Mateo 4:17 - Emberá Chamí

¹⁷ Mau ewari tõpe Jesusba naka jara nibasii: «Bajãad̶e B̶uu neeruu ichid̶irã ichi juad̶e ua b̶uai baita. Maud̶eeba machiba kachirua waubadau ida b̶ud̶aped̶a ichimaa nésturu».

Mateo 4:17 Iomraidhean Croise

Mateo 10:7

Machi wãaduumaa jarásturu: “Bajãad̶e B̶uuba ichid̶irã ichi juad̶e ua b̶uai; neei uru b̶uu”.

Mateo 11:12

Juan chi Boro Eabariiba jaradead̶ad̶eed̶ebena id̶iid̶aa Bajãad̶e B̶uuba ichid̶irã ichi juad̶e ua b̶uu, maarã ãrea biꞌiwãe panuu. Ẽbẽrarã kachiruarãba ãchi kachirua ãrea wau kʉ̃ria panuu.

Mateo 13:11

Jesusba panausii: —Bajãad̶e B̶uuba ichid̶irã ichi juad̶e ua b̶uu ʉ̃rʉbena jomaurãmaa kuitaabiawẽa b̶umina machimaa kuitaabia b̶uu.

Mateo 13:24

Maabae Jesusba june nebʉrʉsii jaradeai baita: «Bajãad̶e B̶uuba ichid̶irã ichi juad̶e ua b̶uu nau kĩra b̶uu. Ẽbẽra b̶uasii. Mau ẽbẽraba ichi druad̶e trigo taa biꞌia kau uusii.

Mateo 13:47

»Bajãad̶e B̶uuba ichid̶irã ichi juad̶e ua b̶uu ãtarraya kĩra b̶uu. Ãtarrayaba do b̶ataaduud̶e b̶eda barikia jidaubadau.

Mateo 13:9

Chi kʉʉrʉ bara niiba kauwa ũrise».

Mateo 25:1

»Bajãad̶e B̶uuba ichid̶irã ichi juad̶e ua b̶uu nau kĩra b̶uai: ãwerarã 10 panasid̶au. Ãchicha ʉ̃d̶aa koabarii adoed̶aped̶a chi miakãiruu mukĩra irsibid̶e wãsid̶au.

Mateo 3:2

Juanba naka jarabachii: «Bajãad̶e B̶uu neeruu ichid̶irã ichi juad̶e ua b̶uai baita. Maud̶eeba machiba kachirua waubadau ida b̶ud̶aped̶a ichimaa wã́sturu».

Mateo 6:10

Daiba kʉ̃ria panuu kãꞌãabariwãed̶e bichiba bichid̶irã bichi juad̶e ua b̶uai. Kʉ̃ria panuu bichiba kʉ̃ria b̶uu nau iujãad̶ebenarãba waud̶ai, bajãad̶ebenarãba waubadau kĩra.

Mateo 9:13

Nau bed̶eaba kãare jara b̶uu kuitaad̶e wã́sturu: “Ãnimara baa dead̶ai bad̶amaarã mʉʉba kʉ̃ria b̶uu machiba waabenarã kĩra chuburia panad̶ai”. Mʉ, chi jipa nuree iui baita need̶awãe, maumaarã chi kachirua waubadaurã́turu iui baita nee b̶uu Dachi Akõremaa need̶amera.

Lucas 15:10

Mʉʉba jaraaruu ara mau kĩra chi kachirua waubarii ab̶a Dachi Akõremaa neeruud̶e Dachi Akõre maud̶e ichi angelerã ãrea kĩrajʉʉbadau».

Lucas 15:7

»Ara mau kĩra mʉʉba machimaa jaraaruu: 99 jipa nuree baita bajãad̶ebenarã kĩrajʉʉbadamina, aude kĩrajʉʉbadau ẽbẽra ab̶a kachirua waubarii Dachi Akõremaa neeruud̶e.

Lucas 24:47

Maabae ichi trʉ̃d̶eeba ichi ijãabadaurãba ẽbẽrarãmaa jarad̶ai ãchi kachirua ida b̶ud̶aped̶a Dachi Akõremaa need̶amera. Maka Dachi Akõreba ãchi kachirua perdonai. Mau naa Jerusalén puurud̶e jarad̶aped̶a joma puuru b̶eecha jarad̶e wãd̶ai.

Lucas 3:23

Jesusba jaradea kob̶eesiid̶e 30 año nibasiika b̶uasii. Ẽbẽrarãmaarã, mau José warr basii. José Elí warr basii.

Lucas 5:32

Mʉ, chi jipa nuree iui baita need̶awãe, maumaarã chi kachirua waubadaurã́turu iui baita nee b̶uu Dachi Akõremaa need̶amera.

Lucas 9:2

Maud̶e ãchi bʉikasii Dachi Akõreba ichid̶irã ichi juad̶e ua b̶uai ʉ̃rʉbena jarad̶e wãd̶amera maud̶e ẽpermo nuree aribiabiad̶amera.

Hechos 11:18

Jerusalend̶ebena ãbarãba mau ũrisid̶aud̶e waa kachirua jarad̶aabasii, maumaarã Dachi Akõremaa naka biꞌia berreasid̶au: —¡Biawãra Dachi Akõreba judiowãerã karibasii ãchi kachirua ida b̶ud̶aped̶a ichimaa need̶amera! ¡Maka ewaricha ichi baara chokae panad̶ai!

Hechos 17:30

Ẽbẽrarãba chi Dachi Akõre naed̶e adua panad̶a, ichiba mau ida b̶usii. Maamina id̶ibae jara b̶uu joma druachad̶ebenarãba kachirua ida b̶ud̶aped̶a ichid̶e ijãad̶amera.

Hechos 2:38

Maud̶e Pedroba panausii: —Kachirua ida b̶ud̶aped̶a Dachi Akõremaa nésturu. Jesucristo trʉ̃d̶eeba boro eásturu. Maud̶e machiba kachirua wauped̶aad̶a Dachi Akõreba perdonaped̶a ichi Jauri machimaa deai.

Hechos 20:21

Judiorãmaa maud̶e judiowãerãmaa mʉʉba jarasii kachirua waubadau ida b̶ud̶aped̶a Dachi Akõremaa need̶amera maud̶e Dachi Mechiu Jesucristod̶e ijãad̶amera.

Hechos 26:20

Mʉʉba naed̶e Damasco puurud̶ebenarãmaa jarasii ãchiba kachirua waubadau ida b̶ud̶aped̶a Dachi Akõremaa need̶amera. Mau maad̶akare Jerusalén puurud̶e, joma Judea druad̶e maud̶e judiowãerãmaa ara mau jarasii. Jomaurãmaa jarasii biꞌia wau panuu ãchiba kachirua wauped̶aad̶a biawãra ida b̶uped̶aad̶a unubiad̶ai baita.

Hechos 3:19

Machiba chi kachirua ida b̶ud̶aped̶a Dachi Akõremaa nésturu. Maka wauduubʉrã machiba kachirua wauped̶aad̶a Dachi Mechiuba perdonaped̶a sõbiabiai,

Hebreos 6:1

Maud̶eeba Cristod̶e kuitaa wari kãri bad̶ai panuu. Dachiba ichi ʉ̃rʉbena naed̶e kuitaaped̶aad̶a akabichia aramáturu jaradearã́duru. Waya jaradead̶aabai chi kachirua wau panuu kakua biud̶ai panuu, kachirua ida b̶ud̶aped̶a Dachi Akõremaa need̶ai panuu, Dachi Akõred̶e ijãad̶ai ʉ̃rʉbena, boro ead̶ai ʉ̃rʉbena, ãbarã ʉ̃rʉ jua kub̶uud̶ai ʉ̃rʉbena, biud̶arã chokae jiradud̶ai ʉ̃rʉbena maud̶e Dachi Akõreba kastikaped̶a ewaricha ãrea biꞌiwãe panad̶ai ʉ̃rʉbena sid̶a.