Mateo 12:15 - Emberá Chamí

¹⁵ Jesusba mau kuitaasiid̶e ãyaa wãsii. Ãrea ẽbẽrarã ichi baara wãsid̶au. Maud̶e Jesusba chi ẽpermo nuree joma aribiabiasii.

Mateo 12:15 Iomraidhean Croise

Mateo 10:23

Puuru ab̶aud̶e ẽbẽrarãba machi wãraaduud̶e, junebena puurud̶aa miru wã́sturu. Mʉʉba biawãra jaraaruu. Machi Israel puuru joma decha jaradea nibad̶ai naed̶e, mʉ, chi Ẽbẽra Ba B̶uad̶a neei.

Mateo 19:2

Ẽbẽrarã ãrea ichi baara wãsid̶au. Aria chi ẽpermo nuree joma aribiabiasii.

Marcos 6:56

Ichi wãaruumaacha ẽbẽrarãba ẽpermo nuree adoebachid̶au. Puuru kaebeurãd̶e, puuru b̶eed̶e maud̶e puuru awarad̶e maka waubachid̶au. Od̶e nub̶ubachid̶au maud̶e Jesús wãyaa wãaruud̶e, chi chuburia id̶ibachid̶au ichi anab̶ari jʉ̃barii id̶e waubiamera. Joma ẽpermo nureeba mau wauduud̶e aribiabachid̶au.

Lucas 5:22

Maamina Jesusba ãchiba kʉ̃risia panuu kuitaasiid̶eeba naka id̶isii: —¿Sakãe machi sõd̶e jãka kʉ̃risia panuma?

Lucas 6:12

Earab̶a Jesús ead̶aa wãsii. Aria Dachi Akõremaa ʉtaa id̶i b̶uu ewarisii.

Lucas 9:11

Maamina ẽbẽrarãba ichi aria b̶uu kuitaad̶aped̶a araa wãsid̶au. Maud̶e Jesusba ãchi biꞌia irsibiped̶a jaradea kob̶eesii Dachi Akõreba ichid̶irã ichi juad̶e ua b̶uai ʉ̃rʉbena. Mau bed̶ea bia jaradea b̶uud̶e chi ẽpermo nuree aribiabiasii.

Juan 11:54

Maud̶eeba Jesús judiorã tãed̶e ãrea nibaka basii, maumaarã Judead̶ebena ãyaa wãsii. Efraín puurud̶e ichi baara nibabadaurã baara b̶uad̶e wãsii. Mau puuru drua sirua wãꞌãe b̶uu kaita b̶uu.

Juan 7:1

Mau maad̶akare Jesús Galilea druad̶e nibasii. Judea druad̶aa makaa wã kʉ̃riabasii judiorã mechiurãba ichi bead̶ai kʉ̃ria panasiid̶eeba.

Juan 9:4

Maud̶eeba wabid̶a ãsaed̶e b̶uud̶e chi mʉ Bʉid̶aba waubi b̶uu mʉʉba waui b̶uu. Kiuruud̶e ab̶a bid̶a poyaa trajakau.

Gálatas 6:9

Maud̶eeba kakua ãkaad̶awẽa ne biꞌia wau panásturu. Kakua ãkaad̶awẽa panuubʉrã, Dachi Akõreba b̶ud̶a ewarid̶e dachiba biꞌia adaud̶ai.

1 Pedro 2:21

Cristo machi kakua ãrea biꞌiwãe b̶uasiid̶eeba Dachi Akõreba machi iusii ãrea biꞌiwãe panad̶amera. Cristo ãrea biꞌiwãe b̶uasiid̶e unubiasii machi nebʉrad̶e panuud̶e saka nibad̶ai panuu.