Daniel 11:37 - Nau Brah Ndu Ngơi 2023

³⁷ Hađăch nây mâu mra chrê ôh ma phung brah phung chô yau păng mâu lah brah phung bu ur rŏng. Păng mâu mra uănh lĕ brah jêng khlay ôh; yorlah n'hao êng păng nơm klơ lơn ma lĕ rngôch.

Daniel 11:37 Iomraidhean Croise

Nau Ntơm 3:16

Brah Ndu lah ma bu ur: “Gâp mra ntop n'hao âk nau rgănh dôl ay ntreo, Jêh ri ntop âk nau ji ăp tơ̆ dôl ay deh kon. Ƀiălah, ay hôm ŭch rêh êp sai ay, Jêh ri sai ay mra chiă uănh ay.”

Nau Ntơm 3:5

Yorlah Brah Ndu gĭt lah khân may sa play nây pôri măt mra lin, jêh ri khân may mra jêng nâm bu Brah Ndu, gĭt nau ueh jêh ri nau mhĭk.”

Nau Mprơ Ueh 7:10

Gâp jêng ndơ nơm gâp rŏng ngăn ngên, Nau păng ŭch prăp ma gâp.

Êsai 14:13

May nơm lah jêh tâm nuih n'hâm pô aơ: “Gâp mra hao ta klơ trôk, Gâp mra n'hao sưng hađăch gâp Prêh lơn ma lĕ mănh mbing Brah Ndu. Gâp mra gŭ ta klơ yôk nau tâm rƀŭn Âk ngai tât ma mpeh pa lơ

Êsai 14:14

Gâp mra hao prêh lơn ma ndâr tŭk, Ƀư ma gâp tâm ban ma Nơm Dŭt Prêh.”

Êsêkiêl 24:16

“Hơi kon bunuyh, ma nau tât ndal, Gâp mra sŏk lơi tă bơh may nau măt may ŭch kơnh ƀiălah mâu dơi lŭng nter ôh, mâu dơi nhhiăng nhĭm jêh ri mâu dơi hor dak măt ôh.

Êsêkiêl 28:2

“Hơi kon bunuyh, lah hom ma hađăch Tyre pô aơ: Kôranh Brah Yêhôva lah: ‘Yorlah nuih n'hâm may sưr ngăn, May lah pô aơ: “Gâp jêng du huê brah, Gâp gŭ ta sưng hađăch lĕ brah, Ta nklang dak mƀŭt.” Ƀiălah may knŏng jêng bunuyh mâu di jêng brah ôh, Nđâp tơlah n'hao êng nuih n'hâm may nơm Tâm ban ma nuih n'hâm brah kloh ueh.

Daniel 11:36

Hađăch mpeh pa lơ mra ƀư tĭng nâm păng ŭch, păng mra n'hao êng păng nơm, yơk păng nơm ta klơ lơn ma lĕ rngôch brah. Păng mra ngơi nau sưr tâm rdâng đah Brah Ndu ma lĕ rngôch brah. Păng mra dơi kŏ tât lôch nau ji nuih, yorlah moh nau Brah Ndu lĕ nal pôri mra dơi ƀư ngăn.

Daniel 11:38

Ntrok ta nây, păng yơk mbah ma brah lĕ pôih. Păng sŏk mah, prăk, lŭ khlay jêh ri lĕ ndơ khlay nhhơr ma brah chô yau păng mâu gĭt năl ôh.

Daniel 8:11

Păng n'hao păng nơm jêng tâm ban ma Kôranh Chiă Uănh ma phung tahan, mƀăr lơi ndơ ƀư brah gŭch nhhơr ƀaƀơ bơh Păng jêh ri ƀư rai ntŭk kloh ueh Păng.

Nau Vay Nkah Tay 21:11

tơlah khân may saơ tâm phung bu nă nây geh du huê bu ur ueh, khân may kơnh ngăn jêh ri ŭch nđăp păng jêng ur,

Nau Vay Nkah Tay 5:21

May mâu dơi kơnh ŭch ur nơm chiau meng may, mâu dơi kơnh ngih vâl bu, lŏ sre, oh mon bu ur oh mon bu klâu, ndrôk, seh bri mâu lah ăp moh ndơ jêng ndơ phung chiau meng may.’

II Têsalônik 2:4

nâm bu ntĭt nơm tâm rdâng, n'hao êng păng nơm ta klơ ma lĕ rngôch nau bu rnha jêng brah mâu lah ma ndơ bu yơk mbah, kŏ tât păng gŭ tâm ngih Brah Ndu, kơp êng păng nơm jêng Brah Ndu.

I Timôthê 4:3

Khân păng buay bu gŭ ur sai, jêh ri ntĭnh ma bu ver lĕ ndơ sông sa Brah Ndu rhăk jêh ma phung chroh jêh ri gĭt rbăng nau ngăn sŏk dơn ma nuih n'hâm gĭt lah ueh.