Amôt 1:5 - Nau Brah Ndu Ngơi 2023

⁵ Gâp mra nkê̆ch lơi rnăng nđăng mpông ƀon Damas; Gâp mra ƀư rai phung ƀon lan gŭ tâm rlŭng Aven, Jêh ri nơm djôt mâng jra hađăch luh bơh Bet-Êđen; Bi ma phung ƀon lan Aram mra jêng bu nă ta n'gor bri Kir” Brah Yêhôva lah pônây.

Amôt 1:5 Iomraidhean Croise

II Phung Hađăch 14:28

Mâu di hĕ lĕ kan êng Y-Jêrôbôam, lĕ nau păng ƀư jêh, nau ktang păng, nau păng hŏ lơh jêh ri nau păng sŏk sĭt tay ƀon Damas jêh ri ƀon Hamat tă bơh phung Yuđa mplơ̆ ma phung Israel, bu hŏ nchih da dê tâm ndrom samƀŭt nau rêh jêng ma phung hađăch Israel?

II Phung Hađăch 16:9

Hađăch Asiri dơn nau Y-Ahas dăn, leo phung tahan păng hao lơh pit sŏk ƀon Damas, nhŭp phung ƀon lan tâm ƀon njŭn leo tât ma Kir jêh ri nkhĭt lơi Y-Rêsin.

Êsai 22:6

Phung Êlam cheng bĭ dơm hăr Ndrel ma ndeh seh jêh ri phung tahan ncho seh, Bi phung Kir djôt khêl rơm ndrăp tâm lơh.

Êsai 43:14

Brah Yêhôva, Nơm Tâm Chuai khân may, Nơm Kloh Ueh Israel lah pô aơ: “Yor khân may, Gâp hŏ njuăl bu hăn lơh Babilôn, Mprơh lĕ rngôch khân păng, jêng phung Kaldê, Tâm ban ma phung nchuăt du, Trŭnh tâm kumpăn khân păng jêng ntŭk khân păng hŏ tă troh nteh huy ngăn.

Êsai 8:4

yorlah êlor ma kon se nây gĭt kuăl: ‘Mbơ̆ gâp!’ mâu lah, ‘Mê̆ gâp!’ hađăch Asiri mra hăn sŏk lĕ drăp ndơ bơh Damas jêh ri ndơ pit sŏk bơh Samari.”

Yêrêmi 50:36

Ăn geh tak đao tât ma phung nơm mbơh lor nklă, Ƀư ma khân păng jêng nơm rluk! Ăn pêh đao tât ma phung tahan janh ktang, Ƀư ma khân păng klach krit!

Yêrêmi 51:30

Phung tahan bri Babilôn rlu tâm lơh, Plơ̆ rŭch tâm lĕ ntŭk pôih nâp; Khân păng hŏ huăr ngăn jêh, Jêng tâm ban ma bu ur. Ngih vâl tâm ƀon toyh bu su ma ŭnh, Mâng rnăng mpông ƀon hŏ nkê̆ch pă jêh.

Nau Nhĭm Vơl 2:9

Lĕ mpông ƀon rhuh jru tâm neh; Păng ƀư rai jêh ri nkê̆ch pă lơi mâng rnăng. Hađăch jêh ri phung kôranh bu nhŭp veng leo ngai bơh n'gor khân păng; Nau vay mâu hôm geh ôh, Nđâp ma phung nơm mbơh lor ăt mâu dơi geh ôh Nau tâm saơ tă bơh Brah Yêhôva.

Êsêkiêl 27:23

Charan, Kannê, jêh ri Êđen, ndrel phung bunuyh tăch drăp gŭ ta Sêba, Asur jêh ri Kilmat jêng phung tăch rgâl đah may da dê.

Êsêkiêl 30:17

Phung bu klâu ndăm ƀon Ôn jêh ri ƀon Pi-Bêset mra cha lôt khĭt yor ma đao, Jêh ri phung bu ur druh ƀon nây mra hăn jêng ƀư bu nă.

Ndrom Samƀŭt bơh Ôsê 10:8

Lĕ ntŭk prêh klơ ta Aven, nây jêng nau tih Israel, Bu mra ƀư rai lơi. Tơm pôm jêh ri pih pŭm mra hon Ta klơ nơng ƀư brah khân păng. Rnôk nây, khân păng mra lah ma lĕ yôk pô aơ: Ăn nkŭm lơi hên! Jêh ri lah ma lĕ gôl pô aơ: Tŭp hom ta klơ hên!

Amôt 5:5

Lơi joi ôh Bêthel, Lơi lăp ôh Gilgal, Mâu lĕ hăn tât ôh ma Bêr-Sêba. Yorlah Gilgal mra hăn jêng bu nă, Bêthel mra roh rai.”

Amôt 9:7

Kôranh Brah Yêhôva lah: “Hơi phung kon sau Israel, mâu di hĕ Gâp uănh khân may nâm bu kon sau phung Êthiôpi lĕ? Mâu di Gâp ngluh khân may luh du tă bơh n'gor bri Êjipt, Phung Philistin luh bơh bri Kaptôr, Jêh ri phung Siri luh bơh bri Kir?

Nahum 3:13

Aơ, phung tahan may Jêng phung bu ur gŭ ta nklang may. Lĕ mpông ƀon bri dak may Mra pơk huy ma phung rlăng; Ŭnh sa rvăn jêh lĕ mâng rnăng mpông!