15 Mʉʉba jãka unubiasii machi chiya aid̶ad̶amera.
Mʉʉmaa ida adoebísturu. Mʉʉba ne jara b̶uu ũrísturu. Mʉ joma dauchia jãadua b̶uabarii maud̶e mʉ sõd̶eeba waabenarã audeara kuitaa b̶uu a kʉ̃risiakau. Mʉʉmaa needuubʉrã machi biawãra kʉrrjĩrubiai.
Mʉʉba kʉ̃ria b̶uu ara mau dachi sõbia nureabiabarii maud̶e joma dauchia jãadua panabiabarii Dachi Akõreba machi aid̶a b̶uai, arab̶aud̶e kʉ̃risiad̶amera Jesucristoba kʉ̃ria b̶uu kĩra.
Jomaurã kʉ̃riásturu Cristoba dachi kʉ̃ria b̶uu unubid̶a kĩra. Kʉ̃riad̶eeba dachi kakua ara ichi beabisii Dachi Akõremaa ãnimara baa dearuu kĩra. Dachi Akõreba mau biꞌia unusii.
Cristo machi kakua ãrea biꞌiwãe b̶uasiid̶eeba Dachi Akõreba machi iusii ãrea biꞌiwãe panad̶amera. Cristo ãrea biꞌiwãe b̶uasiid̶e unubiasii machi nebʉrad̶e panuud̶e saka nibad̶ai panuu.
Chi machiba nu uru panuurã, machi baita bari trajabadaurã kĩra uru panarã́sturu, maumaarã machi nibad̶eeba unubiásturu saka nibad̶ai panuu.
