Mateo 5:46 - Emberá Chamí

⁴⁶ Machiba chi machi kʉ̃riabadáuturu kʉ̃ria panuubʉrã, ¿kãare Dachi Akõreba machimaa ne bia deaima? Maud̶e Romad̶ebenarã chi aude mechiu baita chi nejarra pebadaurã kʉ̃ria panuu ãchi kʉ̃ria uru panuurã.

Mateo 5:46 Iomraidhean Croise

Mateo 11:19

Maumaarã mʉ, chi Ẽbẽra Ba B̶uad̶a, nee b̶uu. Mʉʉba ne joma kobarii maud̶e ne joma dobarii. Maud̶e machiba jarabadau mʉ chi ko ãrea nii maud̶e do ãrea nii. Mau awara jarabadau mʉ kachirua waubadaurã baara maud̶e Romad̶ebena chi aude mechiu nii baita chi nejarra pebadaurã baara nibabarii. Maamina kuitaa panuu Dachi Akõre kʉ̃risia kuitaa jipa b̶uu, mau ijãa panuuba jipa waubadaud̶eeba».

Mateo 18:17

Wabid̶a ãchiba jaraaduu ichiba ũri kʉ̃riawẽebʉrã, Dachi Akõred̶e ijãabadaurãmaa joma ãbua iuped̶a ãchimaa mau ʉ̃rʉbena jarase. Maamina Dachi Akõred̶e ijãabadaurãba jaraaduu ũrii kʉ̃riawẽebʉrã, ichi Dachi Akõred̶e ijãakau kĩra maebʉrã Romad̶ebena baita chi nejarra pebarii kĩra ida b̶ústuru.

Mateo 5:47

Maud̶e machiba ara machi ab̶aarakaurã́turu bia b̶uka aaduubʉrã, ¿ne aude bibuara waumaa panuma? Maud̶e Dachi Akõred̶e ijãad̶akau bid̶a ãchi ab̶aarakaurã maka waubadau.

Mateo 6:1

»Kaubaa ne bia waud̶ai Dachi Akõre baita waabenarã daad̶e maarãba ichiad̶amera. Maka wauduubʉrã, machi Akõre bajãad̶e b̶uuba ichiba ne bia deabai.

Marcos 2:15

Mau maad̶akare Jesús chi ichi baara nibabadaurã baara Leví ded̶e kod̶e wãsid̶au. Ãrea chi Romad̶ebena baita chi nejarra pebadaurã maud̶e kachirua waubadaurã aria akʉ panasid̶au, ãchi sid̶a Jesús baara nibabachid̶aud̶eeba.

Marcos 2:16

Maka panuud̶e Moisesba b̶ʉd̶a jaradeabadaurã (maarã sid̶a fariseorã basma), maarãba Jesús jãarã ẽbẽrarã baara komaa b̶uu unusid̶au. Maud̶eeba fariseorãba Jesús baara nibabadaurãmaa id̶isid̶au: —Machi jaradeabarii ¿sakãe Romad̶ebena baita chi nejarra pebadaurã maud̶e kachirua waubadaurã baara komaa b̶uma?

Lucas 15:1

Earab̶a Romad̶ebena baita chi nejarra pebadaurã maud̶e kachirua waubadaurã neesid̶au Jesusba jaradea b̶uu ũrid̶ai baita.

Lucas 18:13

»Maud̶e Romad̶ebena baita chi nejarra pebarii kaitawẽwãe akʉ nub̶uasii. Maamina bajãad̶aa ichiabasii. Maumaarã kĩra nomaaba ichi pechu taapeped̶a jarasii: “Chacha, mʉ kĩra chuburiáse, mʉʉba ãrea kachirua waubariid̶eeba”.

Lucas 19:2

Aria ẽbẽra Zaqueo abadau b̶uasii. Mau Zaqueo Romad̶ebena baita chi nejarra pebadaurã jaradea ua b̶uabarii basii. Ãrea chi nejarra barau nii basii.

Lucas 19:7

Mau unud̶akare jomaurãba Jesús ʉ̃rʉbena naka kachirua berrea bara b̶eesii: «¡Jãu Jesús ẽbẽra kachirua waubarii ded̶e kãi b̶eed̶e wãsii!».

Lucas 3:12

Maka b̶uud̶e Romad̶ebena baita chi nejarra pebadaurã boro ead̶ai baita neesid̶au. Maabae ãchiba id̶isid̶au: —Jaradeabarii, daiba ¿kãare waud̶ai panuma?

Lucas 5:29

Maabae Jesús baita Leviba ichi ded̶e kod̶ai baita ãrea wausii. Ãrea Romad̶ebena baita chi nejarra pebadaurã maud̶e waabena ẽbẽrarã ãchi baara ko panasid̶au.

Lucas 5:30

Mau unusid̶aud̶e Moisesba b̶ʉd̶a jaradeabadaurãba maud̶e fariseorã Jesús baara nibabadaurãmaa naka kachirua jarasid̶au: —¿Sakãe chi nejarra pebadaurã baara maud̶e waabenarã kachirua waubadaurã baara ãbua komaa panuma?

Lucas 7:29

Jesusba jara b̶uu ũrisid̶aud̶e ẽbẽrarãba maud̶e Romad̶ebena baita chi nejarra pebadaurã jarasid̶au Dachi Akõreba wau b̶uu jipa b̶uu, Juanba ãchi boro ead̶ad̶eeba.

Lucas 7:34

Maabae mʉ, chi Ẽbẽra Ba B̶uad̶a nee b̶uu. Mʉʉba ne joma kobarii maud̶e ne joma dobarii. Maud̶e machiba jarabadau: “Mau chi ko ãrea nii maud̶e do ãrea nii”. Mau awara jarabadau: “Mau kachirua waubadaurã baara maud̶e Romad̶ebena chi aude mechiu nii baita chi nejarra pebadaurã baara nibabarii”.