Mateo 6:2 - Emberá Chamí

² Bichiba ne wãꞌãe nureerãmaa ne kaebea deaduud̶e setaa ẽbẽra bia nuree abadaurãba maka waubadau kĩra waurã́se. Ãchiba ne kaebea deaduud̶e mau baita jarabadau judiorã araa ãbua imibadau ded̶e, puurud̶e bid̶a jomaurãba ãchi ʉ̃rʉbena biꞌia berreamera. Mʉʉba biawãra jaraaruu: ẽbẽrarãba ara ãchi ʉ̃rʉbena biꞌia berread̶ai kʉ̃ria panuud̶eeba ab̶aburu mau uru b̶uai. Dachi Akõred̶ebena ne kaebea uru panad̶aabai.

Mateo 6:2 Iomraidhean Croise

Mateo 15:7

¡Machi setaa ẽbẽra bia nuree abadau! Chi Dachi Akõre baita berreabarii Isaiasba machi ʉ̃rʉbena arakʉd̶e b̶ʉsii. Naka jarasii:

Mateo 16:3

Maud̶e daped̶e orienteare bajãa puria nub̶uubʉrã maud̶e jʉ̃rʉara ãrea nub̶uubʉrã, machiba jarabadau iu pãriui. Machiba bajãa maka ichiaduuba kuitaa panumina Dachi Akõreba nau id̶ibaebena wau b̶uu kuitaad̶akau.

Mateo 22:18

Jesusba kuitaa b̶uasii ichi setaa kũrua panuu, mau nebʉrad̶e b̶aebid̶ayua. Naka jarasii: —Machi setaa ẽbẽra bia nuree abadau, ¿sakãe mʉ kachirua berreabi kʉ̃ria panuma?

Mateo 23:5

»Ãchiba ne joma waubadau waabenarãba biꞌia unud̶amera. Dachi Akõre bed̶ea kartad̶e b̶ʉd̶a ũabisa kaebeud̶e ed̶a b̶ud̶aped̶a ãchi daub̶ʉʉrʉd̶e jʉ̃badau maud̶e juapotad̶e bid̶a jʉ̃badau. Maamina chi ũabisa jõparrea waubadau waabenarãba biꞌia unud̶amera. Maud̶e mau baita ãchiba paru id̶e kapipia deseroa b̶ee kaapirud̶aped̶a jʉ̃badau.

Mateo 23:6

Waabenarã baara kod̶e wãaduud̶e, jomaurã kĩraare akʉ paneebadau, jaradea ua b̶uabadau mechiurã akʉ paneebadaumare. Maud̶e judiorã araa ãbua imibadau ded̶e bid̶a ara mau kĩra waubadau.

Mateo 24:51

Maabae chi chibariba ãrea kastikaped̶a chi setaa ẽbẽra bia nuree abadau ome jʉ̃a bʉikai. Aria jomaurã kĩra nomaa jẽa panad̶ai maud̶e chi puaba kid̶a kʉrrʉa ko panad̶ai.

Mateo 5:18

Mʉʉba biawãra jaraaruu: Bajãa maud̶e nau iujãa b̶uud̶eed̶e, ab̶au bid̶a letra ab̶a bid̶a ãyaa adaud̶aabai chi b̶ʉ kub̶uud̶ebena, ab̶a Moisesba b̶ʉd̶ad̶e jara b̶uu joma makaaruud̶aa.

Mateo 6:16

»Machiba Dachi Akõre baara b̶uayua chiko kod̶akau ewari wauduud̶e kĩra nomaa paneerã́sturu setaa ẽbẽra bia nuree abadaurãba waubadau kĩra. Ãchi mau kĩra panabadau jomaurãba kuitaad̶amera chiko kod̶akau ewarid̶e wau panuu. Mʉʉba biawãra jaraaruu: ẽbẽrarãba ara ãchi ʉ̃rʉbena biꞌia berread̶ai kʉ̃ria panuud̶eeba, mau berreaped̶aad̶a kakua Dachi Akõreba ne bia aude uru panabiabai.

Mateo 6:3

Bichiba ne wãꞌãe nureerãmaa ne kaebea dearuud̶e jĩwa jararã́se. Ab̶aumaa bid̶a nebʉrʉrã́se. Bichiba chũpea biꞌia wau b̶uu bichi Akõre Dachi Akõreba unubarii. Ichiaburu bichimaa ne bia deai.

Mateo 6:5

»Bichiba Dachi Akõremaa ʉtaa id̶iiruud̶e setaa ẽbẽra bia nuree abadaurãba waubadau kĩra waurã́se. Ãchiba judiorã araa ãbua imibadau ded̶e maud̶e puurud̶e bid̶a b̶ari nupaneed̶aped̶a Dachi Akõremaa ʉtaa id̶ibadau ẽbẽrarãba biꞌia unud̶amera. Mʉʉba biawãra jaraaruu: ẽbẽrarãba ara ãchi ʉ̃rʉbena biꞌia berread̶ai kʉ̃ria panuud̶eeba, mau berreaped̶aad̶áburu bia uru panad̶ai. Dachi Akõred̶ebena ne kaebea bia uru panad̶aabai.

Mateo 7:5

¡Bichi setaa ẽbẽra bia nii abarii! Naa bakuru waib̶ʉa bichi daud̶e b̶uu aub̶arise. Maka poyaa unui nejarr ab̶au daud̶e b̶uu aub̶arii baita. Ara mau kĩra bichiba kachirua wau b̶uu ida b̶use. Makaburu waabenarã poyaa aid̶ai.

Marcos 12:39

Dachi judiorã araa ãbua imibadau ded̶e ãchi jomaurã kĩraare akʉ paneebadau, jaradea ua b̶uabadau mechiurã akʉ paneebadaumare; maud̶e waabenarã baara kod̶e wãaduud̶e ara maka waubadau.

Marcos 7:6

Jesusba panausii: —Chi Dachi Akõre baita berreabarii Isaiasba machi ʉ̃rʉbena arakʉd̶e b̶ʉsii. ¡Setaa ẽbẽra bia nuree abadau! Isaiasba jarasii: Nau puurud̶ebenarãba mʉʉmaa biꞌia berreabadau, maamina biawãra ãchi sõd̶eeba mʉʉd̶e kʉ̃risiad̶akau.

Lucas 11:41

Sõbiad̶eeba chi nejarr barauwãe nureerãmaa machiba uru panuud̶ebena deásturu. Maka biawãra machi biꞌia jeraad̶a kĩra paneed̶ai.

Lucas 11:43

»¡Machi fariseorã miichuburi nuree Dachi Akõreba kastikaid̶eeba! Machi judiorã araa ãbua imibadau ded̶e chi jaradea ua b̶uabadau mechiurã akʉ paneebadaumare akʉ b̶eed̶ai kʉ̃riabadau. Mau awara puurud̶e nid̶aud̶e ẽbẽrarãba wapeadee panuud̶eeba saka b̶uma ad̶ai kʉ̃riabadau.

Lucas 12:33

Maud̶eeba machiba uru panuud̶ebena nedobʉid̶aped̶a chi nejarr barauwãe nureerãmaa deásturu. Ne bia bajãad̶e uru panad̶ai baita jʉrʉ́sturu. Chi ne bajãad̶ebena wãꞌãekau. Ara simiaba sĩkau maud̶e nechirurã bid̶a poyaa chiruad̶akau.

Lucas 12:56

Machi chi setaa ẽbẽra bia nuree abadaurãba bajãa maka ichiaduuba kuitaa panumina Dachi Akõreba nau id̶ibaebena wau b̶uu kuitaad̶akau.

Lucas 13:15

Maud̶eeba Dachi Mechiuba jarasii: —¡Machi setaa ẽbẽra bia nuree abadau! ¿Bari panabadau ewarid̶e machi paka maebʉrã mura enad̶aped̶a bania dod̶e adoed̶akaka?

Lucas 20:46

«Moisesba b̶ʉd̶a jaradeabadaurãd̶e kauwa panásturu. Ãchiba paru chi nejarra ãrea id̶ibadau jʉ̃d̶ai kʉ̃riabadau. Maud̶e puurud̶e nid̶aud̶e ẽbẽrarãba wapeadee panuud̶eeba saka b̶uma ad̶ayu kʉ̃riabadau. Dachi judiorã araa ãbua imibadau ded̶e ãchi jomaurã kĩraare akʉ paneebadau, jaradea ua b̶uabadau mechiurã akʉ paneebadaumare; maud̶e waabenarã baara kod̶e wãaduud̶e ara maka waubadau.

Lucas 6:24

“Maamina miichuburi panad̶ai machi chi nejarra ãrea bara nuree; nau ewarid̶éburu kĩrajʉʉ panad̶ai b̶uud̶eeba.

Lucas 6:42

Bakuru waib̶ʉa bichi daud̶e b̶uu unuwẽebʉrã ¿sakaburu ab̶aumaa naka jaraima: “Nejarr bichi daud̶e b̶uu mʉʉba aub̶arii”? ¡Bichi setaa ẽbẽra bia nii abarii! Naa bakuru waib̶ʉa bichi daud̶e b̶uu aub̶arise. Maka poyaa unui nejarr ab̶au daud̶e b̶uu aub̶arii baita. Ara mau kĩra bichiba kachirua wau b̶uu ida b̶use. Makaburu waabenarã poyaa aid̶ai.

Juan 13:29

Judasba ãchi chi nejarra pebadau ũabisa uru b̶uabachii. Maud̶eeba waabenarãba kʉ̃risiasid̶au Jesusba chi bari panabadau ewari baita nedobʉimera jarasii maebʉrã chi nejarr barauwãe nureerãmaa dead̶e wãmera.

Juan 5:41

»Mʉʉba jʉrʉwẽa b̶uu machiba mʉ biꞌia unud̶amera.

Juan 5:44

¿Saka mʉʉd̶e ijãad̶aima? Ab̶aburu kʉ̃ria panuu waabenarãba machi biꞌia unud̶ai. Maamina machiba jʉrʉd̶awẽe Dachi Akõre ab̶a niiba machi biꞌia unui.

Juan 7:18

Barikia ara ichi kʉ̃risiad̶eeba berrea b̶uubʉrã maka wau b̶uu ẽbẽrarãba ichi ʉ̃rʉbena biꞌia kʉ̃risiad̶amera. Maamina ab̶aba kʉ̃ria b̶uubʉrã waabenarãba ichi bʉid̶a ʉ̃rʉbena biꞌia kʉ̃risiad̶ai, biawãra jara b̶uu; setaa waukau.

Hechos 10:2

Mau Cornelio ichi ded̶ebenarã baara joma jipa nureasii. Dachi Akõre wapeadee panasid̶au. Cornelioba judiorã aid̶ai baita chi nejarra ãrea deabachii maud̶e Dachi Akõremaa ʉtaa id̶i b̶uabachii.

Hechos 10:31

Mau ẽbẽraba mʉʉmaa jarasii: “Cornelio, bichiba ʉtaa id̶i b̶uad̶a Dachi Akõreba biꞌia ũrisii. Ichiba kĩraba b̶uu chi bichiba chi nejarr barauwãe nuree aid̶abarii.

Hechos 10:4

Cornelioba chi ángel kĩedarrmaa apii ichiaped̶a ãrea wapeaba id̶isii: —¿Kãare kʉ̃ria b̶uma? Maabae chi angelba jarasii: —Bichiba Dachi Akõremaa ʉtaa id̶ibarii maud̶e chi nejarr barauwãe nuree aid̶abarii ichiba biꞌia unu b̶uu ichimaa ne baa dearuu kĩra.

Hechos 11:29

Maud̶eeba Jesusd̶e ijãabadaurã Antioquiad̶e panuu bed̶ea deasid̶au chi nejarra ãbarã Judea druad̶e nuree baita urubʉid̶ai baita. Ãchicha poyaa deaduu kĩra dead̶ai asid̶au.

Hechos 24:17

»Mʉ Jerusalend̶ebena ãyaa wãd̶a año ãrea bad̶akare, waya araa neesii, chi mʉ puurud̶ebenarã chi nejarr barauwãe nureemaa chi nejarra deai baita maud̶e Dachi Akõremaa ãnimara baa deai baita.

Hechos 9:36

Mau ewarid̶e Jesusd̶e ijãabarii wẽra Tabita abadau Jope puurud̶e b̶uasii. Griego bed̶ead̶e ichi trʉ̃ Dorcas abachid̶au. Mau neekauba ne biꞌia wau b̶uabachii. Chi nejarr barauwãe nuree ãrea aid̶akuabachii.

Romanos 12:8

Chi nureerãmaa deasii ãbarã aid̶a panuud̶eeba biꞌia ijãad̶amera. Maka dead̶akasiibʉrã, ãbarã aid̶ad̶ai panuu biꞌia ijãad̶amera. Chi nureerãmaa deasii ne kaebea dea panuud̶eeba waabenarã aid̶ad̶amera. Maka dead̶akasiibʉrã, sõbiad̶eeba dead̶ai panuu. Chi nureerãmaa deasii chi ijãabadaurã jaradea ua b̶uabarii nuread̶amera. Maka dead̶akasiibʉrã, jipa wau nuread̶ai panuu. Maud̶e chi nureerãmaa deasii waabenarã kĩra chuburiad̶amera. Maka dead̶akasiibʉrã, kĩrajʉʉd̶eeba kĩra chuburiad̶ai panuu.

1 Corintios 13:3

Joma mʉʉba uru b̶uu chi wãꞌãe nureemaa dearuubʉrã maud̶e Dachi Akõre baita ara michi kakua ida baa deabiiruubʉrã, maamina waabenarã kʉ̃riawẽa b̶uubʉrã, mʉ baleswãe nii kĩra nii.

Gálatas 2:10

Ab̶aburu daimaa jarasid̶au ãbarã chi nejarr barauwãe nuree aid̶ad̶amera. Mau mʉʉmaarã ãrea biꞌia b̶uasii maka wau kʉ̃ria b̶uasiid̶eeba.

Efesios 4:28

Nechirua badaad̶a waa nechiruabai b̶uu, maumaarã ichi juaba trajai b̶uu ne uru b̶uai baita. Maka ichiba uru b̶uai chi nejarr barauwãe nuree aid̶ai baita.

1 Tesalonicenses 2:6

Daiba jʉrʉd̶awẽa panasid̶au, machiba maud̶e waabenarãba dai ʉ̃rʉbena biꞌia jarad̶amera. Maumaarã dai Cristoba bʉikad̶ad̶eeba daiba jaradea ua panad̶ai panasid̶au machi tãed̶e. Maamina maka waud̶aabasii.

1 Timoteo 6:18

Chi barau nureerãmaa jarase jomaurã ome biꞌia waud̶amera. Maud̶e jarase ãchiba uru panuud̶ebena sõbiad̶eeba waabenarãmaa dead̶ai baita panad̶ai panuu.

Filemón 1:7

Ãba, bichiba ẽbẽrarã Dachi Akõred̶erã kʉ̃ria b̶uud̶eeba kĩrajʉʉbiasii. Makaburu mʉ sid̶a kĩrajʉʉ nibabisii maud̶e ãrea dauchia jãadua sõbia nibabisii.

Hebreos 13:16

Kĩrabad̶ai ida b̶urã́sturu biꞌia waud̶ai baita maud̶e machiba uru panuud̶eeba chiya aid̶ad̶ai baita. Joma mau Dachi Akõreba biꞌia unu b̶uu ãnimara baa deaduu kĩra.

1 Pedro 4:11

Ab̶auba jaradearuubʉrã, Dachi Akõre bed̶ea jaradea b̶uud̶eeba kauwa jaradeai b̶uu. Ab̶auba waabena aid̶aaruubʉrã, Dachi Akõreba dea b̶uu poyaabariid̶eeba aid̶ai b̶uu. Ne joma wáusturu jomaurãba Jesucristod̶eeba Dachi Akõremaa biꞌia berread̶amera. Ichíturu ewaricha biꞌia berread̶ai panuu. Biꞌia b̶uu ne joma ichi juad̶e uru b̶uai. Ãrea biꞌia b̶uu maka b̶uai.