”

Ndrom Samƀŭt bơh Ôsê 1:9

Brah Yêhôva lah: “Ntơ amoh păng jêng Y-Lô-Ammi, yorlah khân may mâu hôm jêng phung ƀon lan Gâp đŏng ôh jêh ri Gâp mâu lĕ hôm jêng Brah Ndu khân may.”

Amôt 8:8

Neh mra rung răng yor nau kan nây lĕ? Jêh ri lĕ rngôch ƀon lan gŭ ta nây mâu mra nhĭm nhhiăng lĕ? Lĕ bri neh mra hao ler lip nâm bu dak krong Nil, Păng mra mpât n'gơ jêh ri rhuh hŭch nâm bu dak krong n'gor bri Êjipt nây lĕ.”

Amôt 9:5

Yorlah Kôranh Brah jêng Brah Yêhôva ma phung tahan, Nơm pah bi neh ntu jêh ri păng lêk hoch, Lĕ rngôch phung ƀon lan gŭ tâm păng mra nhĭm vơl; Lĕ bri dak mra hao lip ler nâm bu dak krong Nil Jêh ri djoh hŭch nâm bu dak krong n'gor bri Êjipt

Nahum 1:8

Ƀiălah Păng sŏk dak lip ler băm Gay ƀư rai lĕ ntŭk păng gŭ, Jêh ri hăn tĭng phung rlăng Păng lăp tâm nau ngo.

Mathay 22:2

“Ƀon bri hađăch klơ trôk nâm bu du huê hađăch nkra nau nhêt sông tâm nkol ur sai ma kon păng.

Mathay 22:7

Hađăch hao ji nuih, đă phung tahan ƀư rai phung nkhĭt bunuyh nây jêh ri su ƀon khân păng.

Mathay 23:38

Aơ, ngih khân may mra jêng rngol!

Mathay 24:2

Păng lah: “Khân may saơ lĕ rngôch ndơ nây di ƀơh? Nanê̆, Gâp lah ma khân may, ntŭk aơ mâu mra hôm geh du mâm lŭ tâm dăp gŭ ta klơ mlâm lŭ êng mâu mra tŭp.”

Markôs 13:2

Brah Yêsu plơ̆ lah: “May saơ lĕ ngih toyh aơ? Jêh aơ taơ mâu mra hôm du mlâm lŭ dăp gŭ ta klơ mlâm lŭ êng ôh. Lĕ rngôch mra rlâm da dê.”

Markôs 13:7

Nôk khân may tăng bu lah ma nau tâm lơh jêh ri tăng bu nkoch ma nau tâm lơh, lơi rŭng răng; ƀiălah ê hŏ tât nglĕ dŭt ôh.

Markôs 9:12

Păng plơ̆ lah: “Nanê̆ Y-Êli mra văch lor gay njêng tay lĕ rngôch nau. Mâm nau bu nchih ma Kon Bunuyh pô aơ Păng mra dơn âk nau rêh ni jêh ri bu ƀư nau mhĭk?

Luka 21:24

Bu mra nkhĭt khân păng ma đao bu njŭn khân păng jêng bu nă tâm lĕ rngôch mpôl băl, jêh ri phung bu năch mra jot ƀon Yêrusalem tâm dâng jâng khân păng, tât rnôk phung bu năch mra ƀư lĕ.

Luka 21:6

“Nar mra tât lĕ ndơ khân may saơ ta ao mra rlâm rai lĕ ƀhiau, mâu hôm du glo lŭ aơ gŭ ta klơ glo lŭ êng ôh.”

Luka 24:26

Mâu di hĕ Brah Krist dơn lĕ nau nđêh nji tâm ban pônây jêh nây Păng hăn lăp tâm nau chrêk rmah Păng?”

Luka 24:46

Păng lah: “Geh nau bu nchih jêh ma Brah Krist dơn nau nđêh nji, tât nar rơh pe mra dâk rêh tay tă bơh nau khĭt;

Yôhan 14:30

Gâp mâu mra hôm ngơi âk ma khân may ôh, yorlah nơm chiă uănh neh ntu aơ văch. Păng mâu geh nau dơi đah Gâp ôh,

II Kôrintô 5:21

Brah Ndu hŏ ƀư jêh Nơm mâu mâp gĭt năl ôh nau tih plơ̆ jêng nau tih yor he, gay tâm Nơm nây he plơ̆ jêng nau sŏng srăng tanăp Brah Ndu.

Galati 3:13

Brah Krist tâm chuai jêh he bơh nau rtăp rak bơh nau vay, nôk Păng geh nau rak rtăp ntrok ma he — yorlah geh nau nchih: “Khư ma rak rtăp ngăn ma nơm bu yông klơ tơm si” —

I Pêtrôs 2:21

Khân may geh jêh nau kuăl ma nau nĕ, yorlah Brah Krist anh dơn jêh nau rêh ni ma khân may, prăp ma khân may du nơm leo trong, gay ma khân may hăn tĭng têl jâng Păng;

I Pêtrôs 2:24

Păng djôt nau tih he tâm săk jăn Păng ta klơ tơm si, gay ma he khĭt jêh đah nau tih jêh ri gŭ rêh ma nau sŏng srăng; tă bơh lĕ sôt rmanh Păng, khân may geh nau ƀư bah jêh.

I Pêtrôs 3:18

Brah Krist hŏ yor ma nau tih, khĭt du tơ̆ rĭng jêh, jêng Nơm sŏng srăng tâm tang an ma phung mâu sŏng srăng, gay ma njŭn leo he văch ma Brah Ndu; bu nkhĭt jêh Păng tâm nglay săk, ƀiălah tâm huêng Păng dâk rêh jêh;