Daniel 1:9 - Nau Brah Ndu Ngơi 2023

⁹ Brah Ndu ƀư ma kôranh chiă uănh phung kôranh bu char geh nau rŏng jêh ri nau yô̆ ma Y-Daniel.

Daniel 1:9 Iomraidhean Croise

Nau Ntơm 32:28

Bunuyh nây lah: “Săk may mâu hôm mra jêng Y-Yakôb ôh, ƀiălah jêng Y-Israel, yorlah may hŏ tâm nhăt jêh đah Brah Ndu jêh ri đah bu, jêh ri may dơi da dê.”

Nau Ntơm 39:21

Ƀiălah Brah Yêhôva kâp kơl ma Y-Yôsep. Păng mpơl nau ueh ma păng jêh ri ƀư ma păng geh nau yô̆ tanăp măt kôranh bu nă.

I Phung Hađăch 8:50

Dăn ma Kôranh Brah yô̆ an ma phung ƀon lan May jêng phung ƀon lan ƀư tih jêh đah May, jêh ri yô̆ an lĕ rngôch nau tih khân păng ƀư tih jêh đah May; dăn ma May ƀư ma lĕ bunuyh hŏ nhŭp khân păng jêng bu nă geh nau yô̆ nđach ma khân păng,

Nêhêmi 1:11

Hơi Kôranh Brah! Dăn ma May iăt nau gâp mbơh sơm jêng oh mon May jêh ri phung oh mon êng êng, jêng phung maak nuih n'hâm klach yơk ma amoh May. Nar aơ, dăn ma Kôranh Brah ăn ma gâp jêng oh mon Kôranh Brah dơi geh nau ƀŭn lap jêh ri geh nau yô̆ nđach tanăp bunuyh aơ.” Rnôk nây gâp ƀư nau pah kan nhhơr ndrănh ma hađăch.

Nêhêmi 2:4

Hađăch ôp ma gâp: “Moh nau may ŭch dăn?” Gâp mbơh sơm ma Brah Ndu tâm lĕ ndâr trôk,

Êsther 2:9

Bu ur druh nây ƀư maak ma nuih n'hâm Y-Hêgai jêh ri geh nau yô̆ tanăp măt păng. Păng ăn gơnh ro ma păng dak kôlônh gay jut lơi nau ƀơ̆ jêh ri ndơ sông sa êng ngăn ma păng, nđâp pơh oh mon bu ur dơi săch jêh tâm ngih hađăch, jêh nây Y-Hêgai ăn păng ndrel phung oh mon bu ur trơn lăp tâm du jrô dŭt ueh tâm ngih phung bu ur.

Ndrom Samƀŭt bơh Yôp 5:15

Brah Ndu rklaih nuyh o ach klaih bơh mpiăt đao, Klaih bơh trôm mbung jêh ri klaih bơh ti phung janh ƀai.

Ndrom Samƀŭt bơh Yôp 5:16

Pôri phung o ach geh nau kâp gân, Bi ma phung djơh mhĭk mra mêm mbung.

Nau Mprơ Ơm 106:46

Păng ăt ƀư ma bu geh nau yô̆ Tanăp phung nhŭp khân păng ƀư dĭk.

Nau Mprơ Ơm 4:3

Khân may mra gĭt Brah Yêhôva hŏ prăp êng jêh bunuyh blau yơk ma Păng. Tơlah gâp kuăl mbơh sơm, Brah Yêhôva mra iăt nau gâp.

Nau Hôr 16:7

Lah Brah Yêhôva di nuih n'hâm đah nau rêh ueh ma mbu nơm, Pôri Păng ƀư ăn nơm rlăng gŭ đăp rmên ndrel ma bunuyh nây.

Daniel 1:10

Ƀiălah, kôranh aơ lah ma Y-Daniel: “Gâp klach hađăch jêng kôranh gâp, nơm ntăm jêh prăp ndơ nhêt sa ma khân may. Tơlah hađăch saơ muh măt khân may rgay rdjoh lơn ma phung bu klâu ndăm ndrel năm, pôri mâu di khân may njŭn jêh bôk gâp ma hađăch hĕ?”

Kôranh Oh Mon 7:10

Brah Ndu rklaih păng bơh lĕ rngôch nau mhĭk, ăn nau yô̆, jêh ri nau blau mĭn ma păng tanăp Pharaôn, hađăch n'gor Êjipt; hađăch sâm dơm păng jêng kôranh chiă uănh n'gor Êjipt jêh ri lĕ phung ta ngih hađăch.