Amôt 5:20 - Nau Brah Ndu Ngơi 2023

²⁰ Mâu di hĕ nar Brah Yêhôva jêng nar nau ngo, mâu geh nau ang, Nar ngo vêt vê mâu geh nchrat ang ôh?

Amôt 5:20 Iomraidhean Croise

Êsai 13:10

Rnôk nây, lĕ mănh mbing tâm trôk jêh ri lĕ rngôch mănh ang tâm trôk Mâu mra nchrat ang ôh; Nar mhe pơ luh jêng ngo ro, Jêh ri khay mâu hôm nchrat ang ôh.

Êsai 8:22

jêh nây khân păng kŭnh uănh ta neh ntu, ƀiălah knŏng saơ nau rêh ni jêh ri nau ngo, nau rngot klâng; bu mra nklơ̆ khân păng tâm nau ngo mbâl.

Êsêkiêl 34:12

Nâm bu du huê rmăk biăp tĭng joi phung biăp păng tâm nar păng gŭ ta nklang phung biăp păng lĕ nchah rai nhhơt, Gâp ăt joi biăp Gâp nâm bu pônây lĕ. Gâp mra tâm rklaih khân păng luh du bơh lĕ rngôch ntŭk khân păng bơh lĕ rngôch ntŭk khân păng hŏ nchah rai nhhơt tâm nar tŭk mbâl ngo klĕng.

Yôel 2:2

Nây jêng du nar ngo kleng chuê chuăng, Du nar tŭk krăk mbâl ngăn! Yorlah geh du phung mpôl bunuyh âk ngăn jêh ri ktang văch tât Luh nchrat lam jŭm yôk nâm bu ang ơm ôi; Ntơm bơh kăl e nau kơt nây mâu hŏ mâp geh, Jêh ri lĕ rngôch rnôk kăndơ̆ ăt mâu mra geh tâm ban pônây đŏng ôh.

Apdia 1:15

Yorlah nar Brah Yêhôva hŏ dăch tât jêh ma lĕ rngôch bri dak. Aƀaơ, bu mra ƀư ma may di nâm bu may hŏ tă ƀư; Lĕ nau kan may ƀư mra nkhŭt tay ta bôk may nơm.

Nahum 1:8

Ƀiălah Păng sŏk dak lip ler băm Gay ƀư rai lĕ ntŭk păng gŭ, Jêh ri hăn tĭng phung rlăng Păng lăp tâm nau ngo.

Sôphôni 1:15

Nar nây jêng nar nau ji nuih, Nar nau mhĭk tât jêh ri nar rêh ni, Nar ƀư rai jêh ri jêng rngol, Nar ngo klĕng jêh ri rngot ngăn, Nar geh ndâr tŭk jêh ri gui nkâm,

Mathay 22:13

Hađăch ntăm ma phung oh mon: ‘Chăp hom jâng ti păng jêh ri klŭp păng tâm ntŭk ngo padih, ta ntŭk mra geh nau nhĭm nhhiăng jêh ri nau rket sêk.’

Mathay 24:29

Ƀât lât jêh lôch lĕ nar rêh ni nây, nar mra jêng ngo, khay mâu mra nchrat ang ôh, phung mănh mbing mra tŭp tă bơh trôk, jêh ri nau dơi ktang klơ trôk mra mpât n'gơ.

Yuđas 1:13

Khân păng tâm ban rbuh dak mƀŭt ma nau ktang, luh mpŭnh nau ƀơ̆ ƀơch khân păng nơm; khân păng nâm bu lĕ mănh mbing nhhơt, nau ngo vêt vê prăp ma khân păng n'ho ro.

Nau Tâm Mpơl 16:10

Tông mpăr rơh prăm nkhŭt ngan păng nơm ta sưng hađăch mpô mpa dŭt janh, ƀon bri hađăch păng nkŭm ma nau ngo ro, jêh ri bu kăp mpiăt yor nau ji ngăn.