Gálatas 4:8 - Emberá Chamí

⁸ Naed̶e machiba Dachi Akõre adua panasid̶aud̶e chi biawãra Dachi Akõrewãerã ijãa panasid̶au ãchi baita bari trajabadaurã kĩra.

Gálatas 4:8 Iomraidhean Croise

Juan 1:10

Mau ʉ̃d̶aa nau iujãad̶e b̶uasii. Dachi Akõreba ichid̶eeba nau iujãa waud̶amina nau iujãad̶ebenarãba ichi kauwa unud̶aabasii.

Hechos 14:12

Ãchiba Bernabé Zeus abachid̶au maud̶e Pablo Hermes abachid̶au, ichi chi bed̶ea jarabariid̶eeba.

Hechos 17:23

Puurud̶e wãaruud̶e mʉʉba unusii machiba Dachi Akõre kuenda juaba ne kaped̶aad̶a de ãrea kob̶ee. Ne baa deabadaud̶e nau bed̶ea b̶ʉ kub̶uu unusii: “Dachi Akõre chi dachiba adua panuu baita waud̶a”. Chi machiba adua panuu Dachi Akõremaa maumaa biꞌia berreabadau. Ara mau Dachi Akõre ʉ̃rʉbena mʉʉba machimaa jaramaa b̶uu.

Romanos 1:23

Chi Dachi Akõre biukaraa nii maud̶e biꞌia nii ida b̶usid̶au. Maabae chi ẽbẽra biud̶a kĩra juaba ne kaped̶aad̶amaa ʉtaa id̶i kopaneesid̶au. Ibanarã, ãnimara jʉ̃rʉ kimare nuree maud̶e ãnimara iorod̶e ursu nuree kĩra juaba kaped̶aad̶amaa ʉtaa id̶i kopaneesid̶au.

Romanos 1:28

Maarãba Dachi Akõre ida b̶uped̶aad̶ad̶eeba ichiba maarã ida b̶usii kachirua kʉ̃risiad̶aped̶a maka wau panad̶amera.

1 Corintios 1:21

Dachi Akõreba ichi kʉ̃risia kuitaad̶eeba waud̶aba, ara ichi unubia b̶uu. Maamina nau iujãad̶ebenarãba ara ãchi kʉ̃risia kuitaad̶eeba ichi unud̶akau. Chi daiba jaradea panuu kĩra kawawẽa b̶uu kĩra b̶umina Dachi Akõremaarã bibuara b̶uu maud̶eeba joma chi ichid̶e ijãaduu karibai.

1 Corintios 12:2

Machiba kuitaa panuu Dachi Akõred̶e ijãad̶akaurã nureasid̶aud̶e, barikia ʉ̃rʉbena kʉ̃risiabachid̶au. Dachi Akõre kuenda juaba ne kaped̶aad̶ad̶e ijãabachid̶au. Chokae nureewãed̶eeba berread̶akau.

1 Corintios 8:4

Maud̶eeba Dachi Akõrerã kuenda juaba ne kaped̶aad̶arãmaa ãnimara kiuru baa dead̶a kobadau ʉ̃rʉbena mʉʉba jaraaruu. Dachiba kuitaa panuu juaba ne kaped̶aad̶a biawãrawãe. Maud̶e kuitaa panuu Dachi Akõre biawãra ab̶aburu nii.

Gálatas 4:3

Ara mau kĩra Cristod̶e ijãad̶ai naed̶e dachi warraed̶ebena kĩra nureasii. Mau ewarid̶e dachiba nau iujãad̶ebena jauri mechiurã ijãa panasid̶au, chibari baita bari trajabarii kĩra.

Efesios 4:18

Ãchi kʉ̃risia pãriud̶e duanuud̶eeba Dachi Akõre ʉ̃rʉbena kuitaad̶akau. Ãchi sõ chaareaba Dachi Akõre adua nureed̶eeba, chi ichiba chokae duanubiai b̶uu wãꞌãe nuree.

1 Tesalonicenses 1:9

Ara ãchiba jara panuu saka machiba dai deed̶aa urúbad̶e aped̶aad̶a, maud̶e Dachi Akõre kuenda juaba ne kaped̶aad̶arã ida b̶usid̶au Dachi Akõre biawãra chokae nii ijãad̶ai baita.

1 Tesalonicenses 4:5

Nau kakuaba kachirua wau kʉ̃ria b̶uu waurã́sturu Dachi Akõre unud̶akaurãba waubadau kĩra.

1 Pedro 4:3

Naed̶e machiba kachirua wau nureasii Dachi Akõred̶e ijãad̶akaurãba waubadau kĩra. ¡Ara basma! ¡Waa maka waurã́sturu! Waabenarã daad̶e ãrea kĩra nejasia waubachid̶au, nau kakuaba kachirua wau kʉ̃ria b̶uu waubachid̶au, itua biu nibabachid̶au, kĩrajʉʉ ewari waubadaud̶e ãrea kachirua waubachid̶au, waabenarã baara itua ãrea dobachid̶au maud̶e Dachi Akõre kuenda juaba ne kaped̶aad̶amaa ʉtaa id̶ibachid̶au. Mau Dachi Akõreba kʉ̃riakau.

1 Juan 3:1

Ichiásturu saka Dachi Akõreba dachi ãrea kʉ̃ria b̶uu. Ichiba ãrea kʉ̃ria b̶uud̶eeba dachi ichi warrarã abarii. Biawãra dachi ichi warrarãbʉ. Nau iujãad̶ebenarãba mau adua panuu, ichi unud̶akaud̶eeba.